1 Thiab tau muaj tias tag nrho cov uas tsis mloog Hilamas thiab nws cov kwv tij tej lus tau sib sau ua ke tawm tsam lawv cov kwv tij.

2 Thiab nim no saib seb, lawv tau npau taws heev, kawg tias lawv tau xav muab lawv cov ntawd tua.

3 Nim no tus thawj coj ntawm cov uas tau npau taws tawm tsam lawv cov kwv tij yog ib tug neeg loj thiab muaj zog; thiab nws lub npe hu ua Amalikhaiyas.

4 Thiab Amalikhaiyas tau xav ua ib tug vaj ntxwv; thiab cov neeg uas tau npau taws kuj tau xav kom nws ua lawv tus vaj ntxwv thiab; thiab lawv tau yog feem coob ntawm lawv cov uas txiav txim qis ntawm thaj av, thiab lawv tau nrhiav kom muaj hwj chim.

5 Thiab lawv tau raug yaum los ntawm Amalikhaiyas tej kev ua txuj ntxias, tias yog lawv yuav txhawb nws thiab tsa nws ua lawv tus vaj ntxwv ces nws yuav tsa lawv los ua cov kav cov neeg.

6 Zoo li no lawv thiaj raug yaum los ntawm Amalikhaiyas mus rau txoj kev ntxeev siab, tsis quav ntsej Hilamas thiab nws cov kwv tij tej kev qhuab qhia, muaj tseeb tiag, tsis quav ntsej txog lawv txoj kev mob siab tu lub koom txoos, vim lawv yog cov pov thawj hlob saib xyuas lub koom txoos.

7 Thiab tau muaj coob leej nyob hauv lub koom txoos cov uas tau ntseeg Amalikhaiyas tej lus uas hais tshaj qhov ntseeg tau, yog li ntawd lawv tseem tau ntxeev siab tawm ntawm lub koom txoos mus; thiab li no Nifais cov neeg tej hauj lwm tau tsis ruaj khov thiab muaj teeb meem heev, tsis nco txog lawv txoj kev yeej loj uas lawv tau muaj rau saum cov Neeg Lamas, thiab lawv txoj kev zoo siab heev uas lawv tau muaj vim yog lawv txoj kev pab dim los ntawm tus Tswv txhais tes.

8 Zoo li no peb thiaj pom tau tias noob neej hnov qab tus Tswv lawv tus Vajtswv sai npaum li cas, muaj tseeb tiag, ua kev tsis ncaj ncees, thiab raug ua tus dab coj mus sai npaum li cas.

9 Muaj tseeb tiag, thiab peb kuj pom tau tias ib tug neeg uas phem phem mas muaj peev xwm ua tau kom muaj txoj kev phem loj nyob hauv tib neeg.

10 Muaj tseeb tiag, peb pom tias Amalikhaiyas, vim nws yog ib tug neeg txawj dag ntxias thiab ib tug neeg muaj tej lus ua txuj ntxias ntau, pom nws coj ntau tus neeg tej siab mus ua phem heev; muaj tseeb tiag, thiab nrhiav rhuav kom Vajtswv lub koom txoos puas tsuaj mus, thiab rhuav lub hauv paus ntawm txoj kev ywj siab uas Vajtswv tau pub rau lawv, los sis tej koob hmoov uas Vajtswv tau xa los rau saum thaj av vim cov neeg ncaj txoj kev zoo.

11 Thiab nim no tau muaj tias thaum Maulaunais, tus uas yog tus thawj coj cov tub rog ntawm cov Neeg Nifais, tau hnov txog tej kev ntxeev siab no, nws tau npau taws rau Amalikhaiyas.

12 Thiab tau muaj tias nws tau dua nws lub tsho loj; thiab nws tau muab ib daig ntaub ntawd, thiab tau sau rau saud—Rau txoj kev nco txog peb tus Vajtswv, peb txoj kev teev ntuj, thiab txoj kev ywj pheej, thiab peb txoj kev thaj yeeb, peb tej poj niam, thiab peb tej me nyuam—thiab nws tau muab nws khi rau saum ib tug ntsis pas.

13 Thiab nws tau muab nws daim phiaj thaiv taub hau kho khi rau, thiab nws daim phiaj npog hauv siab, thiab nws tej phiaj hlau, thiab khi nws tej cuab yeej ua rog txog ntawm nws puab tais; thiab nws tau nqa tus pas, uas tau muaj daim ntaub uas dua ntawm nws lub tsho loj los nyob tom ntsis, (thiab nws muab hu ua tus chij ntawm txoj kev ywj siab) thiab nws tau khoov rau hauv av, thiab nws tau thov heev rau nws tus Vajtswv rau tej koob hmoov ntawm txoj kev ywj siab los rau saum nws cov kwv tij, ntev npaum li uas tseem muaj ib pab neeg ntseeg Khetos nyob tswj thaj av—

14 Tag nrho sawv daws cov uas tau yog neeg ntseeg Khetos tseeb, cov uas tau zwm rau hauv Vajtswv lub koom txoos, tau raug cov uas tsis tau zwm rau hauv lub koom txoos hu li ntawd.

15 Thiab cov uas tau zwm rau hauv lub koom txoos muaj kev ntseeg heev; muaj tseeb tiag, tag nrho cov uas yog neeg ntseeg tseeb hauv Khetos tau, zoo siab hlo, ris Khetos lub npe rau saum lawv, los sis cov neeg Khetos ib yam li lawv tau raug hu, vim yog lawv txoj kev ntseeg Khetos tus uas yuav los.

16 Thiab yog li ntawd, nyob rau zaum no, Maulaunais tau thov kom cov neeg Khetos, thiab txoj kev ywj pheej ntawm thaj av yuav tau koob hmoov.

17 Thiab tau muaj tias thaum nws tau nchuav tag nrho nws lub siab rau Vajtswv, nws tau tis npe rau tag nrho thaj av uas nyob sab nram hav ntawm thaj av Quav Poj, muaj tseeb tiag, thiab yog, tag nrho thaj av, nyob sab pem toj thiab sab nram hav huv si—Ib thaj av uas tau xaiv cia lawm, thiab thaj av ywj siab.

18 Thiab nws tau hais tias: Tseeb tiag Vajtswv yeej yuav tsis cia peb, cov uas raug luag ntxub vim peb ris Khetos lub npe rau saum peb, kom raug tsuj thiab puas tsuaj, mus txog thaum peb coj nws los rau saum peb los ntawm peb tus kheej tej kev txhaum.

19 Thiab thaum Maulaunais tau hais tej lus no tas, nws tau tawm mus rau hauv cov neeg, co daim ntaub dua ntawm nws lub tsho rau saum ntuj, kom sawv daws yuav pom cov ntawv sau uas nws tau muab sau rau saum daim ntaub dua, thiab qw ib lub suab nrov nrov, hais tias:

20 Saib seb, leej twg uas yuav tswj tuav lub npe no rau saum thaj av, cia lawv tawm los nyob hauv tus Tswv lub zog, thiab nkag rau hauv ib txoj kev khi lus tias lawv yuav tswj nrees tuav lawv tej kev muaj cai, thiab lawv txoj kev teev ntuj, xwv kom tus Tswv Vajtswv yuav foom koob hmoov rau lawv.

21 Thiab tau muaj tias thaum Maulaunais tau tshaj tawm cov lus no, saib seb, cov neeg tau khiav zom zaws los ua ke nrog lawv tej cuab yeej ua rog khi ncig lawv tej duav, dua zom zaws lawv tej ris tsho ua ib lub cim, los sis ib yam li ib lo lus khi tseg, tias lawv yuav tsis hnov qab tus Tswv lawv tus Vajtswv; los sis, ua lwm yam lus hais, yog lawv ua txhaum Vajtswv tej lus txib, los sis poob rau hauv txoj kev txhaum, thiab txaj muag ris Khetos lub npe rau saum lawv, ces tus Tswv yuav dua lawv tib yam li uas lawv tau dua lawv tej ris tsho.

22 Nim no qhov no yog txoj kev khi lus tseg uas lawv tau khi, thiab lawv tau pov lawv tej ris tsho rau ntawm Maulaunais ko taw, hais tias: Peb khi lus nrog peb tus Vajtswv, tias peb yuav raug puas tsuaj, zoo tib yam li peb cov kwv tij uas nyob hauv thaj av sab pem ub, yog tias peb yuav poob mus rau hauv txoj kev txhaum; muaj tseeb tiag, nws muab peb pov rau ntawm peb tej yeeb ncuab ko taw los tau, tib yam li peb tau muab peb tej ris tsho pov rau ntawm koj ko taw cia raug tsuj rau hauv qab xib taws, yog tias peb yuav poob mus rau hauv txoj kev txhaum.

23 Maulaunais hais rau lawv tias: Saib seb, peb yog ib co noob seem tshuav ntawm Yakhauj; muaj tseeb tiag, peb yog ib co noob seem ntawm Yauxej, uas raug nws cov kwv tij muab lub tsho loj dua ua ntau daim; muaj tseeb tiag, thiab nim no saib seb, peb cia li nco ntsoov coj Vajtswv tej lus txib, los sis peb tej ris tsho yuav raug peb cov kwv tij muab dua, thiab peb yuav raug pov rau hauv qhov taub, los sis raug muab muag, los sis muab tua.

24 Muaj tseeb tiag, cia peb hwj xwm peb txoj kev ywj siab kom zoo li ib co neeg seem tshuav ntawm Yauxej; muaj tseeb tiag, cia peb nco ntsoov txog Yakhauj tej lus, uas ua ntej nws yuav tuag, vim saib seb, nws tau pom tias ib feem ntawm Yauxej lub tsho loj seem tshuav tau raug hwj xwm thiab tseem tsis tau lwj. Thiab nws tau hais tias—Tib yam li qhov tw tsho seem tshuav ntawm kuv tus tub no uas raug hwj xwm tseg, ces ib co noob seem ntawm kuv tus tub yeej yuav raug Vajtswv txhais tes tshwj tseg, thiab yuav raug coj mus rau nws tus kheej, thaum uas cov noob seem tshuav ntawm Yauxej yuav piam sij, tib yam li nws qhov tw tsho uas seem tshuav.

25 Nim no saib seb, qhov no ua rau kuv nyuaj siab; txawm li ntawd los, kuv tseem xyiv fab rau kuv tus tub, vim yog rau feem ntawm nws cov noob uas yuav raug coj mus cuag Vajtswv.

26 Nim no saib seb, qhov no yog cov lus uas Yakhauj tau hais.

27 Thiab nim no leej twg yuav paub tias Yauxej cov noob seem tshuav twg, uas yuav piam sij ib yam li nws lub tsho, puas yog cov uas tau ntxeev siab tawm ntawm peb mus lawm? Muaj tseeb tiag, thiab tej zaum twb yuav yog peb tus kheej yog peb tsis sawv khov kho hauv txoj kev ntseeg Khetos.

28 Thiab nim no tau muaj tias thaum Maulaunais tau hais tej lus no tas lawm nws tau tawm mus, thiab kuj tau xa neeg mus rau txhua txhia qhov ntawm thaj av uas tau muaj tej kev ntxeev siab, thiab tau sau tag nrho cov uas xav tswj tuav lawv txoj kev ywj siab tuaj ua ke, los sawv tawm tsam Amalikhaiyas thiab cov uas tau ntxeev siab, cov uas tau raug hu ua cov neeg Amalikhaiyas.

29 Thiab tau muaj tias thaum Amalikhaiyas pom tias Maulaunais cov neeg coob dua li cov neeg Amalikhaiyas—thiab nws kuj tau pom tias nws cov neeg tau ua ntau lub siab txog txoj kev txim lij ntawm qhov uas lawv tau pib ua—yog li ntawd, ntshai nyob tsam nws yeej tsis taus lub ntsiab, nws thiaj tau coj nws cov neeg uas kam nrog nws thiab tau ncaim mus rau hauv thaj av Nifais lawm.

30 Nim no Maulaunais tau xav hais tias tsis tsim nyog kom cov Neeg Lamas yuav muaj zog ntxiv; yog li ntawd nws tau xav tias mus tav cov neeg Amalikhaiyas, los sis txhom lawv thiab coj lawv rov qab, thiab muab Amalikhaiyas tua; muaj tseeb tiag, vim nws paub lawm tias nws yeej yuav txhib kom cov Neeg Lamas npau taws tawm tsam lawv, thiab ua kom lawv tuaj ua rog tawm tsam lawv; thiab nws paub li no lawm tias Amalikhaiyas yuav ua li ntawd kom nws yuav ua tau li nws siab xav.

31 Yog li ntawd Maulaunais thiaj tau xav tias tsim nyog tias nws yuav tsum coj nws tej tub rog, cov uas tau sib sau lawv tus kheej tuaj ua ke, thiab tau npaj cuab yeej, thiab tau nkag rau txoj kev khi lus coj txoj kev thaj yeeb—thiab tau muaj tias nws tau coj nws cov tub rog thiab tau tawm nrog nws tej tsev pheeb suab ntaub mus rau hauv hav zoov, mus txiav Amalikhaiyas kev nyob hauv hav zoov.

32 Thiab tau muaj tias nws tau ua raws li nws siab xav, thiab tau tawm mus rau hauv hav zoov, thiab tau ntsib Amalikhaiyas tej tub rog.

33 Thiab tau muaj tias Amalikhaiyas tau khiav nrog nws ib co neeg uas tsawg lawm, thiab cov seem ces raug txhom coj los rau hauv Maulaunais tes thiab tau raug coj rov qab mus rau hauv thaj av Xalahelas.

34 Nim no, Maulaunais twb yog ib tug neeg uas tau raug tsa los ntawm tej thawj tub txiav txim thiab cov neeg lub suab, yog li ntawd nws muaj hwj chim raws li nws siab xav nrog cov Neeg Nifais tej tub rog, txhim tsa thiab siv cai kav lawv.

35 Thiab tau muaj tias tus neeg Amalikhaiyas twg uas tsis kam nkag rau hauv ib txoj kev khi lus los txhawb rau txoj kev ywj pheej, kom lawv yuav muaj tau ib txoj kev kav ywj siab, nws tau kom raug muab tua; thiab tau muaj tsawg tus uas tsis kam rau txoj kev khi lus ntawm txoj kev ywj pheej.

36 Thiab kuj tau muaj tias, nws tau ua kom tus chij ntawm txoj kev ywj siab raug tsa rau saum txhua tus pej thuam uas muaj nyob rau hauv txhua thaj av, uas cov Neeg Nifais nyob; thiab li no Maulaunais tau cog tus chij ntawm txoj kev ywj siab nyob hauv cov Neeg Nifais.

37 Thiab lawv tau pib muaj kev nyab xeeb nyob rau hauv thaj av dua; thiab li no lawv tau muaj kev nyab xeeb rau hauv thaj av mus yuav luag txog thaum kawg xyoo thib kaum cuaj ntawm cov neeg txiav txim txoj kev kav.

38 Thiab Hilamas thiab tej pov thawj hlob kuj tseem tau tswj tuav tej chaw hauv lub koom txoos; muaj tseeb tiag, twb tau ncua li plaub xyoos uas lawv tau muaj kev nyab xeeb ntau thiab kev zoo siab hauv lub koom txoos.

39 Thiab tau muaj tias tau muaj coob leej uas tau tuag, ntseeg ruaj nrees tias lawv tej ntsuj plig twb raug txhiv dim los ntawm tus Tswv Yexus Khetos; li no lawv tau tawm hauv lub ntiaj teb mus zoo siab hlo.

40 Thiab tau muaj ib txhia uas tau tuag ua npaws, uas muaj tej lub caij nyoog ntawm lub xyoo tau nquag nquag muaj nyob hauv thaj av—tiam sis kuj tsis tau muaj ntau leej tuag kev ua npaws, vim yog txoj kev muaj tej nroj tsuag thiab tej cag ntoo zoo heev uas Vajtswv tau npaj los tshem tej kab mob, uas tej neeg tau raug ywj rau tej huab cua—

41 Tiam sis tau muaj ntau leej uas tau tuag nrog hnub nyoog laus; thiab cov uas tau tuag nyob hauv txoj kev ntseeg Khetos yeej zoo siab nyob hauv nws, ib yam li peb yuav tsum cia muaj.