1 Thiab nim no tau muaj tias kuv tau txais ib tsab ntawv ntawm Amauloos, tus uas yog vaj ntxwv, hais tias yog kuv yuav tso cov neeg raug txim hauv hav rog uas peb txhom tau ces nws yuav muab lub nroog Eethiphalas rau peb.

2 Tiam sis kuv tau xa ib tsab ntawv mus rau vaj ntxwv, tias peb yeej paub tseeb tias peb tej tub rog yeej muaj zog txaus yuav muab lub nroog Eethiphalas los ntawm peb lub zog; thiab los ntawm qhov uas yuav tso cov neeg raug txim los pauv lub nroog ntawd peb kuj yuav xav rau peb tus kheej tias tsis ntse, thiab tias peb tsuas yuav muab peb cov neeg raug txim rov rau kev sib pauv neeg xwb.

3 Thiab Amauloos tau tsis kam ua li kuv tsab ntawv, vim nws tsis kam sib pauv tej neeg raug txim; yog li ntawd peb tau pib npaj mus tawm tsam lub nroog Eethiphalas.

4 Tiam sis cov neeg hauv Eethiphalas tau ncaim lub nroog lawm, thiab tau khiav mus rau lawv lwm lub nroog, uas lawv tau muaj, mus tiv thaiv lawv; thiab li no lub nroog Eethiphalas tau poob rau peb tes.

5 Thiab li no tau xaus xyoo thib nees nkaum thiab yim ntawm cov neeg txiav txim txoj kev kav.

6 Thiab tau muaj tias nyob rau thaum pib xyoo thib nees nkaum thiab cuaj, peb tau txais ib cov khoom noj khoom siv, thiab kuj tau txais neeg ntxiv rau peb cov tub rog, los ntawm thaj av Xalahelas, thiab los ntawm tej thaj av uas nyob ib ncig, tau txog li rau txhiab leej neeg, twb tsis suav rau caum leej ntawm cov neeg Amoos cov tub uas tau tuaj koom lawv cov kwv tij, uas yog kuv pab hluas ob txhiab leej. Thiab nim no saib seb, peb tau muaj zog, muaj tseeb tiag, thiab peb kuj tau muaj khoom noj khoom siv coj tuaj rau peb siv tsis tag.

7 Thiab tau muaj tias peb tau xav ua ib npluav rog nrog cov tub rog uas tau muab tso tsom kwm lub nroog Khumenais.

8 Thiab nim no saib seb, kuv yuav qhia rau koj tias tsis ntev no peb twb ua tau li peb siab xav lawm; muaj tseeb tiag, nrog peb cov tub rog muaj zog, los sis nrog ib feem ntawm peb cov tub rog muaj zog, peb tau vij lub nroog Khumenais, hmo ntuj, ib nyuag ua ntej lub sij hawm uas lawv tseem yuav tau txais tej khoom noj khoom siv.

9 Thiab tau muaj tias peb tau rub yeej ib ncig lub nroog tau ntau hmo; tiam sis peb tau pw puag rawv peb tej ntaj, thiab tso neeg zov, kom cov Neeg Lamas tsis muaj peev xwm tuaj rau saum peb thaum hmo ntuj thiab tua peb, lawv tau sim ua li ntawd ntau zaus; tiam sis ntau zaus uas lawv tau sim ua li no lawv tej ntshav tau nrog.

10 Ntev loo lawv tej khoom noj khoom siv tau tuaj txog, thiab lawv tseem yuav luag nkag mus rau hauv lub nroog yav hmo ntuj. Thiab peb, ntxim tias yog cov Neeg Lamas, ho yog Neeg Nifais; yog li ntawd, peb tau txhom lawv thiab muab lawv tej khoom noj khoom siv.

11 Thiab txawm tias cov Neeg Lamas tau raug txiav ntawm lawv tej kev pab li no los, lawv tseem muaj peev xwm yuav tswj tuav lub nroog; yog li ntawd nws tau tsim nyog lawm tias peb yuav tsum muab cov khoom noj khoom siv ntawd thiab xa lawv mus rau tom Yudais, thiab xa peb cov neeg raug txim mus rau thaj av Xalahelas.

12 Thiab tau muaj tias tsis tau muaj pes tsawg hnub ua ntej cov Neeg Lamas tau pib poob tag nrho tej kev cia siab ntawm txoj kev pab; yog li ntawd lawv tau muab lub nroog rau peb tes; thiab li no peb tau ua tau li peb tej kev npaj muab lub nroog Khumenais.

13 Tiam sis tau muaj tias peb cov neeg raug txim tau coob kawg nkaus, txawm tias peb muaj coob kawg thiab, los peb tseem tau raug siv tag nrho peb tej zog los ceev lawv, los sis muab lawv tua kom tuag.

14 Vim saib seb, lawv pheej nyiag kev khiav coob leej, thiab pheej tawm tsam nrog pob zeb, thiab nrog qws, los sis nrog txhua yam khoom uas lawv yuav muab tau rau hauv lawv tes, kawg tias peb tau muab lawv tua mus txog ob txhiab leej tom qab uas lawv tau zeem los ua neeg raug txim hauv hav rog.

15 Yog li ntawd nws tau rais los tsim nyog rau peb, kom peb yuav muab qhov kawg rau lawv txoj sia, los sis zov khoo lawv, tuav rawv ntaj hauv tes, nqis mus rau nram thaj av Xalahelas; thiab peb tej khoom noj khoom siv los twb tsis tshaj li uas txaus rau peb cov neeg, txawm tias suav tag nrho cov uas peb txeeb tau los ntawm cov Neeg Lamas.

16 Thiab nim no, nyob rau lub caij nyuaj tseem ceeb no, nws tau rais los yog ib qho nyuaj heev uas yuav txiav txim siab txog tej neeg raug txim hauv hav rog no; txawm li ntawd los, peb tau txiav txim siab xa lawv nqis mus rau thaj av Xalahelas; yog li ntawd peb tau xaiv ib co ntawm peb cov neeg, thiab tau kom lawv coj peb cov neeg raug txim nqis mus rau nram thaj av Xalahelas.

17 Tiam sis tau muaj tias tag kis lawv tau rov qab los. Thiab nim no saib seb, peb tsis tau nug lawv txog cov neeg raug txim; vim saib seb, cov Neeg Lamas tau tuaj tua peb, thiab lawv tau rov qab los ncaj sij hawm cawm peb dim ntawm txoj kev poob rau hauv lawv tej. Vim saib seb, Amauloos tau xa tej khoom noj khoom siv tshiab thiab tej tub rog coob heev tuaj pab lawv.

18 Thiab tau muaj tias cov neeg uas peb tau xa nrog cov neeg raug txim mus tau los txog ncaj sij hawm los xyuas lawv, thaum lawv yuav luag kov yeej peb.

19 Tiam sis saib seb, kuv pab me nyuam yaus ob txhiab thiab rau caum tus tau tawm tsam sib zog kawg nkaus li; muaj tseeb tiag, lawv tau tawv ruaj nrees rau cov Neeg Lamas, thiab tau muab kev tuag rau cov uas nyom lawv.

20 Thiab thaum peb cov tub rog uas seem yuav luag thim ntawm cov Neeg Lamas, saib seb, ob txhiab thiab rau caum leej ntawd tau tawv qhawv thiab tsis ntshai li.

21 Muaj tseeb tiag, thiab lawv tau mloog thiab kam ua raws nraim li txhua lo lus uas tau txib; muaj tseeb tiag, thiab raws nraim li lawv txoj kev ntseeg nws twb tau muaj rau lawv lawm; thiab kuv tseem nco qab txog tej lus uas lawv tau hais rau kuv tias lawv niam tau qhia lawv.

22 Thiab nim no saib seb, nws yog kuv cov tub no, thiab cov neeg uas tau raug xaiv los saib cov neeg raug txim, cov uas peb tshuav nqi rau txoj kev yeej loj no; vim lawv yog cov uas tau tua yeej cov Neeg Lamas; yog li ntawd lawv tau raug raws rov qab mus rau lub nroog Meethais.

23 Thiab peb rov qab tau peb lub nroog Khumenais, thiab tsis tau raug puas tsuaj tag nrho los ntawm ntaj; txawm li ntawd los, peb tau raug xiam ntau heev.

24 Thiab tau muaj tias tom qab uas cov Neeg Lamas tau khiav lawm, tam sim ntawd kuv tau txib kom cia li nqa kuv cov neeg uas tau raug mob lawm tawm ntawm cov neeg tuag mus, thiab tau kom muab lawv tej qhov txhab qhwv.

25 Thiab tau muaj tias tau muaj ob puas tus, ntawm kuv ob txhiab thiab rau caum leej, uas tau qaug zog lawm vim yog txoj kev xiam ntshav; txawm li ntawd los, raws li Vajtswv txoj kev zoo, thiab rau peb txoj kev xav tsis thoob li, thiab rau txoj kev xyiv fab ntawm tag nrho peb cov tub rog, lawv tsis tau muaj ib tug kiag uas tau piam sij; muaj tseeb tiag, thiab lawv kuj tsis muaj ib tug li uas tsis tau raug mob ntau li.

26 Thiab nim no, txoj kev uas lawv raug cawm cia tau ua rau tag nrho peb cov tub rog xav tsis thoob li, muaj tseeb tiag, lawv ho raug cawm tseg thaum uas ho muaj ib txhiab ntawm peb cov kwv tij uas tau raug tua. Thiab peb yeej tsuas zoo siab qhuas rau Vajtswv lub hwj chim tseem ceeb, vim yog lawv txoj kev ntseeg heev uas lawv tau raug qhia kom ntseeg—tias muaj ib tug Vajtswv uas ncaj ncees, thiab yog leej twg tsis xyem xyav, ces lawv yeej yuav raug tsom kwm los ntawm nws lub hwj chim uas muaj txuj ci tseem ceeb.

27 Nim no qhov no yog txoj kev ntseeg ntawm cov no uas kuv tau hais txog lawm; lawv tseem hluas, thiab lawv tej siab yeej ruaj nrees, thiab lawv yeej muab lawv txoj kev cia siab rau hauv Vajtswv tsis tu ncua li.

28 Thiab nim no tau muaj tias tom qab uas peb tau tu peb tej neeg raug mob, thiab tau faus peb tej neeg tuag thiab cov Neeg Lamas tej neeg tuag, cov uas muaj coob heev tag lawm, saib seb, peb tau nug Nkis txog cov neeg raug txim uas lawv tau pib nrog nqis mus rau nram thaj av Xalahelas.

29 Nim no Nkis tau yog tus thawj coj kav pab uas tau tsa saib xyuas coj lawv nqis mus rau nram thaj av.

30 Thiab nim no, cov no yog cov lus uas Nkis tau hais rau kuv: Saib seb, peb tau pib nqis mus rau nram thaj av Xalahelas nrog peb cov neeg raug txim. Thiab tau muaj tias peb tau ntsib cov neeg soj ntsuam ntawm peb cov tub rog, uas tau raug xa tawm mus saib cov Neeg Lamas lub yeej.

31 Thiab lawv tau qw rau peb, hais tias—Saib seb, cov Neeg Lamas tej tub rog tab tom mus ncaj nraim rau lub nroog Khumenais; thiab saib seb, lawv yuav tawm tsam lawv, muaj tseeb tiag, thiab yuav ua kom peb cov neeg puas tsuaj.

32 Thiab tau muaj tias peb cov neeg raug txim tau hnov lawv qw, ces tau ua rau lawv muaj siab loj; thiab lawv tau sawv ntxeev siab tawm tsam peb.

33 Thiab tau muaj tias vim yog lawv txoj kev ntxeev siab peb thiaj tau pib xuas peb tej ntaj tua lawv. Thiab tau muaj tias lawv tau khiav tib pab los rau saum peb tej ntaj, ces, lawv feem coob tau raug tua; thiab lawv feem uas seem tshuav tau txeem dhau thiab tau khiav ntawm peb mus lawm.

34 Thiab saib seb, thaum lawv tau khiav lawm thiab peb tsis muaj peev xwm caum tau lawv, peb tau mus nrawm nroos rau lub nroog Khumenais; thiab saib seb, peb tau mus txog ncaj sij hawm kom peb yuav pab tau peb cov kwv tij tswj hwm lub nroog.

35 Thiab saib seb, peb rov qab raug cawm dim ntawm peb tej yeeb ncuab tes. Thiab peb tus Vajtswv lub npe tau koob hmoov; vim saib seb, nws twb yog tus uas cawm peb dim; muaj tseeb tiag, tau ua tej yam tseem ceeb heev no rau peb.

36 Nim no tau muaj tias thaum kuv, Hilamas, tau hnov Nkis tej lus no, kuv tau muaj kev xyiv fab kawg nkaus puv npo vim yog Vajtswv txoj kev zoo uas tau tsom kwm peb, xwv kom peb tsis txhob piam sij tag nrho; muaj tseeb tiag, thiab kuv ntseeg tias tej ntsuj plig ntawm lawv cov uas tau raug tua lawm tau nkag mus rau hauv lawv tus Vajtswv qhov chaw so lawm.