“Xya Hli Ntuj 20–26. Amas 36–38: ‘Ntsia Ntsoov Vajtswv Xwv Kom Muaj Txoj Sia Nyob,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Xya Hli Ntuj 20–26. Amas 36–38,” Los, Nrog Kuv Mus—Rau Ib Leeg thiab Tsev Neeg: 2020
Daim duab txog ib tug txiv neej thov Vajtswv los ntawm Joshua Dennis
Xya Hli Ntuj 20–26
Amas 36–38
“Ntsia Ntsoov Vajtswv Xwv Kom Muaj Txoj Sia Nyob”
“Thaum koj muaj kev xyiv fab uas los ntawm kev to taub txoj moo zoo, koj yuav xav ua raws li koj kawm” (Qhia Kuv txoj Moo Zoo [2004], 19) Sau ntawv txog koj tej kev xav thiab tej kev tshoov siab txog koj yuav ua li cas kom ua raws li tej yam tseeb uas koj kawm.
Sau Ntawv txog Koj tej Kev Tshoov Siab
Thaum Amas pom tej kev phem nyob ib puag ncig nws, ua rau nws “tu siab,” raug “txom nyem” thiab muaj “kev ntxhov siab” (Amas 8:14). Nws hais txog cov Neeg Xaulas hais tias, “Txoj kev phem zoo li no nyob hauv cov neeg no ua rau kuv tus ntsuj plig mob” (Amas 31:30). Nws xav zoo ib yam li ntawd tom qab nws mus qhia cov Neeg Xaulas thiab rov qab los—nws pom tias “cov neeg lub siab pib tawv tuaj, thiab lawv pib npau taws vim yog txoj kev nruj ntawm txoj lus,” ua rau nws “tu siab heev kawg nkaus li” (Amas 35:15). Amas tau ua li cas txog tej yam uas nws pom thiab xav? Nws tsis tau poob siab thiab tsis xav tias ua tsis taus dab tsi. Tiam sis, “nws hais kom nws cov tub tuaj sib sau ua ke” thiab qhia lawv “tej uas hais txog kev ncaj ncees” (Amas 35:16). Nws tau qhia lawv tias “tsis muaj dua lwm txoj kev los sis lwm yam uas tib neeg yuav muaj peev xwm dim tau, tsuas yog los ntawm Khetos xwb. … Saib seb, nws yog txoj lus ntawm qhov tseeb thiab qhov ncaj ncees” (Amas 38:9).
Tej lub Tswv Yim Kawm Vaj Lug Kub ntawm Yus Ib Leeg
Kuv yuav yug los ntawm Vajtswv thaum kuv txo hwj chim thiab hloov siab lees txim.
Yeej yuav tsis muaj neeg coob uas muaj xwm txheej zoo li Amas txoj kev hloov siab los ntseeg. Tiam sis muaj ob peb lub ntsiab cai uas peb kawm tau thiab siv los ntawm nws zaj, vim txhua leej txhua tus yuav tsum “yug los ntawm Vajtswv” (Amas 36:23). Thaum koj nyeem Amas 36, cia li nrhiav tej ntsiab cai uas koj siv tau. Piv txwv hais tias, ib tug neeg uas tau yug los ntawm Vajtswv yuav xav li cas txog kev txhaum? txog Yexus Khetos? Tej zaum koj kuj yuav xav nrhiav tej yam uas ib tug uas yug los ntawm Vajtswv yuav hloov ntawm nws txoj kev ntseeg thiab tej yam nws ua.
Kuj saib Mauxiyas 5:7; 27:25–26; Amas 5:14; 22:15; Hilamas 3:35; “Conversion,” Gospel Topics, topics.ChurchofJesusChrist.org.
Yexus Khetos theej txhoj rau neeg ntiaj teb tej kev txhaum.
Tej zaum koj yuav pom tias muaj tej yam hauv Amas zaj txog nws txoj kev hloov siab los ntseeg uas nws hais ob peb zaug. Muaj li no vim Amas 36 yog ib zaj lus zoo uas siv cov neeg Henplais paj lug hu ua chiasmus, uas yog ib tug txheej txheem hais lus, uas muaj ib lub ntsiab tseem ceeb nyob rau nruab nrab, ces tom qab ntawd rov qab hais tej uas tau hais ua ntej. Nyob hauv Amas 36, lub ntsiab nyob hauv nqe 3 los rov qab hais nyob hauv nqe 27, es lub ntsiab uas hais nyob hauv nqe 5 los rov qab hais nyob hauv nqe 26, thiab li ntawd. Lub tswv yim tseem ceeb yog lub ntsiab uas nyob nruab nrab hauv paj lug chiasmus. Sim saib koj puas txawj nrhiav lub ntsiab nyob hauv nqe 17–18. Cia li saib tias qhov uas Amas lub siab tau “tsom ntsoov rau txoj kev xav no” tau hloov nws lub neej li cas. Qhov tseeb no tau pab koj li cas? Koj puas pom tej lub ntsiab ntxiv hauv tshooj no uas nws rov qab hais dua?
Zaj lus txog kev hloov siab lees txim thiab kev zam txim no ua li cas tshoov koj lub siab kom coj raws li Amas tus yam ntxwv thiab tig mus rau tus Cawm Seej?
Yog xav paub ntxiv txog chiasmus, saib Book of Mormon Student Manual (Church Educational System manual [2009], 232–33).
Twb tau tsom kwm cov vaj lug kub “rau ib lub hom phiaj tseem ceeb.”
Koj puas tau xav tias yog ib qho txuj ci tseem ceeb thiab ib txoj koob hmoov vim peb muaj vaj lug kub hnub no? Vajtswv tau “tso siab muab tej yam no rau [peb], tej yam uas dawb ceev” (Amas 37:14). Thaum koj nyeem Amas 37, nrhiav tej koob hmoov uas los ntawm cov vaj lug kub. Koj tau txais cov koob hmoov tau li cas? Peb yuav tsum ua li cas kom siv cov vaj lug kub pab “[Vajtswv] yuav ua tau nws lub hwj chim tawm los rau tej tiam neeg yav tom ntej no paub”? (Amas 37:18).
Nyob hauv Amas 37:38–47, Amas muab “Khetos txoj lus” piv rau lub Liyahaunas. Thaum koj xav txog kev muab ob yam no sib piv, cia li xav txog tej yam uas koj twb txais tau los ntawm qhov txuj ci tseem ceeb thiab lub hwj chim ntawm Khetos tej lus qhia “ib hnub dhau ib hnub” (Amas 37:40).
Kuj saib D. Todd Christofferson, “The Blessing of Scripture,” Ensign los sis Liahona, Tsib Hlis Ntuj 2010, 32–35.
Cov vaj lug kub qhia peb paub coj raws li Vajtswv.
“Los ntawm tej yam me me thiab yooj yim thiaj muaj tej yam tseem ceeb los.”
Tej lub sij hawm peb xav tias peb tej teeb meem yeej loj dhau thiab nyuaj dhau ces ua rau peb xav tias tej kev kho teeb meem yeej yuav loj thiab nyuaj ib yam thiab. Tiam sis ib lub sij hawm dhau ib lub sij hawm, tus Tswv xaiv kom siv “tej yam me me thiab yooj yim” (Amas 37:6) kom ua tau Nws txoj hauj lwm thiab foom koob hmoov rau Nws cov me nyuam. Thaum koj nyeem Amas 37:6–7, cia li xav thiab sau ntawv txog tej yam uas koj tau pom lub ntsiab cai no hauv koj lub neej. Tus Tswv tau siv tej yam me me thiab yooj yim twg kom foom koob hmoov rau koj thiab ua Nws txoj hauj lwm?
Kuj saib Amas 37:41–46; Dallin H. Oaks, “Tej Yam Me Me thiab Yooj Yim,” Ensign los sis Liahona, Tsib Hlis Ntuj 2018, 89–92.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Amas 36:5–26
Txawm yog Amas zaj lus yeej tsis zoo li lwm tus, nws txoj kev hloov siab los ntseeg qhia txog ob peb lub ntsiab cai uas muaj nqis rau peb txhua tus. Cia li caw nej tsev neeg kom txhua tus xaiv ib nqe los ntawm Amas 36:5–26 uas qhia txog kev “yug los ntawm Vajtswv.” Peb kawm dab tsi los ntawm tej nqe no? Tej zaum nej tsev neeg yuav xav qhia tias lawv tau ua li cas kom ua raws li tej ntsiab cai uas Amas piav txog.
Amas 36:18–21, 24
Peb yuav ua li cas kom siv tej nqe thiaj pab ib tug neeg paub tias kev hloov siab lees txim yog ib txoj kev xyiv fab, tsis yog ib txoj kev txaus ntshai? Kev hloov siab lees txim yuav pab peb li cas kom qhia tau txoj moo zoo rau lwm tus?
Amas 37:6–7, 38–46
Tej yam twg yog tej “yam me me thiab yooj yim” (Amas 37:6) hauv peb lub neej uas ua rau peb txais tau tej yam tseem ceeb? Khetos txoj lus zoo li lub Liyahaunas li cas? Peb yuav ua li cas kom ib leeg pab ib leeg rau siab kawm vaj lug kub ntxiv?
Amas 37:35
Vim li cas yog laj lim tswv yim zoo kom kawm ua raws li cov lus txib thaum “[peb] tseem hluas”?
Amas 38:12
Koj tsev neeg puas paub tias ib lub looj thawb yog dab tsi? Tej zaum nej yuav xav muab daim duab rau lawv thiab sib tham txog qhov uas tib neeg siv qhov no li cas kom tswj ib tug tsiaj. Qhov hais tias “tswj [peb] tej kev ntswv siab” txhais li cas? Qhov uas peb tswj peb tej kev ntswv siab yuav pab peb li cas kom “muaj kev hlub puv npo”?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Sau ntawv txog koj tej kev tshoov siab. Thaum twg koj sau ntawv txog tej kev tshoov siab ntawm sab ntsuj plig, koj qhia tus Tswv tias koj saib Nws tej lus qhia rau nqi, thiab Nws yuav foom koob hmoov rau koj kom txais tau kev tshwm sim ntxiv. Thaum koj kawm, cia li sau ntawv txog koj tej kev xav. (Saib Teaching in the Savior’s Way, 12, 30.)
Tus Tim Tswv Tshwm Sim rau Amas thiab Mauxiyas cov Tub Pom, los ntawm Clark Kelley Price