1 Nim no cov no yog tej lus uas Amulej tau qhuab qhia rau cov neeg uas nyob hauv thaj av Amonaihas, hais tias:

2 Kuv yog Amulej; kuv yog tus tub ntawm Khidaunas, tus uas ho yog tus tub ntawm Ixama-ees, uas ho yog ib tug xeeb ntxwv ntawm Aminadais; thiab nws tau yog tib tug Aminadais uas tau txhais cov ntawv uas nyob ntawm lub tuam tsev lub ntsa loog, uas tau raug sau los ntawm Vajtswv tus ntiv tes.

3 Thiab Aminadais ho yog ib tug xeeb ntxwv ntawm Nifais, uas ho yog tus tub ntawm Lihais, uas tau tawm tim thaj av Yeluxalees tuaj, tus uas tau yog ib tug xeeb ntxwv ntawm Manaxes, tus uas ho yog Yauxej tus uas tau muab muag mus rau Iyiv los ntawm nws cov kwv tij txhais tes tus tub.

4 Thiab saib seb, kuv kuj yog ib tug neeg uas muaj suab npe nyob tag nrho hauv cov neeg uas paub kuv; muaj tseeb tiag, thiab saib seb, kuv muaj tej kwv tij neej tsa thiab tej phooj ywg coob, thiab kuv kuj tau muaj kev nplua nuj heev los ntawm kuv txhais tes uas ua hauj lwm hnyav.

5 Txawm li ntawd los, tom qab ib puas yam tsav no, kuv ib txwm tsis tau paub txog tus Tswv tej kev, thiab nws tej txuj ci uas neeg paub tsis txog thiab lub hwj chim uas zoo kawg nkaus pes tsawg. Kuv tau hais tias kuv ib txwm tsis tau paub ntau txog tej yam no; tiam sis saib seb, kuv tau hais tsis yog, vim kuv tau pom ntau txog nws tej txuj ci uas neeg paub tsis txog thiab nws lub hwj chim uas zoo kawg nkaus; muaj tseeb tiag, twb pom txoj kev tshwj cov neeg no txoj sia.

6 Txawm li ntawd los, kuv tseem tau ua kuv lub siab tawv qhawv, vim kuv tau raug hu ntau zaus thiab kuv tsis kam mloog li; yog li ntawd kuv tau paub txog tej yam no, tiam sis kuv tau tsis xav paub; yog li ntawd kuv tau mus ntxeev siab tawm tsam Vajtswv, nyob hauv txoj kev phem ntawm kuv lub siab, mus txog hnub thib plaub ntawm lub xya hli no, uas nyob hauv xyoo thib kaum ntawm cov neeg txiav txim txoj kev kav.

7 Thaum kuv tseem tab tom ncig mus saib ib tug kwv tij txheeb ze, saib seb tus Tswv ib tug tim tswv tau tshwm sim rau kuv thiab tau hais tias: Amulej es, cia li rov qab lawm tom koj lub tsev, vim koj yuav tau yug tus Tswv ib tug yaj saub; muaj tseeb tiag, yog ib tug neeg dawb huv, uas yog ib tug neeg raug xaiv los ntawm Vajtswv; vim nws tau yoo mov tau ntau hnub los vim yog cov neeg no tej kev txhaum, thiab tau tshaib plab heev, thiab koj yuav tsum txais nws los rau hauv koj tsev thiab yug nws, thiab nws yuav foom koob hmoov rau koj thiab koj tsev neeg; thiab tus Tswv tej koob hmoov yuav los nyob saum koj thiab koj tsev neeg.

8 Thiab tau muaj tias kuv tau mloog li tus tim tswv lub suab, thiab tau rov qab ncaj qha los rau kuv tsev. Thiab thaum kuv tab tom los ntawd kuv tau pom tus neeg uas tus tim tswv tau hais rau kuv tias: Koj yuav tsum txais mus rau hauv koj lub tsev—thiab saib seb nws twb yog tib tug txiv neej no uas tau hais rau nej txog tej yam uas yog Vajtswv li.

9 Thiab tus tim tswv tau hais rau kuv tias nws yog ib tug neeg dawb huv; yog li ntawd kuv paub tias nws yog ib tug neeg dawb huv vim tau hais los ntawm Vajtswv ib tug tim tswv.

10 Thiab ntxiv, kuv paub tias tej uas nws tau ua tim khawv yeej muaj tseeb; vim saib seb kuv hais rau nej, tias ib yam li tus Tswv tseem muaj sia nyob, nws yeej tau xa nws tus tim tswv los ua tej yam no rau kuv paub; thiab nws tau ua li no thaum uas tus Amas no tseem nyob tom kuv tsev.

11 Vim saib seb, nws tau foom koob hmoov rau kuv tsev neeg, nws tau foom koob hmoov rau kuv, thiab kuv tej poj niam, thiab kuv tej me nyuam, thiab kuv txiv thiab kuv tej kwv tij neej tsa; muaj tseeb tiag, nws twb tau foom koob hmoov tag nrho rau kuv tej kwv tij neej tsa, thiab tus Tswv txoj koob hmoov tau los nyob saum peb raws li tej lus uas nws tau hais lawm.

12 Thiab nim no, thaum Amulej tau hais tej lus no tas lawm cov neeg tau pib xav tsis thoob, tau pom tias tau muaj ntau dua li ib tug tim khawv uas tau ua tim khawv txog tej uas lawv raug liam, thiab kuj txog tej uas yuav muaj los, raws li tus ntsuj plig ntawm txoj kev qhia tej uas yuav muaj los yav tom ntej uas nyob hauv nkawd.

13 Txawm li ntawd los, lawv muaj ib txhia uas tau xav nug nkawd, xwv kom los ntawm lawv tej kev ntxias lawv yuav cuab tau nkawd tej lus, xwv kom lawv yuav nrhiav tau tim khawv nkaug nkawd, xwv kom lawv yuav tau coj nkawd mus rau lawv cov neeg txiav txim kom nkawd yuav raug txiav txim raws li txoj kev cai, thiab kom nkawd yuav raug muab tua los sis pov rau hauv qhov taub, raws li txoj kev txhaum uas lawv muaj peev xwm ua kom muaj los sis ua tim khawv nkaug nkawd.

14 Nim no nws yog cov neeg uas tau nrhiav ua kom nkawd puas tsuaj, uas yog cov neeg hais kev cai, uas raug ntiav thiab tsa los ntawm cov neeg los tswj txoj kev cai nyob lub sij hawm uas lawv muaj plaub, los sis thaum muaj plaub txog tej kev txhaum ntawm cov neeg rau ntawm cov neeg txiav txim.

15 Nim no cov neeg hais kev cai no tau kawm tag nrho tej kev haub thiab kev ntxias ntawm cov neeg; thiab qhov no yuav ua kom lawv muaj txuj ci nyob hauv lawv tej hauj lwm.

16 Thiab tau muaj tias lawv tau pib nug Amulej, xwv kom los ntawm qhov ntawd lawv yuav ua kom nws tej lus sib chab sib chaws, los sis kom tsis raws li tej lus uas nws yuav tsum hais.

17 Nim no lawv tsis tau paub tias Amulej yeej paub txog lawv tej tswv yim. Tiam sis tau muaj tias thaum lawv pib nug nws, nws tau paub txog lawv tej kev xav, thiab nws tau hais rau lawv tias: Au nej cov neeg phem thiab tiam niag neeg tsis ncaj es, nej cov neeg hais kev cai thiab cov neeg siab phem es, vim nej tab tom ua tus dab txoj hauj lwm; vim nej tab tom cuab ntxiab thiab cuam koob kom mag Vajtswv tej neeg dawb huv.

18 Nej tab tom npaj kev yuav ua kom cov neeg ncaj ncees tej kev mus nkhaus, thiab coj Vajtswv txoj kev npau taws nqis los rau nej tej taub hau, kom mus txog thaum cov neeg no yuav raug puas tsuaj tas huv tib si.

19 Muaj tseeb tiag, Mauxiyas tau hais meej, tus uas yog peb tus vaj ntxwv kawg tau hais lawm, thaum nws yuav luag tso lub teb chaws, tsis muaj leej twg uas yuav muab tso rau, tau kom cov neeg no yuav tsum raug kav los ntawm lawv tej suab—muaj tseeb tiag, nws yeej tau hais meej tias yog lub sij hawm yuav los tias cov neeg no lub suab yuav xaiv txoj kev tsis ncaj ncees, ntawd yog tias, yog lub sij hawm yuav los tiag cov neeg no yuav poob mus rau hauv txoj kev txhaum, lawv yuav siav rau txoj kev puas tsuaj.

20 Thiab nim no kuv hais rau nej tias tus Tswv yeej yuav txiav txim zoo txog nej tej kev tsis ncaj ncees; nws yeej qhuab qhia zoo rau cov neeg no, los ntawm nws tej tim tswv tej suab tias: Nej cia li hloov siab lees txim, hloov siab lees txim, vim ntuj ceeb tsheej lub nceeg vaj nyob ze lawm.

21 Muaj tseeb tiag, nws yeej qhuab qhia zoo, los ntawm nws tej tim tswv tej suab tias: Kuv yuav nqis los rau hauv kuv cov neeg, nrog txoj kev txij lim thiab txoj kev ncaj ncees nyob hauv kuv tes.

22 Muaj tseeb tiag, thiab kuv hais rau nej tias yog tsis yog rau cov neeg ncaj ncees tej kev thov Vajtswv, cov uas nim no nyob hauv thaj av, ces nim no nej twb raug xyuas los ntawm txoj kev puas tsuaj huv tib si lawm; tiam sis nws yuav tsis yog los ntawm dej nyab, ib yam li cov neeg thaum Nau-as tseem ua neej nyob, tiam sis nws yuav yog los ntawm kev tshaib, thiab los ntawm kev mob nkeeg, thiab ntawm ntaj.

23 Tiam sis nws yog los ntawm cov neeg ncaj ncees tej kev thov Vajtswv nej thiaj li raug tseg; nim no yog li ntawd, yog nej yuav ntiab cov neeg ncaj ncees tawm hauv nej mus ces tus Tswv txhais tes yuav tsis nyob twj ywm; tiam sis nyob hauv nws txoj kev npau taws heev nws yuav tawm los tawm tsam nej; ces nej yuav raug tsim txom los ntawm kev tshaib, thiab kev mob nkeeg, thiab los ntawm tej ntaj; thiab lub caij nyoog twb los yuav txog ze lawm tsuas yog nej hloov siab lees txim xwb.

24 Thiab nim no tau muaj tias cov neeg tau npau taws heev ntxiv rau Amulej, thiab lawv tau qw nrov nrov, hais tias: Tus neeg no tau hais lus phem tawm tsam peb tej kev cai uas ncaj ncees, thiab peb cov tub hais kev cai txawj ntse uas peb tau xaiv.

25 Tiam sis Amulej tau ncav hlo nws txhais tes, thiab hais muaj zog dua rau lawv, hais tias: Au nej cov neeg phem thiab tiam niag neeg tsis ncaj es, vim li cas Dab Ntxwg Nyoog thiaj tuav tau nej tej siab ruaj ua luaj li ko? Vim li cas nej thiaj cia nej tus kheej rau nws xwv kom nws yuav muaj hwj chim kav nej, los npog nej tej qhov muag, kom nej yuav tsis to taub tej lus uas tau hais, raws li lawv qhov tseeb?

26 Vim saib seb, kuv puas tau ua tim khawv nkaug nej txoj kev cai? Nej tsis to taub; nej hais tias kuv tau hais nkaug tej txoj kev cai; tiam sis kuv twb tsis tau, tiam sis kuv tau hais zoo raws li nej txoj kev cai, rau nej txoj kev yuav raug txim xwb.

27 Thiab nim no saib seb, kuv hais rau nej, tias txoj kev puas tsuaj ntawm cov neeg no tau pib npaj los ntawm cov neeg tsis ncaj ncees ntawm nej tej neeg hais kev cai thiab nej tej neeg txiav txim.

28 Thiab nim no tau muaj tias thaum Amulej tau hais tej lus no cov neeg qw tawm nkaug nws, hais tias: Nim no peb paub tias tus neeg no yog tus dab ib tug me nyuam, vim nws tau dag rau peb; vim nws tau hais nkaug peb txoj kev cai. Thiab ziag no nws ho hais tias nws tsis tau hais nkaug no.

29 Thiab ntxiv, nws tau hais phem nkaug peb tej neeg hais kev cai, thiab peb cov neeg txiav txim.

30 Thiab tau muaj tias cov neeg hais kev cai tau muab tso rau hauv lawv tej siab tias lawv yuav tsum nco ntsoov tej no nkaug nws.

31 Thiab tau muaj ib tug nyob hauv lawv uas npe hu ua Xi-elas. Nim no nws yog tus uas liam Amulej thiab Amas heev tshaj, nws tau yog ib tug txawj tshaj ntawm lawv, uas muaj hauj lwm ntau ua heev nyob hauv cov neeg.

32 Nim no qhov tseem ceeb ntawm cov neeg hais kev cai no yog kom nplua nuj; thiab lawv tau nplua nuj raws li lawv tej hauj lwm.