1 Saib seb, nim no tau muaj tias tom qab uas Amoos cov neeg tau nyob tus rau hauv thaj av Ntsawsoos lawm, muaj tseeb tiag, thiab tom qab uas cov Neeg Lamas tau raug raws khiav tawm ntawm thaj av mus lawm, thiab lawv cov neeg tuag tau raug muab faus los ntawm cov neeg ntawm thaj av tas lawm—

2 Nim no tsis tau suav lawv cov neeg tuag vim yog lawv muaj coob heev; thiab cov Neeg Nifais tej neeg tuag los kuj tsis tau suav tib yam—tiam sis tau muaj tias tom qab uas lawv muab lawv cov neeg tuag faus tas, thiab tom qab tej hnub nyoog ua kev yoo mov, thiab txoj kev nyuaj siab, thiab txoj kev thov Vajtswv, (thiab nws tau yog xyoo thib kaum rau ntawm cov neeg txiav txim txoj kev kav Nifais cov neeg) tau pib muaj kev thaj yeeb tsis tu ncua thoob plaws txhua thaj av.

3 Muaj tseeb tiag, thiab cov neeg tau rau siab coj tus Tswv tej lus txib; thiab lawv tau raug coj nruj Vajtswv tej kab ke, raws li Mauxes txoj kev cai; vim lawv tau raug qhia coj Mauxes txoj kev cai kom mus txog thaum nws yuav muaj puv npo.

4 Thiab li no cov neeg tsis tau muaj kev sib thab nyob rau tag nrho xyoo thib kaum rau ntawm cov neeg txiav txim txoj kev kav cov Neeg Nifais.

5 Thiab tau muaj tias nyob rau thaum pib xyoo thib kaum xya ntawm cov neeg txiav txim txoj kev kav, tau muaj kev thaj yeeb tsis tu ncua.

6 Tiam sis tau muaj tias nyob rau thaum yuav kawg ntawm xyoo thib kaum xya, ib tug txiv neej tau tuaj rau hauv thaj av Xalahelas, thiab nws tau yog ib tug neeg tawm tsam Khetos, vim nws tau pib qhuab qhia rau cov neeg tawm tsam tej uas yuav muaj los yav tom ntej uas tau hais los ntawm tej yaj saub, txog txoj kev Khetos los.

7 Nim no tsis tau muaj ib txoj kev cai tawm tsam rau ib tug neeg txoj kev ntseeg; vim nws tau yog ib qho uas tsis ncaj nrog Vajtswv tej lus txib yog hais tias yuav muaj ib txoj kev cai uas yuav coj tib neeg mus rau tej chaw tsis xwm yeem.

8 Vim vajlugkub hais li no: Nej cia li xaiv hnub no saib nej yuav hawm ntseeg leej twg.

9 Nim no yog tias ib tug neeg tau xav hawm ntseeg Vajtswv, qhov ntawd yeej yog nws txoj kev ua tau; los sis tias, yog nws ho tau ntseeg Vajtswv qhov ntawd yeej yog nws txoj kev ua tau los hawm ntseeg nws; tiam sis yog nws ho tsis tau ntseeg nws yeej tsis muaj kev cai uas yuav rau txim rau nws.

10 Tiam sis yog nws tau tua neeg nws yuav raug txim tuag; thiab yog nws tau ua tub nyiag nws kuj yuav tau raug txim; thiab yog nws ua tub sab nws kuj yuav tau raug txim; thiab yog nws tau deev luag poj luag txiv nws kuj yuav tau raug txim; muaj tseeb tiag, rau tag nrho tej kev phem no lawv yeej yuav raug txim.

11 Vim tau muaj ib txoj kev cai tias tib neeg yuav tsum raug txiav txim raws li lawv tej kev txhaum. Txawm li ntawd los, tsis tau muaj kev cai tawm tsam ib tug neeg txoj kev ntseeg; yog li ntawd, ib tug neeg tsuas raug txim rau tej kev txhaum uas nws tau ua lawm xwb; yog li ntawd tib neeg sawv daws yeej nyob saum tej chaw xwm yeem.

12 Thiab tus neeg tawm tsam Khetos no, uas npe hu ua Khaulihos, (thiab txoj kev cai tsis muaj peev xwm tuav tau nws) tau pib qhuab qhia rau cov neeg tias yeej yuav tsis muaj Khetos. Thiab nws tau qhuab qhia li no, hais tias:

13 Au nej cov uas tau raug khi nyob hauv txoj kev cia siab ruam thiab tsis muaj qab hau es, vim li cas nej thiaj cia nej tus kheej kwv tus cuab nrog tej yam ruam ua luaj li no? Vim li cas nej thiaj li tos ib tug Khetos? Vim tsis muaj ib tug neeg txawj paub txog tej yam uas tseem yuav muaj los.

14 Saib seb, tej yam no uas nej hu ua tej kev qhia tej uas yuav muaj los yav tom ntej, uas nej hais tias tau cev nqis los ntawm cov yaj saub dawb huv, saib seb, lawv yog ib co kev li kev cai ruam heev los ntawm nej tej yawg koob.

15 Nej ho paub tau txog lawv tej kev tseeb li cas? Saib seb, nej yeej tsis muaj peev xwm paub txog tej uas nej tsis pom; yog li ntawd nej yeej tsis muaj peev xwm paub tias yuav muaj ib tug Khetos.

16 Nej tos ntsoov thiab hais tias nej pom ib qho kev zam txim ntawm nej tej kev txhaum. Tiam sis saib seb, qhov ntawd tsuas yog txoj kev xav ntawm lub siab npau xwb; thiab txoj kev thab ntawm nej tej siab no los vim yog tej kev li kev cai ntawm nej tej yawg koob, uas tau coj nej mus rau hauv ib txoj kev ntseeg txog tej uas tsis tseeb.

17 Thiab nws tau hais ntau yam zoo li ntawd ntxiv rau lawv, qhia rau lawv tias yuav tsis muaj txoj kev theej txhoj rau tib neeg tej kev txhaum, tiam sis txhua tus neeg nyob mus hauv lub neej no raws li txoj kev khwv ntawm nws; yog li ntawd txhua tus neeg vammeej raws li nws txoj kev txawv, thiab txhua tus neeg tau kav raws li nws lub zog; thiab txawm yog dab tsi uas ib tug neeg tau ua los yeej tsis txhaum.

18 Thiab nws tau qhia los rau lawv, coj tau lawv ntau tus tej siab lawm, tau ua kom lawv tsa lawv tej taub hau nyob hauv lawv txoj kev phem, muaj tseeb tiag, tau coj ntau tus poj niam, thiab txiv neej, mus ua txhaum kev nkauj kev nraug—tau qhia rau lawv tias thaum ib tug neeg tuag lawm, ces qhov ntawd yog qhov kawg ntawm nws lawm.

19 Nim no tus txiv neej no kuj tau mus rau tom thaj av Ntsawsoos, mus qhuab qhia tej yam no rau hauv Amoos cov neeg, uas tau yog cov neeg ntawm cov Neeg Lamas ib zaug.

20 Tiam sis saib seb lawv tau ntse dua li ntau tus Neeg Nifais; vim lawv tau txhom nws, thiab muab nws khi, thiab tau cab nws tuaj cuag Amoos, tus uas yog ib tug pov thawj hlob rau cov neeg ntawd.

21 Thiab tau muaj tias Amoos ua kom nws yuav tsum raug cab tawm ntawm thaj av mus. Thiab nws tau los rau hauv thaj av Khede-oos, thiab kuj tau pib qhuab qhia rau lawv; thiab ntawm no nws ua tsis tau ntau li siab xav, vim nws raug txhom thiab raug khi thiab raug cab mus cuag tus pov thawj hlob, thiab thawj tub txiav txim hauv thaj av.

22 Thiab tau muaj tias tus pov thawj hlob tau hais rau nws tias: Vim li cas koj thiaj mus ncig hloov tus Tswv tej kev? Vim li cas koj thiaj qhia cov neeg no tias yuav tsis muaj Khetos, kom los tab kaum lawv tej kev zoo siab? Vim li cas koj thiaj hais tawm tsam tag nrho tej yaj saub dawb huv tej kev qhia tej uas yuav muaj los yav tom ntej?

23 Nim no tus pov thawj hlob lub npe yog Khidaunas. Thiab Khaulihos tau hais rau nws tias: Vim kuv tsis qhia tej kev li kev cai ruam ntawm nej tej yawg koob, thiab vim kuv tsis qhia cov neeg no kom khi lawv tus kheej rau hauv tej kab ke thiab tej kev li kev cai uas raug ua tseg los ntawm cov pov thawj thaum ub, kom yuav siv tau hwj chim thiab txoj cai rau saum lawv, kom ceev lawv rau hauv txoj kev ua tsis tau dab tsi, xwv kom lawv yuav tsis tsa lawv tej taub hau, tiam sis kom raug tso qis raws li nej tej lus.

24 Nej hais tias cov neeg no yog ib co neeg nyob ywj siab. Saib seb, kuv hais tias lawv nyob hauv txoj kev ua qhev. Nej hais tias tej lus qhia tej uas yuav muaj los yav tom ntej thaum ub muaj tseeb. Saib seb, kuv hais tias nej yeej tsis paub tias lawv muaj tseeb.

25 Nej hais tias cov neeg no yog ib cov muaj txim thiab ib co neeg tau poob, vim yog txoj kev txhaum ntawm ib nkawg niam txiv. Saib seb, kuv hais tias ib tug me nyuam yeej tsis muaj txim vim yog niam thiab txiv.

26 Thiab nej kuj hais tias Khetos yuav los. Tiam sis saib seb, kuv hais tias nej yeej tsis paub tias yuav muaj ib tug Khetos. Thiab nej kuj hais tias nws yuav raug tua theej rau tej kev txhaum ntawm lub ntiaj teb—

27 Thiab li no nej tau ntxias dag cov neeg no mus raws li tej kev li kev cai ruam ntawm nej tej yawg koob, thiab raws li nej tej siab xav; thiab nej ceev lawv nyob qis, tib yam li nyob hauv txoj kev raug txim, xwv kom nej yuav tau tej hauj lwm ntawm lawv tej tes los rau nej tus kheej, xwv kom lawv yuav tsis txhob muaj peev xwm tsa hau ntsia, thiab kom lawv tsis txhob zoo siab rau lawv tej kev muaj cai thiab tej kev muaj cib fim.

28 Muaj tseeb tiag, lawv tsis kam siv tej uas yog lawv tug ntshai tsam lawv yuav ua siab lawv tej pov thawj, uas quab lawv raws li lawv siab nyiam, thiab tau coj lawv los ntseeg, ntawm lawv tej kev li kev cai thiab lawv tej npau suav thiab lawv tej kev xav ruam thiab lawv tej kev ua yog toog pom thiab lawv tej kev txhob txwm uas neeg paub tsis txog, tias lawv yuav tsum ua, yog lawv tsis ua raws li lawv cov no tej lus, ces yuav ua siab tus uas tsis muaj leej twg paub, tus uas lawv hais tias yog Vajtswv—ib tug uas ib txwm tsis tau muaj neeg pom los sis paub, tus uas ib txwm yeej tsis tau muaj thiab yeej yuav tsis muaj li.

29 Nim no thaum tus pov thawj hlob thiab tus thawj tub txiav txim tau pom txoj kev tawv ntawm nws lub siab, muaj tseeb tiag, thaum nkawd pom tias Vajtswv los nws tseem yuav hais lus phem rau thiab, nkawd txawm tsis teb rau nws cov lus; tiam sis nkawd tau ua kom nws yuav tsum raug khi; thiab lawv tau coj nws mus rau ntawm cov tub ceev xwm tes, thiab tau xa nws mus rau thaj av Xalahelas, xwv kom nws yuav raug coj los cuag Amas, thiab tus thawj tub txiav txim uas yog tus tswv xeev rau tag nrho thaj av.

30 Thiab tau muaj tias thaum nws raug coj los cuag Amas thiab tus thawj tub txiav txim, nws tau hais tib yam li uas nws tau hais nyob hauv thaj av Khede-oos; muaj tseeb tiag, nws tau hais lus phem rau Vajtswv.

31 Thiab nws tau tsa suab nrov zuj zus rau Amas, thiab tau hais lus phem tawm tsam cov pov thawj hlob thiab tej xib hwb, liam lawv txog txoj kev coj cov neeg kom ua raws li tej kev li kev cai ruam ntawm lawv tej yawg koob, kom yuav tau tej nqi zog hauj lwm ntawm cov neeg no los ua neej.

32 Nim no Amas tau hais rau nws hais tias: Koj yeej paub tias peb tsis tau muab tej nqi zog hauj lwm ntawm cov neeg no los rau peb ua neej; vim saib seb kuv tau ua hauj lwm txij li thaum cov tub txiav txim pib kav los txog nim no, nrog kuv ob txhais tes rau txoj kev pab kuv, tsis suav kuv tej kev uas tau mus ntau zaus ncig rau hauv thaj av tshaj tawm Vajtswv txoj lus rau kuv cov neeg.

33 Thiab tsis tas li tej hauj lwm ntau uas kuv tau ua nyob rau hauv lub koom txoos, kuv yeej ib txwm tsis tau txais li ib xinais rau kuv txoj hauj lwm; thiab kuv tej kwv tij los yeej tsis muaj ib tug tau, tsuas yog thaum nyob rau hauv lub rooj txiav txim xwb; thiab thaum ntawd peb tsuas tau txais raws li txoj kev cai rau peb tej sij hawm xwb.

34 Thiab nim no, yog peb tsis tau txais ib yam dab tsi rau peb tej hauj lwm nyob hauv lub koom txoos, nws muaj nuj nqis dab tsi rau peb mus ua hauj lwm nyob hauv lub koom txoos tsuas yog tshaj tawm qhov tseeb xwb, xwv kom peb yuav muaj kev xyiv fab vim yog txoj kev xyiv fab ntawm peb cov kwv tij?

35 Yog li ntawd vim li cas koj ho hais tias peb qhuab qhia rau cov neeg no kom peb nplua nuj, thaum koj tus kheej, paub tias peb tsis tau txais kev nplua nuj? Thiab nim no, koj puas ntseeg tias peb dag ntxias cov neeg no qhov uas ua muaj kev xyiv fab li ntawd nyob rau hauv lawv tej siab?

36 Thiab Khaulihos tau teb nws tias, Muaj tseeb tiag.

37 Thiab tom qab ntawd Amas tau hais rau nws tias: Koj puas ntseeg tias muaj ib tug Vajtswv?

38 Thiab nws tau teb tias, Tsis ntseeg.

39 Nim no Amas tau hais rau nws tias: Koj puas yuav tsis kam lees dua tias muaj ib tug Vajtswv thiab yuav tsis kam lees rau tus Khetos thiab? Vim saib seb, kuv hais rau koj tias, kuv paub yeej muaj ib tug Vajtswv, thiab tias Khetos yeej yuav los.

40 Thiab nim no koj muaj yam tim khawv dab tsi uas hais tias tsis muaj Vajtswv, los sis tias Khetos yuav tsis los? Kuv hais rau koj tias koj yeej tsis muaj dab tsi, tsuas yog koj tej lus xwb.

41 Tiam sis, saib seb, kuv muaj txhua yam tsav uas ua tim khawv tias tej yam no muaj tseeb; thiab koj kuj muaj txhua yam ua tim khawv rau koj tias lawv yeej muaj tseeb; thiab koj puas yuav tsis kam lees lawv? Koj puas ntseeg tias tej yam no twb muaj tseeb?

42 Saib seb, kuv paub tias koj yeej ntseeg, tiam sis koj raug ib tug ntsuj plig dag lawm, thiab koj tau muab Vajtswv tus Ntsuj Plig tso tseg xwv kom nws yuav tsis muaj chaw nyob hauv koj; tiam sis tus dab muaj hwj chim kav koj, thiab nws cab koj mus puag ncig, ua hauj lwm dag ntxias xwv kom nws yuav ua kom Vajtswv tej me nyuam puas tsuaj.

43 Thiab nim no Khaulihos tau hais rau Amas tias: Yog koj yuav ua ib lub cim rau kuv saib, kom kuv yuav ntseeg tias muaj ib tug Vajtswv, muaj tseeb tiag, ua rau kuv pom tias nws muaj hwj chim, thiab tom qab ntawd kuv yuav ntseeg txog qhov tseeb ntawm koj tej lus.

44 Tiam sis Amas tau hais rau nws tias: Koj twb tau muaj tej cim txaus lawm; koj tseem yuav sim koj tus Vajtswv thiab los? Koj yuav hais tias, Ua kom kuv pom ib lub cim, thaum koj twb muaj lus tim khawv ntawm tag nrho koj tej kwv tij no, thiab tag nrho tej yaj saub dawb huv? Tej vajlugkub muaj nyob ntawm koj xub ntiag, muaj tseeb tiag, thiab txhua yam qhia tias muaj ib tug Vajtswv; muaj tseeb tiag, lub ntiaj teb, thiab tag nrho txhua yam uas nyob saum nws, muaj tseeb tiag, thiab nws txoj kev tig, muaj tseeb tiag, thiab tag nrho tej ntiaj teb uas txav li lawv ib txwm txav twb ua tim khawv tias muaj ib tug Tswv Tsim Siab Kawg nkaus.

45 Thiab koj tseem mus ncig, dag ntxias cov neeg no tej siab, ua tim khawv rau lawv tias tsis muaj Vajtswv no los? Thiab tsis tas li ntawd koj tseem tsis kam lees tag nrho tej lus tim khawv no los? Thiab nws tau hais tias: Muaj tseeb tiag, kuv yuav tsis lees, tsuas yog koj yuav ua ib lub cim rau kuv pom xwb.

46 Thiab nim no tau muaj tias Amas tau hais rau nws tias: Saib seb, kuv tu siab heev vim yog txoj kev tawv ntawm koj lub siab, muaj tseeb tiag, tias koj yeej tseem yuav tawv rau tus ntsuj plig ntawm qhov tseeb, kom koj tus ntsuj plig yuav raug puas tsuaj.

47 Tiam sis saib seb, nws yuav zoo dua yog koj tus ntsuj plig ploj mus li cia koj ua qhov uas coj ntau tus ntsuj plig nqis mus rau txoj kev puas tsuaj, los ntawm koj tej lus dag thiab los ntawm koj tej lus ntxias; yog li ntawd yog koj yuav tsis kam lees dua, saib seb Vajtswv yuav qhuab koj, kom koj yuav rais los mus ua neeg hais tsis tau lus, kom koj yuav tsis qhib koj lub qhov ncauj ntxiv ib zaug li lawm, kom koj yuav tsis tau ntxias cov neeg no ntxiv lawm.

48 Nim no Khaulihos tau hais rau nws tias: Tsis yog kuv tsis lees tias muaj ib tug Vajtswv, tiam sis kuv tsis ntseeg tias muaj ib tug Vajtswv; thiab kuv hais tias koj yeej tsis paub tias muaj ib tug Vajtswv; thiab tsuas yog koj yuav ua kom kuv pom ib lub cim xwb, kuv yeej yuav tsis ntseeg.

49 Nim no Amas tau hais rau nws tias: Kuv yuav muab qhov no ua ib lub cim rau koj, kom koj yuav raug ua kom hais tsis tau lus, raws li kuv cov lus; thiab kuv hais, tias nyob hauv Vajtswv lub npe, koj yuav raug hais tsis tau lus, xwv kom koj yuav hais tsis tau dab tsi ntxiv lawm.

50 Nim no thaum Amas tau hais tej lus no tas lawm, Khaulihos tau raug hais tsis tau lus, kom nws hais tsis tau dab tsi ntxiv, raws li Amas tej lus.

51 Thiab nim no thaum tus thawj tub txiav txim tau pom qhov no, nws tau ncav nws txhais tes thiab sau ntawv rau Khaulihos, hais tias: Koj puas tau pom Vajtswv lub hwj chim? Nyob hauv leej twg uas koj tau xav kom Amas ua kom pom nws lub cim? Koj puas yuav xav kom nws ua raug rau lwm tus, ua kom koj pom ib lub cim? Saib seb, nws tau ua rau koj pom ib lub cim lawm; thiab nim no koj puas tseem yuav cam ntxiv?

52 Thiab Khaulihos tau ncav nws txhais tes thiab tau sau, hais tias: Kuv paub tias kuv yog ib tug neeg ruam, vim kuv hais tsis tau lus; thiab kuv paub tias tsis muaj dab tsi tsuas yog Vajtswv lub hwj chim xwb thiaj muaj peev xwm coj tau qhov no los rau kuv; muaj tseeb tiag, thiab kuv yeej ib txwm paub tias yeej muaj ib tug Vajtswv.

53 Tiam sis saib seb, tus dab tau dag ntxias kuv; vim nws tau tshwm sim rau kuv li ib tug tim tswv, thiab tau hais rau kuv tias: Cia li mus thiab kho cov neeg no, vim lawv txhua tus tau mus yuam kev raws li ib tug Vajtswv uas tsis muaj leej twg paub. Thiab nws tau hais rau kuv tias: Yeej tsis muaj Vajtswv li; muaj tseeb tiag; thiab nws tau qhia rau kuv tej uas kuv yuav tsum hais. Thiab kuv tau qhia nws tej lus; thiab kuv qhia lawv vim yog lawv haum neeg ntiaj teb lub siab; thiab kuv tau qhia lawv, mus txog thaum kuv vam meej heev, kawg tias kuv twb tau ntseeg tias tej ntawd yeej muaj tseeb; thiab vim qhov no kuv tau tawm tsam qhov tseeb, mus txog thaum kuv coj tau qhov kev foom loj heev no los rau saum kuv.

54 Nim no thaum nws tau hais qhov no tas lawm, nws tau thov kom Amas thov Vajtswv, xwv kom qhov kev foom yuav raug tshem ntawm nws mus.

55 Tiam sis Amas tau hais rau nws tias: Yog qhov kev foom no tshem tawm ntawm koj lawm ces koj yeej yuav rov qab mus ntxias cov neeg no tej siab dua; yog li ntawd, nws yeej yuav muaj mus kom raws li tus Tswv siab xav.

56 Thiab tau muaj tias txoj kev foom ntawd tsis raug muab tshem tawm ntawm Khaulihos; tiam sis nws tau raug ntiab tawm, thiab tau mus ncig ib lub tsev dhau ib lub tsev thov nws tej zaub mov.

57 Nim no txoj kev paub txog tej uas tau tshwm sim rau Khaulihos tau raug muab tshaj tawm tam sim ntawd thoob plaws rau txhua thaj av; muaj tseeb tiag, txoj kev xa xov tau raug xa tawm los ntawm tus thawj tub txiav txim mus rau tag nrho cov neeg nyob hauv thaj av, tshaj tawm rau cov uas tau ntseeg Khaulihos tej lus kom lawv cia li hloov siab lees txim sai sai, tsis li ntawd ces tib txoj kev rau txim ntawd yuav los rau lawv thiab.

58 Thiab tau muaj tias lawv sawv daws tau raug kawm txog txoj kev phem ntawm Khaulihos; yog li ntawd lawv sawv daws tau hloov siab tshiab dua los cuag tus Tswv; thiab qhov no tau xaus txoj kev tsis zoo raws li Khaulihos. Thiab Khaulihos tau mus ncig ib lub tsev dhau ib lub tsev, thov zaub mov los pab nws.

59 Thiab tau muaj tias thaum nws tawm mus rau hauv cov neeg, muaj tseeb tiag, rau hauv ib cov neeg uas tau faib lawv tus kheej tawm ntawm cov Neeg Nifais thiab tau hu lawv ua cov neeg Xaulas, uas tau raug coj los ntawm ib tug txiv neej uas npe hu ua Xaulas—thiab thaum nws tau tawm mus rau hauv lawv, saib seb, nws tau raug hla thiab tsuj, mus txog thaum nws tuag.

60 Thiab li no peb pom qhov kawg ntawm nws tus uas tau hloov tus Tswv tej kev; thiab li no peb pom tias tus dab yeej yuav tsis pab nws tej me nyuam nyob tom hnub kawg, tiam sis tsuas luag lawv nrawm nroos nqis mus rau hauv ntuj txiag teb tsaus xwb.