1 Thiab nim no tau muaj tias nyob rau thaum pib xyoo thib nees nkaum thiab cuaj ntawm cov neeg txiav txim, ces Amauloos tau xa xov rau Maulaunais xav kom nws yuav sib pauv tej neeg raug txim.

2 Thiab tau muaj tias Maulaunais tau muaj kev zoo siab heev rau txoj kev thov no, vim nws tau xav cia tej khoom noj khoom siv uas tau muab pab cov Neeg Lamas raug txim lawm rau txoj kev txhawb nws cov neeg; thiab nws kuj tau xav kom nws cov neeg pab dag zog rau nws tej tub rog.

3 Nim no cov Neeg Lamas txhom tau ntau tus poj niam thiab me nyuam, thiab tsis muaj ib tug poj niam los sis ib tug me nyuam nyob hauv tag nrho Maulaunais cov neeg raug txim, los sis cov neeg raug txim uas Maulaunais txhom tau; yog li ntawd Maulaunais tau txiav txim siab siv tswv yim muab kom tau cov Neeg Nifais raug txim dim los ntawm cov Neeg Lamas coob npaum li yuav ua tau.

4 Yog li ntawd nws tau sau ib tsab ntawv, thiab muab rau Amauloos tus tub qhe xa, tib tug uas tau coj ib tsab ntawv tuaj rau Maulaunais. Nim no cov no yog cov lus uas nws tau sau rau Amauloos, hais tias:

5 Saib seb, Amauloos, kuv tau sau rau koj tej yam txog npluav rog no uas koj tau ua rau kuv cov neeg, los sis qhov uas koj tus tij laug tau ua tawm tsam lawv, thiab qhov uas koj tseem tau ua ntxiv mus tom qab uas nws tuag lawm.

6 Saib seb, kuv yuav qhia koj tej yam txog Vajtswv txoj kev txim lij, thiab rab ntaj ntawm nws txoj kev npau taws heev, uas dai kav nraim rau saum nej tsuas yog koj yuav hloov siab lees txim thiab thim koj tej tub rog mus rau nej tej av xwb, los sis mus rau thaj av uas nej nyob, uas yog thaj av Nifais.

7 Muaj tseeb tiag, kuv yuav qhia koj tej yam no yog koj yuav muaj peev xwm mloog lawv; muaj tseeb tiag, kuv yuav qhia koj txog lub ntuj txiag teb tsaus uas phem heev ntawd uas tos ntsoov txais cov neeg tua neeg li koj thiab koj cov kwv tij uas tau ua tas los lawm, tsuas yog koj yuav hloov siab lees txim thiab thim koj tej tswv yim tua neeg, thiab rov qab nrog koj tej tub rog mus rau nej tej av.

8 Tiam sis ib yam li nej twb tau tsis kam lees yuav tej no ib zaug lawm, thiab tau tua tawm tsam tus Tswv cov neeg, tib yam li ntawd kuv yuav xav tias nej yuav rov qab ua dua.

9 Thiab nim no saib seb, peb twb npaj txhij tos txais nej; muaj tseeb tiag, thiab tsuas yog koj thim koj tej tswv yim xwb, saib seb, nej yuav rub kom Vajtswv tus uas nej tau tsis kam lees txoj kev npau taws poob los rau nej, twb yuav ua kom nej puas tsuaj huv tib si.

10 Tiam sis, ib yam li tus Tswv tseem muaj txoj sia nyob, peb tej tub rog yeej yuav tuaj tua nej tsuas yog nej thim xwb, thiab tsis ntev nej yuav raug txoj kev tuag los xyuas, vim peb yuav rov muab peb tej nroog thiab peb tej av; muaj tseeb tiag, thiab peb yuav tswj tuav peb txoj kev teev ntuj thiab txoj kev ntseeg peb tus Vajtswv.

11 Tiam sis saib seb, kuv xav tias kuv hais rau koj txog tej yam no yuav tsis tau dab tsi; los sis kuv xav tias koj yog ib tug me nyuam ntawm ntuj txiag teb tsaus; yog li ntawd kuv yuav kaw kuv tsab ntawv los ntawm txoj kev qhia koj tias kuv yuav tsis kam sib pauv tej neeg raug txim, tsuas yog tias koj yuav tso tus txiv thiab nws tus poj niam thiab nws tej me nyuam, pauv ib tug neeg raug txim xwb; yog koj yuav kam ua li no, kuv thiaj yuav kam pauv.

12 Thiab saib seb, yog koj tsis kam ua li no, kuv yuav tuaj tawm tsam nej nrog kuv tej tub rog; muaj tseeb tiag, kuv yeej yuav muab tej cuab yeej rau kuv tej poj niam thiab kuv tej me nyuam thiab kuv yuav tuaj tawm tsam nej, thiab kuv yuav raws nej kom mus txog ntua nej thaj av, uas yog thaj av ntawm peb thawj cov qub txeeg qub teg; muaj tseeb tiag, thiab nws yuav yog ntshav pauj ntshav, muaj tseeb tiag, siav pauj siav; thiab kuv yuav ua rog rau nej kom mus txog thaum nej puas tsuaj tawm ntawm lub ntiaj teb no mus.

13 Saib seb, kuv nyob hauv kuv txoj kev npau taws, thiab kuv cov neeg los tib yam; nej tau nrhiav tua peb, thiab peb tsuas tau nrhiav tiv thaiv peb tus kheej xwb. Tiam sis saib seb, yog nej nrhiav ua kom peb puas tsuaj ntxiv peb yuav nrhiav ua kom nej puas tsuaj; muaj tseeb tiag, thiab peb yuav nrhiav peb thaj av, thaj av uas yog peb thawj cov qub txeeg qub teg.

14 Nim no kuv kaw kuv tsab ntawv. Kuv yog Maulaunais; kuv yog ib tug thawj coj ntawm Nifais cov neeg.

15 Nim no tau muaj tias Amauloos, thaum nws tau txais tsab ntawv no, tau npau taws; thiab nws tau sau dua ib tsab ntawv tuaj rau Maulaunais, thiab cov no yog tej lus uas nws tau sau, hais tias:

16 Kuv yog Amauloos, cov Neeg Lamas tus vaj ntxwv; kuv yog tus kwv ntawm Amalikhaiyas tus uas nej tau muab tua lawm. Saib seb, kuv yuav ua pauj nws cov ntshav rau saum nej, muaj tseeb tiag, thiab kuv yuav tuaj tawm tsam nej nrog kuv tej tub rog vim kuv tsis ntshai koj tej lus hem.

17 Vim saib seb, nej tej yawg koob tau ua txhaum lawv cov kwv tij, kawg tias lawv tau txhav lawv txoj cai los kav cov neeg thaum txoj cai ntawd twb yog lawv li.

18 Thiab nim no saib seb, yog nej yuav tso nej tej cuab yeej, thiab cia nej tus kheej raug kav los ntawm cov uas muaj cai ntawm txoj kev kav, ces kuv yuav kom kuv cov neeg tso lawv tej cuab yeej thiab tsum tsis ua rog ntxiv lawm.

19 Saib seb, koj tau hais tawm ntau yam lus hem nkaug kuv thiab kuv cov neeg; tiam sis saib seb, peb tsis ntshai koj tej lus hem li.

20 Txawm li ntawd los, kuv yuav kam sib pauv tej neeg raug txim raws li koj hais, zoo siab hlo, xwv kom kuv yuav tshwj tau kuv tej zaub mov rau kuv cov neeg ua rog; thiab peb yuav ua ib npluav rog uas yuav nyob mus ib txhis, seb cov Neeg Nifais yuav raug los nyob hauv peb txoj cai los sis lawv yuav tu noob nyob mus ib txhis.

21 Thiab hais txog tus Vajtswv ntawd uas koj hais tias peb tau tsis lees yuav, saib seb, peb tsis paub ib tug zoo li ntawd; nej los kuj tsis paub thiab; tiam sis yog hais tias muaj ib tug li ntawd, peb tsis paub tiam sis nws tau ua peb zoo tib yam li nej.

22 Thiab yog hais tias muaj ib tug dab thiab ib lub ntuj txiag teb tsaus, saib seb nws puas yuav tsis xa nej mus nyob qhov ntawd nrog kuv tus tij laug uas nej tau muab tua, tus uas koj tau hais tias tau mus rau qhov chaw zoo li ntawd lawm thiab? Tiam sis saib seb tej no tsis ua li cas.

23 Kuv yog Amauloos, thiab yog ib tug xeeb ntxwv ntawm Xaulas, tus uas nej tej yawg koob tau yuam kom cog lus thiab tau coj tawm ntawm Yeluxalees tuaj.

24 Thiab saib seb nim no, kuv yog ib tug Neeg Lamas tsis ntshai dab tsi; saib seb, npluav rog no tau raug tawm tsam pauj lawv tej kev txhaum, thiab muab rov qab thiab tswj tuav lawv tej cai los rau txoj kev kav; thiab kuv kaw kuv tsab ntawv rau Maulaunais.