1 Thiab ntxiv, kuv cov kwv tij, kuv yuav thov coj nej tej hlwb mus kom txog lub sij hawm thaum uas tus Tswv Vajtswv tau muab tej lus txib no rau nws cov me nyuam; thiab kuv xav kom nej yuav tsum nco ntsoov tias tus Tswv Vajtswv tau tsa tej pov thawj, mus raws li nws tus txheej txheem dawb huv, uas tau mus raws li tus txheej txheem ntawm nws Leej Tub, los qhia tej yam no rau cov neeg.

2 Thiab cov pov thawj ntawd tau raug tsa raws li tus txheej txheem ntawm nws Leej Tub, ntawm ib tug yam ntxwv uas kom los ntawm qhov ntawd cov neeg yuav paub saib lawv yuav ua li cas npaj tos nws Leej Tub rau txoj kev txhiv dim.

3 Thiab qhov no yog raws li qhov uas lawv tau raug tsa—tau raug hu thiab npaj txij thaum tsim lub ntiaj teb los raws li Vajtswv txoj kev paub ua ntej, vim yog lawv txoj kev ntseeg heev thiab tej hauj lwm zoo; nyob hauv thawj qhov chaw tau raug tso kom xaiv qhov zoo los sis qhov phem; yog li ntawd lawv tau xaiv qhov zoo, thiab xyaum muaj txoj kev ntseeg loj heev, tau raug hu nrog ib txoj hauj lwm dawb huv, muaj tseeb tiag, nrog txoj hauj lwm dawb huv ntawd uas tau raug npaj nrog, thiab raws li, ib txoj kev txhiv dim tau npaj rau cov ntawd.

4 Thiab li no lawv tau raug hu los rau txoj hauj lwm dawb huv no vim yog lawv tej kev ntseeg, thaum lwm tus tseem yuav tsis txais Vajtswv tus Ntsuj Plig vim yog lawv txoj kev ua siab tawv thiab tej kev dig ntawm lawv tej siab, thaum, yog tias tsis yog rau qhov no lawv yuav tau muaj ntiag tug zoo heev ib yam li lawv cov kwv tij thiab.

5 Los sis qhov zoo kawg, thaum chiv thawj lawv tau zoo ib yam li lawv cov kwv tij; yog li no txoj hauj lwm dawb huv no tau raug npaj txij thaum tsim lub ntiaj teb los rau cov uas yuav tsis ua lawv tej siab tawv, tau raug nyob hauv thiab dhau los ntawm txoj kev theej txhoj ntawm Tib Leeg Tub, tus uas tau npaj—

6 Thiab li no tau raug hu los ntawm txoj hauj lwm dawb huv no, thiab tau tsa rau lub pov thawj hwj hlob ntawm tus txheej txheem dawb huv ntawm Vajtswv, los qhia nws tej lus txib rau noob neej, kom lawv kuj yuav tau nkag mus rau hauv nws qhov chaw so thiab—

7 Lub pov thawj hwj hlob no tau raug muaj raws li tus txheej txheem ntawm nws Leej Tub, uas yog tus txheej txheem muaj txij puag thaum tsim ntiaj teb los; los sis ua lwm yam lus hais, tau tsis muaj hnub pib los sis tsis muaj xyoo kawg, tau raug npaj ib txhiab ib txhis mus tag nrho rau ib txhiab ib txhis, raws li nws txoj kev paub ua ntej txog txhua yam—

8 Nim no lawv tau raug tsa mus zoo li no—tau raug hu nrog ib txoj hauj lwm dawb huv, thiab raug tsa nrog ib txoj kev tsa dawb huv, thiab lawv tau muaj lub pov thawj hwj hlob ntawm tus txheej txheem dawb huv, uas yog txoj kev hu, thiab txoj kev tsa, thiab lub pov thawj hwj hlob, uas tsis muaj qhov pib los sis qhov kawg—

9 Lawv tau rais los ua cov pov thawj hlob mus ib txhis zoo li no, raws li Leej Tub tus txheej txheem, Tib Leeg Tub ntawm Leej Txiv, tus uas tsis muaj hnub pib los sis tsis muaj xyoo kawg, tus uas muaj kev zoo puv npo, muaj kev txij lim, thiab qhov tseeb. Thiab yeej muaj li ntawd tiag. Amees.

10 Nim no, ib yam li kuv tau hais txog tus txheej txheem dawb huv, los sis lub pov thawj hwj hlob no, tau muaj ntau leej uas tau raug tsa thiab rais los ua Vajtswv cov pov thawj hlob; thiab nws tau vim yog lawv txoj kev ntseeg heev thiab txoj kev hloov siab lees txim, thiab lawv txoj kev ncaj ncees rau Vajtswv, lawv tau xaiv hloov siab lees txim thiab ua hauj lwm ncaj ncees dua li kom piam sij.

11 Yog li ntawd lawv tau raug hu raws li tus txheej txheem dawb huv no, thiab raug ua kom dawb huv, thiab lawv tej ris tsho tau raug ntxhua dawb dhau ntawm tus Me Nyuam Yaj cov ntshav.

12 Nim no lawv, tom qab tau raug ua kom dawb huv los ntawm tus Vaj Ntsuj Plig Dawb Huv, tau ua lawv tej ris tsho kom dawb, tau huv huv thiab tsis muaj qhov ceb rau ntawm Vajtswv, ntsia tsis taus txoj kev txhaum tsuas yog nrog kev ntxub xwb; thiab tau muaj coob, coob heev kawg li, uas tau ua huv huv thiab tau nkag mus rau hauv tus Tswv lawv tus Vajtswv qhov chaw so.

13 Thiab nim no, kuv cov kwv tij, kuv xav kom nej yuav tsum txo nej hwj chim rau Vajtswv, thiab txi taus txiv rau ntawm txoj kev hloov siab lees txim, xwv kom nej thiaj yuav tau nkag mus rau hauv qhov chaw so ntawd thiab.

14 Muaj tseeb tiag, txo nej hwj chim yam li cov neeg uas nyob hauv lub sij hawm Mekixedes, tus uas kuj yog ib tug pov thawj hlob raws li tib tug txheej txheem uas kuv tau hais txog no, tus uas kuj tau txais lub pov thawj hlob rau nws mus ib txhis li.

15 Thiab nws tau yog tib tug Mekixedes no tus uas Anplaham tau them ib feem kaum rau; muaj tseeb tiag, peb tus yawg koob Anplaham tau them ib feem kaum ntawm txhua yam uas nws muaj.

16 Nim no tej kab ke no tau muab raws li no, xwv kom los ntawm qhov ntawd cov neeg yuav tos ntsoov rau Vajtswv Leej Tub, nws tau yog ib lub cim ntawm nws tus txheej txheem, los sis qhov ntawd yog nws tus txheej txheem, thiab qhov no xwv kom lawv yuav tos ntsoov nws rau txoj kev zam lawv lub txim, xwv kom lawv yuav nkag tau mus rau hauv tus Tswv qhov chaw so.

17 Nim no tus Mekixedes no yog ib tug vaj ntxwv kav thaj av Xalees; thiab nws cov neeg tau loj hlob nyob hauv txoj kev tsis ncaj ncees thiab txoj kev qias; muaj tseeb tiag, lawv tag nrho tau mus yuam kev; lawv tau muaj tag nrho txhua yam kev phem;

18 Tiam sis Mekixedes tau siv txoj kev ntseeg heev, thiab tau txais txoj hauj lwm ntawm lub pov thawj hwj hlob raws li Vajtswv tus txheej txheem dawb huv, tau qhuab qhia txoj kev hloov siab lees txim rau nws cov neeg. Thiab saib seb, lawv tau hloov siab lees txim; thiab Mekizedes tau tsim kev thaj yeeb nyob hauv thaj av thaum nws tseem ua neej nyob; yog li ntawd nws tau raug hu ua tub vaj ntxwv ntawm txoj kev thaj yeeb, vim nws tau yog Xalees tus vaj ntxwv; thiab nws tau kav hauv qab nws txiv.

19 Nim no, tau muaj ntau tus ua ntej nws, thiab kuj tau muaj ntau tus tom qab, tiam sis tsis tau muaj ib tug yuav zoo dua; yog li ntawd, lawv tau hais txog nws ntau dua.

20 Nim no kuv tsis tas yuav hais txog qhov ntawd ntxiv; yam uas kuv tau hais lawm nyaj yuav txaus lawm. Saib seb, tej vajlugkub twb nyob ntawm nej xub ntiag; yog nej yuav nrog lawv sib ntswg nws yuav ua rau nej tus kheej muaj kev puas tsuaj.

21 Thiab nim no tau muaj tias thaum Amas tau hais tej lus no rau lawv tas lawm, nws tau cev nws txhais tes rau lawv thiab qw nrog ib lub suab nrov nrov hais tias: Nim no yog lub sij hawm hloov siab lees txim, vim hnub cawm seeg los ze lawm;

22 Muaj tseeb tiag, thiab tus Tswv lub suab, los ntawm tej tim tswv tej qhov ncauj, yuav tshaj nws tawm rau txhua haiv neeg; muaj tseeb tiag, yuav tshaj nws tawm, kom lawv yuav muaj txoj moo zoo ntawm txoj kev xyiv fab heev; muaj tseeb tiag, thiab nws yuav tshaj tawm tej moo zoo no rau tag nrho hauv nws cov neeg, muaj tseeb tiag, mus rau lawv cov uas raug tawg ri niab mus rau lwm teb chaws nyob rau saum lub ntiaj teb; yog li ntawd lawv tau los rau peb.

23 Thiab lawv tau raug ua rau peb paub tseeb, xwv kom peb yuav to taub, xwv kom peb tsis yuam kev; thiab li no los vim peb yog neeg loj leeb nyob hauv ib thaj av txawv; yog li ntawd, peb tau koob hmoov ntau, vim peb tau muaj tej moo zoo no tshaj tawm rau peb nyob rau hauv peb txhua txhia ces kaum vaj txiv hmab.

24 Vim saib seb, tej tim tswv tab tom tshaj nws tawm rau ntau leej nyob rau lub sij hawm no nyob hauv peb thaj av; thiab qhov no yog rau lub ntsiab ntawm txoj kev npaj noob neej tej siab los txais nws txoj lus nyob rau lub sij hawm thaum nws los nyob hauv nws lub yeeb koob.

25 Thiab nim no peb tsuas tos mloog tej xov xwm zoo siab uas tau tshaj tawm rau peb los ntawm tej tim tswv tej qhov ncauj, txog nws txoj kev los; vim lub sij hawm yuav los, peb tsis paub tias yuav sai npaum li cas. Cia siab rau Vajtswv tias nws yuav yog thaum kuv tseem ua neej nyob; tiam sis txawm nws yuav muaj sai los sis qeeb, kuv yeej yuav zoo siab nyob hauv nws.

26 Thiab qhov ntawd yuav ua rau cov neeg ncaj thiab dawb huv paub, los ntawm cov tim tswv tej qhov ncauj, nyob rau lub sij hawm thaum nws los, xwv kom peb tej yawg koob tej lus yuav muaj puv npo, raws li tej uas lawv tau hais txog nws, uas tau raug raws li tus ntsuj plig ntawm txoj kev qhia tej uas yuav muaj los yav tom ntej uas nyob hauv lawv.

27 Thiab nim no, kuv cov kwv tij, kuv vam puag hauv kuv nruab siab tuaj, muaj tseeb tiag, nrog kev txhawj uas twb mob, tias nej yuav mloog rau kuv tej lus, thiab muab nej tej kev txhaum pov tseg, thiab tsis txhob laug sij hawm rau hnub uas nej hloov siab lees txim;

28 Tiam sis nej yuav tsum txo nej tej hwj chim rau tus Tswv, thiab hu nws lub npe dawb huv, thiab xyuas thiab thov tsis tu ncua, kom nej yuav tsis raug ntxias tshaj qhov uas nej tiv taus, thiab xwv kom yuav raug tus Ntsuj Plig Dawb Huv coj, rais los mus ua neeg txo hwj chim, siab dawb siab zoo, zam rau lwm tus, ua siab ntev, muaj kev hlub puv npo thiab muaj kev ua siab ntev nyiaj huv tib si;

29 Muaj kev ntseeg rau tus Tswv; muaj txoj kev cia siab tias nej yuav tau txais txoj sia nyob mus ib txhis; muaj Vajtswv txoj kev hlub nyob hauv nej tej siab tas mus li, xwv kom nej yuav raug tsa sawv nyob hauv hnub kawg thiab nkag mus rau hauv nws qhov chaw so.

30 Thiab thov tus Tswv pub txoj kev hloov siab lees txim rau nej, xwv kom nej tsis txhob coj nws txoj kev npau taws nqis los rau nej, xwv kom nej tsis txhob raug khi los ntawm ntuj txiag teb tsaus tej saw hlau, xwv kom nej tsis txhob raug txoj kev tuag zaum ob.

31 Thiab Amas tau hais ntau yam lus ntxiv rau cov neeg, uas tsis tau muab sau rau hauv phau ntawv no.