1 Thiab nim no, cov no yog Amoos tej lus rau nws cov kwv tij, uas hais li no: Kuv cov kwv tij thiab kuv cov kwv npawg, saib seb kuv hais rau nej tias, peb yeej muaj qhov txaus zoo siab heev; vim peb puas muaj peev xwm xav tau tias Vajtswv yuav pub rau peb tej koob hmoov zoo npaum li no thaum peb pib pem thaj av Xalahelas?

2 Thiab nim no, kuv thov nug, nws tau muab yam koob hmoov tseem ceeb dab tsi rau peb? Nej puas muaj cuab kav qhia tau?

3 Saib seb, kuv teb rau nej tias; peb cov kwv tij, cov Neeg Lamas, twb tau nyob hauv txoj kev tsaus ntuj, muaj tseeb tiag, twb nyob hauv lub qhov tob uas tsaus ntuj tshaj plaws, tiam sis saib seb, lawv pes tsawg leej uas tau coj los pom Vajtswv txoj kev kaj uas zoo tshaj plaws! Thiab qhov no yog txoj koob hmoov uas tau muab rau peb, xwv kom peb tau raug ua cuab yeej nyob hauv Vajtswv txhais tes kom coj txog txoj hauj lwm tseem ceeb no.

4 Saib seb, txhiab txhiab leej ntawm lawv zoo siab heev tiag, thiab tau raug coj los mus rau hauv Vajtswv pab.

5 Saib seb, daim teb tau siav lawm, thiab nej tau koob hmoov, vim nej tau cev liag mus hlais, thiab tau muab sau los ntawm nej tej dag zog, muaj tseeb tiag, nej tau ua hauj lwm tag nrho ib hnub ntev loo; thiab saib seb tej teg nplej uas nej pav tau! Thiab lawv yuav raug sau ua ke mus rau hauv txhab, xwv kom lawv yuav tsis raug xiam mus.

6 Muaj tseeb tiag, lawv yuav tsis raug nthwv cua daj cua dub nplawm kom vau nyob rau hauv hnub kawg; muaj tseeb tiag, thiab lawv yuav tsis raug nthwv cua moj lig kaw ntsawj kom tawg ri niab; tiam sis thaum nthwv cua daj cua dub los lawv yuav raug sau los ua ke rau hauv lawv tej chaw, xwv kom nthwv cua daj cua dub yuav tsis muaj peev xwm mus txog lawv; muaj tseeb tiag, thiab lawv yuav tsis raug tej cua nyaum tshuab mus rau tej qhov uas tej yeeb ncuab xav cab lawv mus.

7 Tiam sis saib seb, lawv nyob hauv tus Tswv txhais tes ntawm txoj kev sau qoob loo, thiab lawv yeej yog nws li; thiab nws yuav tsa lawv sawv nyob rau hauv hnub kawg.

8 Peb tus Vajtswv lub npe cia li tau koob hmoov; peb cia li hu nkauj qhuas nws, muaj tseeb tiag, peb cia li ua tsaug rau nws lub npe dawb huv, vim nws yeej ua tej hauj lwm uas ncaj ncees mus ib txhis li.

9 Vim yog hais tias peb tsis tau tawm ntawm thaj av Xalahelas tuaj, peb cov kwv tij uas peb hlub no, cov uas tau hlub peb heev, yeej tseem yuav raug tsim txom nrog txoj kev ntxub tawm tsam peb, muaj tseeb tiag, thiab lawv kuj tseem yuav yog tej neeg qhua rau Vajtswv.

10 Thiab tau muaj tias thaum Amoos tau hais tej lus no tas lawm, nws tus tij laug Aloos tau cem nws, hais tias: Amoos, kuv ntshai hais tias tsam koj txoj kev xyiv fab yuav tau coj koj mus rau txoj kev khav theeb lawm.

11 Tiam sis Amoos tau hais rau nws tias: Kuv yeej tsis khav nyob hauv kuv tus kheej lub zog, los sis hauv kuv tus kheej txoj kev txawj ntse; tiam sis saib seb, kuv txoj kev xyiv fab twb muaj puv npo lawm, muaj tseeb tiag, kuv lub siab muaj kev xyiv fab puv nkaus, thiab kuv yuav xyiv fab nyob hauv kuv tus Vajtswv.

12 Muaj tseeb tiag, kuv paub hais tias kuv yeej ua tsis tau dab tsi li; yog hais txog kuv lub zog kuv tsis muaj zog; yog li ntawd kuv yuav tsis khav txog kuv tus kheej, tiam sis kuv yuav khav txog kuv tus Vajtswv, vim nyob hauv nws lub zog kuv yeej muaj peev xwm ua tau ib puas yam tsav; muaj tseeb tiag, saib seb, ntau yam txuj ci tseem ceeb loj uas peb tau ua nyob rau hauv thaj av no, vim tej uas peb yuav qhuas nws lub npe mus ib txhis.

13 Saib seb, pes tsawg txhiab leej ntawm peb cov kwv tij uas nws tau tso tawm ntawm ntuj txiag teb tsaus tej kev tsim txom mob nkeeg; thiab lawv tau raug coj los hu nkauj txog txoj kev hlub ntawm txoj kev txhiv dim, thiab qhov no vim yog lub hwj chim ntawm nws txoj lus uas nyob hauv peb, yog li ntawd tsis yog peb muaj qhov uas yuav tsum zoo siab heev los?

14 Muaj tseeb tiag, peb muaj qhov zoo kawg los qhuas nws mus ib txhis, vim nws yog tus Vajtswv uas Siab Tshaj Plaws, thiab tau tso peb tej kwv tij tawm ntawm ntuj txiag teb tsaus tej saw hlau.

15 Muaj tseeb tiag, lawv tau raug kaw cia nrog txoj kev tsaus ntuj uas kav ib txhis thiab txoj kev puas tsuaj; tiam sis saib seb, nws tau coj lawv los rau hauv nws txoj kev kaj uas kav ib txhis, muaj tseeb tiag, mus rau txoj kev cawm seej uas kav ib txhis; thiab lawv raug thaiv ib puag ncig nrog txoj kev siab dawb uas piv tsis tau ntawm nws txoj kev hlub; muaj tseeb tiag, thiab peb tau ua tej cuab yeej nyob hauv nws txhais tes rau txoj kev ua txoj hauj lwm loj thiab tseem ceeb no.

16 Yog li ntawd, peb cia li zoo siab, muaj tseeb tiag, peb yuav xyiv fab nyob hauv tus Tswv; muaj tseeb tiag, peb yuav zoo siab, vim peb txoj kev xyiv fab twb muaj puv npo lawm; muaj tseeb tiag, peb yuav qhuas peb tus Vajtswv mus ib txhis. Saib seb leej twg yuav muaj peev xwm zoo siab ntau dhau lawm nyob hauv tus Tswv? Muaj tseeb tiag, leej twg yuav muaj cuab kav hais ntau dhau lawm txog nws lub hwj chim loj, thiab txog nws txoj kev hlub tshua, thiab txog nws txoj kev ua siab ntev nyiaj rau noob neej? Saib seb, kuv hais rau nej tias, kuv twb tsis muaj peev xwm hais feem me tshaj plaws uas kuv xav tau.

17 Leej twg yuav xav tau hais tias peb tus Vajtswv yuav ua siab zoo ua luaj ib yam li tau pab tshem peb dim tawm ntawm peb txoj kev phem, txoj kev txhaum, thiab qhov chaw vuab tsuab?

18 Saib seb, peb tau tawm mus nyob hauv txoj kev npau taws, nrog txoj kev ntxias kub ntxhov phem kom rhuav nws lub koom txoos.

19 Au ces, vim li cas nws ho tsis tau xa peb mus rau txoj kev puas tsuaj uas phem kawg nkaus, muaj tseeb tiag, vim li cas nws ho tsis tau cia rab ntaj ntawm nws txoj kev ncaj ncees poob los rau peb, thiab rau txim rau peb mus rau txoj kev uas tsis muaj chaw cia siab nyob mus ib txhis?

20 Au, kuv tus ntsuj plig es, yuav luag zoo li uas tau, tsiv ntawm txoj kev xav ntawd. Saib seb, nws tsis tau siv nws txoj kev txim lij rau peb, tiam sis nyob hauv nws txoj kev hlub tshua heev tau coj peb los dhau tus kwj tob tob ntawm lub qhov tuag uas kav ib txhis ntawd thiab txoj kev nyuaj siab ntawd, xwv kom peb tej ntsuj plig thiaj tau kev cawm seej.

21 Thiab nim no saib seb, kuv cov kwv tij, muaj tus neeg ntiaj teb dab tsi uas paub tej yam no? Kuv hais rau nej tias, yeej tsis muaj ib tug twg uas paub tej yam no, tsuas yog cov uas hloov siab lees txim lawm xwb.

22 Muaj tseeb tiag, tus uas hloov siab lees txim thiab xyaum kom muaj kev ntseeg, thiab ua tau tej hauj lwm zoo, thiab thov Vajtswv tsis tseg tsis tu ncua—rau cov zoo li ntawd twb raug cia kom paub Vajtswv tej txuj ci uas neeg paub tsis txog; muaj tseeb tiag, rau cov zoo li ntawd yuav raug muab ua kom paub tej uas ib txwm tsis tau paub dua; muaj tseeb tiag, thiab yuav raug muab rau cov zoo li ntawd kom coj tau txhiab txhiab leej los rau txoj kev hloov siab lees txim, ib yam li uas tau muab rau peb kom coj peb cov kwv tij no los rau txoj kev hloov siab lees txim.

23 Nim no nej puas nco qab, kuv cov kwv tij, tias peb tau hais rau peb cov kwv tij nyob hauv thaj av Xalahelas tias, peb nce mus rau pem thaj av Nifais, mus qhuab qhia rau peb cov kwv tij, cov Neeg Lamas, thiab lawv tau luag thuam peb no los?

24 Vim lawv tau hais rau peb tias: Nej xav hais tias nej muaj peev xwm coj tau cov Neeg Lamas los mus paub qhov tseeb no los? Nej xav hais tias nej muaj peev xwm yaum cov Neeg Lamas txog txoj kev tsis yog ntawm lawv tej yawg koob tej kev li kev cai, thaum uas lawv yog ib cov neeg tawv ncauj; cov uas muaj tej siab nyiam txoj kev ua kom ntshav nrog; cov uas txoj sia tau raug siv nyob hauv txoj kev tsis ncaj ncees uas phem tshaj plaws; cov uas muaj tej kev tau yog li ib tug neeg txhaum tej kev txij li thaum chiv keeb los? Nim no kuv cov kwv tij, nej nco qab tias qhov no tau yog lawv tej lus.

25 Thiab lawv tau hais ntxiv tias: Peb cia li nqa cuab yeej tawm tsam lawv, xwv kom peb tau ua kom lawv puas tsuaj thiab lawv tej kev tsis ncaj ncees tawm ntawm thaj av, nyob tsam lawv kov yeej peb thiab ua kom peb puas tsuaj.

26 Tiam sis saib seb, kuv cov kwv tij uas kuv hlub, peb tau tuaj rau hauv hav zoov tsis yog nrog qhov uas tuaj ua kom peb tej kwv tij puas tsuaj, tiam sis nrog txoj kev xav tias tej zaum nyaj peb yuav cawm tau lawv ib txhia qho tug dim.

27 Nim no thaum peb nyuaj siab, thiab peb tau yuav luag tig rov qab, saib seb, tus Tswv tau nplij peb siab, thiab tau hais tias: Cia li mus rau hauv nej cov kwv tij, cov Neeg Lamas, thiab ua siab ntev nyiaj nej tej kev txom nyem, thiab kuv yuav pub kom nej ua tau li nej siab xav.

28 Thiab nim no, peb tau tuaj, thiab tau nyob hauv lawv; thiab peb tau ua siab ntev nyob hauv peb tej kev txom nyem, thiab peb tau nyiaj txhua yam uas tsis muaj siv; muaj tseeb tiag, peb tau mus ib lub tsev rau ib lub tsev, vam khom ntsoov rau tej kev hlub tshua ntawm lub ntiaj teb—tsis yog vam rau tej kev hlub tshua ntawm lub ntiaj teb xwb tiam sis rau Vajtswv tej kev hlub tshua.

29 Thiab peb tau nkag mus rau hauv lawv tej tsev thiab tau qhia lawv, thiab peb tau qhia lawv nyob hauv lawv tej kev; muaj tseeb tiag, thiab peb tau qhia lawv nyob saum lawv tej roob; thiab peb kuj tau nkag mus rau hauv lawv tej tuam tsev thiab lawv tej tsev sab laj thiab qhia lawv; thiab peb tau raug ntiab tawm, thiab tau raug thuam, thiab raug nto qaub ncaug rau, thiab raug xuas ncuav pias rau peb tej plhu; peb raug xuas pob zeb ntaus, thiab raug txhom thiab khi nrog tej hlua khov khov, thiab raug pov rau hauv qhov taub; thiab dhau los ntawm Vajtswv lub hwj chim thiab txoj kev txawj ntse peb tau raug tso dim dua.

30 Thiab peb tau raug txhua yam kev txom nyem, thiab tag nrho ib puas yam tsav no, xwv kom tej zaum peb yuav yog tej cuab yeej ntawm txoj kev cawm ib txhia neeg dim; thiab peb tau xav hais tias peb txoj kev xyiv fab yuav muaj puv npo yog tias tej zaum peb muaj peev xwm ua tej cuab yeej ntawm txoj kev cawm tej neeg ib txhia.

31 Nim no saib seb, peb muaj peev xwm tos ntsoov thiab pom tej kev tawg paj txi txiv ntawm peb tej dag zog; thiab lawv puas tsawg? Kuv hais rau nej tias, Tsis tsawg, lawv coob kawg; muaj tseeb tiag, thiab peb yeej muaj peev xwm ua tim khawv txog lawv txoj kev ntseeg tiag tiag, vim yog lawv txoj kev hlub uas muaj rau lawv tej kwv tij thiab rau peb.

32 Vim saib seb, lawv tau yeem tso lawv txoj sia dua li uas muab lawv tej yeeb ncuab txoj sia; thiab lawv tau muab lawv tej cuab yeej ua rog faus cia tob rau hauv av, vim yog lawv txoj kev hlub uas lawv muaj rau lawv cov kwv tij.

33 Thiab nim no saib seb kuv hais rau nej tias, puas tau muaj kev hlub loj zoo li ntawd nyob tag nrho rau hauv thaj av? Saib seb, kuv hais rau nej tias, Tsis muaj, nyob hauv cov Neeg Nifais los twb tsis tau muaj thiab.

34 Vim saib seb, lawv yuav nqa cuab yeej ua rog tawm tsam lawv cov kwv tij; lawv yuav tsis tau cia lawv tus kheej raug tua. Tiam sis saib seb pes tsawg tus ntawm lawv cov no tau tso lawv txoj sia; thiab peb paub tias lawv tau mus cuag lawv tus Vajtswv lawm, vim yog lawv txoj kev hlub thiab lawv txoj kev ntxub txoj kev txhaum.

35 Nim no peb tseem tsis muaj dab tsi los zoo siab los? Muaj tseeb tiag, kuv hais rau nej tias, yeej ib txwm tsis tau muaj neeg uas tau muaj qhov zoo siab heev npaum li peb, txij li thaum ntuj tsim teb raug los; muaj tseeb tiag, thiab kuv txoj kev xyiv fab twb raug coj lawm deb, twb mus txog rau txoj kev khav nyob hauv kuv tus Vajtswv; vim nws muaj tag nrho ib puas yam tsav hwj chim, ib puas yam tsav kev txawj ntse, thiab tag nrho ib puas yam tsav kev to taub; nws to taub ib puas yam tsav, thiab nws yog ib Tug ua muaj kev hlub tshua, kawg nkaus tias tau muab txoj kev cawm seej, rau cov uas yuav hloov siab lees txim thiab ntseeg nws lub npe.

36 Nim no yog tias qhov no yog txoj kev khav theeb, txawm li ntawd los kuv yuav khav; vim qhov no yog kuv txoj sia thiab kuv txoj kev kaj, kuv txoj kev xyiv fab thiab kuv txoj kev cawm seej, thiab kuv txoj kev txhiv dim ntawm txoj kev nyuaj siab uas kav ib txhis. Muaj tseeb tiag, kuv tus Vajtswv lub npe cia li tau koob hmoov, tus uas tau nco ntsoov txog cov neeg no, cov uas yog ib ceg ntawm tsob ntoo Ixayees, thiab tau ploj ncaim ntawm nws lub cev mus rau pej kum teb; muaj tseeb tiag, kuv hais tias, kuv tus Vajtswv lub npe cia li tau koob hmoov, tus uas tau nco ntsoov txog peb, cov neeg loj leeb rau hauv pej kum teb.

37 Nim no kuv cov kwv tij, peb pom tias Vajtswv yeej nco ntsoov txog neeg txhua tus, txawm yog lawv yuav nyob hauv thaj av twg; muaj tseeb tiag, nws yeej suav ntsoov nws cov neeg, thiab txoj kev hlub tshua ntawm nws lub siab twb nyob rau tag nrho ntiaj teb no. Nim no qhov no yog kuv txoj kev xyiv fab, thiab kuv txoj kev ua tsaug loj; muaj tseeb tiag, thiab kuv yuav ua kuv tus Vajtswv tsaug mus ib txhis li. Amees.