1 Thiab nim no tau muaj tias Maulaunais tsis tau tsum kev npaj rau kev ua rog, los sis tiv thaiv nws cov neeg rau ntawm cov Neeg Lamas; vim nws tau ua kom nws tej tub rog pib nyob rau thaum pib xyoo nees nkaum ntawm cov neeg txiav txim txoj kev kav, kom lawv yuav tsum pib khawb tej pawg av ncig tag nrho rau txhua lub nroog, thoob plaws txhua thaj av uas cov Neeg Nifais nyob.

2 Thiab nyob rau saum tej phab ntsa av no nws tau ua kom yuav tsum muaj cav ntoo, muaj tseeb tiag, muab cav ntoo los ua kom siab txij li neeg, ncig tej nroog.

3 Thiab nws tau ua kom nyob rau saum cov ntsa cav no yuav tsum txua ib co pas hmuv txheem rau saum cov ntoo ib puag ncig; thiab lawv khov thiab siab heev.

4 Thiab nws tau ua kom tsa muaj pej thuam uas saib tau rau saum cov ntsa ntoo ntse ntse ntawd, thiab nws tau ua kom rhawv chaw tiv thaiv rau saum tej pej thuam ntawd, xwv kom tej pob zeb thiab tej xub ntawm cov Neeg Lamas yuav tuaj tsis raug lawv.

5 Thiab lawv tau npaj kom lawv yuav txawb tau tej pob zeb tawm saum ncov saud mus, raws li lawv siab xav thiab lawv lub zog, thiab tua cov uas yuav sim tuaj kom ze tej ntsa loog ntawm lub nroog.

6 Li no Maulaunais tau npaj tej phab ntsa khov tiv thaiv lawv tej yeeb ncuab txoj kev tuaj, rau txhua txhua lub nroog hauv txhua thaj av ib puag ncig.

7 Thiab tau muaj tias Maulaunais tau kom nws tej tub rog yuav tsum tawm mus rau hauv hav zoov uas nyob sab hnub tuaj; muaj tseeb tiag, thiab lawv tau tawm mus thiab tau raws tag nrho cov Neeg Lamas uas tau nyob hauv hav zoov uas nyob sab hnub tuaj khiav mus rau hauv lawv tej av, uas nyob sab nram hav ntawm thaj av Xalahelas.

8 Thiab thaj av Nifais tau ncau tib kab ncaj nraim txij li hiav txwv sab hnub tuaj mus rau sab hnub poob.

9 Thiab tau muaj tias thaum Maulaunais tau raws tag nrho cov Neeg Lamas uas nyob hauv hav zoov uas nyob sab hnub tuaj, uas nyob rau sab pem toj ntawm tej thaj av uas yog lawv ntiag tug khiav tawm tag lawm, nws tau kom cov neeg uas nyob hauv thaj av Xalahelas thiab tej av uas nyob ib puag ncig yuav tsum tawm mus rau hauv roob moj sab qhua uas nyob rau sab hnub tuaj, kom mus nyob rau tej ciam teb ntawm ntug dej hiav txwv, thiab nyob rau hauv thaj av.

10 Thiab nws kuj tau tso tej tub rog rau sab nram hav, nyob rau tej ciam teb uas lawv nyob, thiab tau kom lawv tsa tej ntsa tiv thaiv xwv kom lawv yuav tsom kwm tau lawv tej tub rog thiab lawv tej neeg tawm ntawm lawv tej yeeb ncuab tes.

11 Thiab li no nws tau txiav tag nrho cov Neeg Lamas tej nroog muaj zog uas nyob hauv hav zoov sab hnub tuaj, muaj tseeb tiag, thiab kuj txiav nyob rau sab hnub poob thiab, tau kho tej ciam teb uas nyob nruab nrab ntawm cov Neeg Nifais thiab cov Neeg Lamas nyob nruab nrab ntawm thaj av Xalahelas thiab thaj av Nifais kom khov tuaj, txij li hiav txwv sab hnub poob, mus rau tus hau dej Xidoos—cov Neeg Nifais nyob tag nrho thaj av sab pem toj, muaj tseeb tiag, twb tag nrho thaj av uas nyob sab pem toj ntawm thaj av Huaj Vam, raws li lawv siab nyiam.

12 Li no Maulaunais, nrog nws cov tub rog, uas tau coob ntxiv txhua hnub vim yog txoj kev muaj kev tsom kwm zoo uas nws tej hauj lwm tau coj los rau lawv, tau nrhiav txiav lub zog thiab hwj chim ntawm cov Neeg Lamas tawm ntawm tej av uas yog lawv tej chaw nyob, xwv kom lawv yuav tsis muaj hwj chim rau saum tej av uas yog lawv li.

13 Thiab tau muaj tias cov Neeg Nifais tau pib ua ib lub nroog, thiab lawv tau hu lub nroog npe ua Maulaunais; thiab nws nyob ntawm hiav txwv sab hnub tuaj; thiab nws nyob sab nram hav ze tus ciam teb uas yog cov Neeg Lamas li.

14 Thiab lawv kuj tau pib ua ib lub nroog nyob nruab nrab ntawm lub nroog Maulaunais thiab lub nroog Aloos, koom tus ciam teb ntawm Aloos thiab Maulaunais; thiab lawv tau hu lub nroog lub npe, los sis thaj av ua, Nifaihas.

15 Thiab tib xyoos ntawd lawv kuj tau pib ua ntau lub nroog nyob rau sab pem toj, ib lub uas muaj qauv txawv uas lawv tau hu ua Lihais, uas nyob sab pem toj uas nyob ib sab ntawm tej ciam teb ntawm ntug hiav txwv.

16 Thiab li no tau xaus xyoo nees nkaum.

17 Thiab Nifais cov neeg tau muaj tej kev vam meej no nyob rau thaum pib xyoo nees nkaum thiab ib ntawm cov neeg txiav txim txoj kev kav Nifais cov neeg.

18 Thiab lawv tau vam meej heev, thiab lawv tau rais los mus nplua nuj heev; muaj tseeb tiag, thiab lawv tau coob ntxiv thiab loj hlob nyob rau hauv thaj av.

19 Thiab li no peb pom tias txoj kev hlub tshua thiab ncaj ntawm tus Tswv tej kev ua dej num zoo npaum li cas, mus ua kom muaj tiav li tag nrho nws tej lus rau noob neej; muaj tseeb tiag, peb yeej tau pom tias nws tej lus tau muaj tseeb tiag, tib yam li lub sij hawm no, uas nws tau hais rau Lihais, hais tias:

20 Koj thiab koj tej me nyuam yuav tau koob hmoov; thiab lawv yuav raug foom koob hmoov, npaum li uas lawv yuav coj kuv tej lus txib lawv yeej yuav vam meej nyob rau hauv thaj av. Tiam sis nco ntsoov, npaum li uas lawv yuav tsis coj kuv tej lus txib ces lawv yuav raug txiav tawm ntawm tus Tswv xub ntiag mus.

21 Thiab peb pom tias tej lus cog tseg no tau muaj tseeb rau Nifais cov neeg; vim nws tau yog lawv tej kev sib cav thiab lawv tej kev tsis sib haum xeeb, muaj tseeb tiag, lawv tej kev tua neeg, thiab lawv tej kev lim hiam, lawv tej kev pe dab pe mlom, lawv tej kev ua niam ntiav, thiab lawv tej kev qias, uas muaj nyob hauv lawv, es thiaj tau coj tej tsov rog thiab tej kev puas tsuaj los rau lawv.

22 Thiab cov uas muaj kev ntseeg coj tus Tswv tej lus txib yeej tau raug pab dim txhua txhia zaus, tiam sis txhiab txhiab tus ntawm lawv cov kwv tij phem tau raug cia rau hauv txoj kev ua qhev, los sis piam sij los ntawm ntaj, los sis tso txoj kev ntseeg tseg zuj zus, thiab ho mus sib yuav txuam nrog cov Neeg Lamas.

23 Tiam sis saib seb yeej ib txwm tsis tau muaj ib lub sij hawm zoo siab tshaj nyob hauv Nifais cov neeg, txij li Nifais lub caij los, dua li nyob hauv Maulaunais lub caij, muaj tseeb tiag, twb nyob rau lub sij hawm no, nyob hauv xyoo nees nkaum thiab ib ntawm cov neeg txiav txim txoj kev kav.

24 Thiab tau muaj tias xyoo nees nkaum thiab ob ntawm cov neeg txiav txim txoj kev kav kuj tau xaus nyob hauv txoj kev thaj yeeb; muaj tseeb tiag, thiab xyoo nees nkaum thiab peb los ib yam.

25 Thiab tau muaj tias nyob rau thaum pib xyoo nees nkaum thiab plaub ntawm cov neeg txiav txim txoj kev kav, nws yeej tseem yuav muaj kev thaj yeeb nyob rau hauv Nifais cov neeg thiab yog tias tsis txhob muaj ib qho kev tsis sib haum xeeb uas tau muaj nyob hauv lawv txog thaj av Lihais, thiab thaj av Mauli-atoos, uas koom rau tej ciam teb ntawm Lihais; ob thaj uas puav leej nyob rau tej ciam teb ze ntug hiav txwv.

26 Vim saib seb, cov neeg uas nyob hauv thaj av Mauli-atoos tau txeeb ib feem ntawm thaj av Lihais; yog li ntawd tau pib muaj ib qho kev tsis sib haum xeeb sov nyob hauv lawv, kawg tias cov neeg Mauli-atoos tau nqa cuab yeej ua rog tawm tsam lawv cov kwv tij, thiab lawv tau txiav txim siab xuas ntaj tua lawv.

27 Tiam sis saib seb, cov neeg uas nyob hauv Lihais thaj av tau khiav mus rau tom Maulaunais lub yeej, thiab tau thov kom nws pab; vim saib seb lawv tsis yog nyob ntawm qhov txhaum.

28 Thiab tau muaj tias thaum cov neeg Mauli-atoos, uas tau raug coj los ntawm ib tug txiv neej uas npe hu ua Mauli-atoos, tau nrhiav pom tias Lihais cov neeg tau khiav mus rau tom Maulaunais lub yeej lawm, lawv tau ntshai heev nyob tsam Maulaunais cov tub rog ho tuaj tawm tsam lawv thiab ua kom lawv puas tsuaj.

29 Yog li ntawd, Mauli-atoos tau muab nws rau hauv lawv tej siab tias lawv yuav tsum khiav mus rau thaj av uas nyob sab pem toj, uas tau muaj tej dej loj npog, thiab mus nyob rau thaj av uas nyob sab pem toj.

30 Thiab saib seb, lawv yeej yuav ua kom tau li txoj kev npaj ntawd, (uas yuav yog ib qho ua kom muaj kev quaj ntsuag) tiam sis saib seb, Mauli-atoos yog ib tug neeg npau taws sai, yog li ntawd nws tau npau taws nrog nws ib tug ntxhais qhev, thiab tau poob rau saum nws thiab ntaus nws heev.

31 Thiab tau muaj tias nws tau khiav, thiab tau tuaj rau tom Maulaunais lub yeej, thiab tau qhia rau Maulaunais txhua yam txog yam xwm no, thiab kuj qhia txog qhov uas lawv yuav khiav mus rau hauv thaj av sab pem toj.

32 Nim no saib seb, cov neeg uas nyob hauv thaj av Huaj Vam, los sis yog Maulaunais, tau ntshai tias tsam lawv yuav mloog Mauli-atoos tej lus thiab sau ua ke nrog nws cov neeg, thiab li no ces nws yuav txeeb tau chaw nyob rau hauv tej feem av ntawd, uas yuav ua kom pib muaj tej qho nyuaj nyob hauv Nifais cov neeg, muaj tseeb tiag, tej uas yuav coj mus rau txoj kev muab lawv txoj kev ywj siab pov tseg.

33 Yog li ntawd Maulaunais tau xa ib co tub rog, nrog lawv tej khoom siv, mus txiav cov neeg Mauli-atoos kev, mus cheem lawv txoj kev mus rau thaj av sab pem toj.

34 Thiab tau muaj tias lawv txiav tsis tau lawv kev mus txog thaum lawv tau los rau ntawm thaj av Quav Poj ciam teb; thiab lawv tau ntsib lawv qhov ntawd, nyob ntawm ib txoj kev nqaim uas tus hiav txwv coj mus rau thaj av sab pem toj, muaj tseeb tiag, ze ntawm hiav txwv, nyob sab hnub poob thiab nyob sab hnub tuaj.

35 Thiab tau muaj tias cov tub rog uas Maulaunais xa mus, uas tau raug ib tug txiv neej uas npe hu ua Thi-akhas coj, tau ntsib Mauli-atoos cov neeg; thiab Mauli-atoos cov neeg tau tsis thim xav heev, (vim tau raug yaum los ntawm nws txoj kev phem thiab nws tej lus ua txuj ntxias) ces ib ntsug rog tau pib nyob nruab nrab ntawm lawv, nyob hauv qhov uas Thi-akhas tau muab Mauli-atoos tua thiab kov yeej nws cov tub rog, thiab tau coj lawv mus ua tej neeg raug txim, thiab tau rov qab los rau tom Maulaunais lub yeej. Thiab li no tau xaus xyoo nees nkaum thiab plaub ntawm cov neeg txiav txim txoj kev kav Nifais cov neeg.

36 Thiab cov neeg Mauli-atoos tau raug coj rov qab los li no. Thiab los ntawm lawv txoj kev khi lus coj txoj kev thaj yeeb lawv tau raug rov qab txum tim rau hauv thaj av Mauli-atoos, thiab tau muaj ib qho kev sib koom ua ke nyob nruab nrab ntawm lawv thiab cov neeg Lihais; thiab lawv kuj tau raug rov qab los txum tim rau lawv tej av.

37 Thiab tau muaj tias nyob rau tib xyoos uas Nifais cov neeg tau muaj txoj kev thaj yeeb rov qab txum tim rau lawv, Nifaihas, tus thawj tub txiav txim thib ob, tau tuag, tau nyob hauv lub rooj txiav txim nrog txoj kev ncaj ncees kawg nkaus rau Vajtswv.

38 Txawm li ntawd los, nws tau tsis kam cia rau Amas ceev cov ceeb xwm txheej thiab tej yam uas Amas thiab nws tej yawg koob tau muab saib ua qhov dawb ceev dua ntais; yog li ntawd Amas tau muab lawv rau nws tus tub, Hilamas.

39 Saib seb, tau muaj tias Nifaihas tus tub tau raug tsa los nyob lub rooj txiav txim, los hloov nws txiv chaw; muaj tseeb tiag, nws tau raug tsa ua tus thawj tub txiav txim thiab tus tswv xeev rau cov neeg, nrog ib lo lus lav thiab txoj kab ke dawb ceev los txiav txim ncaj ncees, thiab los ceev txoj kev thaj yeeb thiab txoj kev ywj pheej ntawm cov neeg, thiab kom pub rau lawv lawv tej kev muaj cai dawb ceev los teev tiam tus Tswv lawv tus Vajtswv, muaj tseeb tiag, kom pab cuam thiab ceev txoj kev ntawm Vajtswv kom tag nws lub neej, thiab kom coj cov neeg phem los rau txoj kev txim lij raws li lawv tej kev txhaum.

40 Nim no saib seb, nws lub npe yog Peholas. Thiab Peholas tau nws txiv lub rooj, thiab tau pib nws txoj kev kav nyob rau thaum kawg xyoo nees nkaum thiab plaub, rau Nifais cov neeg.