1 Kuv tus me tub, cuab pob ntseg rau kuv tej lus, vim kuv hais rau koj tias, zoo ib yam li kuv tau hais rau Hilamas lawm, tias npaum li uas koj yuav coj Vajtswv tej lus txib koj yuav vammeej nyob hauv thaj av; thiab npaum li uas koj yuav tsis coj Vajtswv tej lus txib koj yuav raug txiav tawm ntawm nws xub ntiag mus.

2 Thiab nim no, kuv tus me tub, kuv cia siab tias kuv yuav muaj kev xyiv fab nyob hauv koj, vim yog koj txoj kev ruaj nrees thiab koj txoj kev ntseeg rau Vajtswv; vim ib yam li koj tau pib thaum koj tseem hluas vam khom ntsoov rau tus Tswv koj tus Vajtswv, tib yam li ntawd kuv cia siab ntsoov tias koj yuav coj nws tej lus txib mus tsis tu ncua; vim tus uas yuav tau koob hmoov yog tus uas nyiaj kom mus txog thaum kawg.

3 Kuv hais rau koj, kuv tus me tub es, tias kuv twb tau muaj kev xyiv fab heev nyob hauv koj lawm, vim yog koj txoj kev ntseeg thiab koj txoj kev rau siab, thiab koj txoj kev ua siab ntev thiab koj txoj kev ua siab ntev nyiaj nyob hauv cov Neeg Xaulas.

4 Vim kuv paub tias koj tau raug khi; muaj tseeb tiag, thiab kuv kuj paub tias koj tau raug xuas pob zeb txawb vim yog txoj hauj lwm ntawm txoj lus; thiab koj tau ua siab ntev nyiaj tag nrho ib puas yam tsav no vim tus Tswv tau nrog koj nyob; thiab nim no koj paub tias tus Tswv tau tso koj dim lawm.

5 Thiab nim no kuv tus me tub, Sinploos, kuv xav kom koj yuav nco ntsoov, tias ntau ib yam li koj yuav tso koj txoj kev cia siab rau Vajtswv koj yeej yuav raug tso dim ntawm koj tej kev txom nyem thiab koj tej teeb meem, thiab koj tej kev kub ntxhov ntau npau li ntawd, thiab koj yuav raug tsa sawv nyob rau hauv hnub kawg.

6 Nim no, kuv tus me tub, kuv tsis xav kom koj xav tias kuv paub tej yam no kuv tus kheej, tiam sis nws yog Vajtswv tus Ntsuj Plig uas nyob hauv kuv uas ua tej yam no rau kuv paub; vim yog kuv tsis tau raug yug los ntawm Vajtswv ces kuv yeej yuav tsis tau paub tej yam no.

7 Tiam sis saib seb, tus Tswv vim nws txoj kev hlub tshua heev tau xa nws tus tim tswv los tshaj tawm rau kuv tias kuv yuav tsum tseg txoj hauj lwm ntawm txoj kev puas tsuaj nyob hauv cov neeg no; muaj tseeb tiag, thiab kuv tau pom ib tug tim tswv tim ntsej tim muag, thiab nws tau hais lus nrog kuv, thiab nws lub suab zoo ib yam li xob quaj, thiab nws tau ua rau tag nrho thaj av tshee qeeg nkaws.

8 Thiab tau muaj tias kuv tau nyob hauv txoj kev mob iab heev thiab kev nkeeg ntawm tus ntsuj plig tau peb hnub thiab peb hmos; thiab ib txwm tsis tau, mus txog thaum kuv tau quaj thov tus Tswv Yexus Khetos rau txoj kev zam txim, kuv kuj tau txais txoj kev zam txim rau kuv tej kev txhaum. Tiam sis saib seb, kuv tau quaj thov nws thiab kuv thiaj nrhiav tau txoj kev thaj yeeb rau kuv tus ntsuj plig.

9 Thiab nim no, kuv tus me tub, kuv tau qhia koj tej yam no xwv kom koj yuav kawm tau kev txawj ntse, kom koj yuav kawm ntawm kuv tias tsis muaj dua lwm txoj kev los sis lwm yam uas leej tib neeg yuav muaj peev xwm dim tau, tsuas yog nyob hauv thiab dhau los ntawm Khetos xwb. Saib seb, nws yog txoj sia thiab qhov kaj ntawm lub ntiaj teb. Saib seb, nws yog txoj lus ntawm qhov tseeb thiab qhov ncaj ncees.

10 Thiab nim no, ib yam li koj tau pib qhia txoj lus txawm li ntawd los kuv xav kom koj yuav qhia tsis txhob tu ncua; thiab kuv xav kom koj yuav rau siab thiab ceev lub siab rau tag nrho txhua yam.

11 Ceev faj kom koj tsis txhob khav theeb; muaj tseeb tiag, ceev faj koj tsis txhob khav txog koj tus kheej txoj kev txawj ntse, thiab txhob khav txog koj lub zog.

12 Siv txoj kev muaj peev xwm, tiam sis tsis txhob tshaj qhov yuav nyiaj taus; thiab kuj ceev faj tias koj yuav tswj tag nrho koj tej kev ntswv siab, xwv kom koj yuav muaj txoj kev hlub puv npo; ceev faj koj tsis txhob tub nkeeg.

13 Tsis txhob thov Vajtswv li cov Neeg Xaulas thov, vim koj tau pom tias lawv thov kom neeg hnov, thiab kom raug qhuas rau lawv tej kev txawj ntse.

14 Tsis txhob hais tias: Au Vajtswv, kuv ua koj tsaug tias peb zoo dua li peb tej kwv tij; tiam sis yuav tsum hais tias: Au tus Tswv, thov zam kuv tej kev tsis tsim txiaj, thiab nco ntsoov hlub tshua rau kuv cov kwv tij—muaj tseeb tiag, qhia koj tej kev tsis tsim txiaj rau Vajtswv txhua lub caij nyoog.

15 Thiab thov tus Tswv foom koob hmoov rau koj tus ntsuj plig, thiab txais koj nyob hauv hnub kawg rau hauv nws lub nceeg vaj, mus zaum nyob hauv txoj kev thaj yeeb. Nim no cia li mus, kuv tus me tub, thiab qhia txoj lus rau cov neeg no. Ua tiag tiag. Kuv tus me tub, mus zoo koj mog.