1 Thiab tau muaj tias Amas thiab Amulej tau raug txib kom ncaim tawm ntawm lub nroog ntawd; thiab nkawd tau ncaim, thiab tau tawm los mus rau hauv thaj av Xidoos; thiab saib seb, qhov ntawd nkawd tau pom tag nrho cov neeg uas tau ncaim tawm ntawm thaj av Amonaihas, cov uas tau raug ntiab tawm thiab muab pob zeb ntaus, vim lawv tau ntseeg Amas tej lus.

2 Thiab nkawd tau piav rau lawv tag nrho ib puas yam tsav uas tau tshwm sim rau lawv tej poj niam thiab me nyuam, thiab kuj txog nkawd tus kheej, thiab txog nkawd lub hwj chim ntawm txoj kev cawm dim.

3 Thiab Xi-elas kuj tau mob pw nyob tom Xidoos, ua npaws kub, uas tau mob los ntawm tej kev txom nyem ntawm nws saib vim yog nws txoj kev phem, vim nws tau xav tias tsis muaj Amas thiab Amulej lawm; thiab nws tau xav tias nkawd tau tuag lawm vim yog nws txoj kev tsis ncaj. Thiab txoj kev txhaum loj no, thiab nws lwm yam kev txhaum ntau, tau tsim txom nws lub siab mus txog thaum nws tau rais los mus mob heev kawg li, tsis muaj txoj kev cawm dim li; yog li ntawd nws tau pib kub heev nrog ib qho hluav taws kub.

4 Nim no, thaum uas nws tau hnov tias Amas thiab Amulej tau nyob hauv thaj av Xidoos, nws lub siab tau pib rov muaj zog tuaj; thiab nws tau xa ib tsab xov tam sim ntawd mus rau nkawd, xav kom nkawd los cuag nws.

5 Thiab tau muaj tias nkawd tau mus tam sim, ua kiag raws li tsab xov uas nws tau xa mus rau nkawd; thiab nkawd tau mus rau hauv tsev mus cuag Xi-elas; thiab nkawd nrhiav tau nws saum nws lub txaj, tau mob, tau ua npaws kub tsis muaj zog kiag li; thiab nws lub siab los kuj tau mob heev kawg nkaus li vim yog nws tej kev tsis ncaj ncees; thiab thaum nws tau pom nkawd nws tau xyab hlo nws txhais tes, thiab tau thov nkawd kom nkawd kho nws.

6 Thiab tau muaj tias Amas tau tuav nkaus nws tes, tau hais rau nws tias: Koj puas ntseeg Khetos lub hwj chim uas coj mus rau txoj kev cawm seeg?

7 Thiab nws tau teb thiab hais tias: Muaj tseeb tiag, kuv ntseeg tag nrho ib puas yam tsav lus uas koj tau qhia lawm.

8 Thiab Amas tau hais tias: Yog koj ntseeg hauv txoj kev txhiv dim ntawm Khetos ces koj yeej zoo taus.

9 Thiab nws tau hais tias: Muaj tseeb tiag, kuv ntseeg raws nraim li koj tej lus.

10 Thiab tom qab ntawd Amas tau quaj thov rau tus Tswv hais tias: Au tus Tswv peb tus Vajtswv es, thov hlub tus txiv neej no, thiab kho nws raws li nws txoj kev ntseeg uas nyob hauv Khetos.

11 Thiab thaum Amas tau hais tej lus no tas, Xi-elas tau sawv tsees, thiab tau pib mus kev; thiab tau ua zoo li no rau txoj kev xav tsis thoob heev ntawm cov neeg tag nrho; thiab txoj kev paub ntawm qhov no tau mus thoob plaws rau txhua thaj av hauv Xidoos.

12 Thiab Amas tau muab Xi-elas ua kev cai raus dej rau tus Tswv; thiab nws tau pib txij li lub sij hawm ntawd mus qhuab qhia rau cov neeg.

13 Thiab Amas tau tsa ib lub koom txoos nyob hauv thaj av Xidoos, thiab tau tsa tej pov thawj thiab tej xib hwb nyob hauv thaj av, muab ua kev cai raus dej rau tus Tswv cov uas xav ua kev cai raus dej.

14 Thiab tau muaj tias lawv tau muaj coob; vim lawv tau tuaj tag nrho hauv ib cheeb tsam ib ncig Xidoos tuaj, thiab tau ua kev cai raus dej.

15 Tiam sis rau cov neeg uas nyob hauv thaj av Amonaihas, lawv tseem ua ib co neeg siab tawv thiab tawv ncauj; thiab lawv tsis tau hloov siab lees txim ntawm lawv tej kev txhaum, tseem muab tag nrho Amas thiab Amulej tej hwj chim txiaj ntsig rau tus dab; vim lawv tau yog Nihos tej tub txawg tub ntse, thiab tsis tau ntseeg txoj kev hloov siab lees txim ntawm lawv tej kev txhaum.

16 Thiab tau muaj tias Amas thiab Amulej, Amulej tau tso tag nrho nws tej kub, thiab tej nyiaj dawb, thiab nws tej khoom muaj nuj nqis, uas muaj nyob hauv thaj av Amonaihas, rau Vajtswv txoj lus, nws tau raug tsis lees yuav los ntawm cov uas tau yog nws tej phooj ywg ib zaug thiab kuj los ntawm nws txiv thiab nws tej kwv tij neej tsa;

17 Yog li ntawd, tom qab uas Amas tau tsa lub koom txoos nyob hauv Xidoos, tau pom ib txoj kev ris siab loj, muaj tseeb tiag, tau pom tias cov neeg tau ris siab rau txoj kev khav theeb ntawm lawv tej siab, thiab tau pib txo lawv tej hwj chim rau Vajtswv, thiab tau pib sau lawv tus kheej tuaj ua ke rau lawv tej chaw dawb huv teev tiam Vajtswv ntawm lub thaj, xyuas ntsoov thiab thov Vajtswv tsis tu ncua, kom lawv yuav raug cawm dim ntawm Dab Ntxwg Nyoog, thiab ntawm txoj kev tuag, thiab ntawm txoj kev puas tsuaj—

18 Nim no ib yam li kuv tau hais lawm, Amas tau pom tag nrho tej yam no, yog li ntawd nws tau coj Amulej thiab tau los rau thaj av Xalahelas, thiab tau coj nws mus rau tom nws lub tsev, thiab tau pab nws hauv nws tej kev txom nyem, thiab txhawb nws lub dag lub zog nyob hauv tus Tswv.

19 Thiab li no tau kawg xyoo thib kaum ntawm cov neeg txiav txim txoj kev kav Nifais cov neeg.