“Rau Hli Ntuj 29–Xya Hli Ntuj 5. Amas 23–29: Lawv ‘Twb Tsis Muaj Ib tug uas Ncaim Mus Li Lawm,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Rau Hli Ntuj 29–Xya Hli Ntuj 5. Amas 23–29,” Los, Nrog Kuv Mus—Rau Ib Leeg thiab Tsev Neeg: 2020
Cov Eethais-Nifais-Lihais Muab Lawv tej Cuab Yeej Ua Rog Faus, los ntawm Jody Livingston
Rau Hli Ntuj 29–Xya Hli Ntuj 5
Amas 23–29
Lawv “Twb Tsis Muaj Ib tug uas Ncaim Mus Li Lawm”
Thaum koj kawm Amas 23–29, koj nrhiav tej zaj lus twg rau koj tus kheej thiab rau koj tsev neeg? Koj xav tias koj yuav hais dab tsi nyob rau hauv koj tej chav kawm hauv lub Koom Txoos?
Sau Ntawv txog Koj tej Kev Tshoov Siab
Puas muaj tej lub sij hawm thaum koj xav paub seb tib neeg puas txawj hloov siab tiag tiag? Tej zaum koj txhawj hais tias koj tsis txawj kov yeej tej yam uas koj tau xaiv tsis zoo los sis tej kev ua tsis zoo, los sis tej zaum koj txhawj txog cov uas koj hlub. Yog li ntawd, zaj dab neeg txog Eethais-Nifais-Lihais pab tau koj. Cov neeg no yog cov yeeb ncuab ntawm cov Neeg Nifais. Thaum Amoos thiab nws cov kwv tij txiav txim siab mus qhia txoj moo zoo rau lawv, cov Neeg Nifais “luag thuam [lawv].” Ntshe zoo li kev tua cov Neeg Lamas tuag yeej yuav yooj yim dua kev muab lawv hloov siab los ntseeg. (Saib Amas 26:23–25.)
Tiam sis cov Neeg Lamas twb hloov siab—los ntawm tus Tswv lub hwj chim kom neeg hloov siab los ntseeg. Ua ntej lawv yog “ib co neeg … tawv thiab nyaum” (Amas 17:14), tiam sis tom qab ntawd lawv “txawv lwm cov neeg vim yog lawv txoj kev mob siab hlub tshua rau Vajtswv” (Amas 27:27). Muaj tseeb tiag, lawv “twb tsis muaj ib tug uas ncaim mus li lawm” (Amas 23:6).
Tej zaum koj muaj tej kab lig kev cai cuav los sis “tej cuab yeej ntawm kev ntxeev siab” uas koj yuav tsum tso tseg (Amas 23:7). Los sis tej zaum koj yuav tsum mob siab me ntsis ntxiv ua tim khawv rau lwm tus thiab tsis txhob ua ib tug neeg uas yooj yim ncaim mus. Txawm koj yuav tsum hloov dab tsi los yog, Amas 23–29 yuav ua rau nej cia siab hais tias los ntawm Yexus Khetos lub hwj chim theej txhoj, koj muaj peev hloov siab uas kav ntev.
Tej lub Tswv Yim Kawm Vaj Lug Kub ntawm Yus Ib Leeg
Thaum Vajtswv cov me nyuam txais Nws txoj moo zoo, muaj cov koob hmoov zoo kawg tom qab ntawd.
Thaum cov Neeg Lamas tus vaj ntxwv tshaj tawm tias yuav tsum tsis “txhob muaj kev cuam tshuam” Vajtswv txoj lus nyob hauv nws cov neeg (saib Amas 23:1–5), nws twb qhib kev rau lawv txais cov koob hmoov loj heev. Thaum koj nyeem Amas 23–29, nrhiav tej koob hmoov no. Koj yuav ua li cas kom “txhob muaj kev cuam tshuam” Vajtswv txoj lus hauv koj lub neej los sis nyob hauv koj tsev neeg?
Kuv txoj kev hloov siab los ntseeg Yexus Khetos thiab Nws txoj moo zoo hloov kuv lub neej.
Cov Neeg Lamas uas Amoos thiab nws cov kwv tij tuaj xyuas los tej zaum tsis zoo li tib neeg uas yus xav tias yus hloov siab los ntseeg—lawv twb muaj lawv cov poj koob yawm txwv tej kab lig kev cai thiab lawv ua phem. Tiam sis lawv feem coob twb lees yuav Yexus Khetos txoj moo zoo thiab tua hloov lawv lub neej. Cov Neeg Lamas no hu lawv tus kheej ua Eethais-Nifais-Lihais kom ua ib lub cim txog lawv txoj kev hloov siab los ntseeg. (Lub ntsiab ntawm “anti” tsis yog zoo ib yam li lo lus Akiv “anti” uas txhais tias “tawm tsam.”)
Qhov uas koj xav txog cov Neeg Lamas txoj kev hloov siab los ntseeg tej zaum yuav tshoov koj lub siab kom xav txog koj txoj kev hloov siab los ntseeg “tus Tswv” (Amas 23:6). Ib txoj kev kawm tej tshooj no yog kev kawm tias cov Eethais-Nifais-Lihais lub neej tau hloov vim lawv hloov siab los ntseeg. Tej nqe no nram qab no pab tau koj pib kawm li ntawd.
Thaum koj xav txog cov Eethais-Nifais-Lihais txoj kev hloov siab, cia li xav seb koj txoj kev hloov siab los ntseeg Khetos pab koj hloov li cas. Koj xav tias koj tseem yuav tsum hloov dab tsi kom txoj moo zoo yuav muaj hwj chim hauv koj lub neej?
Vajtswv muaj siab hlub tshua.
Txawm yog Amoos thiab cov Eethais-Nifais-Lihais tej kev txhaum uas lawv yuav tsum kov yeej yeej txawv ntawm ib yam dab tsi hauv koj lub neej los, peb txhua tus tso siab rau Vajtswv lub siab hlub tshua. Koj kawm dab tsi nyob hauv Amas 24:7–19 thiab 26:17–22 uas pab koj to taub Nws txoj kev muaj siab hlub tshua? Thaum koj nyeem, tej zaum yuav zoo yog koj xav txog tej yam no: tej lus uas lwm tus hais kom caw koj hloov siab lees txim, thaum twg koj tau hloov siab lees txim, koj tau ua li cas kom koj tsis txhob rov qab ua txhaum, thiab cov koob hmoov uas tau los rau koj los ntawm kev hloov siab lees txim. Thaum koj nyeem tej nqe no zoo li no, koj kawm dab tsi txog Vajtswv txoj kev hlub tshua hauv koj lub neej?
Kev ua hauj lwm rau tus Tswv pab yus muaj kev xyiv fab.
Txawm Amoos thiab Amas tau ua tej yam sib txawv, nkawd twb qhia tias nkawd zoo ib yam txog nkawd tej hauj lwm ua tub txib. Tej zaum koj yuav xav nyeem Amas 26 thiab 29 thiab muab ib tshooj piv rau ib tshooj. Koj kawm txog tej yam twg uas sib txawv? Tej lus twg yog tej lus uas siv ntau zaus? Koj kawm dab tsi los ntawm Amoos thiab Amas txog txoj kev nrhiav kev xyiv fab tiag tiag tsis hais thaum koj raug teeb meem los yog? (Xwv kom nco txog tej teeb meem uas Amas raug, nyeem tej zaj lus piav txog tshooj rau Amas 5–16. Xwv kom nco txog tej teeb meem uas Amoos thiab nws cov kwv tij raug, saib tej zaj lus piav txog tshooj rau Amas 17–28.)
Tej teg nplej thiab lub txhab yog dab tsi?
Thaum txog sij hawm sau qoob loo, feem ntau lawv muab cov nplej sau los ua tej teg nplej thiab tso hauv txhab. Txwj Laug David A. Bednar tau hais txog ib txoj kev txhais lus rau tej lub sim nyob hauv Amas 26:5: “Tej teg nplej nyob hauv zaj lus piv txwv no yog ib lub cim rau cov mej zeej uas nyuam qhuav ua kev cai raus dej hauv lub Koom Txoos. Cov txhab yog cov tuam tsev dawb huv” (“Honorably Hold a Name and Standing,” Ensign los sis Liahona, Tsib Hlis Ntuj 2009, 97). Cia li xav txog qhov uas zaj lus piv txwv nyob hauv Amas 26:5–7 qhia koj txog tej kev khi lus hauv lub tuam tsev tseem ceeb npaum li cas.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Amas 24:6–19
Vim li cas cov Eethais-Nifais-Lihais tau muab lawv tej cuab yeej ua rog faus “tob cia rau hauv av”? (Amas 24:16). Tej zaum nej tsev neeg yuav nyiam sau ntawv txog tej yam uas lawv kov yeej los sis tso tseg. Ces lawv dig av los tau thiab muab cov ntawv ntawd faus cia.
Amas 24:7–12
Kev kawm tej nqe no yuav pab nej tsev neeg to taub lub txiaj ntsim uas yog kev hloov siab lees txim. Cov Eethais-Nifais-Lihais tau ua li cas thiaj li hloov siab lees txim rau lawv tej kev txhaum? Tus Tswv tau ua li cas kom pab lawv hloov siab lees txim? Peb yuav kawm dab tsi los ntawm lawv tus yam ntxwv?
Amas 24:20–27
Peb tau pom dab tsi uas yog kev ua tim khawv txog qhov uas Maumoos tej lus no muaj tseeb: “Yog li no peb pom hais tias tus Tswv siv tej txoj kev ntau kom coj tau kev cawm seej los rau nws cov neeg”? (Amas 24:27).
Amas 26:2
Nej tsev neeg yuav teb Amoos tej lus nug li cas nyob hauv Amas 26:2? Tej zaum nej yuav xav sau ntawv txog tej yam lawv teb rau ib daim ntawv loj heev thiab muab dai rau ib qho chaw uas txhua tus pom tau yooj yim. Cia li yaum nej tsev neeg sau ntxiv thaum lawv xav txog lwm txoj koob hmoov uas Vajtswv tau “muab rau peb.”
Amas 29:9
Vim li cas Amoos thiab Amas yog rab cuab yeej hauv Vajtswv txhais tes? Xav seb nej puas saib tej twj los sis tej cuab yeej hauv nej tsev thiab sib tham vim li cas tej no pab tau nej tsev neeg. Qhov no pab peb peb li cas kom to taub tias peb txhua tus muaj peev xwm ua “ib rab cuab yeej hauv Vajtswv txhais tes”?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Siv ntau yam. Qhov uas nej tsis ua zoo ib yam txhua lub sij hawm nej kawm vaj lug kub nrog nej tsev neeg yeej pab tau nej tsev neeg xav kawm thiab rau siab. piv txwv hais tias, tom qab ib tug hauv nej tsev neeg nyeem ib nqe, tej zaum nws yuav xav nug lwm tus kom lawv rov qab hais tias nyuam qhuav tau nyeem dab tsi.
Daim duab txog cov Eethais-Nifais-Lihais muab lawv tej cuab yeej ua rog faus, los ntawm Dan Burr