1 Nim no kuv tus me tub, qhov no yog tej yam ntxiv uas kuv yuav hais rau koj; vim kuv pom tias koj lub siab txhawj txog txoj kev sawv hauv qhov tuag rov qab los ntawm cov neeg tuag.

2 Saib seb, kuv hais rau koj, tias tsis muaj txoj kev sawv hauv qhov tuag rov qab los—los sis, kuv yuav hais, ua lwm yam hais, tias lub cev uas txawj tuag no yuav tsis rais los ua lub uas tsis txawj tuag, lub cev uas txawj lwj no yuav tsis rais los mus ua lub uas tsis txawj lwj—mus txog tom qab uas Khetos los tso.

3 Saib seb, nws coj tau txoj kev sawv hauv qhov tuag rov los rau cov neeg tuag. Tiam sis saib seb, kuv tus me tub, txoj kev sawv hauv qhov tuag rov qab los tseem yuav tsis tau muaj. Nim no, kuv qhia rau koj paub txog ib qho txuj ci tseem ceeb uas neeg paub tsis txog; txawm li ntawd los, muaj ntau yam txuj ci tseem ceeb uas neeg paub tsis txog uas tau muaj ceev tseg lawm, xwv kom tsis txhob muaj neeg paub txog lawv tsuas yog Vajtswv tus kheej xwb. Tiam sis kuv qhia rau koj paub txog ib yam uas kuv tau rau siab thov kom Vajtswv qhia kuv paub—qhov ntawd yog txog txoj kev sawv hauv qhov tuag rov qab los.

4 Saib seb, muaj ib lub sij hawm uas tau teem tseg rau sawv daws yuav tawm hauv qhov tuag los. Nim no thaum lub sij hawm no los yuav tsis muaj leej twg paub; tiam sis Vajtswv paub lub sij hawm uas tau teem tseg lawm.

5 Nim no, txawm tias yuav muaj ib zaug, los sis zaum ob, los sis zaum peb, uas leej tib neeg yuav sawv hauv qhov tuag los, los nws tsis tseem ceeb dab tsi; vim Vajtswv paub tag tej yam no; thiab nws txaus kuv lawm thaum paub tias muaj li no—tias twb muaj ib lub caij uas tau teem tseg lawm uas tag nrho sawv daws yuav sawv hauv qhov tuag los.

6 Nim no yuav tsum muaj ib ntus nyob nruab nrab ntawm lub caij tuag thiab lub caij ntawm txoj kev sawv hauv qhov tuag rov qab los.

7 Thiab nim no kuv yuav nug tias neeg tej ntsuj plig yuav rais mus nyob li cas txij li lub sij hawm tuag mus rau lub sij hawm uas tau teem tseg rau txoj kev sawv hauv qhov tuag rov qab los?

8 Nim no txawm tias yuav muaj ntau dua li ib zaug uas tau teem tseg rau neeg kom sawv los los nws tsis tseem ceeb dab tsi; vim sawv daws tsis ua tib txhij tuag, thiab qhov no tsis tseem ceeb dab tsi; tag nrho zoo li ib hnub rau Vajtswv xwb, thiab lub caij lub nyoog tsuas yog suav rau noob neej xwb.

9 Yog li ntawd, muaj ib lub sij hawm uas tau teem rau tib neeg lawm kom lawv yuav sawv hauv qhov tuag los; thiab muaj ib ntus uas nyob nruab nrab ntawm lub caij tuag thiab txoj kev sawv hauv qhov tuag rov qab los. Thiab nim no, hais txog lub caij no, tib neeg tej ntsuj plig yuav rais mus nyob li cas yog yam uas kuv tau mob siab thov tus Tswv kom paub; thiab qhov no yog yam uas kuv paub.

10 Thiab thaum lub sij hawm los uas sawv daws yuav sawv, lub sij hawm ntawd lawv yuav paub tias Vajtswv paub tag nrho tej caij nyoog uas tau raug teem cia rau tib neeg lawm.

11 Nim no, hais txog saib tej ntsuj plig yuav nyob li cas nruab nrab txoj kev tuag thiab txoj kev sawv hauv qhov tuag rov qab los—Saib seb, nws raug ua rau kuv paub lawm los ntawm ib tug tim tswv, tias tag nrho tej tib neeg tej ntsuj plig, thaum uas lawv ncaim ntawm lub cev uas txawj ploj txawj tuag no, muaj tseeb tiag, tej tib neeg sawv daws tej ntsuj plig, txawm yog lawv zoo los phem, tau raug coj mus tsev mus cuag Vajtswv tus uas tau muab txoj sia rau lawv.

12 Thiab lub sij hawm ntawd yuav tau muaj tias, tej ntsuj plig ntawm cov uas ncaj ncees tau raug txais mus nyob rau hauv ib qho chaw zoo siab, uas hu ua yeeb tsheej, ib qho chaw uas tau so, ib qho chaw uas muaj kev thaj yeeb, qhov uas lawv yuav tau so tseg tag nrho lawv tej teeb meem thiab tseg tag nrho tej kev txhawj, thiab tej kev tu siab.

13 Thiab lub sij hawm ntawd yuav tau muaj tias, cov neeg phem tej ntsuj plig, muaj tseeb tiag, cov uas yog neeg phem—vim saib seb, lawv tsis muaj feem los sis ib qho ntawm tus Tswv tus Ntsuj Plig; vim saib seb, lawv tau xaiv ua tej hauj lwm phem dua li tej zoo; yog li ntawd tus dab tus ntsuj plig tau nkag mus rau hauv lawv, thiab mus nyob hauv lawv tej tsev—thiab cov no yuav raug pov rau hauv qhov chaw tsaus ntuj nti; yuav muaj kev quaj, thiab kev nyiav, thiab muaj kev tom hniav qees, thiab qhov no vim yog lawv tus kheej tej kev tsis ncaj ncees, raug ntxias txhom los ntawm tus dab kev siab xav tau.

14 Nim no qhov no yog qhov chaw rau cov neeg phem tej ntsuj plig, muaj tseeb tiag, nyob hauv txoj kev tsaus ntuj, thiab ib qho chaw uas phem heev, ntshai rawv nyob tsam Vajtswv txoj kev npau taws yuav los rau saum lawv; yog li ntawd lawv pheej yuav nyob hauv qhov chaw no, ib yam li cov neeg ncaj ncees nyob hauv yeeb tsheej, mus txog lawv lub caij uas yuav sawv hauv qhov tuag rov qab los.

15 Nim no, muaj ib txhia tau to taub tias qhov chaw nyob kaj siab lug thiab qhov chaw txom nyem ntawm tus ntsuj plig no, ua ntej txoj kev sawv hauv qhov tuag rov qab los, twb yog thawj txoj kev sawv hauv qhov tuag rov qab los. Muaj tseeb tiag, kuv xav tias yuav hu tau nws ua ib txoj kev sawv hauv qhov tuag rov qab los, txoj kev sawv ntawm tus ntsuj los sis tus plig thiab lawv txoj kev xa mus rau qhov tau zoo los sis qhov txom nyem, raws li tej lus uas tau raug hais lawm.

16 Thiab saib seb, kuj tau hais nws lawm tias yuav muaj thawj txoj kev sawv hauv qhov tuag rov qab los, ib txoj kev sawv hauv qhov tuag rov qab los ntawm tag nrho cov uas tau muaj los lawm, los sis cov ziag no, los sis cov tseem yuav muaj, nqis mus txog thaum Khetos sawv hauv qhov tuag rov qab los.

17 Nim no, peb tsis txhob xav tias thawj txoj kev sawv hauv qhov tuag rov qab los no, uas tau raug hais zoo li no, yuav yog txoj kev sawv hauv qhov tuag rov qab los ntawm tej ntsuj plig thiab lawv txoj kev mus rau qhov tau zoo los sis txom nyem. Koj tsis muaj peev xwm xav tias nws yog txhais li qhov no.

18 Saib seb, kuv hais rau koj tias, Tsis yog li ntawd; tiam sis nws txhais hais tias yog txoj kev lub cev thiab tus ntsuj plig rov los sib sau ua ke dua, ntawm cov uas txij li lub sij hawm thaum Adas nyob nqis mus txog thaum Khetos sawv hauv qhov tuag rov qab los.

19 Nim no, txawm tej ntsuj plig thiab tej cev ntawm cov uas tau hais lawm yuav rov sib sau tag nrho los ua ke ib zaug los, tsis hais cov neeg phem los cov zoo, kuv tsis hais; cia nws txaus, tias kuv hais tias lawv sawv daws yeej yuav sawv; los sis ua lwm yam lus hais, lawv txoj kev sawv hauv qhov tuag rov qab los yuav xub muaj ua ntej txoj kev sawv hauv qhov tuag rov qab los ntawm cov uas tuag tom qab Khetos txoj kev sawv hauv qhov tuag rov qab los.

20 Nim no, kuv tus me tub, kuv tsis tau hais tias lawv txoj kev sawv hauv qhov tuag rov qab los yuav los rau lub caij thaum Khetos sawv hauv qhov tuag rov qab los; tiam sis saib saib, kuv tsuas hais raws li kuv lub siab xav, tias tej ntsuj plig thiab tej cev yuav los sib sau ua ke, ntawm cov neeg ncaj ncees, nyob rau lub caij thaum Khetos sawv hauv qhov tuag rov qab los, thiab nws txoj kev nce mus saum ntuj ceeb tsheej.

21 Tiam sis txawm nws yuav yog thaum nws txoj kev sawv hauv qhov tuag rov qab los los sis tom qab ntawd, kuv tsis hais; tiam sis kuv hais npaum li no, tias muaj ib ntus uas nyob nruab nrab ntawm txoj kev tuag thiab txoj kev sawv hauv qhov tuag rov qab los ntawm lub cev, thiab ib qho chaw tau zoo los sis txom nyem rau tus ntsuj plig nyob mus txog lub sij hawm uas Vajtswv tau teem tseg cia lawm tias cov neeg tuag yuav sawv los, thiab rov los sib sau, tus ntsuj plig thiab lub cev los ua ke; thiab yuav raug coj los sawv ntawm Vajtswv xub ntiag, thiab raug txiav txim raws li lawv tej hauj lwm.

22 Muaj tseeb tiag, qhov no yuav ua kom muaj txoj kev txum tim tej yam uas tau hais los ntawm cov yaj saub tej qhov ncauj lawm rov qab los.

23 Tus ntsuj plig yuav rov txum tim los nyob hauv lub cev, thiab lub cev rov muaj tus ntsuj plig; muaj tseeb tiag, thiab tej tes tej taw thiab tej pob qij txha yuav rov txum tim los dhos li qub rau hauv nws lub cev; muaj tseeb tiag, ib txoj plaub hau saum taub hau los yuav tsis poob; tiam sis tag nrho txhua yam yuav rov txum tim los rau lawv tej qub chaw thiab qub cev uas zoo kawg nkaus.

24 Thiab nim no, kuv tus me tub, qhov no yog txoj kev txum tim rov qab los ntawm qhov uas tau hais los ntawm tej yaj saub tej qhov ncauj—

25 Thiab thaum ntawd cov neeg ncaj ncees yuav ci tuaj nyob rau hauv Vajtswv lub nceeg vaj.

26 Tiam sis saib seb, ib txoj kev tuag phem heev yuav los rau cov neeg phem; vim lawv tuag yam li tej khoom uas muaj rau tej yam ntawm txoj kev ncaj ncees; vim lawv tsis huv, thiab tsis muaj ib yam uas tsis huv yuav muaj peev xwm nkag tau rau Vajtswv lub nceeg vaj; tiam sis lawv yuav raug ntiab tawm, thiab raug kom noj tej txiv ntawm lawv tej dag zog los sis lawv tej hauj lwm, uas tau ua phem; thiab lawv yuav haus tej txo ntawm lub khob iab.