1 Thiab nim no tau muaj tias Amas tau rov qab los tom Khede-oos thaj av los, tom qab uas tau qhia cov neeg Khede-oos ntau yam uas tsis muaj peev xwm muab sau cia, tau txhim tsa tus txheej txheem ntawm lub koom txoos ib yam li nws twb tau ua nyob hauv thaj av Xalahelas, muaj tseeb tiag, nws tau rov qab los rau hauv nws lub tsev nyob hauv Xalahelas los so ntawm tej hauj lwm uas nws tau ua lawm.

2 Thiab xws li no tau xaus xyoo thib cuaj ntawm cov neeg txiav txim txoj kev kav Nifais cov neeg.

3 Thiab tau muaj tias thaum pib xyoo thib kaum ntawm cov neeg txiav txim txoj kev kav Nifais cov neeg, Amas tau ncaim ntawm qhov ntawd thiab tau mus ncig rau hauv thaj av Milej, nyob sab hnub poob ntawm tus dej Xidoos, nyob sab hnub poob tom tej ciam hav zoov.

4 Thiab nws tau pib qhia cov neeg nyob hauv thaj av Milej raws li Vajtswv tus txheej txheem dawb huv, uas nws tau raug hu; thiab nws tau pib qhia cov neeg thoob plaws txhua thaj av hauv Milej.

5 Thiab tau muaj tias cov neeg tau tuaj rau nws thoob plaws ntawm txhua tus ciam dej ciam av ntawm thaj av uas nyob ib sab tom hav zoov. Thiab lawv tau ua kev cai raus dej thoob plaws txhua thaj av;

6 Ces thaum uas nws tau ua nws txoj hauj lwm nyob hauv Milej tag lawm nws tau ncaim qhov ntawd mus, thiab tau mus peb hnub ncig mus rau sab pem toj ntawm thaj av Milej; thiab nws tau los rau ib lub nroog uas hu ua Amonaihas.

7 Nim no nws yog raws li kev li kev cai uas Nifais cov neeg tis npe rau lawv tej av thiab tej nroog, thiab lawv tej zej zog, muaj tseeb tiag, twb tag nrho rau lawv tej zej zog me, raws lub npe ntawm nws tus uas xub xub nyob hauv lawd; thiab thaj av Amonaihas thiaj tau tis ib yam li ntawd.

8 Thiab tau muaj tias thaum Amas tau tuaj rau hauv lub nroog Amonaihas nws tau pib qhuab qhia Vajtswv txoj lus rau lawv.

9 Nim no Dab Ntxwg Nyoog tau tuav cov neeg ntawm lub nroog Amonaihas tej siab tej ntsws ruaj heev; yog li ntawd lawv tsis kam mloog Amas tej lus.

10 Txawm li ntawd los Amas tau ua hauj lwm ntau nyob hauv sab ntsuj plig, sib ntswg nrog Vajtswv nyob hauv txoj kev thov Vajtswv heev, xwv kom nws yuav nchuav nws tus Ntsuj Plig rau saum cov neeg uas nyob hauv lub nroog; xwv kom nws thiaj yuav cia Amas muab lawv ua kev cai raus dej rau txoj kev hloov siab lees txim.

11 Txawm li ntawd los, lawv tau ua lawv tej siab tawv qhwb qhawv, hais rau nws tias: Saib seb, peb paub tias koj yog Amas; thiab peb paub tias koj yog tus pov thawj hlob rau lub koom txoos uas koj tau txhim tsa nyob ntau qhov chaw ntawm thaj av, raws li koj txoj kev li kev cai; thiab peb tsis yog neeg ntawm koj lub koom txoos, thiab peb tsis ntseeg tej kev li kev cai ruam li ntawd.

12 Thiab nim no peb paub tias vim peb tsis yog neeg ntawm koj lub koom txoos peb paub tias koj tsis muaj hwj chim rau saum peb; thiab koj tau muab lub rooj txiav txim rau Nifaihas lawm; yog li ntawd koj tsis yog tus thawj tub txiav txim rau peb lawm.

13 Nim no thaum cov neeg tau hais li no lawm, thiab tau tawm tsam nws tej lus tag nrho, thiab tau thuam nws, thiab nto qaub ncaug rau nws, thiab tau ua kom nws yuav tsum raug ntiab tawm ntawm lawv lub nroog mus, nws tau ncaim tawm ntawm qhov ntawd thiab tau ncig mus rau lub nroog uas hu ua Aloos.

14 Thiab tau muaj tias thaum nws tseem tab tom mus tid, tau raug tsuam hnyav nrog txoj kev nyuaj siab, tiv qees txoj kev txom nyem thiab kev mob ntau ntawm sab ntsuj plig, vim txoj kev phem ntawm cov neeg uas nyob hauv lub nroog Amonaihas, tau muaj tias thaum Amas tseem raug tsuam hnyav nrog txoj kev nyuaj siab, saib seb tus Tswv ib tug tim tswv tau tshwm sim rau nws, hais tias:

15 Koj tau koob hmoov, Amas; yog li ntawd, cia li tsa koj lub taub hau thiab cia li zoo siab, vim koj muaj qhov zoo heev los zoo siab; vim koj tau mob siab coj Vajtswv tej lus txib txij li lub sij hawm uas koj tau txais koj thawj tsab xov los ntawm nws. Saib seb, kuv yog nws tus uas tau coj tsab xov ntawd los rau koj.

16 Thiab saib seb, kuv tau raug xa los txib kom koj rov qab mus rau lub nroog Amonaihas, thiab rov qhuab qhia dua rau cov neeg ntawm lub nroog; muaj tseeb tiag, qhuab qhia rau lawv. Muaj tseeb tiag, hais rau lawv tias, tsuas yog lawv hloov siab lees txim xwb tsis li ntawd tus Tswv Vajtswv yuav ua kom lawv puas tsuaj.

17 Vim saib seb, lub sij hawm no lawv kawm kom lawv yuav rhuav koj cov neeg txoj kev ywj siab, (vim tus Tswv tau hais li no) uas tsis raws li tej lus txib, thiab tej kev txiav txim, thiab tej lus txib uas nws tau muab rau nws cov neeg.

18 Nim no tau muaj tias tom qab uas Amas tau txais nws tsab xov los ntawm tus Tswv tus tim tswv lawm nws tau rov qab nrawm nroos mus rau tom thaj av Amonaihas. Thiab nws tau mus lwm txoj kev nkag mus rau hauv lub nroog, muaj tseeb tiag, mus txoj kev uas nyob rau sab nram hav ntawm lub nroog Amonaihas.

19 Thiab thaum uas nws tau nkag mus rau hauv lub nroog nws tau tshaib plab heev, thiab nws tau hais rau ib tug txiv neej tias? Koj puas kam muab ib yam dab tsi rau Vajtswv tus tub qhe uas txo hwj chim noj?

20 Thiab tus txiv neej tau hais rau nws tias: Kuv yog ib tug Neeg Nifais, thiab kuv paub tias koj yog Vajtswv ib tug yaj saub dawb huv, vim koj yog tus neeg uas tus tim tswv tau hais nyob hauv ib txoj kev ua yog toog pom tias: Koj yuav tau txais. Yog li ntawd, cia li nrog kuv mus lawm tom kuv tsev thiab kuv yuav faib kuv tej zaub mov rau koj; thiab kuv paub tias koj yuav yog ib qho koob hmoov rau kuv thiab kuv tsev neeg.

21 Thiab tau muaj tias tus txiv neej tau txais nws mus rau hauv nws tsev; thiab tus txiv neej yog hu ua Amulej; thiab nws tau nqa mov mog thiab nqaij thiab muab tso rau ntawm Amas xub ntiag.

22 Thiab tau muaj tias Amas tau noj mov mog thiab tau tsau; thiab nws tau foom koob hmoov rau Amulej thiab nws tsev neeg, thiab nws tau ua Vajtswv tsaug.

23 Thiab tom qab uas nws tau noj tag thiab tau tsau lawm nws tau hais rau Amulej tias: Kuv yog Amas, thiab yog tus pov thawj hlob saib xyuas Vajtswv lub koom txoos thoob plaws hauv thaj av.

24 Thiab saib seb, kuv tau raug hu tuaj qhuab qhia Vajtswv txoj lus rau hauv tag nrho cov neeg no, raws li tus ntsuj plig ntawm txoj kev tshwm sim thiab qhia tej uas yuav muaj los yav tom ntej; thiab kuv tau tuaj nyob hauv thaj av no thiab lawv tsis kam txais kuv, tiam sis lawv muab kuv ntiab tawm thiab kuv twb yuav luag tig kuv lub nraub qaum rau thaj av no mus ib txhis.

25 Tiam sis saib seb, kuv tau raug txib tias kuv yuav tsum rov qab tuaj dua thiab qhia tej uas yuav muaj los yav tom ntej rau cov neeg no, muaj tseeb tiag, thiab ua tim khawv nkaug lawv txog lawv tej kev tsis ncaj ncees.

26 Thiab nim no, Amulej, vim koj tau pub kuv noj thiab tau coj kuv los tsev, koj tau koob hmoov; vim kuv tau tshaib plab heev, vim kuv tau yoo mov tau ntau hnub.

27 Thiab Amas tau nyob nrog Amulej tau ntau hnub ua ntej nws pib qhuab qhia rau cov neeg.

28 Thiab tau muaj tias cov neeg tau pib ua tej kev tsis ncaj ncees loj heev ntxiv tuaj.

29 Thiab txoj lus tau los rau Amas hais tias: Cia li mus; thiab hais rau kuv tus tub qhe Amulej, cia li mus thiab qhia tej uas yuav muaj los yav tom ntej rau cov neeg no, hais tias—Nej cia li hloov siab lees txim, vim tus Tswv tau hais li no, tsuas yog nej hloov siab lees txim xwb tsis li ntawd kuv yuav los saib xyuas cov neeg no nyob hauv kuv txoj kev npau taws; muaj tseeb tiag, thiab kuv yuav tsis tig kuv txoj kev npau taws heev mus li.

30 Thiab Amas tau mus, thiab Amulej thiab, mus rau hauv cov neeg, mus tshaj tawm Vajtswv tej lus rau lawv; thiab nkawd tau muaj tus Vaj Ntsuj Plig Dawb Huv puv npo.

31 Thiab nkawd tau hwj chim uas tau muab rau nkawd, kawg tias lawv tsis muaj cuab kav ceev nkawd rau hauv tej qhov taub; thiab tsis muaj ib tug neeg twg uas yuav muaj peev xwm tua tau nkawd; txawm li ntawd los nkawd tsis tau siv nkawd tej hwj chim mus txog thaum nkawd raug khi thiab raug muab pov rau hauv qhov taub. Nim no, tau ua li no xwv kom tus Tswv yuav qhia nws lub hwj chim dhau los ntawm nkawd.

32 Thiab tau muaj tias nkawd tau mus ncig thiab tau pib qhuab qhia thiab qhia tej uas yuav muaj los yav tom ntej rau cov neeg, raws li tus ntsuj plig thiab lub hwj chim uas tus Tswv tau muab rau nkawd.