1 Thiab nim no tau muaj tias thaum Maulaunais tau txais tsab ntawv no nws lub siab tau muaj zog tuaj, thiab tau raug muaj txoj kev xyiv fab puv npo vim yog Pheholas txoj kev ntseeg, tias nws kuj tsis tau yog ib tug neeg ntxeev siab rau txoj kev ywj pheej thiab txoj kev ntseeg ntawm nws lub teb chaws.

2 Tiam sis nws kuj tau nyuaj siab heev vim yog txoj kev tsis ncaj ntawm cov uas tau raws Pheholas tawm ntawm lub rooj txiav txim, muaj tseeb tiag, tau nyuaj siab vim yog cov uas tau ntxeev siab tawm tsam lawv lub teb chaws thiab lawv tus Vajtswv.

3 Thiab tau muaj tias Maulaunais tau coj ib co neeg tsis coob, raws li Pheholas siab xav, thiab tau muab cia rau Lihais thiab Thi-akhas saib xyuas nws cov tub rog uas seem tshuav, thiab nws tau mus rau tom thaj av Khede-oos.

4 Thiab nws tau tsa tus chij ntawm txoj kev ywj siab rau txhua qhov chaw uas nws tau nkag mus, thiab sau tau zog ntau npaum li nws ua tau thaum nws mus rau tom thaj av Khede-oos.

5 Thiab tau muaj tias txhiab txhiab tus tau sau los rau hauv nws txoj kev coj, thiab tau nqa lawv tej ntaj tiv thaiv lawv txoj kev ywj pheej, xwv kom lawv yuav tsis tau los mus rau hauv txoj kev ua qhev.

6 Thiab li no, thaum Maulaunais tau sau tau tag nrho cov neeg li li nws ua tau thaum nws mus, nws tau los rau hauv thaj av Khede-oos; thiab tau muab nws cov tub rog los koom nrog Pheholas cov lawv tau rais los mus ua ib co muaj zog heev, twb muaj zog dua li Pakas cov neeg, tus uas yog vaj ntxwv ntawm cov neeg ntxeev siab ntawd uas tau raws cov neeg ywj pheej tawm ntawm thaj av Xalahelas thiab txeeb tau thaj av.

7 Thiab tau muaj tias Maulaunais thiab Pheholas tau nqis nrog lawv tej tub rog mus rau hauv thaj av Xalahelas, thiab tau tawm mus tawm tsam lub nroog, thiab tau ntsib Pakas cov neeg, kawg tias lawv tau los ua rog.

8 Thiab saib seb, Pakas tau raug tua thiab nws cov neeg tau raug txhom ua neeg raug txim, thiab Pheholas tau rov qab txum tim rau nws lub rooj txiav txim.

9 Thiab Pakas cov neeg tau txais lawv tej txim, raws li txoj kev cai, thiab cov neeg-vaj ntxwv uas tau raug txhom yav tag los thiab raug pov rau hauv qhov taub; thiab lawv tau raug tua raws li txoj kev cai; muaj tseeb tiag, Pakas cov neeg thiab cov neeg-vaj ntxwv ntawd, cov uas tau tsis kam nqa cuab yeej tiv thaiv lawv lub teb chaws, tiam sis tseem tawm tsam nws, tau raug muab tua.

10 Thiab li no nws tau rais los tsim nyog tias txoj kev cai no yuav tsum nruj kom ceev tau txoj kev nyab xeeb ntawm lawv lub teb chaws; muaj tseeb tiag, thiab tus twg uas nrhiav pom tsis kam yuav lawv txoj kev ywj pheej tau raug muab tua nrawm nroos raws li txoj kev cai.

11 Thiab li no tau xaus xyoo thib peb caug ntawm cov neeg txiav txim txoj kev kav cov Neeg Nifais; Maulaunais thiab Pheholas tau rov qab muab txoj kev nyab xeeb txum tim rau thaj av Xalahelas, rau hauv lawv cov neeg, tau muab kev tuag rau tag nrho cov uas tsis ncaj rau txoj kev ntseeg txoj kev ywj pheej.

12 Thiab tau muaj tias nyob rau thaum pib xyoo thib peb caug thiab ib ntawm cov neeg txiav txim txoj kev kav cov Neeg Nifais, Maulaunais tau kom xa tej khoom noj khoom siv nrawm nroos, thiab xa ib pab tub rog rau txhiab leej mus rau Hilamas, mus pab nws ceev feem av ntawd.

13 Thiab nws kuj tau kom xa ib pab tub rog rau txhiab leej, nrog zaub mov noj txaus hlo, mus rau Lihais thiab Thi-akhas cov tub rog. Thiab tau muaj tias tau ua li no kom mus tiv thaiv thaj av ntawm cov Neeg Lamas.

14 Thiab tau muaj tias Maulaunais thiab Pheholas, tau tseg ib pab neeg coob heev cia rau hauv thaj av Xalahelas, nkawd tau nrog ib pab neeg coob heev mus rau tom thaj av Nifaihas, tau txiav txim siab mus ntaus cov Neeg Lamas uas nyob hauv lub nroog ntawd.

15 Thiab tau muaj tias thaum uas lawv tab tom mus rau tom thaj av, lawv txhom tau ib pab neeg coob heev ntawm cov Neeg Lamas, thiab tau muab lawv ib txhia tua, thiab txeeb tau lawv tej khoom noj thiab lawv tej cuab yeej ua rog.

16 Thiab tau muaj tias tom qab uas lawv txhom tau lawv lawm, lawv tau kom lawv khi ib lo lus tias lawv yuav tsis nqa lawv tej cuab yeej ua rog tawm tsam cov Neeg Nifais ib zaug ntxiv lawm.

17 Thiab thaum uas lawv tau khi lo lus no tas lawm lawv tau xa lawv mus nrog Amoos cov neeg nyob, thiab lawv muaj kwv yees li plaub txhiab leej uas tsis tau raug tua.

18 Thiab tau muaj tias thaum uas lawv muab lawv xa mus lawm lawv tau rov taug lawv txoj kev mus rau tom thaj av Nifaihas. Thiab tau muaj tias thaum lawv tau los txog lub nroog Nifaihas lawm, lawv rub lawv tej tsev pheeb suab ntaub rau hauv tej tiaj Nifaihas, uas nyob ze lub nroog Nifaihas.

19 Nim no Maulaunais tau xav kom cov Neeg Lamas tawm tuaj ua rog tawm tsam lawv, nyob saum tej tiaj; tiam sis cov Neeg Lamas, paub txog lawv txoj kev muaj zog heev, thiab tau pom lawv cov neeg coob heev, yog li ntawd lawv tsis kam tawm tuaj tawm tsam lawv; yog li ntawd lawv tsis kam tuaj ua rog nyob rau hnub ntawd.

20 Thiab thaum tsaus ntuj tuaj, Maulaunais tau tawm mus hauv hmo uas tsaus tsaus, thiab tau nce mus rau saum hau ntsa loog soj saib cov Neeg Lamas tau teeb lawv tej yeej nrog lawv tej tub rog rau phab twg ntawm lub nroog.

21 Thiab tau muaj tias lawv tau nyob rau sab hnub tuaj, ze ntawm lub rooj nkag; thiab lawv tag nrho tau tsaug zog. Thiab nim no Maulaunais tau rov qab los cuag nws cov tub rog, thiab tau kom lawv npaj tej hlua khov thiab tej ntaiv sai sai, coj mus tuam saum hau ntsa loog mus rau sab hauv ntsa loog.

22 Thiab tau muaj tias Maulaunais tau kom nws cov neeg tawm mus thiab nce mus rau saum hau ntsa loog, thiab cia lawv nqis mus rau hauv lub nroog sab hauv, muaj tseeb tiag, twb mus rau sab hnub poob, qhov uas cov Neeg Lamas tsis teeb yeej nrog lawv tej tub rog.

23 Thiab tau muaj tias lawv tag nrho tau nqis mus rau hauv lub nroog nyob rau thaum tsaus ntuj, los ntawm lawv tej hlua khov thiab lawv tej ntaiv; li no thaum sawv ntxov tuaj tag nrho lawv tau nyob hauv tej ntsa loog sab hauv lawm.

24 Thiab nim no, thaum cov Neeg Lamas tau tsim thiab tau pom tias Maulaunais cov tub rog twb nyob ntsa loog sab hauv lawm, lawv tau ceeb loj kawg li, kawg tias lawv tau khiav tawm ntawm lub rooj vag mus.

25 Thiab nim no thaum Maulaunais pom tias lawv tau tab tom khiav ua ntej nws, nws tau kom nws cov neeg tawm mus tawm tsam lawv, thiab tau tua ntau leej, thiab vij tau ntau leej, thiab tau txhom lawv ua neeg raug txim; thiab lawv cov uas seem tau khiav mus rau hauv thaj av Maulaunais, uas nyob hauv tej ciam teb ze ntug dej hiav txwv.

26 Li no Maulaunais thiab Pheholas rov txeeb tau lub nroog Nifaihas yam tsis tau xiam ib tug neeg li; thiab cov Neeg Lamas muaj coob leej uas tau raug tua.

27 Nim no tau muaj tias ntau leej ntawm cov Neeg Lamas uas yog cov neeg raug txim tau xav mus koom nrog cov neeg Amoos thiab rais ua ib co neeg ywj siab.

28 Thiab tau muaj tias txhua tus uas xav tau, tau pub rau lawv raws li lawv siab xav.

29 Yog li ntawd, tag nrho cov Neeg Lamas uas raug txim tau mus koom nrog Amoos cov neeg, thiab tau pib ua hauj lwm hnyav heev, khawb av, cog tag nrho txhua yam noob, thiab tej pab yaj thiab tej tsiaj txhu txhua yam; thiab li no cov Neeg Nifais lub nra loj thiaj tau sib; muaj tseeb tiag, kawg tias lawv tau dim ntawm txoj kev zov tag nrho cov Neeg Lamas uas raug txim.

30 Nim no tau muaj tias Maulaunais, tom qab uas nws rov txeeb tau lub nroog Nifaihas, txhom tau neeg raug txim ntau, qhov uas tau ua rau cov Neeg Lamas tej tub rog tsawg lawm ntau, thiab rov tau ntau tus cov Neeg Nifais uas tau raug txhom ua neeg raug txim, qhov uas tau txhawb Maulaunais cov tub rog zog kawg nkaus li; yog li ntawd Maulaunais tau tawm ntawm thaj av Nifaihas mus rau thaj av Lihais.

31 Thiab tau muaj tias thaum cov Neeg Lamas tau pom tias Maulaunais tau tab tom tuaj tawm tsam lawv, lawv tau rov qab txhawj dua thiab tau khiav ua ntej Maulaunais cov tub rog.

32 Thiab tau muaj tias Maulaunais thiab nws cov tub rog tau raws lawv qab ib lub nroog rau ib lub nroog, mus txog thaum lawv mus ntsib Lihais thiab Thi-akhas; thiab cov Neeg Lamas tau khiav ntawm Lihais thiab Thi-akhas, nqis mus rau nram tej ciam teb ze ntug hiav txwv, mus txog thaum lawv tau los rau thaj av Maulaunais.

33 Thiab tag nrho cov Neeg Lamas tej tub rog tau sib sau ua ke, kawg tias lawv tag nrho tau ua ib pab rau hauv thaj av Maulaunais. Nim no, Amauloos, cov Neeg Lamas tus vaj ntxwv, kuj tau nrog lawv thiab.

34 Thiab tau muaj tias Maulaunais thiab Lihais thiab Thi-akhas tau teeb yeej nrog lawv tej tub rog nyob ib puag ncig hauv tej ciam teb ntawm thaj av Maulaunais, kawg tias cov Neeg Lamas tau raug vij nyob hauv tej ciam teb ze hav zoov uas nyob sab nram hav, thiab nyob hauv tej ciam teb ze hav zoov uas nyob sab hnub tuaj.

35 Thiab li no lawv tau teeb yeej rau hmo ntawd. Vim saib seb, cov Neeg Nifais thiab cov Neeg Lamas kuj tau lim vim yog txoj kev mus deb; yog li ntawd lawv tsis tau txiav txim siab yuav sim siv ib yam tswv yim thaum tsaus ntuj, tsuas yog Thi-akhas xwb; vim nws tau npau taws heev nrog Amauloos, npaum cuag tias nws tau suav tias Amauloos, thiab Amalikhaiyas nws tus tij laug, tau yog qhov uas ua kom muaj npluav rog loj thiab tsis paub kawg uas nyob nruab nrab ntawm lawv thiab cov Neeg Lamas, qhov uas tau muaj tsov rog thiab nqaij ntuag ntshav nrog ntau, muaj tseeb tiag, thiab muaj kev tshaib nqhis ntau kawg nkaus.

36 Thiab tau muaj tias Thi-akhas hauv nws txoj kev npau taws tau tawm mus rau hauv cov Neeg Lamas lub yeej, thiab nws tau nqis cov ntsa loog ntawm lub nroog. Thiab nws tau nqa ib txog hlua mus, ib qho chaw rau ib qho chaw, kawg tias nws nrhiav tau tus vaj ntxwv; thiab nws tau nkaug ib rab hmuv rau nws, uas tau chob nws ze ntawm lub siab. Tiam sis saib seb, tus vaj ntxwv tau tsa nws cov tub qhe ua ntej nws tuag, kawg tias lawv tau caum Thi-akhas, thiab tau muab nws tua.

37 Nim no tau muaj tias thaum Lihais thiab Maulaunais tau paub tias Thi-akhas tau tuag lawm nkawd tau nyuaj siab heev; vim saib seb, nws yog ib tug neeg uas tau tawm tsam yam tsis ntshai kiag rau nws lub teb chaws, muaj tseeb tiag, yog ib tug phooj ywg tseeb rau txoj kev ywj siab; thiab nws tau raug ntau yam kev txom nyem mob heev kawg nkaus. Tiam sis saib seb, nws tau tuag lawm, thiab tau mus txoj kev uas tag nrho tej neeg ntiaj teb mus.

38 Nim no tau muaj tias tag kis Maulaunais tau tawm mus, thiab tawm tsam cov Neeg Lamas, kawg tias lawv tau tua lawv tuag coob heev; thiab lawv tau raws lawv tawm ntawm thaj av mus; thiab lawv tau khiav, npaum tias lawv twb tsis rov qab los tawm tsam cov Neeg Nifais nyob rau lub sij hawm ntawd lawm.

39 Thiab li no tau xaus xyoo thib peb caug thiab ib ntawm cov neeg txiav txim txoj kev kav cov Neeg Nifais; thiab li no lawv tau muaj tsov rog, thiab nqaij ntuag ntshav nrog, thiab kev tshaib nqhis, thiab kev txom nyem, tau ncua ntau xyoo.

40 Thiab tau muaj tej kev tua neeg, thiab tej kev sib cav sib ceg, thiab tej kev ntxeev siab, thiab tag nrho txhua yam kev tsis ncaj nyob hauv cov Neeg Nifais; txawm li ntawd los rau cov neeg uas ncaj ncees, muaj tseeb tiag, vim yog tej kev thov Vajtswv ntawm cov neeg ncaj ncees, lawv tseem dim kev puas tsuaj.

41 Tiam sis saib seb, vim yog qhov ncua ntev heev ntawm npluav rog uas nyob nruab nrab ntawm cov Neeg Nifais thiab cov Neeg Lamas, ntau tus tau rais los mus ua neeg tawv, vim yog qhov ncua ntev heev ntawm npluav rog; thiab ntau tus tau txo hwj chim vim yog lawv tej kev txom nyem, kawg tias lawv tau txo lawv tej hwj chim rau Vajtswv, twb txo hwj chim kawg nkaus li.

42 Thiab tau muaj tias tom qab uas Maulaunais tau txhim kho tej feem av uas nyob qhib lug rau cov Neeg Lamas, mus txog thaum uas lawv muaj zog txaus lawm, nws tau rov qab los rau lub nroog Xalahelas; thiab Hilamas los kuj tau rov qab los mus rau qhov chaw uas yog nws qub txeeg qub teg; thiab tau rov qab ua muaj kev nyab xeeb dua nyob hauv cov Neeg Nifais.

43 Thiab Maulaunais tau tso txoj kev txib nws cov tub rog rau hauv nws tus tub tes, tus uas npe hu ua Maulaunaihas; thiab nws tau mus so nyob hauv nws lub tsev xwv kom nws yuav tau siv nws lub neej uas seem tshuav nyob kaj siab lug.

44 Thiab Pheholas tau rov qab mus rau nws lub rooj txiav txim; thiab Hilamas tau rov qab ua hauj lwm qhuab qhia Vajtswv txoj lus rau cov neeg dua; vim yog muaj tej kev tsov rog thiab tej kev sib cav sib ceg ntau thiaj li tsim nyog tias yuav tsum tau rov ua dua txoj kev cai nyob hauv lub koom txoos.

45 Yog li ntawd, Hilamas thiab nws cov kwv tij tau tawm mus, tau tshaj tawm Vajtswv txoj lus muaj hwj chim heev rau txoj kev qhia neeg coob leej txog lawv tej kev phem, qhov ntawd tau ua rau lawv hloov siab lees txim txog lawv tej kev txhaum thiab mus ua kev cai raus dej rau tus Tswv lawv tus Vajtswv.

46 Thiab tau muaj tias lawv tau rov txhim tsa Vajtswv lub koom txoos dua, nyob thoob plaws txhua thaj av.

47 Muaj tseeb tiag, thiab tau ua tej kev qhia ntsig txog txoj kev cai. Thiab lawv tej neeg txiav txim, thiab lawv tej thawj tub txiav txim tau raug xaiv.

48 Thiab cov Neeg Nifais tau pib huaj vam dua nyob hauv thaj av, thiab tau pib coob ntxiv thiab tau rais los mus muaj zog heev nyob hauv thaj av dua. Thiab lawv tau hlob nplua nuj heev.

49 Tiam sis txawm tias lawv nplua nuj, los sis lawv muaj zog, los sis lawv huaj vam, lawv yeej tsis tau khav txiv; thiab lawv kuj tsis qeeb los nco txog tus Tswv lawv tus Vajtswv; tiam sis lawv tau txo lawv tej hwj chim rau nws heev kawg nkaus.

50 Muaj tseeb tiag, lawv yeej nco ntsoov tej yam tseem ceeb heev uas tus Tswv tau ua rau lawv lawm, tias nws tau cawm lawv dim ntawm txoj kev tuag, thiab ntawm tej kev ua qhev, thiab ntawm tej qhov taub, thiab ntawm tag nrho txhua yam kev txom nyem, thiab nws tau cawm lawv dim ntawm lawv tej yeeb ncuab tes.

51 Thiab lawv tau thov tus Tswv lawv tus Vajtswv tsis tu ncua li, kawg tias tus Tswv tau foom koob hmoov rau lawv, raws li nws txoj lus, li ntawd lawv thiaj tau hlob muaj zog thiab huaj vam nyob hauv thaj av.

52 Thiab tau muaj tias tag nrho ib puas yam tsav no tau muaj tiav. Thiab Hilamas tau tuag, nyob rau hauv xyoo thib peb caug thiab tsib ntawm cov neeg txiav txim txoj kev kav cov Neeg Nifais.