1 Nim no tau muaj tias tom qab uas Amulej tau xaus tej lus no lawm lawv tau ncaim ntawm cov neeg coob coob thiab tau los rau hauv thaj av Ntsawsoos.

2 Muaj tseeb tiag, thiab tag nrho cov kwv tij, tom qab uas lawv tau qhuab qhia txoj lus rau cov Neeg Xaulas, kuj tau los rau hauv thaj av Ntsawsoos tib yam.

3 Thiab tau muaj tias tom qab uas feem coob ntawm cov Neeg Xaulas tau sab laj ua ke txog tej lus uas tau raug qhia rau lawv, lawv tau npau taws vim yog txoj lus, vim nws tau rhuav lawv tej kev li kev cai uas tsis raws li txoj moo zoo; yog li ntawd lawv tsis kam mloog tej lus.

4 Thiab lawv tau xa neeg thiab sib sau cov neeg sawv daws thoob plaws rau tej thaj av tuaj ua ke, thiab tau sab laj nrog lawv txog tej lus uas tau hais lawm.

5 Nim no lawv tej nom tswv thiab lawv tej pov thawj thiab lawv tej xib hwb tsis pub cov neeg paub txog lawv tej kev xav; yog li ntawd lawv tau paub twj ywm txog cov neeg tag nrho tej siab.

6 Thiab tau muaj tias tom qab uas lawv tau nrhiav paub tej siab ntawm cov neeg sawv daws, cov uas tau nyiam txog txoj lus uas tau hais los ntawm Amas thiab nws cov kwv tij tau raug ntiab tawm ntawm thaj av; thiab lawv muaj coob; thiab lawv kuj tau los rau hauv thaj av Ntsawsoos.

7 Thiab tau muaj tias Amas thiab nws cov kwv tij tau qhuab qhia rau lawv.

8 Nim no cov Neeg Xaulas tau npau taws nrog Amoos cov neeg uas nyob hauv Ntsawsoos thiab tus thawj coj ntawm cov Neeg Xaulas, tau yog ib tug neeg phem heev; tau xa neeg mus cuag Amoos cov neeg xav kom lawv yuav tsum ntiab cov neeg ntawd tawm ntawm lawv thaj av tag nrho cov uas tau tuaj pem lawv rau hauv lawv cov no thaj av.

9 Thiab nws tau hais ntau yam lus tsiv tsiv tawm tsam lawv. Thiab nim no Amoos cov neeg tsis tau ntshai lawv tej lus; yog li ntawd lawv tsis tau ntiab lawv cov no tawm, tiam sis lawv tau txais tag nrho tej neeg pluag ntawm cov Neeg Xaulas uas tau los rau hauv lawv; thiab lawv tau tu lawv cov no, thiab tau muab ris tsho rau lawv hnav, thiab tau muab tej av rau lawv ua lawv qub txeeg qub teg; thiab lawv tau pab lawv raws li lawv tej kev xav tau.

10 Nim no qhov no tau txhib cov Neeg Xaulas npau taws tawm tsam Amoos cov neeg, thiab lawv tau pib sib xyaw nrog cov Neeg Lamas thiab kuj txhib lawv kom npau taws nkaug lawv.

11 Thiab li no cov Neeg Xaulas thiab cov Neeg Lamas tau pib npaj ua rog tawm tsam Amoos cov neeg, thiab kuj tawm tsam cov Neeg Nifais.

12 Thiab li no tau xaus xyoo thib kaum xya ntawm cov neeg txiav txim txoj kev kav cov Neeg Nifais.

13 Thiab Amoos cov neeg tau ncaim tawm ntawm thaj av Ntsawsoos, thiab tau los rau hauv thaj av Milej, thiab cia kom muaj chaw nyob hauv thaj av Ntsawsoos rau cov Neeg Nifais tej tub rog, xwv kom lawv yuav tawm tsam nrog tej tub rog ntawm cov Neeg Lamas thiab tej tub rog ntawm cov Neeg Xaulas; thiab li no tau pib ib npluav rog nyob nruab nrab ntawm cov Neeg Lamas thiab cov Neeg Nifais, nyob hauv xyoo thib kaum yim ntawm cov neeg txiav txim txoj kev kav; thiab ib zaj yuav hais txog lawv tej kev tsov rog tom ntej no mus.

14 Thiab Amas, thiab Amoos, thiab lawv tej kwv tij, thiab Amas ob tug tub tau rov qab los rau hauv thaj av Xalahelas, tom qab uas tau raug ua tej cuab yeej nyob rau hauv Vajtswv txhais tes los coj ntau tus ntawm cov Neeg Xaulas los mus rau txoj kev hloov siab lees txim; thiab coob npaum li cov uas tau coj los hloov siab lees txim tau raug raws tawm ntawm lawv thaj av; tiam sis lawv tau muaj av ua lawv qub txeeg qub teg nyob rau hauv thaj av Ntsawsoos, thiab lawv tau nqa tej cuab yeej ua rog tiv thaiv lawv tus kheej, thiab lawv tej poj niam, thiab tej me nyuam, thiab lawv tej av.

15 Nim no Amas, tau tu siab heev rau nws cov neeg tej kev tsis ncaj ncees, muaj tseeb tiag rau tej tsov rog, thiab txoj kev nqaij ntuag ntshav nrog, thiab tej kev sib cav sib ceg uas nyob hauv lawv; thiab tau raug tshaj tawm txoj lus, los sis tau raug xa mus tshaj tawm txoj lus, rau tag nrho cov neeg sawv daws nyob rau hauv txhua txhia lub nroog; thiab tau pom tias cov neeg tej siab tau pib tawv tuaj, thiab lawv tau pib npau taws vim yog txoj kev nruj ntawm txoj lus, nws tau tu siab heev kawg nkaus li.

16 Yog li ntawd, nws tau kom nws cov tub tuaj sib sau ua ke; xwv kom nws yuav tau muab rau lawv txhua tus nws tej kev qhuab qhia, kem tsis ua ke, txog tej yam uas nyob rau hauv kev ncaj ncees. Thiab peb muaj ib zag txog nws tej lus txib, uas nws tau muab rau lawv raws li nws tus kheej phau ceev xwm txheej.