“Rau Hli Ntuj 15–21. Amas 13–16: ‘Nkag Mus rau Hauv tus Tswv Qhov Chaw So,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Rau Hli Ntuj 15–21. Amas 13–16,” Los, Nrog Kuv Mus—Rau Ib Leeg thiab Tsev Neeg: 2020
Daim duab txog Amas thiab Amulej txoj kev dim lub tsev kaw, los ntawm Andrew Bosley
Rau Hli Ntuj 15–21
Amas 13–16
“Nkag Mus rau Hauv tus Tswv Qhov Chaw So”
Kev tshoov siab uas koj txais thaum koj xav txog vaj lug kub yeej muaj nqis heev. Koj qhia tau hais tias koj saib tej ntawd muaj nqis thaum koj ceev tej ntawd thiab ua raws li koj kawm.
Sau Ntawv txog Koj tej Kev Tshoov Siab
Feem ntau, Amulej thiab Xi-elas twb muaj lub neej zoo nyob hauv Amoonaihas. Amulej yog “ib tug neeg uas muaj suab npe,” uas muaj “kwv tij neej tsa thiab phooj ywg coob” thiab “muaj kev nplua nuj heev” (Amas 10:4). Xi-elas yog “ib tug uas txawj tshaj” ntawm cov kws lij choj thiab “muaj hauj lwm ntau ua heev” (Amas 10:31). Ces Amas tuaj txog Amoonaihas caw lawv hloov siab lees txim thiab “nkag mus rau hauv tus Tswv qhov chaw so” (Amas 13:16). Amulej, Xi-elas, thiab lwm tus, lawv yuav tsum tso ntau yam tseg thiab raug tej kev txom nyem loj kawg nkaus kom lees txais nws txoj kev caw no.
Tiam sis zaj no tsis tau tag ntawm no. Nyob hauv Amas 13–16, peb kawm txog qhov uas thaum kawg yuav muaj li cas rau cov uas ntseeg “Khetos lub hwj chim uas cawm tau tib neeg” (Amas 15:6). Tej lub sij hawm peb txais kev dim, tej lub sij hawm peb txais kev kho mob—thiab tej lub sij hawm peb lub neej yeej nyuaj npaum li qub. Tiam sis txhua lub sij hawm, “tus Tswv twb txais [Nws cov neeg] mus rau nws tus kheej, nyob hauv yeeb koob” (Amas 14:11). Txhua lub sij hawm, tus Tswv “pub hwj chim rau [peb], raws li [peb] txoj kev ntseeg uas yog txoj kev ntseeg Khetos” (Amas 14:28). Thiab txhua lub sij hawm, “kev ntseeg tus Tswv” ntawd ua rau peb muaj “kev cia siab tias [peb] yuav tau txais txoj sia nyob mus ib txhis” (Amas 13:29). Thaum nej nyeej tej tshooj no, nej yeej txais tau kev nplij siab los ntawm tej lus cog tseg no, thiab nej yuav to taub zoo dua ntxiv txog qhov uas Amas hais thaum nws hais txog “tus Tswv qhov chaw so.”
Tej lub Tswv Yim Kawm Vaj Lug Kub ntawm Yus Ib Leeg
Cov kab ke pov thawj hwj pab kuv txais Yexus Khetos txoj kev txhiv dim.
Tej zaum koj yuav nco txog Amas 12, thaum Amas qhia txog Vajtswv txoj hau kev txhiv dim (saib Amas 12:24–27). Nyob hauv tshooj 13, nws tau hais lus txog cov pov thawj uas Vajtswv tsa “los qhia tej yam no rau cov neeg” (Amas 13:1). Amas tej lus qhia ntau yam tseeb txog lub pov thawj hwj. Tej zaum koj yuav xav nrhiav ib yam tseeb hauv txhua nqe nyob hauv Amas 13:1–9. Nov yog ob peb lub tswv yim kom pab koj pib ua li ntawd:
-
Nqe 1.Lub pov thawj hwj kuj hu ua “raws li tus txheej txheem ntawm [Vajtswv] Leej Tub” (kuj saib Lus Qhuab Qhia thiab Kev Khi Lus 107:1–4).
-
Nqe 2.Vajtswv tsa cov pov thawj hwj kom pab tib neeg cia siab rau Nws Leej Tub kom txais tau kev txhiv dim.
-
Nqe 3.Cov uas tuav lub pov thawj hwj tau npaj rau lawv tej kev lav ris “txij thaum ntuj tsim teb raug.”
Koj nrhiav tau dab tsi ntxiv? Koj xav li cas txog lub pov thawj hwj thaum koj xav txog tej yam tseeb no? Cov kab ke pov thawj hwj tau pab koj li cas thaum koj saib ntsoov Khetos thov kev txhiv dim?
Neeg coob nyob hauv Amoonaihas yog cov uas coj raws li Nihos (saib Amas 14:18; 15:15). Cov pov thawj hwj ntawm Nihos tus txheej txheem (saib Amas 1:3–6) thiab cov pov thawj uas tau muab tsa “raws li tus Txheej Txheem ntawm Vajtswv Leej Tub” (Lus Qhuab Qhia thiab Kev Khi Lus 107:3), uas Amas piav txog, ob pawg no txawv li cas? (saib Amas 13:1–19).
Kuj saib Dale G. Renlund, “Lub Pov Thawj Hwj thiab tus Cawm Seej lub Hwj Chim Theej Txhoj,” Ensign los sis Liahona, Kaum Ib Hlis Ntuj 2017, 64–67.
Cov kab ke pov thawj hwj pab peb saib ntsoov Yexus Khetos thov kev txhiv dim.
Cov uas tuav lub pov thawj hwj puas yog tib co neeg uas “[Vajtswv] tau hu thiab npaj … txij thaum ntuj tsim teb raug”?
Amas tej lus qhia nyob hauv Amas 13:3 hais txog cov uas tuav lub pov thawj hwj. Tiam sis, lub ntsiab cai uas nws tau qhia—hais tias tib neeg tau txais kev txib thiab tau npaj ua tej ntawd “txij thaum ntuj tsim teb raug” los—yog hais rau peb txhua tus. Thawj Tswj Hwm Spencer W. Kimball hais tias: “Nyob hauv lub ntuj ua ntej peb los nyob no, cov poj niam rau siab ntseeg tau txais kev txib thaum muab cov txiv neej rau siab ntseeg tsa rau tej hauj lwm pov thawj hwj. Txawm peb tsis nco qab txog tej no, yeej tsis hloov qhov uas peb twb tau pom zoo ua tej yam no tiag tiag” (Teachings of Presidents of the Church: Spencer W. Kimball [2006], 215–16; kuj saib Lus Qhuab Qhia thiab Kev Khi Lus 138:55–56).
Tej lub sij hawm Vajtswv cia cov ncaj ncees raug txom nyem.
Amas 14 hais txog ib co neeg ncaj ncees uas raug txom nyem thiab tuag vim yog lawv ntseeg. Tej zaum koj yuav xav paub, ib yam li neeg coob xav paub, vim li cas tej yam phem heev raug cov neeg uas sim ua neej ncaj ncees. Tej zaum koj yuav nrhiav tsis tau txhua yam uas teb tau txoj lus nug nyuaj heev nyob hauv Amas 14, tiam sis muaj ntau yam uas koj kawm tau los ntawm tej yam uas Amas thiab Amulej ua thaum nkawd raug xwm txheej li no. Nkawd tej lus thiab tej yam lawv ua qhia dab tsi rau koj txog qhov uas vim li cas muaj tej lub sij hawm uas tus Tswv cia cov ncaj ncees raug txom nyem? Koj kawm dab tsi los ntawm nkawd txog kev raug tsim txom?
Kuj saib Mathais 5:43–44; Malakaus 14:55–65; Loos 8:35–39; 1 Petus 4:12–14; Lus Qhuab Qhia thiab Kev Khi Lus 122:5–9.
Yuav tsum ua kev txi kom ua ib tug thwj tim.
Tej zaum yuav zoo yog koj sau ntawv txog tej yam uas Amulej tau tso tseg kom nws thiaj li txais tau txoj moo zoo (saib Amas 10:4–5; 15:16) thiab muab piv rau tej yam uas nws tau txais (saib Amas 15:18; 16:13–15; 34:8). Koj txaus siab tso tej yam twg tseg kom thiaj li rau siab ntxiv ua ib tug thwj tim uas rau siab ntseeg?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Amas 13
Tej zaum nej tsev neeg yuav tau koob hmoov yog nej nco qab txhua lub sij hawm muaj lo lus “qhov chaw so” nyob hauv Amas 13. Muaj lwm lo lus thiab lwm lub tswv yim twg nyob ze lo lus ntawd? Qhov uas nej kawm li no pab peb li cas to taub tias “tus Tswv qhov chaw so” txhais li cas? Tus Tswv qhov chaw so txawv ntawm kev so ntawm yus lub cev nqaij daim tawv?
Amas 13:10–12
Xwv kom pab nej tsev neeg xav txog tej yam uas tej nqe no qhia, tej zaum nej yuav xav ntxuav ib yam dab tsi ua ke—xws li tej ris tsho dawb. Peb xav li cas thaum peb qias neeg? Peb xav li cas thaum peb rov qab huv lawm? Tej kev xav no puas zoo ib yam li peb xav thaum peb ua txhaum ces peb hloov siab lees txim thiab rov qab los ua neeg huv los ntawm tus Cawm Seej txoj Kev Theej Txhoj?
Amas 15:1–12
Peb kawm dab tsi los ntawm Xi-elas zaj lus txog tus Tswv lub hwj chim uas txhawb nqa thiab kho peb, tsis hais thaum peb ua yuam kev? Lub pov thawj hwj pab tau peb li cas kom tau txais Nws txoj kev txhawb nqa thiab txoj kev kho?
Amas 16:1–10
Tom qab nej nyeem tej nqe no, tej zaum nej yuav xav nyeem Amas 9:4. Peb kawm dab tsi thaum peb muab Xaulas txoj kev xav txog tus yaj saub tej lus piv rau cov neeg hauv Amoonaihas txoj kev xav? Peb tab tom ua dab tsi kom rau siab ua raws li peb tus yaj saub uas nyob hauv lub caij nyoog no tej lus?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Ua tib zoo npaj txhua lub sij hawm. Tej lub sij hawm zoo qhia los dhau mus sai heev, yog li ntawd ua tib zoo qhia thaum muaj sij hawm. Piv txwv hais tias, thaum lub ntiaj teb raug xwm txheej, tej zaum lub sij hawm ntawd yog ib lub cib fim qhia tej ntsiab cai los ntawm Amas 14 txog vim li cas uas tus Tswv cia cov neeg uas tsis muaj txim raug txom nyem. (Saib Teaching in the Savior’s Way, 16.)
Amas thiab Amulej Nyob hauv lub Tsev Kaw, los ntawm Gary L. Kapp