1 Thiab saib seb, nim no tau muaj tias yam peb yuav ua tom ntej yog txeeb kom tau lub nroog Meethais; tiam sis saib seb, tsis muaj kev li uas peb yuav coj tau lawv tawm ntawm lub nroog los ntawm peb cov tub rog tsawg. Vim saib seb, lawv tau nco ntsoov tej uas peb tau ua tas los lawm; yog li ntawd peb tsis muaj peev xwm ntxias tau lawv tawm ntawm lawv tej chaw muaj zog mus.

2 Thiab lawv los kuj muaj coob dua li peb cov tub rog ces peb thiaj tsis kam tawm mus thiab tawm tsam lawv nyob hauv lawv tej chaw muaj zog.

3 Muaj tseeb tiag, thiab nws tau rais los tsim nyog tias peb yuav tsum siv peb cov neeg mus tswj tuav peb tej feem av uas peb tau rov txeeb tau los lawm; yog li ntawd nws tsim nyog tias peb yuav tsum tos, xwv kom peb yuav txais tau zog ntxiv los ntawm thaj av Xalahelas thiab tej khoom noj khoom siv tshiab tso.

4 Thiab tau muaj tias kuv thiaj li tau xa ib co tub xa xov mus rau tus tswv xeev ntawm peb thaj av, mus qhia rau nws txog tej hauj lwm ntawm peb cov neeg. Thiab tau muaj tias peb tau tos kom txais tej khoom noj khoom siv thiab zog ntawm thaj av Xalahelas.

5 Tiam sis saib seb, qhov no tsuas pab peb me me xwb; vim cov Neeg Lamas kuj tau txais zog loj ib hnub dhau ib hnub, thiab kuj tau txais tej khoom noj khoom siv ntau; thiab peb tej kev nyob rau lub sij hawm no zoo li no.

6 Thiab cov Neeg Lamas tau tab tom maj nrawm nroos tawm tsam peb ib lub sij hawm dhau ib lub sij hawm, siv tswv yim ua kom peb puas tsuaj; txawm li ntawd los peb tsis muaj cuab kav tuaj ua rog nrog lawv, vim yog lawv tej chaw nkaum thiab lawv tej chaw muaj zog.

7 Thiab tau muaj tias peb tau tos nyob rau hauv tej lub caij nyuaj no tau ncua ntau lub hlis, twb mus txog thaum uas peb yuav luag piam sij rau txoj kev xav tau zaub mov.

8 Tiam sis tau muaj tias peb tau txais zaub mov, uas raug saib xyuas tuaj rau peb los ntawm ib pab tub rog ob txhiab leej uas tuaj pab peb; thiab qhov no yog tag nrho tej kev pab uas peb tau txais, los tiv thaiv peb tus kheej thiab peb lub teb chaws kom dim ntawm txoj kev poob rau hauv peb tej yeeb ncuab tes, muaj tseeb tiag, mus tawm tsam tus yeeb ncuab uas suav tsis txheeb.

9 Thiab nim no qhov uas ua rau peb tau txais kev pab tsawg, los sis qhov uas vim li cas lawv tsis xa zog ntxiv rau peb, peb tsis paub; yog li ntawd peb tau nyuaj siab thiab kuj muaj kev ntshai puv npo, ntshai tsam muaj dab tsi es Vajtswv tej kev txiav txim ho los rau saum peb thaj av, ua kom peb poob thiab puas tsuaj huv si mus.

10 Yog li ntawd peb tau nchuav hlo peb tej siab tawm thov Vajtswv, kom nws yuav txhawb peb zog thiab pab peb dim ntawm peb tej yeeb ncuab tes, muaj tseeb tiag, thiab muab lub zog rau peb thiab kom peb yuav rov muab tau peb tej nroog, thiab peb tej av, thiab tej uas peb muaj, rau txoj kev txhawb peb cov neeg.

11 Muaj tseeb tiag, thiab tau muaj tias tus Tswv peb tus Vajtswv tau los xyuas peb nrog tej kev tseeb tias nws yuav cawm peb; muaj tseeb tiag, kawg tias nws tau hais kev nyab xeeb rau peb tej siab, thiab tau muab txoj kev ntseeg heev rau peb, thiab tau ua rau peb kom peb cia siab tias nws yuav cawm peb.

12 Thiab peb thiaj tau ua siab loj nrog peb lub zog me uas peb tau txais, thiab tau paub zoo ruaj nrees tias yuav kov yeej peb tej yeeb ncuab, thiab mus tswj tuav peb tej av, thiab tej uas peb muaj, thiab peb tej poj niam, thiab peb tej me nyuam, thiab txoj kev ntseeg peb txoj kev ywj siab.

13 Thiab li no peb tau tawm mus nrog tag nrho peb tej zog tawm tsam cov Neeg Lamas, uas nyob hauv lub nroog Meethais; thiab peb tau rub peb tej tsev pheeb suab ntaub rau ntawm ntug hav zoov, uas nyob ze rau lub nroog.

14 Thiab tau muaj tias nyob rau tag kis, thaum cov Neeg Lamas tau pom tias peb tau nyob ntawm ntug hav zoov uas nyob ze lub nroog, ces lawv tau xa lawv tej neeg soj xyuas tuaj ncig peb kom lawv yuav paub saib peb tej tub rog muaj npaum li cas thiab muaj zog li cas.

15 Thiab tau muaj tias thaum lawv pom tias peb tsis muaj zog, raws li tej neeg uas peb muaj, thiab ntshai tias tsam peb yuav txiav lawv tawm ntawm lawv txoj kev pab tsuas yog lawv yuav tawm tuaj ua rog tawm tsam peb thiab tua peb, thiab kuj xav tias lawv yuav ua kom peb puas tsuaj yooj yim nrog lawv tej tub rog uas coob coob, yog li ntawd lawv tau pib npaj tawm tuaj ua rog tawm tsam peb.

16 Thiab thaum peb tau pom tias lawv tab tom npaj tawm tuaj tawm tsam peb, saib seb, kuv tau kom Nkis, nrog ib co neeg tsawg, yuav tsum mus nkaum rau hauv hav zoov, thiab Thi-onaws thiab ib co neeg tsawg yuav tsum mus nkaum rau hauv hav zoov thiab.

17 Nim no Nkis thiab nws cov neeg tau nyob sab xis thiab lwm cov ho nyob sab laug; thiab thaum lawv tau mus nkaum li no lawm, saib seb, kuv tau nyob, nrog kuv cov tub rog uas tshuav, rau hauv tib qhov chaw uas peb xub thawj rub peb tej tsev pheeb suab ntaub npaj tos lub sij hawm uas cov Neeg Lamas tawm tuaj ua rog.

18 Thiab tau muaj tias cov Neeg Lamas tau tawm nrog lawv tej tub rog coob coob tuaj tawm tsam peb. Thiab thaum lawv tau tuaj thiab yuav luag tawm tsam peb nrog tej ntaj, kuv tau kom kuv cov neeg, uas tseem nrog kuv, thim mus rau hauv hav zoov.

19 Thiab tau muaj tias cov Neeg Lamas tau raws ceev heev lawv peb qab, vim lawv tau xav caum kom tau peb heev kom lawv yuav tau muab peb tua; yog li ntawd lawv tau raws peb qab mus rau hauv hav zoov; thiab peb tau hla mus rau hauv nruab nrab ntawm Nkis thiab Thi-onaws, kawg tias cov Neeg Lamas twb tsis pom lawv.

20 Thiab tau muaj tias thaum cov Neeg Lamas tau hla los dhau, los sis thaum cov tub rog tau hla los, Nkis thiab Thi-onaws tau sawv hauv lawv tej chaw nkaum los, thiab tau txiav cov Neeg Lamas tej neeg soj xyuas kom lawv yuav rov qab tsis tau mus rau hauv nroog.

21 Thiab tau muaj tias thaum lawv tau txiav lawv kev lawm, lawv tau khiav mus rau tom nroog thiab tawm tsam cov neeg saib xyuas uas tau tso zov lub nroog, kawg tias lawv tau ua rau lawv puas tsuaj thiab txeeb tau lub nroog.

22 Nim no qhov no tau muaj tiav los yog vim cov Neeg Lamas tau cia tag nrho lawv cov tub rog, raug coj mus rau hauv hav zoov, tsuas yog tshuav ob peb tug neeg zov xwb.

23 Thiab tau muaj tias Nkis thiab Thi-onaws los ntawm qhov no thiaj txeeb tau lawv tej chaw muaj zog. Thiab tau muaj tias peb tau taug peb txoj kev, tom qab uas tau mus ntev hauv hav zoov mus rau thaj av Xalahelas.

24 Thiab thaum cov Neeg Lamas pom tias lawv tau tab tom mus ncaj nraim rau thaj av Xalahelas, lawv tau ntshai heev, nyob tsam muaj ib qho kev npaj uas yuav coj lawv mus rau txoj kev puas tsuaj; yog li ntawd lawv tau pib thim rov mus rau hauv hav zoov dua, muaj tseeb tiag, twb rov tib txog qub ke uas lawv tau tuaj.

25 Thiab saib seb, yog hmo ntuj thiab lawv tau rub lawv tej tsev pheeb suab ntaub, vim cov thawj nom peb ntawm cov Neeg Lamas tau xav tias cov Neeg Nifais yuav lim heev vim yog lawv txoj kev mus kev; thiab tau xav tias lawv tau raws tag nrho cov Neeg Nifais tej tub rog lawm yog li ntawd lawv tsis tau xav txog lub nroog Meethais.

26 Nim no tau muaj tias thaum uas tsaus ntuj lawm, kuv tau kom kuv cov neeg tsis txhob pw, tiam sis kom lawv mus dua lwm txoj kev rau tom thaj av Meethais.

27 Thiab vim yog peb txoj kev mus hmo ntuj li no, saib seb, tag kis peb tau cov Neeg Lamas ntej, kawg tias peb tau xub mus txog lub nroog Meethais ua ntej lawv.

28 Thiab li no tau muaj tias, los ntawm txoj kev siv tswv yim no peb thiaj txeeb tau lub nroog Meethais yam tsis muaj ntshav nrog.

29 Thiab tau muaj tias thaum cov tub rog ntawm cov Neeg Lamas los txog ze lub nroog, thiab tau pom tias peb tau npaj ntsib lawv, lawv tau poob siab heev thiab tau txhawj kawg nkaus, kawg tias lawv tau khiav mus rau hauv hav zoov lawm.

30 Muaj tseeb tiag, thiab tau muaj tias cov Neeg Lamas tej tub rog tau khiav tawm tag nrho ntawm feem av no mus lawm. Tiam sis saib seb, lawv tau cab nrog lawv ntau tus poj niam thiab me nyuam tawm ntawm thaj av mus.

31 Thiab cov nroog uas tau raug cov Neeg Lamas muab tau lawm, nyob rau lub sij hawm no peb puav leej muab tau lawv tag nrho lawm; thiab peb tej txiv thiab peb tej poj niam thiab peb tej me nyuam tab tom rov qab mus rau lawv tej tsev, tag nrho sawv daws tsuas tshuav cov uas tau raug txhom ua neeg raug txim thiab raug cab mus lawm los ntawm cov Neeg Lamas xwb.

32 Tiam sis saib seb, peb tej tub rog tsawg heev uas yuav tswj tuav ntau lub nroog thiab ntau yam uas muaj.

33 Tiam sis saib seb, peb cia siab rau hauv peb tus Vajtswv uas tau muab txoj kev yeej tej av ntawd rau peb, kawg tias peb rov txeeb tau tej nroog thiab tej av ntawd, uas yeej yog peb li.

34 Nim no peb tsis paub qhov uas tej nom tswv tsis xa zog ntxiv rau peb; cov neeg uas tau tuaj rau peb los kuj tsis paub tias vim li cas peb tsis tau txais zog ntau ntxiv.

35 Saib seb, peb yeej tsis paub tiam sis tsuas yog hnov tej uas nej ua tsis tau xwb, thiab koj tau rub tej tub rog mus rau feem av tom ko lawm; yog muaj tseeb li ntawd ces, peb tsis xav yws yws.

36 Thiab yog tias tsis yog li ntawd no ces, saib seb, peb ntshai tias tsam muaj kev ntxeev siab nyob hauv cov nom tswv, es lawv thiaj tsis kam xa neeg ntxiv tuaj pab peb; vim peb paub tias lawv yeej muaj coob dua li tej uas lawv tau xa lawm.

37 Tiam sis, saib seb, nws tsis ua li cas—peb cia siab Vajtswv yuav cawm peb, txawm tias peb tej tub rog tsis muaj zog, muaj tseeb tiag, thiab yeej yuav cawm peb dim ntawm peb tej yeeb ncuab tes.

38 Saib seb, qhov no yog thaum yuav kawg, xyoo thib nees nkaum thiab cuaj, thiab peb twb nyob hauv tej chaw ntawm peb tej av; thiab cov Neeg Lamas tau khiav mus rau thaj av Nifais lawm.

39 Thiab cov neeg Amoos tej tub, uas kuv pheej nquag hais txog ntawd, kuj nrog kuv nyob hauv lub nroog Meethais; thiab tus Tswv tau txhawb lawv, muaj tseeb tiag, thiab tau ceev lawv dim ntawm txoj kev vau los ntawm ntaj, kawg tias twb tsis muaj ib tug uas raug tua li.

40 Tiam sis saib seb, lawv tau txais mob ntau; txawm li ntawd los lawv tseem sawv ruaj nrees hauv txoj kev ywj siab uas Vajtswv tau ua rau lawv dim; thiab lawv yeej ua tib zoo nco ntsoov tus Tswv lawv tus Vajtswv ib hnub dhau ib hnub; muaj tseeb tiag, lawv yeej ua tib zoo coj nws tej lus txib, thiab nws tej kev txiav txim, thiab nws tej lus txib tsis tu ncua; thiab lawv txoj kev ntseeg yeej muaj zog nyob hauv tej kev qhia tej uas yuav muaj los yav tom ntej txog tej uas yuav muaj los.

41 Thiab nim no, kuv tus tij laugMaulaunais, uas kuv hlub es, thov tus Tswv peb tus Vajtswv, uas tau txhiv peb thiab ua rau peb dim, ceev koj tsis tu ncua nyob hauv nws xub ntiag; muaj tseeb tiag, thiab thov nws foom koob hmoov rau cov neeg no, kom nej yuav ua tau rov qab muab tau tag nrho tej uas cov Neeg Lamas tau txeeb ntawm peb mus lawm, tej uas yog yam txhawb peb. Thiab nim no, saib seb, kuv kaw kuv tsab ntawv. Kuv yog Hilamas, Amas tus tub.