1 Kuv tus tub, cuab pob ntseg rau kuv tej lus; vim kuv cog lus rau koj, tias npaum li uas koj yuav coj Vajtswv tej lus txib koj yuav vam meej nyob rau hauv thaj av.

2 Kuv xav kom koj yuav ua li kuv tau ua lawm, nco ntsoov txog txoj kev ua qhev ntawm peb tej yawg koob; vim lawv tau poob cev qhev, thiab tsis muaj leej twg yuav muaj peev xwm tso tau lawv tsuas yog Anplaham tus Vajtswv nkaus xwb, thiab Ixaj tus Vajtswv, thiab Yakhauj tus Vajtswv; thiab nws yeej tau tso lawv dim ntawm lawv tej kev txom nyem lawm tiag.

3 Thiab nim no, Au kuv tus me tub Hilamas es, saib seb, koj tseem hluas, thiab yog li ntawd, kuv thov koj kom koj yuav hnov kuv tej lus thiab kawm ntawm kuv; vim kuv yeej paub tias txhua tus uas yuav tso lawv tej kev ntseeg siab rau Vajtswv yeej yuav raug pab nyob hauv lawv tej kev plaub ntug, thiab lawv tej teeb meem, thiab lawv tej kev txom nyem, thiab yuav raug tsa sawv nyob rau hauv hnub kawg.

4 Thiab kuv tsis xav kom koj xav tias kuv paub kuv tus kheej xwb—tsis yog los ntawm sab cev nqaij daim tawv tiam sis yog los ntawm sab ntsuj plig, tsis yog los ntawm neeg tej siab tiam sis yog los ntawm Vajtswv.

5 Nim no, saib seb, kuv hais rau koj tias, yog kuv tsis tau yug los ntawm Vajtswv kuv yeej yuav tsis tau paub txog tej yam no; tiam sis los ntawm nws tus tim tswv dawb huv lub qhov ncauj, Vajtswv tau ua tej yam no rau kuv paub, tsis yog ib yam tsim nuj nqis ntawm kuv tus kheej;

6 Vim kuv tau mus ncig nrog Mauxiyas cov tub, mus nrhiav rhuav Vajtswv lub koom txoos; tiam sis saib seb, Vajtswv tau xa nws ib tug tim tswv dawb huv los cheem peb ntawm txoj kev.

7 Thiab saib seb, nws tau hais rau peb zoo ib yam li nws yog ib lub suab xob quaj, thiab tej av tau qeeg nkaws hauv peb qab xib taws; thiab peb sawv daws tau vau rau hauv av, vim tus Tswv txoj kev ntshai tau los rau saum peb.

8 Tiam sis saib seb, lub suab tau hais rau kuv tias: Cia li sawv. Thiab kuv tau sawv thiab tau sawv ntsug, thiab tau pom tus tim tswv.

9 Thiab nws tau hais rau kuv tias: Yog koj tsis xav kom koj tus kheej raug puas tsuaj, tsis txhob nrhiav rhuav Vajtswv lub koom txoos ntxiv lawm.

10 Thiab tau muaj tias kuv tau vau rau hauv av; thiab tau peb hnub thiab peb hmos uas kuv rua tsis tau kuv lub qhov ncauj, thiab kuv kuj siv tsis tau kuv tej tes tej taw.

11 Thiab tus tim tswv tau hais ntau yam ntxiv rau kuv, uas tau hnov los ntawm kuv cov kwv tij, tiam sis kuv tsis tau hnov tej ntawd; vim thaum kuv tau hnov tej lus uas hais tias—Yog koj tsis xav kom koj tus kheej raug puas tsuaj, tsis txhob nrhiav rhuav Vajtswv lub koom txoos ntxiv lawm—kuv tau raug kev txhawj thiab kev ntshai heev ntshai tsam kuv yuav raug puas tsuaj, ces kuv tau vau rau hauv av thiab tsis tau hnov dab tsi ntxiv lawm.

12 Tiam sis kuv tau raug tsim txom nrog txoj kev tsim txom uas nyob mus ib txhis, vim kuv tus ntsuj plig tau raug txom nyem kawg nkaus thiab tsim txom nrog tag nrho kuv tej kev txhaum.

13 Muaj tseeb tiag, kuv tau nco qab txog tag nrho kuv tej kev txhaum thiab tej kev tsis ncaj ncees, vim qhov uas kuv tau raug tsim txom nrog tej kev mob ntawm ntuj txiag teb tsaus; muaj tseeb tiag, kuv tau pom tias kuv tau ntxeev siab tawm tsam kuv tus Vajtswv, thiab kuv tsis tau coj nws tej lus txib dawb huv.

14 Muaj tseeb tiag, thiab kuv tau tua nws tej me nyuam ntau tus, los sis tau coj lawv mus rau txoj kev puas tsuaj; muaj tseeb tiag, thiab thaum kawg kuv tej kev tsis ncaj ncees tau muaj ntau heev kawg nkaus li, npaum tias txoj kev uas xav los rau hauv Vajtswv xub ntiag tau tsim txom kuv tus ntsuj plig nrog txoj kev ntshai uas tsis pom qab piav tau.

15 Au, kuv tau xav, tias kheev lam kuv raug xa tau mus nrauj zoo thiab rais los mus tsis muaj tus ntsuj plig thiab lub cev, xwv kom kuv tsis tau raug coj los sawv nyob hauv kuv tus Vajtswv xub ntiag, los txiav txim rau tej uas kuv tau ua los lawm.

16 Thiab nim no, kuv tau raug tsim txom tau peb hnub thiab peb hmos, twb raug tej kev mob ntawm ib tug neeg txhaum.

17 Thiab tau muaj tias thaum kuv tau raug tsim nrog txoj kev tsim txom zoo li ntawd, thaum kuv tau raug tsim txom los ntawm txoj kev nco qab txog kuv tej kev txhaum ntau, saib seb, kuv kuj tau nco txog kuv tau hnov kuv txiv txoj kev qhia tej uas yuav muaj los yav tom ntej rau cov neeg txog txoj kev los ntawm tus Yexus Khetos, Vajtswv ib tug tub, los theej ntiaj teb tej kev txhaum.

18 Nim no, thaum kuv lub siab txhom tau qhov kev xav no, kuv tau quaj nyob hauv kuv lub siab tias: Au Yexus, koj tus uas yog Vajtswv tus Tub, thov zam txim rau kuv, tus uas nyob hauv txoj kev phem kev iab, thiab raug khi los ntawm tej saw hlau ntawm txoj kev tuag uas kav ib txhis.

19 Thiab nim no, saib seb, thaum kuv tau xav li no, kuv txawm tsis nco qab txog kuv tej kev mob ntxiv lawm; muaj tseeb tiag, kuv tsis tau raug tsim txom los ntawm txoj kev nco qab txog kuv tej kev txhaum ntxiv lawm.

20 Thiab au, txoj kev xyiv fab dab tsi, thiab txoj kev kaj zoo kawg nkaus dab tsi uas kuv tau pom; muaj tseeb tiag, kuv tus ntsuj plig tau muaj txoj kev xyiv fab puv npo heev ib yam li kuv tej kev mob thiab!

21 Muaj tseeb tiag, kuv hais rau koj, kuv tus me tub, yeej tsis muaj ib yam dab tsi uas yuav mob thiab iab npaum li kuv tej kev mob. Muaj tseeb tiag, thiab kuv hais rau koj ntxiv, kuv tus me tub, tiam sis nyob rau sab tes tod, ho tsis muaj kev zoo nkauj thiab qab zib npaum li kuv txoj kev xyiv fab.

22 Muaj tseeb tiag, kuv nco tias kuv twb pom, ib yam li peb tus yawg koob Lihais tau pom, Vajtswv zaum saum nws lub rooj zaum, muaj tim tswv coob leej suav tsis txheeb nrog ncig nws, zoo li lawv hu nkauj thiab qhuas lawv tus Vajtswv; muaj tseeb tiag, thiab kuv tus ntsuj plig tau xav nyob qhov ntawd.

23 Tiam sis saib seb, kuv tej tes tej taw tau rov qab txais lawv tej zog dua, thiab kuv tau sawv tsees sawv ntsug, thiab tau qhia tseeb rau cov neeg tias kuv tau yug los ntawm Vajtswv.

24 Muaj tseeb tiag, thiab txij li lub caij ntawd los txog nim no, kuv tau ua hauj lwm tsis tseg li, xwv kom kuv yuav coj tau tej tib neeg los rau txoj kev hloov siab lees txim; xwv kom kuv yuav coj tau lawv los saj txoj kev xyiv fab heev uas kuv tau saj lawm; xwv kom lawv kuj yuav tau yug los ntawm Vajtswv, thiab muaj tus Vaj Ntsuj Plig Dawb Huv puv npo.

25 Muaj tseeb tiag, thiab nim no saib seb, Au kuv tus me tub es, tus Tswv tau muab rau kuv txoj kev xyiv fab heev vim tej txiv uas txi ntawm kuv tej hauj lwm;

26 Rau qhov vim yog txoj lus uas nws tau faib rau kuv, saib seb, ntau tus tau yug los ntawm Vajtswv, thiab tau saj ib yam li kuv tau saj lawm, thiab tau pom ntawm qhov muag kiag ib yam li kuv tau pom lawm; yog li ntawd lawv yeej paub txog tej yam no uas kuv tau hais lawm, ib yam li kuv paub; thiab txoj kev paub uas kuv muaj yog los ntawm Vajtswv los.

27 Thiab kuv tau raug pab thaum muaj kev nyuaj siab thiab muaj teeb meem txhua yam, muaj tseeb tiag, thiab nyob tag nrho hauv txhua yam kev txom nyem; muaj tseeb tiag, Vajtswv tau tso kuv dim qhov taub, thiab dim kev raug txim, thiab dim txoj kev tuag; muaj tseeb tiag, thiab kuv yeej muab kuv txoj kev cia siab rau nws, thiab nws yeej tseem yuav tso kuv dim.

28 Thiab kuv paub tias nws yuav tsa kuv sawv nyob rau hauv hnub kawg, mus nyob nrog nws muaj yeeb koob zis; muaj tseeb tiag, thiab kuv yuav qhuas nws mus ib txhis li, vim nws tau coj peb tej yawg koob tawm ntawm Iyiv los, thiab nws tau ua rau dej nqos cov neeg Iyiv mus rau hauv dej Hiav Txwv Liab; thiab nws tau coj lawv los ntawm nws lub hwj chim mus rau thaj av uas tau cog lus cia lawm; muaj tseeb tiag, thiab nws tau tso lawv dim ntawm txoj kev raug txim thiab txoj kev ua qhev ib lub caij dhau ib lub caij.

29 Muaj tseeb tiag, thiab nws kuj tau coj peb tej yawg koob tawm ntawm thaj av Yeluxalees tuaj thiab; thiab nws kuj tau, los ntawm nws lub hwj chim uas kav ib txhis, tau tso lawv dim ntawm tej kev raug txim thiab ua qhev, ib lub caij mus rau ib lub caij nqis los txog niaj hnub nim no; thiab kuv tau nco ntsoov txog lawv tej kev ua qhev; muaj tseeb tiag, thiab koj kuj tsim nyog yuav tsum nco ntsoov txog lawv tej kev ua qhev thiab, ib yam li kuv tau nco lawv tej kev ua qhev.

30 Tiam sis saib seb, kuv tus me tub es, tsis tas li no xwb; vim tsim nyog koj yuav tsum paub ib yam li kuv paub, tias npaum li uas koj yuav coj Vajtswv tej lus txib koj yuav vam meej nyob rau hauv thaj av; thiab koj kuj tsim nyog yuav tsum paub, tias npaum li uas koj yuav tsis coj Vajtswv tej lus txib koj yuav raug txiav tawm ntawm nws xub ntiag mus. Nim no qhov no yog raws li nws txoj lus.