1 Thiab tau muaj tias thaum lawv tau tsim ib lub koom txoos nyob rau hauv thaj av ntawd lawm, vaj ntxwv Lamaunais tau xav kom Amoos yuav tsum nrog nws mus rau thaj av Nifais, xwv kom nws yuav tau qhia Amoos rau nws txiv.

2 Thiab tus Tswv lub suab tau los rau Amoos hais tias: Koj tsis txhob nce mus rau pem thaj av Nifais, vim saib seb, vaj ntxwv yuav nrhiav koj txoj sia; tiam sis koj yuav tsum mus rau thaj av Midaunais; vim saib seb, koj tus kwv Aloos, thiab Mulaukhais thiab Eemas tseem nyob hauv qhov taub.

3 Nim no tau muaj tias thaum Amoos tau hnov li no, nws tau hais rau Lamaunais tias: Saib seb, kuv tus kwv thiab cov kwv tij nyob hauv qhov taub tom Midaunais, thiab kuv mus xwv kom kuv yuav tso tau lawv dim.

4 Nim no Lamaunais tau hais rau Amoos tias: Kuv paub, nyob hauv tus Tswv lub zog koj yeej ua tau ib puas yam tsav. Tiam sis saib seb, kuv yuav nrog koj mus rau thaj av Midaunais; vim tus vaj ntxwv ntawm thaj av Midaunais, uas npe hu ua Eethi-anaus, yog kuv ib tug phooj ywg; yog li ntawd kuv mus rau tom thaj av Midaunais, xwv kom kuv yuav tau thov rau tus vaj ntxwv ntawm thaj av, thiab nws yuav tso koj cov kwv tij tawm hauv qhov taub. Nim no Lamaunais tau hais rau nws tias: Leej twg qhia koj tias koj cov kwv tij nyob hauv qhov taub?

5 Thiab Amoos tau hais rau nws tias: Tsis muaj leej twg tau qhia kuv, tsuas yog Vajtswv xwb; thiab nws tau hais rau kuv tias—Cia li mus thiab mus tso koj cov kwv tij, vim lawv tau nyob qhov taub nyob hauv thaj av Midaunais.

6 Nim no thaum Lamaunais tau hnov qhov no lawm nws tau kom nws tej tub qhe npaj nws tej nees thiab nws tej tsheb nees luag kom txhij.

7 Thiab nws tau hais rau Amoos tias: Los, kuv yuav nrog koj nqis mus rau nram thaj av Midaunais, thiab nyob nrad kuv yuav thov tus vaj ntxwv kom nws yuav tso koj cov kwv tij tawm qhov taub.

8 Thiab tau muaj tias thaum Amoos thiab Lamaunais tseem tab tom taug kev mus rau nrad, nkawd tau ntsib Lamaunais txiv, tus uas yog vaj ntxwv kav tag nrho txhua thaj av.

9 Thiab saib seb, Lamaunais txiv tau hais rau nws tias: Vim li cas koj tsis tuaj rau pluas qav uas nyob rau hnub tseem ceeb ntawd thaum uas kuv tau ua ib pluag qav rau kuv tej tub, thiab rau kuv cov neeg?

10 Thiab nws kuj tau hais tias: Koj tab tom nrog tus Neeg Nifais no, uas yog ib tug me nyuam ntawm tus neeg dag tuaj mus lawm qhov twg?

11 Thiab tau muaj tias Lamaunais tau hais rau nws saib nws tab tom mus lawm qhov twg, vim nws ntshai tsam ua rau nws npau taws.

12 Thiab nws kuj tau hais rau nws tag nrho ib puas yam tsav uas ua rau nws nyob rau hauv nws lub nceeg vaj, uas nws tsis tau mus cuag nws txiv mus koom pluas qav uas nws tau npaj.

13 Thiab nim no thaum Lamaunais tau qhia rau nws tag nrho ib puas yam tsav no, saib seb, rau nws txoj kev ceeb, nws txiv tau npau taws rau nws, thiab tau hais tias: Lamaunais es, koj tseem yuav mus tso cov Neeg Nifais no, cov uas yog tus neeg dag cov tub. Saib seb, nws tau nyiag peb tej yawg koob; thiab nim no nws tej me nyuam kuj tau tuaj rau hauv peb xwv kom lawv yuav los ntawm lawv txoj kev ntxias thiab lawv tej kev dag, dag ntxias peb, kom lawv yuav rov qab nyiag peb tej qhov txhia chaw dua.

14 Nim no Lamaunais txiv tau txib kom nws yuav tsum muab nws rab ntaj tua Amoos. Thiab nws kuj tau txib Lamaunais tias nws yuav tsum tsis txhob mus rau tom thaj av Midaunais, tiam sis nws yuav tsum rov qab nrog nws mus lawm tom thaj av Ixama-ees.

15 Tiam sis Lamaunais tau hais rau nws tias: Kuv yuav tsis tua Amoos, kuv yuav tsis rov qab mus lawm tom thaj av Ixama-ees, tiam sis kuv yuav mus lawm tom thaj av Midaunais xwv kom kuv yuav tso tau Amoos cov kwv tij, vim kuv paub tias lawv yog neeg ncaj ncees thiab yog cov yaj saub dawb huv ntawm Vajtswv tus tseeb.

16 Nim no thaum nws txiv tau hnov tej lus no, nws tau npau taws rau nws, thiab nws tau rho hlo nws rab ntaj xwv kom nws yuav tua kom Lamaunais vau rau hauv av.

17 Tiam sis Amoos tau txav zog los thiab tau hais rau nws tias: Saib seb, koj tsis txhob tua koj tus tub; txawm li ntawd los nws tuag ntshe yuav zoo dua li koj, vim saib seb, nws tau hloov siab lees txim ntawm nws tej kev txhaum; tiam sis yog koj yuav tuag nyob rau lub sij hawm no, hauv koj txoj kev npau taws, koj tus ntsuj plig yuav dim tsis tau li.

18 Thiab ntxiv, tsim nyog tias koj yuav tswj koj tus kheej; vim yog tias koj yuav muab koj tus tub tua, nws tau yog ib tug neeg tsis muaj txim, nws cov ntshav yuav quaj tawm hauv av tuaj mus rau tus Tswv nws tus Vajtswv, rau txoj kev pauj txiaj ntsig los rau koj; thiab tej zaum koj yuav poob koj tus ntsuj plig mus.

19 Nim no thaum Amoos tau hais tej lus no rau nws, nws tau teb Amoos tias: Kuv paub tias yog kuv tua kuv tus tub, ces kuv yuav ua kom tej ntshav uas tsis muaj txim nrog; vim twb yog koj uas tau nrhiav ua kom nws puas tsuaj.

20 Thiab nws tau ncav hlo nws txhais tes tua Amoos. Tiam sis Amoos tau tiv nws txoj kev tua, thiab kuj tau thav nws txhais caj npab xwv kom nws tsis muaj peev xwm siv nws.

21 Nim no thaum vaj ntxwv tau pom tias Amoos muaj cuab kav tua tau nws, nws tau pib thov Amoos tias kom nws tseg nws txoj sia.

22 Tiam sis Amoos tau tsa hlo nws rab ntaj, thiab tau hais rau nws tias: Saib seb, kuv yuav muab koj tua ntshe tsuas yog koj yuav pub rau kuv tias kuv cov kwv tij yuav raug tso tawm ntawm qhov taub xwb.

23 Nim no vaj ntxwv, ntshai tsam nws yuav xiam nws txoj sia, tau hais tias: Yog koj yuav tso kuv kuv yuav muab rau koj txhua yam uas koj thov, txawm yuav muab ib nrab ntawm lub teb chaws los tau.

24 Nim no thaum Amoos tau pom tias nws tau soo tau vaj ntxwv laus raws li nws siab xav, nws tau hais rau nws tias: Yog koj yuav cia kom kuv cov kwv tij dim tawm ntawm qhov taub, thiab Lamaunais los tseem yuav ceev nws lub nceeg vaj, thiab koj yuav tsis npau taws nrog nws, tiam sis pub kom nws yuav ua tau raws li nws tus kheej xav nyob hauv txhua yam uas nws xav tau, ces kuv yuav tso koj; yog tsis li ntawd ces kuv yuav ntaus koj rau hauv av.

25 Nim no thaum Amoos tau hais tej lus no tas lawm, vaj ntxwv tau pib zoo siab vim yog nws txoj sia.

26 Thiab thaum nws tau pom tias Amoos tsis tau muaj siab xav ua kom nws puas tsuaj, thiab thaum nws kuj tau pom txoj kev hlub heev uas Amoos tau muaj rau nws tus tub Lamaunais, nws tau xav tsis thoob kiag li, thiab tau hais tias: Vim qhov no yog tag nrho tej uas koj xav tau xwb, kom koj yuav tso koj cov kwv tij, thiab cia kuv tus tub Lamaunais ceev nws lub nceeg vaj, saib seb, kuv yuav pub rau koj tias kuv tus tub yuav ceev nws lub nceeg vaj txij lub sij hawm no mus thiab mus ib txhis li; thiab kuv yuav tsis kav nws ntxiv lawm—

27 Thiab kuv kuj yuav pub rau koj tias koj cov kwv tij yuav raug tso tawm ntawm qhov taub, thiab koj thiab koj cov kwv tij yuav los cuag kuv, nyob hauv kuv lub nceeg vaj; vim kuv xav pom koj heev. Vim vaj ntxwv tau xav tsis thoob heev rau tej lus uas nws tau hais lawm, thiab kuj rau tej lus uas tau hais los ntawm nws tus tub Lamaunais, yog li ntawd nws tau xav kawm lawv.

28 Thiab tau muaj tias Amoos thiab Lamaunais tau taug kev mus rau tom thaj av Midaunais ntxiv. Thiab Lamaunais tau raug vaj ntxwv ntawm thaj av nyiam; yog li ntawd Amoos cov kwv tij tau raug coj tawm ntawm qhov taub.

29 Thiab thaum Amoos tau ntsib lawv nws tau tu siab heev kawg li, vim saib seb lawv tau liab qab, thiab lawv tej tawv nqaij tau yaig heev vim yog raug tej hlua khov khov khi. Thiab lawv kuj tau raug tshaib, yoo nqhis, thiab txhua yam kev txom nyem; txawm li ntawd los lawv tseem tau ua siab ntev nyob tag nrho hauv lawv tej kev txom nyem.

30 Thiab, li yam uas tau tshwm sim, nws tau yog lawv txoj hmoov tau poob rau hauv cov neeg uas tawv dua thiab nyaum dua tej; yog li ntawd lawv cov no thiaj tsis kam mloog lawv tej lus, thiab lawv cov no tau raws lawv tawm, thiab tau ntaus lawv, thiab raws lawv ib lub tsev dhau ib lub tsev, thiab ib qho chaw rau ib qho chaw, twb mus txog thaum lawv tau los txog rau hauv thaj av Midaunais; thiab qhov ntawd lawv tau raug txhom thiab pov rau hauv qhov taub, thiab raug xuas hlua khov khov khi, thiab tau cia nyob rau hauv qhov taub tau ntau hnub, thiab tau raug tso dim los ntawm Lamaunais thiab Amoos.