1 Thiab nim no, tau muaj tias nyob hauv xyoo nees nkaum thiab rau ntawm cov neeg txiav txim txoj kev kav Nifais cov neeg, saib seb, thaum cov Neeg Lamas tau tsim nyob rau thawj tag kis ntawm thawj lub hlis, saib seb, lawv tau nrhiav pom tias Amalikhaiyas tau tuag nyob hauv nws lub tsev pheeb suab ntaub; thiab lawv kuj tau pom tias Thi-akhas twb npaj tau yuav ua rog rau lawv hnub ntawd.

2 Thiab nim no, thaum cov Neeg Lamas tau pom qhov no lawv tau poob siab heev; thiab lawv tau tso lawv tej tswv yim tseg uas tau npaj lawm tias yuav mus rau hauv thaj av sab pem toj lawm, thiab thim tag nrho lawv tej tub rog mus rau hauv lub nroog Mules, thiab tau mus nrhiav chaw tiv thaiv nyob hauv lawv tej chaw tiv thaiv.

3 Thiab tau muaj tias Amalikhaiyas tus kwv tau raug tsa ua vaj ntxwv kav cov neeg; thiab nws lub npe yog Amauloos; li no vaj ntxwv Amauloos, vaj ntxwv Amalikhaiyas tus kwv, tau raug tsa los kav nyob hauv nws qhov chaw.

4 Thiab tau muaj tias nws tau txib kom nws cov neeg yuav tsum tswj tuav cov nroog ntawd, tej uas lawv txeeb tau los ntawm txoj kev nqaij ntuag ntshav nrog; vim lawv tsis tau txeeb ib lub nroog uas lawv tsis tau xiam ntshav li.

5 Thiab nim no, Thi-akhas tau pom tias cov Neeg Lamas tau txiav txim tswj tuav cov nroog uas lawv txeeb tau, thiab tej feem ntawm thaj av uas lawv tau kav lawm; thiab kuj tau pom tias lawv tau coob heev, Thi-akhas tau xav tias nws tsis tsim nyog nws yuav sim tawm tsam lawv nyob hauv lawv tej chaw tiv thaiv.

6 Tiam sis nws tau ceev nws cov neeg nyob ib puag ncig, ib yam li npaj rawv yuav ua rog; muaj tseeb tiag, thiab tseeb tiag nws yeej tau npaj tiv thaiv nws tus kheej tawm tsam lawv, los ntawm txoj kev ua phab ntsa ncig thiab tau npaj tej chaw tiv thaiv.

7 Thiab tau muaj tias nws tau npaj rawv ua rog mus txog thaum Maulaunais tau xa ib pab neeg coob tuaj txhawb nws cov tub rog zog.

8 Thiab Maulaunais kuj tau xa lus txib mus rau nws kom nws yuav tsum ceev tag nrho tej neeg raug txim uas tau poob rau hauv nws tes; vim ib yam li cov Neeg Lamas tau txhom coob tus neeg raug txim, kom nws yuav tsum ceev tag nrho cov Neeg Lamas tej neeg raug txim cia pauv cov uas cov Neeg Lamas txhom tau lawm.

9 Thiab nws kuj tau xa tej lus txib rau nws kom nws yuav tsum ua ntsa tiv thaiv thaj av Huaj Vam, thiab xyuas zoo zoo txoj kev nqaim uas coj mus rau thaj av sab pem toj, nyob tsam cov Neeg Lamas yuav tuaj txeeb tau qhov ntawd thiab yuav muaj zog tawm tsam lawv tsis tseg rau txhua sab.

10 Thiab Maulaunais kuj tau xa xov rau nws, xav kom nws yuav tsum mob siab tswj tuav ces kaum av ntawd, thiab kom nws yuav nrhiav txhua lub sij hawm kov kom yeej cov Neeg Lamas nyob rau ces kaum av ntawd, kom ntau npaum li nws lub zog, xwv kom tej zaum nws yuav rov qab txeeb tau tej nroog uas tau raug poob tawm ntawm lawv tes lawm los ntawm txoj kev siv tswv yim los sis los ntawm lwm txoj kev; thiab kom nws kuj yuav tsum ua ntsa tiv thaiv thiab ua kom tej nroog nyob ib ncig uas tseem tsis tau poob rau hauv cov Neeg Lamas tes muaj zog.

11 Thiab nws kuj tau hais rau nws tias, kuv yuav tuaj cuag koj, tiam sis saib seb, cov Neeg Lamas tau tawm tsam peb nyob rau ntawm tej ciam teb ntawm thaj av uas nyob ze hiav txwv sab hnub poob; thiab saib seb, kuv tau mus tawm tsam lawv, yog li ntawd kuv thiaj tuaj tsis tau cuag koj.

12 Nim no, tus vaj ntxwv (Amauloos) tau ncaim tawm ntawm thaj av Xalahelas lawm, thiab tau ua rau niam vaj ntxwv paub txog nws tus tij laug txoj kev tuag, thiab tau sau ib co neeg coob coob tuaj ua ke, thiab tau tawm mus tawm tsam cov Neeg Nifais nyob nram tej ciam teb ze hiav txwv sab hnub poob.

13 Thiab li no nws tau sib zog mus tawm tsam cov Neeg Nifais tsis tseg, thiab tau rub ib feem ntawm lawv tej tub rog mus rau feem av ntawd, thiab nws tau txib cov uas nws tau tseg cia kom nyob tej nroog uas nws txeeb tau, kom lawv kuj yuav tsum tawm tsam cov Neeg Nifais nyob rau tej ciam teb uas ze hiav txwv sab hnub tuaj, thiab yuav tsum txeeb kom tau lawv tej av ntau npaum li lawv yuav ua tau, raws li lawv tej tub rog tej zog.

14 Thiab li no cov Neeg Nifais uas nyob rau hauv tej chaw muaj teeb meem tau xaus xyoo nees nkaum thiab rau ntawm cov neeg txiav txim txoj kev kav cov Neeg Nifais.

15 Tiam sis saib seb, tau muaj tias nyob rau hauv xyoo nees nkaum thiab xya ntawm cov neeg txiav txim txoj kev kav, ces Thi-akhas, los ntawm tej lus txib ntawm Maulaunais—tus uas tau txhim tsa tej tub rog los tsom kwm tej ciam teb sab nram hav thiab sab hnub poob ntawm thaj av, thiab nws tau tawm ncaj qha mus rau tom thaj av Huaj Vam, xwv kom nws yuav pab tau Thi-akhas thiab nws cov neeg txeeb kom tau tej nroog uas lawv tau poob lawm.

16 Thiab tau muaj tias Thi-akhas tau txais lus txib kom tawm tsam lub nroog Mules thiab txeeb nws rov qab yog tias yuav ua tau.

17 Thiab tau muaj tias Thi-akhas tau npaj ua ib npluav rog rau saum lub nroog Mules, thiab tau nrog nws cov tub rog tawm mus tawm tsam cov Neeg Lamas; tiam sis nws tau pom tias yuav mus tsis tau tias nws yuav kov yeej lawv thaum lawv tseem nyob hauv lawv tej chaw tiv thaiv; yog li ntawd nws tau tso nws tej kev npaj thiab tau rov qab los rau tom lub nroog Huaj Vam, los tos Maulaunais tuaj, xwv kom nws yuav tau txais zog pab nws tej tub rog.

18 Thiab tau muaj tias Maulaunais tau nrog nws cov tub rog tuaj txog rau thaj av Huaj Vam, nyob rau thaum yuav kawg xyoo nees nkaum thiab xya ntawm cov neeg txiav txim txoj kev kav cov Neeg Nifais.

19 Thiab nyob rau thaum pib xyoo nees nkaum thiab yim, Maulaunais thiab Thi-akhas thiab ntau tus thawj nom peb tau rub ib lub rooj sab laj ua rog—saib lawv yuav ua yam dab tsi thiaj ua tau rau cov Neeg Lamas tawm tuaj ua rog tawm tsam lawv; los sis kom lawv yuav ua tau tej yam dab tsi ntxias tau lawv tawm ntawm lawv tej chaw nkaum, xwv kom lawv yuav tau qhov zog rau saum lawv thiab thiaj txeeb tau lub nroog Mules rov qab.

20 Thiab tau muaj tias lawv tau xa neeg xa xov mus rau cov Neeg Lamas tej tub rog, uas saib xyuas lub nroog Mules, mus rau lawv tus thawj coj, uas npe hu ua Yakhauj, tau xav kom nws tawm nrog nws cov tub rog tuaj ntsib lawv rau tom tiaj uas nyob nruab nrab ntawm ob lub nroog. Tiam sis saib seb, Yakhauj, tus uas yog neeg Xaulas, tsis kam tawm nrog nws cov tub rog tuaj ntsib lawv rau tom tiaj.

21 Thiab tau muaj tias Maulaunais, tsis muaj kev cia siab tias yuav tau ntsib lawv rau saum tej av xwm yeem, yog li ntawd, nws tau xav ib txoj kev uas nws yuav ntxias tau cov Neeg Lamas tawm ntawm lawv tej chaw nkaum.

22 Yog li ntawd nws tau kom Thi-akhas coj ib co neeg tsawg thiab nqis mus ze nram ntug hiav txwv; thiab Maulaunais thiab nws cov tub rog, tau mus rau hauv hav zoov thaum tsaus ntuj, uas nyob sab hnub poob ntawm lub nroog Mules; thiab li no, nyob rau tag kis, thaum cov Neeg Lamas tej tub saib xyuas tau nrhiav pom Thi-akhas, lawv tau khiav thiab tau qhia qhov ntawd rau Yakhauj, lawv tus thawj coj.

23 Thiab tau muaj tias cov Neeg Lamas tej tub rog tau tawm mus tawm tsam Thi-akhas, tau xav tias los ntawm lawv tej neeg coob coob yeej yuav kov yeej Thi-akhas vim nws cov neeg tsawg heev. Thiab thaum Thi-akhas pom cov Neeg Lamas tej tub rog tab tom tawm tuaj tawm tsam nws nws tau pib thim nqis mus raws ntug hiav txwv, sab pem toj.

24 Thiab tau muaj tias thaum cov Neeg Lamas pom tias nws tau pib khiav, lawv tau muaj siab hlo thiab tau raws lawv tas zog. Thiab thaum Thi-akhas tab tom coj cov Neeg Lamas mus lawm cov uas tau raws lawv tsis tau dab tsi, saib saib, Maulaunais tau txib kom ib feem ntawm nws cov tub rog uas nrog nws yuav tsum mus rau hauv lub nroog, thiab txeeb qhov chaw nyob.

25 Thiab lawv tau ua li no, thiab tau tua tag nrho cov uas tau tseg zov thaiv lub nroog, muaj tseeb tiag, tag nrho cov uas tsis kam tso tseg lawv tej cuab yeej ua rog.

26 Thiab li no Maulaunais thiaj txeeb tau lub nroog Mules nrog ib feem ntawm nws cov tub rog, ces nws ho nrog cov seem tshuav mus ntsib cov Neeg Lamas thaum lawv yuav rov qab los ntawm txoj kev mus raws Thi-akhas.

27 Thiab tau muaj tias cov Neeg Lamas tau raws Thi-akhas mus txog thaum lawv tau los txog ze lub nroog Huaj Vam, thiab tom qab ntawd lawv thiaj tau raug ntsib Lihais thiab ib pab tub rog tsawg, uas tau tso tseg zov thaiv lub nroog Huaj Vam.

28 Thiab nim no saib seb, thaum tej thawj nom peb ntawm cov Neeg Lamas tau pom Lihais nrog nws cov tub rog tab tom tuaj tawm tsam lawv, lawv tau khiav feeb tsis meej heev li, ntshai nyob tsam lawv yuav mus tsis txog lub nroog Mules ua ntej Lihais yuav txhom tau lawv; vim lawv tau qaug zog rau qhov lawv tau tuaj deb, thiab Lihais cov neeg tseem khov kho.

29 Nim no cov Neeg Lamas tsis tau paub tias Maulaunais twb nyob tom lawv qab nrog nws cov tub rog; thiab tag nrho tej uas lawv ntshai tsuas yog Lihais thiab nws cov neeg xwb.

30 Nim no Lihais tsis tau xav txhom kom tau lawv mus txog thaum lawv ntsib Maulaunais thiab nws cov tub rog.

31 Thiab tau muaj tias ua ntej cov Neeg Lamas yuav tau thim deb lawv tau raug vij los ntawm cov Neeg Nifais, ib sab los ntawm Maulaunais cov neeg, thiab lwm sab los ntawm Lihais cov neeg, tag nrho sawv daws puav leej tseem khov thiab muaj zog heev; tiam sis cov Neeg Lamas tau qaug zog vim yog lawv txoj kev mus deb.

32 Thiab Maulaunais tau txib nws cov neeg kom lawv tawm tsam tua lawv mus txog thaum lawv tso lawv tej cuab yeej ua rog tseg.

33 Thiab tau muaj tias Yakhauj, tus uas yog lawv tus thawj, tus uas kuj yog ib tug neeg Xaulas, thiab muaj lub siab tsis kam swb leej twg li, nws tau coj cov Neeg Lamas tawm ua rog npau taws heev tawm tsam Maulaunais.

34 Maulaunais tau nyob hauv lawv txoj kev mus, yog li ntawd Yakhauj tau txiav txim siab tua lawv thiab txiav nws txoj kev kom dhau mus rau lub nroog Mules. Tiam sis saib seb, Maulaunais thiab nws cov neeg tau muaj zog dua; yog li ntawd lawv tsis txav kev rau cov Neeg Lamas li.

35 Thiab tau muaj tias lawv tau sib tua heev nyob rau ob tog; thiab tau muaj ntau tus tau raug tua nyob rau ob tog; muaj tseeb tiag, thiab Maulaunais tau raug mob thiab Yakhauj tau raug tua.

36 Thiab Lihais tau sib zog nias qees tom lawv qab tuaj nrog nws cov neeg uas muaj zog, ces cov Neeg Lamas uas nyob tom qab tau tso lawv tej cuab yeej ua rog tseg; thiab lawv cov uas seem, tau feeb tsis meej, tsis paub saib yuav mus qhov twg los sis yuav tua qhov twg.

37 Nim no Maulaunais tau pom lawv txoj kev feeb tsis meej, nws tau hais rau lawv tias: Yog nej yuav coj nej tej cuab yeej ua rog thiab muab lawv los, saib seb peb yuav tsum tsis txo nej tej ntshav lawm.

38 Thiab tau muaj tias thaum cov Neeg Lamas tau hnov tej lus no, lawv tej thawj nom peb, tag nrho cov uas tsis tau raug tua, tau txav los thiab tau pov lawv tej cuab yeej ua rog rau ntawm Maulaunais ko taw, thiab kuj tau txib kom lawv cov neeg yuav tsum ua tib yam.

39 Tiam sis saib seb, tau muaj coob tug uas tsis kam; thiab cov uas tsis kam tso lawv tej ntaj tau raug txhom thiab khi, thiab lawv tej cuab yeej ua rog tau raug muab ntawm lawv mus, thiab lawv raug yuam nrog lawv cov kwv tij mus rau hauv thaj av Huaj Vam.

40 Thiab nim no cov neeg raug txim uas tau raug txhom tau coob dua li cov neeg uas raug tua tuag, muaj tseeb tiag, coob dua li cov uas tau tua tuag hauv ob tog.