1 Thiab nim no tau muaj tias nyob rau thaum pib xyoo nees nkaum thiab tsib ntawm cov neeg txiav txim txoj kev kav Nifais cov neeg, lawv tau txhim tsa txoj kev thaj yeeb nyob nruab nrab ntawm Lihais cov neeg thiab Mauli-atoos cov neeg txog lawv tej av, thiab tau pib muaj kev thaj yeeb nyob rau hauv xyoo nees nkaum thiab tsib.

2 Txawm li ntawd los, lawv twb tsis tswj tuav tag nrho txoj kev thaj yeeb nyob hauv thaj av kom ntev, vim tau pib muaj ib qho kev sib cav nyob hauv cov neeg txog tus thawj tub txiav txim Peholas; vim saib seb, tau muaj ib feem ntawm cov neeg tau xav kom muab tej yam ntawm txoj kev cai pauv.

3 Tiam sis saib seb, Peholas tsis kam hloov los sis tsis kam pauv txoj kev cai; yog li ntawd, nws tsis mloog rau cov uas tau xa lawv tej suab nrog lawv tej ntawd thov txog txoj kev hloov txoj kev cai.

4 Yog li ntawd, cov uas tau xav kom hloov txoj kev cai tau npau taws rau nws, thiab tau tsis xav kom nws ua tus thawj txiav txim kav thaj av ntxiv lawm; yog li ntawd tau sawv ib qho kev sib cav sov txog qhov ntawd, tiam sis tsis tau sib tua.

5 Thiab tau muaj tias cov uas tau xav kom tshem Peholas tawm ntawm lub rooj txiav txim tau raug hu ua neeg-vaj ntxwv, vim lawv tau xav kom hloov txoj kev cai es yuav ntxeev txoj kev kav ywj siab thiab tsim ib tug vaj ntxwv kav thaj av.

6 Thiab cov uas tau xav kom Peholas yuav tsum nyob ua tus thawj tub txiav txim kav thaj av tau hu lawv ua cov neeg ywj pheej; thiab li no thiaj tau muaj kab kem nyob hauv lawv, vim cov neeg ywj pheej tau twv los sis tau khi lus yuav tswj tuav lawv tej kev muaj cai thiab tej cib fim ntawm lawv txoj kev teev ntuj los ntawm ib txoj kev kav ywj siab.

7 Thiab tau muaj tias qhov teeb meem ntawm lawv txoj kev sib cav no tau raug tu tiav los ntawm cov neeg lub suab. Thiab tau muaj tias cov neeg lub suab tau nyiam cov neeg ywj pheej txoj, thiab Peholas rov tau nyob lub rooj txiav txim, uas tau ua kom muaj kev zoo siab nyob hauv Peholas cov kwv tij thiab kuj nyob hauv ntau tus ntawm cov neeg ywj siab, cov uas kuj tau ua kom cov neeg-vaj ntxwv ntsiag, kom lawv tsis kam nyom tiam sis tau raug kom tswj tuav txoj kev ywj pheej.

8 Nim no cov uas nyiam kom muaj vaj ntxwv tau yog cov uas tau yug los muaj nyiaj txiag, thiab lawv nrhiav kev ua vaj ntxwv; thiab lawv tau raug pab cuam los ntawm cov uas nrhiav hwj chim thiab cai rau saum cov neeg.

9 Tiam sis saib seb, qhov no tau yog ib lub sij hawm tsis zoo rau tej kev sib ceg li ntawd nyob hauv Nifais cov neeg; vim saib seb, Amalikhaiyas tau txhib dua cov Neeg Lamas tej siab tawm tsam Nifais cov neeg, thiab nws tau sib sau tej tub rog thoob plaws hauv nws thaj av tuaj ua ke, thiab tis cuab yeej rau lawv, thiab tau npaj zoo zoo tag nrho ua rog; vim nws tau cog lus lawm tias yuav haus Maulaunais cov ntshav.

10 Tiam sis saib seb, peb yuav pom tias nws lo lus cog uas nws tau cog yog ib qho ruam; txawm li ntawd los, nws tau npaj nws tus kheej thiab nws tej tub rog tuaj ua rog tawm tsam cov Neeg Nifais.

11 Nim no nws tej tub rog tsis muaj coob npaum li lawv tau muaj tas los lawm, vim yog ntau txhiab leej cov uas tau raug tua los ntawm cov Neeg Nifais tes; tiam sis txawm tias lawv tau poob loj los, Amalikhaiyas tseem tau sib sau ib pab tub rog zoo heev, kawg tias nws tsis ntshai nqis tuaj rau thaj av Xalahelas.

12 Muaj tseeb tiag, Amalikhaiyas tus kheej los kuj tau nqis tuaj thiab, nyob pem cov Neeg Lamas hau ntej. Thiab tau nyob rau hauv xyoo nees nkaum tsib ntawm cov neeg txiav txim txoj kev kav; thiab tau yog tib lub sij hawm uas lawv tau pib tu tej teeb meem ntawm lawv tej kev sib cav txog tus thawj tub txiav txim, Peholas.

13 Thiab tau muaj tias thaum cov neeg uas raug hu ua cov neeg-vaj ntxwv tau hnov tias cov Neeg Lamas tau tab tom nqis tuaj ua rog tawm tsam lawv, lawv tau zoo lawv tej siab; thiab lawv tsis kam tuav tej cuab yeej ua rog, vim lawv tau npau taws heev rau tus thawj tub txiav txim, thiab rau cov neeg ywj siab, ces lawv thiaj tsis kam tuav tej cuab yeej tiv thaiv lawv lub teb chaws.

14 Thiab tau muaj tias thaum Maulaunais tau pom li no, thiab kuj tau pom tias cov Neeg Lamas tab tom tuaj rau hauv tej ciam teb ntawm thaj av, nws tau npau taws heev vim yog txoj kev siab tawv ntawm cov neeg uas nws tau rau siab heev ua hauj lwm pab tshwj tseg cia; muaj tseeb tiag, nws tau npau taws heev; nws tus ntsuj plig tau muaj kev npau taws puv npo rau lawv.

15 Thiab tau muaj tias nws tau xa ib daig ntawv sau nrog cov neeg tej suab mus rau tus tswv xeev ntawm thaj av, tau xav kom nws yuav tsum nyeem daim ntawv ntawd, thiab muab hwj chim rau nws (Maulaunais) yuam cov neeg ntxeev siab kom tiv thaiv lawv lub teb chaws los sis muab lawv tua pov tseg.

16 Vim twb yog nws thawj qho kev pab xyuas uas ua kom xaus tej kev sib cav thiab tej kev tsis sib haum xeeb zoo li ntawd uas nyob hauv cov neeg; vim saib seb, qhov no tau yog ib qho teeb meem ntawm tag nrho lawv tej kev puas tsuaj yav tas los lawm. Thiab tau muaj tias nws tau raug pub kom muaj raws li cov neeg tej suab.

17 Thiab tau muaj tias Maulaunais tau txib kom nws cov tub rog mus tawm tsam cov neeg-vaj ntxwv ntawd, mus txo lawv tej kev khav theeb thiab lawv tej kev ua nom, thiab pheej lawv kom txij li av, los sis lawv yuav tsum tuav tej cuab yeej ua rog thiab txhawb txoj kev ywj siab.

18 Thiab tau muaj tias cov tub rog tau tawm mus tawm tsam lawv; thiab lawv tau txo lawv tej kev khav theeb thiab lawv txoj kev ua nom, kawg tias thaum uas lawv tau tsa lawv tej cuab yeej ua rog tua tawm tsam Maulaunais cov neeg lawv tau raug ntov vau thiaj pheej tiaj li av.

19 Thiab tau muaj tias tau muaj plaub txhiab leej ntawm cov neeg ntxeev siab uas tau raug ntov vau los ntawm ntaj; thiab lawv cov thawj uas tsis tau raug tua hauv tshav rog tau raug txhom thiab pov rau hauv qhov taub, vim tsis muaj sij hawm hais lawv tej plaub nyob rau lub sij hawm no.

20 Thiab cov neeg ntxeev siab uas seem, uas tsis xav kom raug ntov vau rau hauv av los ntawm ntaj, ho yeem los mus rau hauv txoj kev kav kev ywj siab, thiab tau raug yuam los tsa tus chij ntawm txoj kev ywj siab rau saum lawv tej pej thuam, thiab hauv lawv tej nroog, thiab los tuav tej cuab yeej tiv thaiv lawv lub teb chaws.

21 Thiab li no Maulaunais tau muab ib qho kev kawg rau cov neeg-vaj ntxwv ntawd, kom tsis txhob muaj ib tug twg muaj lub npe neeg-vaj ntxwv; thiab li no nws tau muab ib qho kev kawg rau cov neeg siab tawv thiab khav theeb uas hais tias yog roj ntshav ntawm cov neeg ua nom; tiam sis lawv tau raug qhau vau los txo lawv tej hwj chim zoo ib yam li lawv tej kwv tij, thiab kom sib sib zog ntaus rau lawv txoj kev ywj pheej kom dim ntawm txoj kev ua qhev.

22 Saib seb, tau muaj tias lub caij thaum Maulaunais tseem tab tom tshem tej tsov rog thiab tej kev sib cav nyob hauv nws cov neeg, thiab yuam kom lawv muaj kev thaj yeeb thiab kev vam meej, thiab ua tej kev cai npaj ua rog tawm tsam cov Neeg Lamas, saib seb, cov Neeg Lamas tau tuaj rau hauv thaj av Maulaunais, uas nyob hauv tej ciam teb ze ntawm ntug hiav txwv.

23 Thiab tau muaj tias cov Neeg Nifais tsis muaj zog txaus nyob hauv lub nroog Maulaunais; yog li ntawd Amalikhaiyas tau raws lawv, tau tua ntau leej. Thiab tau muaj tias Amalikhaiyas txeeb tau lub nroog, muaj tseeb tiag, tag nrho lawv tej khoom tiv thaiv uas muaj zog.

24 Thiab cov uas tau khiav tawm ntawm lub nroog Maulaunais tau los rau lub nroog Nifaihas; thiab cov neeg ntawm lub nroog Lihais kuj tau sib sau tuaj ua ke, thiab tau ua hauj lwm npaj thiab tau npaj txhij txais cov Neeg Lamas sib ua rog.

25 Tiam sis tau muaj tias Amalikhaiyas tsis cia cov Neeg Lamas mus ua rog tawm tsam lub nroog Nifaihas, tiam sis tau ceev lawv nyob qis rau nram ntug hiav txwv, tau tso neeg nyob rau txhua lub nroog tswj tuav thiab tiv thaiv tej nroog ntawd.

26 Thiab li no nws tau mus ntxiv, txeeb tau ntau lub nroog, lub nroog Nifaihas, thiab lub nroog Lihais, thiab lub nroog Mauli-atoos, thiab lub nroog Oonaws, thiab lub nroog Nkis, thiab lub nroog Mules, tag nrho cov uas nyob rau tej ciam teb sab hnub tuaj ze ntug hiav txwv.

27 Thiab cov Neeg Lamas txeeb tau li no, los ntawm Amalikhaiyas txoj kev txawj dag ntxias, ntau lub nroog heev, los ntawm lawv tej tub rog uas suav tsis txheeb, tag nrho cov uas muaj khoom tiv thaiv zoo raws li tej uas Maulaunais tau kom ua tiv thaiv; tag nrho tej uas muaj chaw tiv thaiv muaj zog rau cov Neeg Lamas.

28 Thiab tau muaj tias lawv tau mus rau tom thaj av Huaj Vam tej ciam teb, tau raws cov Neeg Nifais khiav ntawm lawv mus thiab tau tua coob leej.

29 Tiam sis tau muaj tias lawv tau raug ntsib Thi-akhas, tus uas tau tua Mauli-atoos thiab tau txiav nws cov neeg kev thaum nws khiav.

30 Thiab tau muaj tias nws kuj tau txiav Amalikhaiyas kev, thaum uas nws tseem tab tom mus nrog nws cov tub rog coob coob xwv kom nws yuav txeeb tau thaj av Huaj Vam, thiab thaj av sab pem toj.

31 Tiam sis saib seb nws tau ntsib ib txoj kev ua tsis tau li siab xav los ntawm txoj kev raws khiav rov qab los ntawm Thi-akhas thiab nws cov neeg, vim lawv yog ib cov neeg txawj sib tua heev; vim txhua tus neeg ntawm Thi-akhas tau kov yeej cov Neeg Lamas nyob hauv lawv lub zog thiab hauv lawv tej kev txawj ua rog, kawg tias lawv tau qhov yeej rau saum cov Neeg Lamas.

32 Thiab tau muaj tias lawv tau tawm tsam lawv tsis tu ncua li, kawg tias lawv tau tua lawv mus txog thaum tsaus ntuj. Thiab tau muaj tias Thi-akhas thiab nws cov neeg tau rub lawv tej tsev pheeb suab ntaub nyob hauv tej ciam teb ntawm thaj av Huaj Vam; thiab Amalikhaiyas tau rub nws tej tsev pheeb suab ntaub nyob hauv tej ciam teb nyob nram suab puam ze ntug hiav txwv, thiab lawv tau raug raws khiav zoo li no.

33 Thiab tau muaj tias thaum tsaus ntuj los lawm, Thi-akhas thiab nws tus tub qhe tau nyiag sawv thiab tau tawm mus hmo ntuj, thiab tau mus rau hauv Amalikhaiyas lub yeej; thiab saib seb, txoj kev tsaug zog tau kov yeej lawv vim yog lawv txoj kev sab lim heev, uas tau raug los ntawm txoj kev siv zog thiab tshav kub hnub ntawd.

34 Thiab tau muaj tias Thi-akhas tau nyiag nkag mus rau hauv vaj ntxwv lub tsev pheeb suab ntaub thiab tau muab ib rab hmuv nkaug nws lub siab; thiab nws tau ua rau vaj ntxwv tuag tam sim ntawd kom nws tsa tsis tau nws tej tub qhe.

35 Thiab nws tau rov qab twj ywm los rau hauv nws lub yeej, thiab saib seb, nws cov neeg tau tsaug zog tag, thiab nws tau tsa lawv thiab tau qhia lawv tag nrho ib puas yam tsav uas nws tau ua lawm.

36 Thiab nws tau kom nws cov tub rog yuav tsum sawv npaj txhij zog tos, nyob tsam cov Neeg Lamas yuav tsim thiab tuaj tawm tsam lawv.

37 Thiab li no thiaj tau xaus xyoo nees nkaum tsib ntawm cov neeg txiav txim txoj kev kav Nifais cov neeg; thiab li no thiaj kawg Amalikhaiyas lub neej.