1 Thiab nim no, kuv tus me tub, kuv muaj tej yam yuav hais txog txoj kev txum tim rov qab los ntawm tej uas tau hais lawm; vim saib seb, muaj ib txhia tau muab tej vajlugkub ntxeev, thiab tau mus yuam kev deb vim yog qhov no. Thiab kuv paub tias koj lub siab kuj tau txhawj txog tej yam no thiab. Tiam sis saib seb, kuv yuav muab nws piav rau koj.

2 Kuv hais rau koj, kuv tus me tub, tias lub tswv yim kev txum tim rov qab los dua yeej tsim nyog raws li Vajtswv txoj kev txim lij; vim nws tsim nyog kom tag nrho txhua yam yuav muaj rov los rau lawv tej chaw. Saib seb, nws tsim nyog thiab ncaj, raws li lub hwj chim thiab txoj kev sawv hauv qhov tuag rov qab los ntawm Khetos, kom tus ntsuj plig ntawm tib neeg yuav raug txum tim rov qab los rau nws lub cev, thiab kom txhua feem ntawm lub cev yuav raug txum tim rov muaj li qub.

3 Thiab nws tsim nyog nrog Vajtswv txoj kev txim lij tias leej tib neeg yuav tsum raug txiav txim raws li lawv tej hauj lwm; thiab yog tias lawv tej hauj lwm zoo nyob hauv lub neej no, thiab tej kev xav tau ntawm lawv tej siab los zoo, ces lawv kuj yuav, raug txum tim rov rau qhov zoo, nyob rau hauv hnub kawg.

4 Thiab yog lawv tej hauj lwm phem lawv yuav raug txum tim rau lawv tej phem. Yog li ntawd, tag nrho txhua yam yuav raug txum tim rov los rau lawv tej qub chaw, txhua txhia yam rau nws lub cev qub—lub cev uas txawj tuag tau sawv mus ua lub uas tsis txawj tuag, lub txawj lwj mus rau lub uas tsis txawj lwj—yuav sawv mus rau txoj kev zoo siab uas tsis muaj qhov kawg mus nyob Vajtswv lub nceeg vaj, los sis mus rau txoj kev txom nyem uas tsis muaj qhov kawg mus nyob tus dab lub nceeg vaj, ib tug tau nyob sab no, lwm tus ho tau nyob sab tod—

5 Ib txhia tau sawv los mus rau txoj kev kaj siab raws li nws tej kev xav tau txoj kev zoo siab, los sis qhov zoo raws li nws tej kev xav tau qhov zoo; thiab ib txhia mus rau qhov phem raws li nws tej kev xav tau qhov phem; vim ib yam li nws tau xav ua phem tag nrho hauv nws lub neej tib yam nkaus li ntawd nws yuav tau txais nws qhov nqi zog ntawm qhov phem thaum hmo tsaus ntuj los txog.

6 Thiab tib yam li ntawd yuav tshwm sim rau lwm cov. Yog nws tau hloov siab lees txim ntawm nws tej kev txhaum, thiab tau xav tau qhov ncaj ncees mus txog thaum kawg nws lub neej, tib yam nkaus li ntawd nws yuav tau txais qhov ncaj ua nqi zog.

7 Cov no yog lawv cov uas tau raug txhiv los ntawm tus Tswv; muaj tseeb tiag, cov no yog lawv cov uas tau raug rho tawm, uas raug tso dim ntawm hmo tsaus ntuj uas tsis muaj qhov kawg; thiab yog li ntawd lawv yuav sawv los sis vau; vim saib seb, lawv yog cov uas txiav txim rau lawv tus kheej; txawm yuav ua zoo los sis ua phem.

8 Nim no, Vajtswv tej kev cai yeej pauv tsis tau li; yog li ntawd, txoj kev twb tau npaj lawm kom tus uas xav taug yuav taug hauv thiab kom dim.

9 Thiab nim no saib seb, kuv tus me tub, tsis txhob cav hmoov ua siab nkaug koj tus Vajtswv ib zaug ntxiv rau tej lus qhuab qhia uas tau hais li ntawd lawm, uas koj tau cav hmoov ua txhaum los txog nim no.

10 Tsis txhob xav tias, vim nws tau hais txog txoj kev txum tim rov qab los, ces koj yuav rov muaj tau kev zoo siab los ntawm txoj kev txhaum los. Saib seb, kuv hais rau koj tias, txoj kev phem yeej ib txwm tsis yog txoj kev zoo siab.

11 Thiab nim no, kuv tus me tub, txhua tus tib neeg uas tseem ua raws li ntiaj teb, los sis kuv yuav hais tias, tseem ua kev ntiaj teb, yeej tseem nyob hauv qhov phem heev ntawm txoj kev iab thiab nyob hauv txoj kev ua qhev ntawm txoj kev tsis ncaj; lawv nyob hauv ntiaj teb tsis muaj Vajtswv li, thiab lawv tau mus tsis raws li Vajtswv tej kev; yog li ntawd, lawv nyob hauv ib qho chaw uas tsis ncaj rau txoj kev zoo siab.

12 Thiab nim no saib seb, lo lus tias txum tim rov qab los lub ntsiab puas yog muab ib yam ntawm qhov uas ib txwm muaj thiab coj mus rau hauv qhov ua ib txwm tsis muaj, los sis muab nws rau hauv qhov fab ntxeev ntawm nws qhov ib txwm muaj?

13 Au, kuv tus me tub es, tsis yog li qhov no; tiam sis lub ntsiab ntawm lo lus tias txum tim rov qab los yog hais tias rov qab coj kev phem los rau kev phem, los sis kev ntiaj teb rau kev ntiaj teb, los sis zoo li qhov phem rau phov phem—qhov zoo rau qhov uas zoo; qhov ncaj rau qhov uas ncaj; qhov tus rau qhov tus; qhov muaj kev hlub tshua rau qhov muaj kev hlub tshua.

14 Yog li ntawd, kuv tus me tub, nco ntsoov tias koj yuav tsum ua zoo rau koj cov kwv tij; coj ncaj ncees, txiav txim ncaj ncees, thiab ua qhov zoo tsis txhob tu ncua; thiab yog koj ua tag nrho ib puas yam tsav no ces koj yuav tau txais koj qhov nqi zog; muaj tseeb tiag, koj yuav muaj kev zam txim txum tim rov qab los rau koj dua; koj yuav muaj kev txim lij txum tim rov qab los rau koj dua; koj yuav muaj kev txiav txim ncaj ncees txum tim rov qab los rau koj dua; thiab koj yuav muaj nqi zog zoo rov los rau koj dua.

15 Vim tej uas koj xa tawm mus lawm yuav rov qab los rau koj dua, thiab txum tim rov li qub; yog li ntawd, lo lus tias txum tim rov qab los dua rau txim rau cov neeg txhaum ntau dua, thiab yuav tsis zam dab tsi rau nws hlo li.