1 Thiab tau muaj tias cov Neeg Nifais uas tsis tau raug tua los ntawm tej ntaj riam sib rog, tom qab uas tau muab cov uas raug tua faus tas—nim no cov uas raug tua tsis tau suav, vim lawv muaj coob leej heev—tom qab uas lawv tau faus lawv cov tuag tas lawm tag nrho lawv tau rov qab los rau tom lawv tej av, thiab lawv tej tsev, thiab lawv tej poj niam, thiab lawv tej me nyuam.

2 Nim no coob leej poj niam thiab me nyuam tau raug ntaj riam tua, thiab ntau tus ntawm lawv tej yaj thiab lawv tej tsiaj txhu los tib yam; thiab lawv muaj ntau daim teb uas muaj noob qoob loos tau raug puas tsuaj, vim lawv raug neeg coob heev tsuj vau liam tas.

3 Thiab nim no thaum cov Neeg Lamas thiab cov neeg Alixais coob coob leej uas tau raug tua nyob ntawm tus ntug dej Xidoos tau raug muab pov rau hauv cov dej Xidoos tas lawm; thiab saib seb lawv tej pob txha nyob puag hauv dej hiav txwv, thiab lawv ntau heev li.

4 Thiab paub tau cov neeg Alixais tawm ntawm cov Neeg Nifais, vim lawv tau kos cim liab rau ntawm lawv hauv pliaj mus raws li cov Neeg Lamas; txawm li ntawd los, lawv tsis tau muab lawv tej taub hau chais zoo li cov Neeg Lamas.

5 Nim no cov Neeg Lamas tej taub hau tau muab chais do dus; thiab lawv liab qab, tsuas yog muaj tawv tsiaj uas vas lawv tej puab tais, thiab lawv tej cuab yeej ua rog, uas vas lawv me ntsis, thiab lawv tej hneev, thiab lawv tej xub, thiab lawv tej pob zeb, thiab lawv tej hneev nti roj hmab, thiab lwm yam.

6 Thiab cov Neeg Lamas tej tawv nqaij tsaus, raws li lub cim uas tau muab rau saum lawv tej yawg koob, uas tau yog ib qho kev foom tsis zoo rau lawv vim yog lawv tej kev txhaum thiab lawv tej kev ntxeev siab tawm tsam lawv cov kwv tij, uas yog Nifais, Yakhauj, thiab Yauxej, thiab Xam, cov uas tau yog neeg ncaj ncees thiab dawb huv.

7 Thiab lawv cov kwv tij tau nrhiav ua kom lawv puas tsuaj, yog li ntawd lawv thiaj tau raug foom tsis zoo; thiab tus Tswv Vajtswv thiaj tau ntaus ib lub cim rau lawv, muaj tseeb tiag, rau saum Lamas thiab Lemu-ees, thiab kuj rau saum Ixama-ees cov tub, thiab tej poj niam Ixama-ees.

8 Thiab tau ua qhov no xwv kom lawv tej noob yuav zoo txawv ntawm lawv tej kwv tij tej noob, kom los ntawm qhov ntawd tus Tswv Vajtswv yuav tshwj tau nws cov neeg, xwv kom lawv yuav tsis sib xyaw thiab ntseeg tej kev li kev cai uas tsis yog uas yuav qhia tseeb txog lawv txoj kev puas tsuaj.

9 Thiab tau muaj tias txhua tus uas tau muab nws tej noob mus xyaw nrog cov Neeg Lamas tej tau coj tib txoj kev foom tsis zoo los rau nws tej noob.

10 Yog li ntawd, txhua tus uas tau cia nws tus kheej raug cov Neeg Lamas coj mus tau muab hu nyob hauv lub npe ntawd, thiab tau muaj ib lub cim muab rau nws.

11 Thiab tau muaj tias txhua tus uas tsis ntseeg li cov Neeg Lamas txoj kev li kev cai, tiam sis tau ntseeg cov ceev xwm txheej uas tau coj tawm ntawm daim av Yeluxalees tuaj, thiab li lawv tej yawg koob txoj kev li kev cai, uas yog txoj yog, cov uas tau ntseeg Vajtswv tej lus txib thiab coj lawv, tau raug hu ua cov Neeg Nifais, los sis Nifais cov neeg, txij li lub sij hawm ntawd mus—

12 Thiab twb yog lawv cov uas tau ceev cov ceev xwm txheej uas yog qhov tseeb ntawm lawv cov neeg, thiab ntawm cov Neeg Lamas cov neeg.

13 Nim no peb yuav rov qab tig mus rau cov neeg Alixais, vim lawv los kuj muaj ib lub cim kos rau lawv thiab; muaj tseeb tiag, lawv tau kos lub cim rau lawv tus kheej, muaj tseeb tiag, twb yog ib lub cim liab rau saum lawv hauv pliaj.

14 Yog li ntawd Vajtswv txoj lus tau muaj puv npo, vim cov no yog tej lus uas nws tau hais rau Nifais tias: Saib seb, kuv tau foom tsis zoo rau cov Neeg Lamas, thiab kuv yuav tso ib lub cim rau lawv xwv kom lawv thiab lawv tej noob yuav faib tawm ntawm koj thiab koj tej noob, txij li lub sij hawm no lawm yav tom ntej thiab mus ib txhis li, tsuas yog lawv hloov siab lees txim ntawm lawv txoj kev phem thiab tig los cuag kuv xwv kom kuv yuav muaj kev hlub tshua rau lawv.

15 Thiab ntxiv: Kuv yuav tso ib lub cim rau tus uas muab nws tej noob mus do xyaw nrog koj tej kwv tij, kom lawv yuav raug foom tsis zoo tib yam.

16 Thiab ntxiv: Kuv yuav tso ib lub cim rau tus uas yuav ntaus tawm tsam koj thiab koj tej noob.

17 Thiab ntxiv, Kuv hais rau nws tus uas ncaim ntawm koj mus yuav tsis raug hu ua koj cov noob ib zaug ntxiv lawm; thiab kuv yuav foom koob hmoov rau koj, thiab cov uas yuav raug hu ua koj cov noob, txij no mus lawm yav tom ntej thiab mus ib txhis li; thiab cov no yog tej lus cog tseg ntawm tus Tswv rau Nifais thiab rau nws tej noob.

18 Nim no cov neeg Alixais tsis tau paub tias lawv tau tab tom ua kom Vajtswv tej lus tiav thaum lawv tau pib kos cim rau saum lawv tej hauv pliaj; txawm li ntawd los lawv tseem tau tab meeg ntxeev siab tawm tsam Vajtswv; yog li ntawd nws tsim nyog tias txoj kev foom tsis zoo yuav tsum poob los rau lawv.

19 Nim no kuv xav kom nej pom tias lawv tau coj txoj kev foom tsis zoo los rau lawv tus kheej; thiab txhua tus neeg uas raug foom tsis zoo los kuj coj nws txoj kev rau txim los rau nws tus kheej.

20 Nim no tau muaj tias tsis ntau hnub tom qab npluav rog uas tau tawm tsa nyob hauv thaj av Xalahelas, los ntawm cov Neeg Lamas thiab cov neeg Alixais, tau muaj dua cov Neeg Lamas lwm pab tub rog tuaj tawm tsam Nifais cov neeg, nyob hauv tib qho chaw uas thawj pab tub rog tau ntsib cov neeg Alixais.

21 Thiab tau muaj tias tau muaj ib pab tub rog raug xa mus raws lawv tawm ntawm lawv thaj av.

22 Nim no Amas tus kheej tau raug mob thiaj tsis tau nce mus ua rog tawm tsam cov Neeg Lamas zaum no;

23 Tiam sis nws tau xa ib pab tub rog coob mus tawm tsam lawv; thiab lawv tau nce mus thiab tau tua cov Neeg Lamas ntau leej, thiab tau raws lawv cov uas seem tshuav tawm ntawm lawv thaj av tej ciam teb mus.

24 Thiab ces lawv tau rov qab los dua thiab tau pib tsim kev thaj yeeb nyob hauv thaj av, tsis muaj teeb meem nrog lawv tej yeeb ncuab ntxiv tau ib ntus.

25 Nim no tag nrho txhua yam tsav no tau ua tiav, muaj tseeb tiag, tag nrho tej tsov rog thiab tej kev sib cav sib ceg no tau pib thiab tau xaus nyob hauv xyoo thib tsib ntawm cov neeg txiav txim txoj kev kav.

26 Thiab nyob rau hauv ib xyoos tau muaj ntau txhiab leej tau raug xa mus rau lub ntiaj teb uas nyob mus ib txhis, xwv kom lawv yuav tau sau lawv tej nqi zog raws li lawv tej hauj lwm, tsis hais lawv yuav zoo los sis tsis hais lawv yuav phem, sau txoj kev zoo siab nyob mus ib txhis los sis txoj kev txom nyem nyob mus ib txhis, raws li tus ntsuj plig uas lawv tau xaiv raws ntseeg, tsis hais nws yog ib tug ntsuj plig zoo los sis ib tug phem.

27 Vim txhua tus neeg yeej yuav tau txais tej nqi zog ntawm tus uas nws xaiv raws ntseeg, thiab qhov no yog raws li tej lus ntawm tus ntsuj plig uas qhia tej uas yuav muaj los yav tom ntej; yog li ntawd cia kom nws muaj raws li qhov tseeb. Thiab li no thiaj li xaus xyoo thib tsib ntawm cov neeg txiav txim txoj kev kav.