1 Nim no tau muaj tias tom qab uas kawg Khaulihos, Amas tau txais xov tias cov Neeg Xaulas tau hloov tus Tswv tej kev, thiab Xaulas, tus uas yog lawv tus thawj, tau coj tej neeg tej siab mus pe hawm tej mlom ruam, nws lub siab tau rov pib mob dua vim yog cov neeg txoj kev tsis ncaj ncees.

2 Vim nws tau yog qhov uas ua kev tu siab ntau heev rau Amas uas paub txog txoj kev tsis ncaj ncees nyob hauv nws cov neeg; yog li ntawd nws tau tu siab heev kawg nkaus li vim yog txoj kev faib cov Neeg Xaulas tawm ntawm cov Neeg Nifais.

3 Nim no cov Neeg Xaulas tau sau lawv tus kheej tuaj ua ke nyob hauv ib thaj av uas lawv hu ua Eethi-onas, uas nyob sab hnub tuaj ntawm thaj av Xalahelas, uas nyob ze ciam teb ntawm ntug dej hiav txwv, uas nyob rau sab nram hav ntawm thaj av Ntsawsoos, uas kuj nyob ntawm ciam teb uas nyob ze hav zoov sab nram hav, lub hav zoov uas muaj puv nkaus cov Neeg Lamas.

4 Nim no cov Neeg Nifais tau ntshai heev tias tsam cov Neeg Xaulas yuav nkag mus cog kev phooj ywg nrog cov Neeg Lamas, thiab qhov ntawd yuav ua ib qho chaw poob loj heev rau cov Neeg Nifais sab.

5 Thiab nim no, ib yam li txoj kev qhuab qhia ntawm txoj lus muaj hwj chim coj tau cov neeg coob heev mus ua tej uas ncaj ncees—muaj tseeb tiag, qhov ntawd tau muaj hwj chim loj tshaj rau cov neeg tej siab dua li tej ntaj, los sis lwm yam huv tib si, uas tau muaj los rau lawv—yog li ntawd Amas tau xav tias nws tsim nyog tias lawv yuav tsum sim qhov tsim txiaj ntawm Vajtswv txoj lus.

6 Yog li ntawd nws tau coj Amoos, thiab Aloos, thiab Oonaws; thiab nws tau tso Hinais rau hauv lub koom txoos uas nyob hauv Xalahelas; tiam sis thawj peb tug nws tau coj nrog nws, thiab kuj coj Amulej thiab Xi-elas, uas tau nyob hauv Melej; thiab nws kuj tau coj nws ob tug tub thiab.

7 Nim no nws tsis tau coj nws tus tub hlob nrog nws, thiab nws lub npe yog Hilamas; tiam sis cov npe ntawm cov uas nws tau coj nrog nws yog Sinploos thiab Khali-atoos; thiab cov no yog cov npe ntawm cov uas tau nrog nws mus rau hauv cov Neeg Xaulas, mus qhuab qhia txoj lus rau lawv.

8 Nim no cov Neeg Xaulas tau yog neeg tsis sib haum nrog cov Neeg Nifais; yog li ntawd lawv twb tau muaj Vajtswv txoj lus qhuab qhia rau lawv lawm.

9 Tiam sis lawv tau poob mus rau hauv tej kev yuam kev loj lawm, vim lawv tsis kam xyaum coj Vajtswv tej lus txib, thiab tej kev cai, raws li Mauxes txoj kev cai.

10 Thiab lawv kuj tsis kam xyaum coj lub koom txoos tej kab ke, kom thov Vajtswv tsis tu ncua thiab txo hwj chim rau Vajtswv txhua hnub, xwv kom lawv yuav tsis nkag mus rau hauv txoj kev dag ntxias.

11 Muaj tseeb tiag, thaum kawg, lawv tau hloov tus Tswv tej kev nyob hauv ntau yam; yog li ntawd vim qhov no, Amas thiab nws cov kwv tij tau mus rau hauv thaj av mus qhuab qhia txoj lus rau lawv.

12 Nim no, thaum lawv tau tuaj rau hauv thaj av lawm, saib seb, rau lawv txoj kev yoob lawv tau pom tias cov Neeg Xaulas tau ua tej tsev sab laj, thiab lawv tau sib sau lawv tus kheej tuaj ua ke rau ib hnub ntawm lub lim tiam, hnub uas lawv tau hu ua tus Tswv hnub; thiab lawv tau teev tiam raws li tej uas Amas thiab nws cov kwv tij ib txwm tsis tau pom li;

13 Vim lawv tau ua ib qho chaw nyob hauv nruab nrab ntawm lawv lub tsev sab laj, ib qho chaw sawv ntsug, uas siab dua li taub hau, thiab saum hau tsuas txaus ib tug neeg xwb.

14 Yog li ntawd, leej twg tau xav teev tiam yuav tsum tau mus thiab sawv rau saum hau saud, thiab tsa nws ob txhais tes rau saum ntuj, thiab qw nrog ib lub suab nrov nrov, hais tias:

15 Dawb Huv, Vajtswv tus uas dawb huv; peb ntseeg tias koj yog Vajtswv, thiab peb ntseeg tias koj dawb huv, thiab koj tau yog ib tug ntsuj plig, thiab koj yog ib tug ntsuj plig, thiab koj tseem yuav yog ib tug ntsuj plig mus ib txhis.

16 Vajtswv tus uas dawb huv, peb ntseeg tias koj tau faib peb tawm ntawm peb cov kwv tij; thiab peb tsis ntseeg peb cov kwv tij tej kev li kev cai, uas tau raug cev nqis los rau lawv los ntawm siab me nyuam yaus ntawm lawv tej yawg koob; tiam sis peb ntseeg hais tias koj tau xaiv peb los ua koj tej me nyuam dawb huv; thiab koj kuj tau ua rau peb paub tias yuav tsis muaj Khetos.

17 Tiam sis nag hmo, hnub no koj zoo li cas, koj yeej yuav zoo li ntawd mus ib txhis; thiab koj tau xaiv peb kom peb yuav dim, thaum txhua tus uas nyob ib ncig peb tau raug xaiv pov rau hauv ntuj txiag teb tsaus los ntawm koj txoj kev npau taws; vim txoj kev dawb huv, Au Vajtswv es, peb ua koj tsaug; thiab peb kuj ua koj tsaug uas koj tau xaiv peb, kom peb yuav tsis raug coj yuam kev raws li tej kev li kev cai ruam ntawm peb tej kwv tij, uas khi lawv qaug rau ib txoj kev ntseeg Khetos, uas tau coj lawv tej siab ua loj leeb deb ntawm koj mus, peb tus Vajtswv.

18 Thiab peb ua koj tsaug ntxiv, Au Vajtswv es, uas peb yog ib cov neeg uas raug xaiv tseg thiab dawb huv. Amees.

19 Nim no tau muaj tias tom qab uas Amas thiab nws cov kwv tij thiab nws cov tub tau hnov tej kev thov Vajtswv no tas lawm, lawv tau yoob tshaj li qhov ntseeg tau.

20 Vim saib seb, txhua tus neeg tau nce mus thiab hais tej lus thov Vajtswv zoo tib yam nkaus.

21 Nim no lawv tau hu qhov chaw no ua Lamiyatoos, uas, tau txhais, tias qhov chaw sawv dawb huv.

22 Nim no, nyob ntawm qhov chaw sawv no lawv tau thov, txhua tus neeg, thov Vajtswv tib yam lus, ua lawv tus Vajtswv tsaug tias lawv tau yog cov uas nws tau xaiv lawm, thiab tias nws tsis tau coj lawv yuam kev raws li txoj kev li kev cai ntawm lawv cov kwv tij, thiab tias lawv tej siab tsis tau raug nyiag mus ntseeg hauv tej uas yuav muaj los, uas lawv tsis tau paub txog.

23 Nim no, tom qab uas cov neeg sawv daws tau thov ua tsaug zoo li no tas lawm, lawv tau rov qab mus rau tom lawv tej tsev, tsis hais txog lawv tus Vajtswv ntxiv mus txog thaum lawv tau rov qab sib sau lawv tus kheej tuaj ua ke dua rau ntawm qhov chaw sawv dawb huv, tuaj ua tsaug raws li lawv sij ua.

24 Nim no thaum Amas tau pom li no mob nws lub siab heev; vim nws tau pom tias lawv tau yog ib co neeg phem thiab ib co neeg uas hloov tus Tswv tej kev; muaj tseeb tiag, nws tau pom tias lawv tej siab tau muab tso rau saum tej kub, thiab saum tej nyiaj dawb, thiab rau saum txhua yam tsim nuj huv tib si.

25 Muaj tseeb tiag, thiab nws kuj tau pom tias lawv tej siab tau nqa siab rau txoj kev khav theeb, nyob hauv lawv txoj kev khav.

26 Thiab nws tau tsa nws lub suab rau saum ntuj, thiab quaj thov, hais tias: Au, yuav ntev npaum li cas, Au tus Tswv es, uas koj yuav cia kom koj tej tub qhe yuav nyob hauv cev nqaij daim tawv rau hauv qab no, kom pom tej kev phem tiag tiag li ntawd nyob hauv noob neej los?

27 Saib seb, Au Vajtswv es, lawv quaj thov rau koj, thiab tiam sis lawv tej siab twb raug lawv txoj kev khav nqos lawm. Saib seb, Au Vajtswv es, lawv quaj thov rau koj nrog lawv tej qhov ncauj, thaum lawv muaj plhus heev, nrog tej khoom tsis muaj qab hau ntawm lub ntiaj teb.

28 Saib seb, Au kuv tus Vajtswv es, lawv tej khoom kim kim, thiab lawv tej nplhaib, thiab lawv tej saw tes, thiab lawv tej saw kub, thiab tag nrho lawv tej khoom muaj nqis uas lawv coj ua saw; thiab saib seb, lawv tej siab tau muab tso rau saum cov no, thiab lawv tseem tau quaj thov rau koj thiab hais tias—Peb ua koj tsaug, Au Vajtswv es, vim peb yog ib co neeg uas raug xaiv tseg rau koj lawm, thaum uas lwm cov yuav piam sij.

29 Muaj tseeb tiag, thiab lawv hais tias koj tau ua rau lawv paub tias yuav tsis muaj Khetos.

30 Au tus Tswv Vajtswv es, ntev npaum li cas ntxiv uas koj yuav cia tej kev phem thiab tsis muaj kev ntseeg li ntawd nyob nrog cov neeg no? Au tus Tswv es, thov koj muab lub zog rau kuv, xwv kom kuv yuav nyiaj tau kuv tej kev tsis muaj zog. Vim kuv tau qaug zog, thiab txoj kev phem li ntawd nyob hauv cov neeg no ua rau kuv tus ntsuj plig mob.

31 Au tus Tswv es, tu kuv lub siab heev kawg nkaus; thov koj nplij kuv tus ntsuj plig nyob hauv Khetos. Au tus Tswv es, thov koj pub rau kuv kom kuv yuav muaj taus zog, kom kuv yuav ua tau siab ntev nyiaj tej kev txom nyem no uas yuav los rau kuv, vim yog txoj kev txhaum ntawm cov neeg no.

32 Au tus Tswv es, thov koj nplij kuv tus ntsuj plig, thiab muab rau kuv txoj kev vam meej, thiab kuj muab rau kuv cov phooj ywg ua hauj lwm uas nyob nrog kuv—muaj tseeb tiag, Amoos, thiab Aloos, thiab Oonaws, thiab Amulej thiab Xi-elos thiab kuv ob tug tub—muaj tseeb tiag, tag nrho lawv cov no thov koj nplij, Au tus Tswv es. Muaj tseeb tiag, thov koj nplij lawv tej ntsuj plig nyob hauv Khetos.

33 Thov koj pub rau lawv kom lawv yuav muaj zog, kom lawv yuav nyiaj tau lawv tej kev txom nyem uas yuav los rau lawv vim yog tej kev tsis ncaj ncees ntawm cov neeg no.

34 Au tus Tswv es, thov koj pub rau peb kom peb yuav muaj kev vam meej nyob hauv txoj kev coj lawv rov qab los cuag koj nyob hauv Khetos.

35 Saib seb, Au tus Tswv es, lawv tej ntsuj plig yeej tsim txiaj, thiab coob tug ntawm lawv yog peb cov kwv tij; yog li ntawd, Au tus Tswv es, muab rau peb lub hwj chim thiab kev txawj ntse xwv kom peb yuav coj tau, peb cov kwv tij no, rov qab los rau koj.

36 Nim no tau muaj tias thaum Amas tau hais tej lus no tas lawm, ces nws tau tso nws txhais tes rau saum lawv txhua tus uas nrog nws nyob. Thiab saib seb, thaum nws tso nws txhais tes rau saum lawv, lawv tau muaj tus Ntsuj Plig Dawb Huv puv npo.

37 Thiab tom qab ntawd lawv ib leeg tau faib ncaim ib leeg, tsis tau xav rau lawv tus kheej tias lawv yuav noj dab tsi, los sis lawv yuav haus dab tsi, los sis lawv yuav hnav dab tsi.

38 Thiab tus Tswv tau pub rau lawv kom lawv tsis txhob tshaib, thiab kom lawv tsis txhob nqhis; muaj tseeb tiag, thiab nws kuj tau muab lub zog rau lawv, kom lawv yuav tsis tau nyiaj ib yam kev txom nyem dab tsi, tsuas yog muaj kev xyiv fab ntawm Khetos xwb. Nim no qhov no tau zoo raws kiag li Amas txoj kev thov Vajtswv; thiab qhov no vim yog nws tau thov nyob hauv txoj kev ntseeg.