1 Thiab nim no tau muaj tias tom qab uas Amas tau hais cov lus no rau lawv tas lawm nws tau zaum rau hauv av, thiab Amulej tau sawv thiab tau pib qhia lawv, hais tias:

2 Kuv cov kwv tij, kuv xav tias yuav ua tsis tau yog tias nej yuav tsis quav ntsej txog tej yam uas tau hais txog Khetos txoj kev los, tus uas peb tau qhia tias yog Vajtswv Leej Tub; muaj tseeb tiag, kuv paub tias tej yam no tau raug qhia rau nej ntau zaus ua ntej nej tau faib tawm ntawm peb mus.

3 Thiab ib yam li nej tau xav kom kuv tus tij laug uas kuv hlub ua rau nej paub saib nej yuav ua dab tsi, vim yog nej tej kev txom nyem; thiab nws tau hais ob peb yam rau nej kom npaj nej tej siab; muaj tseeb tiag, thiab nws tau txhawb nej los rau txoj kev ntseeg thiab rau txoj kev ua siab ntev—

4 Muaj tseeb tiag, twb kom nej yuav muaj kev ntseeg txaus cog txoj lus rau hauv nej tej siab, kom nej yuav xyaum paub txog nws txoj kev zoo.

5 Thiab peb tau pom tias lo lus nug loj uas nyob hauv nej tej siab yog saib txoj lus puas yuav nyob hauv Vajtswv Leej Tub, los sis saib puas yuav tsis muaj Khetos.

6 Thiab nej kuj tau pom tias kuv tus tij laug tau ua rau nej paub tseeb, nyob hauv ntau tus yam ntxwv, tias txoj lus yog nyob hauv Khetos mus rau txoj kev cawm seej.

7 Kuv tus tij laug tau muab Xinos tej lus hais, tias txoj kev txhiv dim yuav los dhau ntawm Vajtswv Leej Tub los, thiab kuj tau hais txog Xinoj tej lus; thiab nws kuj tau hais txog Mauxes, qhia kom paub tseeb tias tej yam no yeej muaj tseeb tiag.

8 Thiab nim no, saib seb, kuv yuav ua tim khawv ntawm kuv tus kheej rau nej tias tej yam no yeej muaj tseeb. Saib seb, kuv hais rau nej, tias kuv yeej paub tias Khetos yuav los rau hauv noob neej, los ris nws cov neeg tej kev txhaum rau saum nws, thiab tias nws yuav theej lub ntiaj teb tej kev txhaum; vim tus Tswv Vajtswv tau hais li ntawd.

9 Vim nws tsim nyog tias yuav tsum muaj ib txoj kev theej txhoj; vim raws li txoj kev npaj tseem ceeb ntawm Vajtswv tus uas nyob mus ib txhis, nws yuav tsum muaj ib txoj kev theej txhoj, los sis tsis li ntawd tib neeg sawv daws yuav tsum zam tsis dhau txoj kev piam sij; muaj tseeb tiag, sawv daws yeej tawv; muaj tseeb tiag, sawv daws raug qaug thiab raug poob zoo lawm, thiab yuav tsum raug piam sij ntshe tsuas yog dhau los ntawm txoj kev theej txhoj uas tsim nyog yuav tsum muaj xwb.

10 Vim tsim nyog tias yuav tsum muaj ib txoj kev txi loj thiab kawg; muaj tseeb tiag, tsis yog ib txoj kev txi tib neeg, thiab tsis yog ntawm tej tsiaj, los sis yog ntawm tej noog; vim nws yuav tsum tsis yog ib txoj kev txi tib neeg; tiam sis nws yuav tsum yog ib txoj kev txi uas tsis muaj qhov kawg thiab nyob mus ib txhis.

11 Nim no yeej tsis muaj ib tug neeg uas muaj peev xwm txi nws cov ntshav kiag uas yuav theej tau rau lwm tus tej kev txhaum. Nim no, yog ib tug neeg raug tua, saib seb peb txoj kev cai, uas ncaj ncees, puas yuav muab txoj sia ntawm nws tus kwv tij? Kuv hais rau nej, Yeej tsis muab.

12 Tiam sis txoj kev cai yuav tsum kom tau txoj sia ntawm nws tus uas tau tua neeg lawm; yog li ntawd yuav tsis muaj ib yam dab tsi uas txaus rau ib txoj kev theej txhoj uas tsis muaj qhov kawg uas yuav txaus rau ntiaj teb tej kev txhaum.

13 Yog li ntawd, nws tsim nyog tias yuav tsum muaj ib txoj kev txi loj thiab kawg nkaus; thiab ces yuav muaj, los sis nws tsim nyog yuav tsum muaj, ib qho kawg rau txoj kev nqaij ntuag ntshav nrog; ces Mauxes txoj kev cai yuav muaj puv npo; muaj tseeb tiag, nws yuav muaj puv npo huv tib si, txhua yam tsis tseem ceeb thiab me, thiab yuav tsis muaj ib yam uas yuav tsis los dhau mus.

14 Thiab saib seb, qhov no yog lub ntsiab tag nrho ntawm txoj kev cai, txhua feem uas me puav leej taw rau txoj kev txi loj thiab kawg nkaus ntawd; thiab txoj kev txi loj thiab kawg nkaus ntawd yuav yog Vajtswv Leej Tub, muaj tseeb tiag, qhov kev txi uas tsis muaj kawg thiab nyob mus ib txhis.

15 Thiab li no nws yuav coj txoj kev cawm seej los rau txhua tus uas yuav ntseeg nws lub npe; qhov no yog qhov uas txhob txwm npaj rau ntawm txoj kev txi kawg no, kom muaj tau lub siab hlub ntawm txoj kev zam txim, uas muaj hwj chim kov yeej txoj kev txim lij, thiab ua kom muaj kev rau noob neej kom lawv yuav muaj kev ntseeg los hloov siab lees txim.

16 Thiab li no txoj kev zam txim thiaj them tau tej nqi ntawm txoj kev txim lij, thiab puag lawv nyob hauv txhais caj npab uas tsis muaj xwm txheej, thaum tus uas tsis xyaum kom muaj kev ntseeg mus rau txoj kev hloov siab lees txim qhib ntsa rau tag nrho tej kev txib ntawm txoj kev txim lij; yog li ntawd tsuas yog rau tus uas muaj txoj kev ntseeg mus rau txoj kev hloov siab lees txim xwb thiaj raug coj los mus rau txoj kev txhiv dim loj thiab nyob mus ib txhis.

17 Yog li ntawd thov Vajtswv pub rau nej, kuv cov kwv tij, kom nej yuav pib xyaum nej tej kev ntseeg mus rau txoj kev hloov siab lees txim, kom nej yuav pib thov rau nws lub npe dawb huv, xwv kom nws yuav zam txim rau nej;

18 Muaj tseeb tiag, quaj thov nws rau txoj kev zam txim; vim nws muaj hwj chim cawm tau.

19 Muaj tseeb tiag, txo nej tej hwj chim, thiab thov nws ntxiv mus.

20 Quaj thov nws thaum nej nyob hauv nej tej liaj teb, muaj tseeb tiag, thov rau tag nrho nej tej tsiaj txhu.

21 Quaj thov nws nyob hauv nej tej vaj tse, muaj tseeb tiag, thov rau tag nrho nej lub cuab yig, tag nrho thaum sawv ntxov, thaum tav su thiab thaum tsaus ntuj.

22 Muaj tseeb tiag, quaj thov nws tawm tsam lub hwj chim ntawm nej tej yeeb ncuab.

23 Muaj tseeb tiag, thov nws tawm tsam tus dab, tus uas yog ib tug yeeb ncuab rau tag nrho kev ncaj ncees.

24 Quaj thov nws rau tej qoob loos tom nej tej liaj teb, xwv kom nej yuav muaj lawv nplua mias.

25 Quaj thov rau tej tsiaj txhu tom nej tej liaj teb, xwv kom lawv yuav muaj coob ntxiv.

26 Tiam sis tsis tas li no xwb; nej yuav tsum nchuav nej tej siab rau hauv nej tej chaw rau khaub chaws, thiab nej tej chaw tseem ceeb, thiab hauv nej tej hav zoov.

27 Muaj tseeb tiag, thiab thaum nej tsis quaj thov rau tus Tswv, cia nej tej siab kom puv npo, rho nej txoj kev thov Vajtswv rau nws tsis tu ncua kom pab nej, thiab kom pab cov uas nyob ib ncig nej.

28 Thiab nim no saib seb, kuv cov kwv tij uas kuv hlub es, kuv hais rau nej, tsis txhob xav tias tas li qhov no xwb; vim tom qab uas nej tau ua tag ib puas yam tsav no lawm, yog nej tsis kam lees cov neeg txom nyem, thiab cov neeg liab qab, thiab tsis saib xyuas cov neeg mob thiab txom nyem, thiab tsis faib nej tej khoom, yog nej muaj, rau cov uas txom nyem—kuv hais rau nej tias, yog nej tsis ua ib yam ntawm tej yam no, saib seb, nej txoj kev thov Vajtswv yeej tsis muaj qab hau dab tsi, thiab yuav tsis ua ib yam dab tsi rau nej, thiab nej zoo li tej neeg siab phem uas tsis kam lees txoj kev ntseeg.

29 Yog li ntawd, yog nej tsis nco qab muaj siab hlub, nej zoo li tej quav hlau, uas cov neeg ntaus hlau muab pov tseg, (vim nws tsis muaj nuj nqis) thiab raug neeg muab ko taw tsuj.

30 Thiab nim no, kuv cov kwv tij, kuv xav kom, tom qab uas nej tau txais ntau tus tim khawv heev lawm, tau pom tias tej vajlugkub dawb huv ua tim khawv txog tej yam no, nej tawm los thiab txi txiv rau txoj kev hloov siab lees txim.

31 Muaj tseeb tiag, kuv xav kom nej yuav tawm los thiab tsis txhob ua nej tej siab tawv ntev ntxiv lawm; vim saib seb, nim no yog lub sij hawm thiab yog hnub ntawm nej txoj kev cawm seej; thiab yog li ntawd, yog nej yuav hloov siab lees txim thiab tsis txhob ua nej tej siab tawv, tsis ntev ces txoj kev txhiv dim yuav raug coj los rau nej.

32 Vim saib seb, lub neej no yog lub caij rau tib neeg npaj mus ntsib Vajtswv; muaj tseeb tiag, saib seb lub caij ntawm lub neej no yog lub caij rau tib neeg ua lawv tej hauj lwm.

33 Thiab nim no, ib yam li kuv tau hais rau nej ua ntej lawm, ib yam li nej twb tau muaj ntau yam tim khawv heev lawm, yog li ntawd, kuv thov nej tias nej tsis txhob laug laug nej lub sij hawm hloov siab lees txim rau puag tom kawg; vim tom qab lub neej no, uas tau muab rau peb npaj rau txoj kev nyob mus ib txhis, saib seb, yog peb tsis ua kom peb lub caij no zoo dua li qub thaum nyob hauv lub neej no, ces hmo tsaus ntuj yuav los qhov uas yuav ua tsis tau hauj lwm lawm.

34 Nej hais tsis tau tias, thaum nej raug coj los rau qhov kev phem txaus ntshai ntawd, tias kuv mam hloov siab lees txim, kom kuv yuav tau rov qab mus cuag kuv tus Vajtswv. Tsis tau, nej hais tsis tau li no; vim tias tib tug ntsuj plig uas kav peb tej cev thaum lub caij nej tawm ntawm lub neej no mus, tib tug ntsuj plig ntawd yuav muaj hwj chim los kav nej lub cev nyob rau hauv lub ntiaj teb uas nyob mus ib txhis ntawd.

35 Vim saib seb, yog nej tau laug nej lub sij hawm hloov siab lees txim kom txog ntua thaum tuag tso mam hloov siab, saib seb, nej tau rais los mus raug cob rau tus ntsuj plig ntawm tus dab, thiab yuav muab nej zwm ua nws li; yog li ntawd, tus Tswv tus Ntsuj Plig tau tso nej tseg, thiab tau tsis muaj chaw nyob rau hauv nej, thiab tus dab yuav muaj hwj chim huv tib si kav nej; thiab qhov no yog qhov kawg ntawm cov neeg phem.

36 Thiab kuv paub qhov no, vim tus Tswv tau hais tias nws tsis nyob hauv tej tuam tsev uas tsis dawb huv, tiam sis nws nyob hauv tej neeg ncaj ncees tej siab; muaj tseeb tiag, thiab nws kuj tau hais tias cov neeg ncaj ncees yuav tau zaum hauv nws lub nceeg vaj, yuav tsis tawm mus ntxiv ib zaug li lawm; tiam sis lawv tej ris tsho yuav raug ua kom dawb dhau los ntawm tus Me Nyuam Yaj cov ntshav.

37 Thiab nim no, kuv cov kwv tij uas kuv hlub es, kuv xav kom nej yuav nco ntsoov tej yam no, thiab xwv kom nej yuav ua hauj lwm rau nej txoj kev cawm seej nrog txoj kev ntshai Vajtswv, thiab kom nej yuav tsum tsis txhob tsis lees txoj kev Khetos yuav los ntxiv lawm.

38 Xwv kom nej tsis txhob tawm tsam tus Vaj Ntsuj Plig Dawb Huv ntxiv lawm, tiam sis kom nej yuav txais yuav nws, thiab ris Khetos lub npe rau saum nej; kom nej txo nej tej hwj chim kom ti hauv av, thiab teev tiam Vajtswv, nyob txhua qhov chaw uas nej nyob, nyob hauv tus ntsuj plig thiab hauv txoj kev tseeb; thiab kom nej ua neej nyob hauv txoj kev ua tsaug txhua hnub, vim tej kev hlub tshua thiab tej koob hmoov ntau uas nws tau muab rau nej.

39 Muaj tseeb tiag, thiab kuv kuj ntuas nej, kuv cov kwv tij, kom nej yuav ceev faj thiab thov Vajtswv tsis tu ncua, xwv kom nej yuav tsis raug kom yuam kev los ntawm tej kev haub ntxias ntawm tus dab, xwv kom nws yuav kov tsis yeej nej, xwv kom nej yuav tsis rais los mus ua nws qhev nyob rau hauv hnub kawg; vim saib seb, nws yuav muab nqi zog uas tsis muaj ib yam zoo li rau nej.

40 Thiab nim no kuv cov kwv tij uas kuv hlub es, kuv yuav ntuas nej kom ua siab ntev, thiab kom nej yuav nyiaj txhua yam kev txom nyem; kom nej tsis txhob foom cov uas ntiab nej tawm vim yog nej txoj kev pluag heev, nyob tsam nej ho yuav rais los mus ua tej neeg txhaum li lawv thiab;

41 Tiam sis kom nej ua siab ntev, thiab nyiaj tej kev txom nyem, nrog ib txoj kev cia siab ruaj khov tias muaj ib hnub nej yuav tau so ncaim ntawm nej tej kev txom nyem huv tib si mus.