“Rau Hli Ntuj 22–28. Amas 17–22: ‘Kuv Yuav Muab Nej Los Ua Ib rab Cuab Yeej,’” Come, Follow Me—For Individuals and Families: Book of Maumoos 2020 (2020)
“Rau Hli Ntuj 22–28. Amas 17–22,” Los, Nrog Kuv Mus—Rau Ib Leeg thiab Tsev Neeg: 2020
Amoos thiab Vaj Ntxwv Lamaunais, los ntawm Scott M. Snow
Rau Hli Ntuj 22–28
Amas 17–22
“Kuv Yuav Muab Nej Los Ua Ib rab Cuab Yeej”
Thaum koj nyeem Amas 17–22, sau ntawv txog tej kev tshoov siab uas koj tau txais thiab ua li ntawd. Yog koj ua li ntawd ces koj ua rau tus Tswv paub tias koj txaus siab txais kev tshwm sim ntxiv.
Sau Ntawv txog Koj tej Kev Tshoov Siab
Xav txog tag nrho tej yam uas tib neeg yuav hais vim li cas lawv tsis qhia txoj moo zoo rau lwm tus: “Kuv tsis paub txaus” los sis “Xyov lawv puas xav kawm” los sis tej zaum “Yuav ua li cas yog kuv ua rau lawv tu siab?” Tej zaum tau muaj tej lub sij hawm thaum koj twb xav ib yam li ntawd koj tus kheej. Cov Neeg Nifais twb muaj ib yam ntxiv vim li cas lawv tsis qhia txoj moo zoo rau cov Neeg Lamas; lawv yog “ib co neeg qus, thiab tawv thiab nyaum; ib co neeg uas nyiam tua cov Neeg Nifais” (Amas 17:14; kuj saib Amas 26:23–25). Tiam sis Mauxiyas cov tub haj yam xav tias tsim nyog uas lawv yuav tsum qhia txoj moo zoo rau cov Neeg Lamas: “Lawv xav mus tshaj tawm txoj kev cawm seej rau txhua tus neeg, vim lawv tiv tsis taus qhov uas yuav cia ib tug neeg tus ntsuj plig piam sij” (Mauxiyas 28:3). Txoj kev hlub uas twb tshoov Amoos thiab nws cov kwv tij lub siab no kuj tshoov tau koj lub siab kom koj qhia txoj moo zoo rau koj tsev neeg, phooj ywg, thiab cov uas koj paub—tsis hais cov uas zoo li yuav tsis kam lees yuav.
Tej lub Tswv Yim Kawm Vaj Lug Kub ntawm Yus Ib Leeg
Thaum kuv txhawb kuv txoj kev ntseeg lub zog, ua rau kuv haj yam txawj qhia txoj moo zoo.
Koj puas tau rov qab los koom nrog cov phooj ywg qub thiab xav zoo li Amas xav—muaj kev xyiv fab kawg nkaus vim lawv tseem muaj kev ntseeg ruaj khov? (saib Amas 17:1–2). Koj kawm dab tsi los ntawm Mauxiyas cov tub txog qhov uas yuav tsum ua li cas kom koj txoj kev ntseeg txoj moo zoo yuav muaj zog thiab pab koj rau siab ua? Thaum koj xav txog Mauxiyas cov tub lub dag zog ntawm sab ntsuj plig, ua rau koj xav ua dab tsi?
Qhov uas Mauxiyas cov tub tau npaj lawv sab ntsuj plig pab lawv li cas thaum lawv ua hauj lwm rau cov Neeg Lamas? Tej zaum koj yuav xav siv lub cib fim no ntsuam xyuas koj txoj kev qhia txoj moo zoo “nrog Vajtswv lub hwj chim thiab txoj cai” (Amas 17:3).
Kuv ua tau ib rab cuab yeej hauv Vajtswv txhais tes kom Nws cov me nyuam muaj kev cawm seej.
Thawj Tswj Hwm Thomas S. Monson hais tias, “Kuv yeej xav kom tus Tswv paub tias yog Nws xav kom kuv ua ib txoj hauj lwm, ces Tom Monson yuav ua txoj hauj lwm ntawd rau Nws” (“On the Lord’s Errand: The Life of Thomas S. Monson,” video, ChurchofJesusChrist.org). Thaum koj nyeem Amas 17:6–12, nrhiav tej yam uas Mauxiyas cov tub tau ua xwv kom lawv thiaj li ua tau tej cuab yeej hauv Vajtswv txhais tes. Koj yuav ua li cas kom ua ib rab cuab yeej hauv Vajtswv txhais tes kom foob koob hmoov rau lwm tus? Koj kawm dab tsi los ntawm lawv tus yam ntxwv uas ua rau koj muaj cuab kav ua tej yam uas tus Tswv xav kom koj ua?
Kuj saib Dallin H. Oaks, “Kev Qhia txoj Moo Zoo uas Tau Muab Txum Tim Rov Qab Los,” Ensign los sis Liahona, Kaum Ib Hlis Ntuj 2016, 57–60.
Kuv pab tau lwm tus npaj txais txoj moo zoo.
Lamaunais yog tus thawj coj ntawm “ib co neeg qus, thiab tawv thiab nyaum” (Amas 17:14), tiam sis nws twb kov yeej lawv cov kab lig kev cai thiab lees yuav Yexus Khetos txoj moo zoo. Thaum koj nyeem txog Amoos txoj kev sib raug zoo nrog Lamaunais, cia li kawm txog tej yam uas Amoos tau ua uas tau pab Lamaunais txais nws zaj xov. Yog ua rau koj xav txog tej yam uas koj ua tau kom qhia txoj moo zoo rau lwm tus, cia li sau ntawv txog tej kev tshoov siab no.
Tej zaum kuj yuav pab yog koj sau lub cim los yog sau ntawv txog tej yam tseeb uas Amoos tau qhia rau Lamaunais (saib Amas 18:24–39) thiab tej yam tseeb uas Aloos qhia Lamaunais txiv (saib Amas 22:1–16). Tej nqe no qhia dab tsi rau koj txob tej yam tseeb uas koj qhia tau rau lwm tus kom pab lawv muaj ib zaj lus tim khawv txog txoj moo zoo?
Minerva K. Teichert (1888–1976), Amoos Cawm tus Vaj Ntxwv Pab Yaj, 1935–1945, pleev roj rau pob zeb, 35 x 48 yas tes. Brigham Young University Museum of Art.
Kuv zaj lus tim khawv txawj pab tau neeg coob heev.
Txawm tej zaj txog kev hloov siab los ntseeg uas peb nyeem hauv cov vaj lug kub yeej muaj xwm txheej loj heev, lub ntsiab ntawm tej zaj no los muaj tib neeg uas ua siab loj hais lus thiab tshaj tawm lawv zaj lus tim khawv rau lwm tus. Ib txoj kev rau koj kawm tej yam nyob hauv Amas 18–22 yog nrhiav tej yam uas muaj los thaum ib tug neeg tau ua tim khawv. Tej zaum koj yuav xav sau ntawv txog tej yam uas koj nrhiav hauv ib daim duab zoo li no:
|
Amoos tau qhia txoj moo zoo rau , uas tau qhia txoj moo zoo rau , thiab thaum kawg tau muaj li no . |
Tus Tswv cev Nws txhais npab rau kuv thaum kuv hloov siab lees txim.
Thaum xaus zaj ntawm Lamaunais txoj kev hloov siab los ntseeg, Maumoos qhia ib yam tseem ceeb txog tus Tswv tus cwj pwm. Amas 19:36 qhia dab tsi rau koj txog tus Tswv tus cwj pwm? Thaum twg koj tau hnov tus Tswv cev Nws txhais npab rau koj? Koj yuav ua li cas kom pab cov uas koj hlub paub txog Nws lub siab hlub tshua?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Amas 17–19
Nej yuav ua li cas kom tej zaj hauv peb tshooj no muaj nqis rau nej tsev neeg? Tej zaum nej yuav xav ua yeeb yam txog Amoos txoj kev pov hwm cov yaj los sis zaj txog Anpis txoj kev hais kom cov neeg tuaj los saib Vajtswv lub hwj chim. Tej zaum nej tsev neeg yuav xav kos duab txog tej feem ntawm zaj dab neeg thiab siv cov duab kom hais dab neeg ntawd. Nej tsev neeg yuav ua li cas thiaj li coj raws li Amoos thiab Anpis tus yam ntxwv?
Amas 18:24–39
Tej zaum nej tsev neeg yuav xav nyeem Amas 18:24–39 ua ke thiab nrhiav tej yam tseeb uas Amoos tau qhia Lamaunais. Peb xav tias yog vim li cas Amoos qhia Lamaunais tej yam tseeb no ua ntej? Vim li cas peb yuav tsum paub tej yam no muaj tseeb?
Amas 20:8–15
Peb kawm dab tsi los ntawm Lamaunais txoj kev teb nws txiv? Peb yuav ua li cas kom coj raws li Lamaunais tus yam ntxwv thaum nws ua qhov yog? (Kom pom tej piv txwv, saib daim video “Dare to Stand Alone” nyob ntawm ChurchofJesusChrist.org.)
Amas 22:15–18
Rov qab nyeem Amas 20:23 kom saib Lamaunais txiv txaus siab tso dab tsi tseg thiaj li cawm tau nws txoj sia. Ces rov qab nyeem Amas 22:15 saib nws txaus siab tso dab tsi tseg thiaj li txais tau kev xyiv fab los ntawm txoj moo zoo. Nws txaus siab tso dab tsi tseg kom thiaj li paub Vajtswv? (saib nqe 18). Tej zaum nej tsev neeg yuav xav sau txog ib yam uas lawv yuav muab tso tseg kom lawv thiaj paub Vajtswv zoo dua ntxiv.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Kawm thiab ua raws li tej ntsiab cai. Txawm yog koj xav tias tej yam hauv cov vaj lug kub tej zaj dab neeg tsis pab koj lub neej dab tsi li, tej ntsiab cai hauv tej zaj no yeej pab tau koj. Thaum koj nyeem txog Amoos thiab Aloos, koj kawm tej ntsiab cai twg txog kev qhia txoj moo zoo?
Vaj Ntxwv Lamaunais tus poj niam tau sawv hauv av los, qhuas Yexus. Auj, Yexus tus uas Muaj Yeeb Koob, los ntawm Walter Rane