1 Nim no tau muaj tias thaum cov Neeg Lamas uas tau mus ua rog tawm tsam cov Neeg Nifais tau nrhiav pom, tom qab uas lawv muaj ntau yam nyuaj ua kom lawv cov no puas tsuaj, tias nws tau yog ib qho tsis muaj qab hau nrhiav ua kom lawv puas tsuaj, lawv tau tig rov qab mus rau thaj av Nifais.

2 Thiab tau muaj tias cov neeg Amalej, vim yog lawv txoj kev ploj, tau raug npau taws heev. Thiab thaum lawv tau pom tias lawv tsis muaj cuab kav nrhiav pauj txiaj ntsig rau cov Neeg Nifais, lawv tau pib txhib cov neeg kom npau taws tawm tsam lawv cov kwv tij, cov neeg Eethais-Nifais-Lihais; yog li ntawd lawv tau pib rov qab ua kom lawv cov no puas tsuaj dua.

3 Nim no cov neeg no tau rov tsis kam nqa lawv tej cuab yeej ua rog dua, thiab lawv tau cia lawv tus kheej raug tua raws li lawv tej yeeb ncuab siab nyiam.

4 Nim no thaum Amoos thiab nws cov kwv tij tau pom txoj hauj lwm puas tsuaj no nyob hauv cov uas lawv tau hlub heev, thiab nyob hauv cov uas tau hlub lawv heev—vim lawv tau raug saib zoo li lawv tau yog tej tim tswv uas tau xa los ntawm Vajtswv los cawm lawv dim ntawm txoj kev puas tsuaj uas kav ib txhis—yog li ntawd, thaum Amoos thiab nws cov kwv tij tau pom txoj hauj lwm puas tsuaj loj no, lawv tau raug txav nrog txoj kev siab hlub, thiab lawv tau hais rau vaj ntxwv hais tias:

5 Cia peb sau tus Tswv cov neeg no los ua ke, thiab cia peb nqis mus rau nram thaj av Xalahelas mus cuag peb cov kwv tij cov Neeg Nifais, thiab khiav tawm ntawm peb tej yeeb ncuab tes, kom peb thiaj tsis raug puas tsuaj.

6 Tiam sis vaj ntxwv tau hais rau lawv tias: Saib seb, cov Neeg Nifais yuav ua kom peb puas tsuaj, vim yog tej kev tua neeg coob thiab tej kev txhaum uas peb tau ua rau lawv.

7 Thiab Amoos tau hais tias: Kuv yuav mus thiab nug tus Tswv, thiab yog nws hais rau peb tias, cia li nqis mus rau nram peb cov kwv tij, koj puas yuav mus?

8 Thiab vaj ntxwv tau hais rau nws tias: Muaj tseeb tiag, yog tus Tswv hais rau peb tias mus, peb yuav nqis mus rau nram peb cov kwv tij, thiab peb yuav ua lawv qhev mus txog thaum peb kho tau rau lawv tej kev tua neeg coob thiab tej kev txhaum uas peb tau ua rau lawv lawm.

9 Tiam sis Amoos tau hais rau nws tias: Qhov ntawd txhaum peb cov kwv tij txoj kev cai, uas tau raug tsim los ntawm kuv txiv, tias yuav tsum tsis txhob muaj ib tug twg ua qhev nyob hauv lawv; yog li ntawd cia peb nqis mus thiab vam khom rau peb cov kwv tij tej kev hlub tshua.

10 Tiam sis vaj ntxwv tau hais rau nws tias: Nug tus Tswv, thiab yog nws hais rau peb tias mus, peb yuav mus; tsis li ntawd ces peb yuav piam sij nyob hauv thaj av.

11 Thiab tau muaj tias Amoos tau mus thiab tau nug tus Tswv, thiab tus Tswv tau hais rau nws tias:

12 Coj cov neeg no tawm ntawm thaj av no mus, xwv kom lawv yuav tsis piam sij; vim Dab Ntxwg Nyoog tau tuav cov neeg Amalej tej siab ruaj heev li, cov uas tau txhib kom cov Neeg Lamas npau taws tawm tsam lawv cov kwv tij kom muab lawv tua; yog li ntawd nej cia li tawm ntawm thaj av no mus; thiab cov neeg no tau koob hmoov nyob hauv tiam no, vim kuv yuav hwm lawv cia.

13 Thiab nim no tau muaj tias Amoos tau mus thiab tau hais rau vaj ntxwv tag nrho tej lus uas tus Tswv tau hais rau nws.

14 Thiab lawv tau sau tag nrho lawv cov neeg tuaj ua ke, muaj tseeb tiag, tag nrho tus Tswv cov neeg, thiab tau sau tag nrho lawv tej pab yaj thiab tej tsiaj txhu los ua ke, thiab tau ncaim tawm ntawm thaj av, thiab tau los rau hauv hav zoov uas tau muab thaj av Nifais faib tawm ntawm thaj av Xalahelas, thiab tau los txog ze rau tej ciam teb ntawm thaj av.

15 Thiab tau muaj tias Amoos tau hais rau lawv tias: Saib seb, kuv thiab kuv cov kwv tij yuav tawm mus rau hauv thaj av Xalahelas, thiab nej yuav tsum nyob qhov no mus txog thaum peb rov qab tuaj; thiab peb yuav sim peb cov kwv tij tej siab, saib lawv puas yuav kam nej los rau hauv lawv thaj av.

16 Thiab tau muaj tias thaum uas Amoos tseem tab tom tawm mus rau hauv thaj av, ces nws thiab nws cov kwv tij tau ntsib Amas, nyob rau hauv qhov chaw uas tau hais txog lawm; thiab saib seb, txoj kev sib ntsib zaum no tau yog ib txoj uas xyiv fab heev.

17 Nim no Amoos tau xyiv fab heev kawg nkaus tias nws tau puv npo; muaj tseeb tiag, nws tau raug nqos los ntawm nws tus Vajtswv txoj kev xyiv fab, kawg nkaus tias nws tau qaug zog; thiab nws tau rov qab qaug rau hauv av dua.

18 Nim no qhov no tsis yog txoj kev xyiv fab heev los? Saib seb, qhov no yog txoj kev xyiv fab uas tsis muaj leej twg tau txais tsuas yog tus uas hloov siab lees txim tiag tiag thiab tus uas txo hwj chim los nrhiav txoj kev zoo siab xwb.

19 Nim no Amas txoj kev xyiv fab uas tau ntsib nws cov kwv tij tau yog ib qho zoo kawg tiag, thiab txoj kev xyiv fab ntawm Aloos, ntawm Oonaws, thiab Hinais; tiam sis saib seb lawv tej kev xyiv fab ho tsis tau tshaj lawv tej zog.

20 Thiab nim no tau muaj tias Amas tau coj nws cov kwv tij rov qab mus rau tom thaj av Xalahelas; mus rau hauv nws lub tsev kiag. Thiab lawv tau mus thiab tau qhia rau tus thawj tub txiav txim tag nrho ib puas yam tsav uas tau tshwm sim rau lawv nyob rau hauv thaj av Nifais, nyob rau hauv lawv cov kwv tij, cov Neeg Lamas.

21 Thiab tau muaj tias tus thawj tub txiav txim tau xa ib tsab xov mus thoob plaws rau txhua thaj av, xav tau suab ntawm cov neeg saib puas kam txais lawv cov kwv tij, cov uas tau yog cov neeg Eethais-Nifais-Lihais.

22 Thiab tau muaj tias tej suab ntawm cov neeg tau los, hais tias: Saib seb, peb yuav kam muab thaj av Ntsawsoos, uas nyob rau sab hnub tuaj uas npuab dej hiav txwv, uas txuas thaj av Huaj Vam, uas nyob sab nram hav ntawm thaj av Huaj Vam; thiab thaj av Ntsawsoos no yog thaj av uas peb yuav muab rau peb cov kwv tij ua ib qho qub txeeg qub teg.

23 Thiab saib seb, peb yuav tso peb tej tub rog nyob nruab nrab ntawm thaj av Ntsawsoos thiab thaj av Nifais, xwv kom peb yuav tsom kwm tau peb cov kwv tij nyob hauv thaj av Ntsawsoos; thiab peb ua li no rau peb cov kwv tij, vim yog lawv txoj kev ntshai nqa tej cuab yeej ua rog tawm tsam lawv cov kwv tij ntshai tsam lawv yuav ua txhaum; thiab lawv txoj kev ntshai heev no tau los vim yog lawv txoj kev hloov siab lees txim mob heev uas lawv tau muaj lawm, rau lawv tej kev tua neeg ntau thiab lawv tej kev phem heev.

24 Thiab nim no saib seb, peb yuav ua li no rau peb cov kwv tij, xwv kom lawv yuav tau thaj av Ntsawsoos ua qub txeeg qub teg; thiab peb yuav muab peb tej tub rog saib xyuas lawv thaiv lawv tej yeeb ncuab, tsuas yog kom lawv yuav muab qho me ntsis ntawm lawv tej khoom rau peb kom pab peb tej tub rog kom muaj txawm peem xwb.

25 Nim no, tau muaj tias thaum Amoos tau hnov qhov no, nws tau rov qab mus cuag cov neeg Eethais-Nifais-Lihais, thiab Amas kuj nrog nws thiab, mus rau tom hav zoov, qhov uas lawv tau rub lawv tej tsev pheeb suab ntaub, thiab tau ua rau lawv paub tag nrho ib puas yam tsav no. Thiab Amas kuj tau qhia rau lawv txog nws txoj kev los ntseeg Vajtswv, nrog Amoos thiab Aloos, thiab nws cov kwv tij.

26 Thiab tau muaj tias qhov ntawd tau ua txoj kev xyiv fab heev nyob rau hauv lawv. Thiab lawv tau nqis mus rau nram thaj av Ntsawsoos, thiab tau muab thaj av Ntsawsoos; thiab lawv tau raug hu los ntawm cov Neeg Nifais ua Amoos cov neeg; yog li ntawd lawv tau raug zoo txawv los ntawm lub npe ntawd txij li ntawd mus lawm.

27 Thiab lawv tau nyob nrog cov Neeg Nifais, thiab kuj raug suav nrog cov neeg uas tau yog cov ntseeg ntawm Vajtswv lub koom txoos. Thiab lawv kuj zoo txawv rau lawv tej kev mob siab rau Vajtswv, thiab rau tib neeg; vim lawv tau ua neeg siab ncaj thiab siab zoo huv si nyob hauv tag nrho txhua yam; thiab lawv tau nyob ruaj nrees hauv txoj kev ntseeg ntawm Khetos, mus txog hnub uas kawg.

28 Thiab lawv tau saib txoj kev tua lawv cov kwv tij nrog txoj kev tsis nyiam tshaj plaws; thiab lawv yuav tsis muaj cuab kav raug yaum tau los nqa tej cuab yeej ua rog tawm tsam lawv tej kwv tij; thiab lawv tsis tau ntshai txog txoj kev tuag ib nyuag qhov li, vim lawv txoj kev cia siab thiab tej kev paub txog Khetos thiab txoj kev sawv hauv qhov tuag rov qab los; yog li ntawd, rau lawv txoj kev tuag tau raug Khetos txoj kev kov yeej muab nws nqos lawm.

29 Yog li ntawd, lawv yeej yuav nyiaj txoj kev tuag uas mob tshaj thiab nyuaj siab tshaj uas raug lawv tej kwv tij ua, ua ntej lawv yuav nqa ntaj los sis nqa liag tua lawv.

30 Thiab li no lawv tau yog ib cov neeg rau siab thiab ntxim hlub, ib cov neeg uas tau koob hmoov ntau heev los ntawm tus Tswv.