“Xya Hli Ntuj 13–19. Amas 32–35: ‘Cog txoj Lus No rau hauv Nej lub Siab,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Xya Hli Ntuj 13–19. Amas 32–35,” Los, Nrog Kuv Mus—Rau Ib Leeg thiab Tsev Neeg: 2020
Xya Hli Ntuj 13–19
Amas 32–35
“Cog txoj Lus No rau hauv Nej lub Siab”
Cia li sau ntawv txog tej kev tshoov siab ntawm sab ntsuj plig uas koj txais thaum koj kawm Amas 32–35. Koj txais kev tshoov siab ua dab tsi vim yog tej yam uas koj kawm?
Sau Ntawv txog Koj tej Kev Tshoov Siab
Cov Neeg Xaulas xav hais tias kev thov Vajtswv yog ib tug txheej txheem uas lawv ua ib zaug xwb txhua lub lim tiam kom pab lawv tus kheej xwb. Lawv sawv ntsug rau txhua tus pom thiab rov qab hais tej lus khav theeb, qias dub xwb. Qhov haj yam tsis zoo yog qhov uas Neeg Xaulas tsis ntseeg Yexus Khetos—lawv xyeej hais tias Nws muaj txoj sia nyob—thiab lawv tsim txom cov neeg pluag (saib Amas 31:9–25). Tiam sis, Amas thiab Amulej ua siab loj qhia tias kev thov Vajtswv yeej yog tej yam yus muaj hauv yus lub siab thiab tsis yog tej uas yus hais saum ib lub sam thiaj tab meeg sawv daws. Thiab yog tias kev thov Vajtswv tsis ua rau yus muaj kev khuv leej rau cov uas xav tau, ces kev thov li ntawd “yeej tsis muaj qab hau dab tsi, thiab yuav tsis ua ib yam dab tsi” (Amas 34:28). Qhov tseem ceeb tshaj, kev thov Vajtswv yog ib txoj kev qhia tias yus ntseeg Yexus Khetos, tus uas muab kev txhiv dim rau peb los ntawm Nws “txoj kev txi uas tsis muaj qhov kawg thiab nyob mus ib txhis” (Amas 34:10). Amas piav hais tias, yuav muaj kev ntseeg li no yog yus txo hwj chim thiab “xav kom muaj kev ntseeg” (Amas 32:27). Kev ntseeg no yuav loj zuj zus, ib yam li ib tug ntoo, thiab yus yuav tsum tu zoo tsis tu tsis tseg. Thaum koj nyeem Amas 32–35, tej zaum koj yuav xav txog koj txoj kev ntseeg thiab kev thov Vajtswv; koj puas xav tias koj tab tom cia tej kev xav zoo li cov Neeg Xaulas nkag hauv koj lub siab? Koj yuav ua li cas tu koj txoj kev ntseeg Yexus Khetos xwv kom yuav “yog ib tsob ntoo loj tuaj mus rau txoj sia uas kav ib txhis”? (Amas 32:41).
Tej lub Tswv Yim Kawm Vaj Lug Kub ntawm Yus Ib Leeg
Kuv muaj peev xwm xaiv ua ib tug uas txo hwj chim.
Amas pom tias cov Neeg Xaulas uas pluag heev twb txo hwj chim thiab “npaj [siab] hnov txoj lus” (Amas 32:6). Thaum koj nyeem Amas 32:1–16, cia li xav seb koj yuav tsum npaj li cas kom hnov Vajtswv txoj lus.
Tej xwm txheej twg tau ua rau koj txo hwj chim? Koj tau ua li cas kom txo hwj chim ntxiv? Tej zaum tej nqe no yuav qhia koj kom paub xaiv kev txo hwj chim thiab tsis txhob raug yuam kom txo hwj chim. Piv txwv hais tias, qhov uas yus “pluag hais txog tej khoom ntawm lub ntiaj teb” thiab “pluag hauv nruab siab” txawv li cas? (nqe 3). Qhov uas koj “txo [koj] lub hwj chim tiag tiag vim yog txoj lus” txhais li cas? (nqe 14).
Kuj saib “Humility,” Gospel Topics, topics.ChurchofJesusChrist.org.
Kuv muab siab rau ntseeg Yexus Khetos thaum kuv cog thiab tu Nws txoj lus nyob hauv kuv lub siab.
Koj xav tias yog vim li cas Amas hais txog kev cog ib lub noob thaum nws teb cov Neeg Xaulas tej lus nug txog kev teev tiam Vajtswv? Lub noob uas Amas hais txog yog dab tsi? (saib Amas 32:28; 33:22–23). Thaum koj nyeem Amas 32:17–43, sau lus cim txog tej lus uas yuav pab koj to taub ua li cas kom muab siab rau ntseeg Yexus Khetos thiab Nws txoj lus. Koj kawm dab tsi txog kev ntseeg? Ces, thaum koj nyeem chapters 33–34, cia li nrhiav tej lus teb cov Neeg Xaulas txoj lus nug “[Peb] yuav cog lub noob li cas?” (Amas 33:1).
Nov yog ib txoj kev ntxiv rau koj kawm Amas 32–34: Kos duab txog tej lub sij hawm thaum ib lub noob loj tuaj. Ces sau tej lus rau txhua daim duab los ntawm Amas 32:28–43 uas pab koj to taub cog thiab tu txoj lus nyob hauv koj lub siab.
Kuj saib Mathais 13:3–8, 18–23; Henplais 11; Neil L. Andersen, “Tsis Lam Tau Kev Ntseeg, Xaiv Muaj Kev Ntseeg,” Ensign los sis Liahona, Kaum Ib Hlis Ntuj 2015, 65–68; “Faith in Jesus Christ,” Gospel Topics, topics.ChurchofJesusChrist.org.
Kuv teev tiam Vajtswv thaum kuv thov Vajtswv, txhua lub sij hawm thiab nyob qhov twg los tau.
Amas thiab Amulej tej lus ntuas txog kev teev tiam thiab kev thov Vajtswv yog hais kom kho cov Neeg Xaulas txoj kev tsis to taub zoo (saib Amas 31:13–23). Tiam sis tej yam tseeb uas nkawd qhia yeej pab tau peb txhua tus to taub kev thov Vajtswv thiab kev teev tiam Nws zoo dua. Tej zaum koj yuav xav sau tej lus tseeb txog kev thov Vajtswv uas koj nrhiav tau nyob hauv Amas 33:2–11 and 34:17–29. Rau cov lus ntawd ib sab, cia li sau ntawv txog tej yam uas neeg xav ua yuam kev txog kev thov Vajtswv uas tej lus tseeb qhia txog (saib Amas 31:12–23). Tej yam uas koj kawm los ntawm tej nqe no yuav ua li cas rau koj txoj kev thov Vajtswv thiab kev teev tiam?
Xenos thiab Xenoj yog leej twg?
Xenos thiab Xenoj yog ob tug yaj saub uas ua tim khawv txog Yexus Khetos thaum lub caij ntawm Phau Qub, tiam sis nkawd tej lus qhia tsis nyob hauv Phau Qub. Cov Neeg Nifais muaj ob tug yaj saub tej lus qhia, nyaj yog vim tej lus no nyob hauv cov phiaj toog uas Nifais tau los ntawm Lanpas. Kuj hais txog nkawd tej lus no nyob hauv 1 Nifais 19:10–12; Yakhauj 5:1; thiab Hilamas 8:19–20.
“Lub neej no [yog] lub sij hawm los npaj mus ntsib Vajtswv.”
Thaum koj nyeem Amas 34:30–41, cia li xav seb koj yuav “ua zoo siv [koj] lub sij hawm thaum nyob hauv lub neej no” zoo li cas (nqe 33). Kev hloov siab lees txim thiab kev ua siab ntev yuav ua li cas pab koj npaj mus ntsib Vajtswv? Puas muaj tej yam uas koj yuav tsum hloov uas koj twb tau laug koj lub sij hawm ua? Cia li ua raws li tej kev tshoov siab ntawm sab ntsuj plig uas koj tau txais.
Kuj saib Amas 12:24; Larry R. Lawrence, “Tseem Tshuav Yam Twg uas Kuv Tsis Tau Ua Thiab?” Ensign los sis Liahona, Kaum Ib Hlis Ntuj 2015, 33–35.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Amas 32:9–11; 33:2–11; 34:38–39
Yuav zoo li cas yog tias cia peb teev tiam thiab thov Vajtswv thaum Hnub Sunday xwb? Thaum nej nyeem tej nqe no ua ke, tej zaum nej tsev neeg yuav xav sib tham seb lawv yuav teev tiam Vajtswv li cas txhua hnub thiab vim li cas lawv zoo siab uas lawv ua tau li ntawd.
Amas 32:28–43
Muaj ib daim duab txog ib tug ntoo nrog tus txheej txheem qhia no; tej zaum nej yuav xav siv kom qhia txog Amas tej lus hauv tej nqe no. Los sis tej zaum nej tsev neeg yuav xav taug kev nrhiav cov nroj tsuag uas tab tom loj tuaj thiab nyeem tej nqe los ntawm Amas 32 uas muab tus ntoo piv rau peb txoj kev ntseeg. Tej zaum txhua tus hauv nej tsev neeg yuav xav cog ib lub noob thiab sib tham seb peb yuav tsum ua li cas kom pab lub noob ntawd loj tuaj. Thaum tej lub lim tiam tom ntej nej saib xyuas tau nej cov noob thiaj li nco qab tias txhua tus yuav tsum saib xyuas lawv zaj lus tim khawv.
Amas 33:2–11; 34:17–29
Tej nqe no qhia dab tsi rau peb txog tej yam uas peb ua tau kom peb yuav txawj thov Vajtswv zoo dua, tsis hais thaum peb thov peb tus kheej thiab thaum peb thov nrog tsev neeg?
Amas 34:31
Tej yam twg tau qhia rau peb tias thaum peb hloov siab lees txim, ces tam sim ntawd peb yuav txais tau cov koob hmoov ntawm txoj hau kev txhiv dim?
Amas 34:33–35
Nej tsev neeg puas paub tias laug sij hawm txhais li cas? Tej zaum ib tug qhia tau txog kev laug sij hawm thiab tej yam tsis zoo uas los thaum yus ua li ntawd. Qhov hais tias “laug [peb] lub sij hawm hloov siab lees txim” txhais li cas?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Kos duab. Tej zaum nej yuav xav kom nej tsev neeg kos duab thaum lawv kawm vaj lug kub. Piv txwv hais tias, tej zaum lawv yuav nyiam kos duab txog ib lub noob uas loj tuaj ua ib tug ntoo thaum lawv kawm Amas 32.
“Vim yog nej txoj kev rau siab ntso thiab nej txoj kev ntseeg thiab nej txoj kev ua siab ntev tu txoj lus, … saib seb, tsis ntev nej yuav tau de cov txiv ntawd, uas yog cov muaj nuj nqis tshaj” (Amas 32:42).