“Xya Hli Ntuj 27–Yim Hli Ntuj 2. Amas 39–42: ‘Txoj Hau Kev Zoo Siab uas Tseem Ceeb,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Xya Hli Ntuj 27–Yim Hli Ntuj 2. Amas 39–42,” Los, Nrog Kuv Mus—Rau Ib Leeg thiab Tsev Neeg: 2020
Me Ntxhais, Ua Li Cas Koj Quaj? los ntawm Mark R. Pugh
Xya Hli Ntuj 27–Yim Hli Ntuj 2
Amas 39–42
“Txoj Hau Kev Zoo Siab uas Tseem Ceeb”
Thaum koj kawm Amas 39–42, tus Vaj Ntsuj Plig Dawb Huv yuav pab koj muaj tswv yim txog koj lub neej.
Sau Ntawv txog Koj tej Kev Tshoov Siab
Thaum ib tug neeg uas peb hlub tau ua yuam kev loj heev, nyuaj rau peb paub ua li cas. Ib yam uas muaj nqis heev nyob hauv Amas 39–42 yog qhov uas Amas tau ua li cas thaum muaj xwm txheej li no vim nws yog Khetos ib tug thwj tim uas dhau los twb muaj tej kev txhaum loj heev nws thiaj li yuav tsum hloov siab lees txim. Amas tus tub Khali-atoos tau ua txhaum kev cai coj dawb huv, thiab Amas, ua li nws twb ua ntau zaus, nws tso siab rau lub hwj chim ntawm cov lus qhuab qhia tseeb kom txhawb nqa nws tus tub hloov siab lees txim (saib Amas 4:19; 31:5). Nyob hauv tej tshooj no, peb pom Amas txoj kev ua siab loj hais tias kev txhaum yeej tsis zoo thiab nws txoj kev hlub rau Khali-atoos. Thiab thaum kawg, peb xav tias Amas txoj kev tso siab hais tias tus Cawm Seej “yuav los tshem neeg ntiaj teb tej kev txhaum mus [thiab] yuav los tshaj tawm tej moo zoo siab ntawm kev cawm seej” rau cov uas hloov siab lees txim (Amas 39:15). Vim Khali-atoos tau rov qab ua txoj hauj lwm qhuab qhia (saib Amas 49:30) ces peb yuav muaj kev cia siab rau txoj kev zam txim thiab kev txhiv dim thaum peb raug “xeeb txob” (Amas 42:29) txog peb tej kev txhaum los sis ib tug uas peb hlub tej kev txhaum.
Tej lub Tswv Yim Kawm Vaj Lug Kub ntawm Yus Ib Leeg
Kev txhaum kev cai coj dawb huv los tus Tswv pom yog kev qias.
Xwv kom nws tus tub paub tias kev txhaum kev cai coj dawb huv yog kev txhaum loj heev, Amas qhia tias “tus Tswv pom tej yam no yog kev qias” (Amas 39:5). Vim li cas kev cai coj dawb huv yog ib qho tseem ceeb rau koj? Vim li cas yog ib qho tseem ceeb rau tus Tswv? Tej zaum qhov uas Txwj Laug Jeffrey R. Holland piav yuav pab koj:
“Peb yeej paub tias ib qho uas nws txhawj txog ntau tshaj txog lub neej no yog qhov uas yus nkag los rau hauv lub ntuj no li cas thiab yus tawm mus li cas. Nws twb tau tsa kev cai nruj heev txog tej no.
“… Kev pw ua ke yeej tseg cia rau ib khub niam txiv uas sib yuav vim yog lub cim txog kev koom siab koom ntsws tag nrho, yog kev koom ua ke uas Vajtswv tau tsa thiab pom zoo rau. … Kev sib yuav yeej yog qhov uas ib tug txiv neej thiab ib tug poj niam koob ua ke tag nrho. … Nov yog ib txoj kev koom siab koom ntsws tag nrho peb thiaj li siv lo lus khi kom qhia tias txoj kev cog lus no yeej yuav mus ib txhis li” (“Personal Purity,” Ensign, Kaum Ib Hlis Ntuj 1998, 76).
Cia li xav txog Amas tej lus ntuas rau Khali-atoos nyob hauv Amas 39:8–15. Tej uas nws hais pab koj li cas kom to taub tias kev cai coj dawb huv tseem ceeb npaum li cas thiab paub kov yeej kev ntxias? Amas tej lus qhia kuj qhia tias tus Tswv xav xav zam txim pub rau peb thaum peb hloov siab lees txim thiab muaj kev cia siab rau peb txhua leej txhua tus. Thaum koj nyeem Amas 39–42 lub lim tiam no, nrhiav tej yam uas qhia txog Vajtswv lub siab hlub tshua. Vajtswv lub siab hlub tshua tau foom koob hmoov rau koj li cas?
Kuj saib “Sexual Purity,” For the Strength of Youth, 35–37.
Kuv yuav sawv rov los thiab sawv ntawm Vajtswv xub ntiag es Nws yuav txiav txim rau kuv.
Thaum Amas pom tias Khali-atoos muaj lus nug txog txoj Kev Sawv Rov Los, nws tau qhia nws tus tom txog tej yam uas muaj los tom qab peb tuag. Amas tau qhia txog tej yam tseeb twg nyob hauv tshooj 40–41 uas yuav pab Khali-atoos—thiab leej twg uas tau ua txhaum—to taub zoo? Tej zaum koj yuav xav muab tej yam uas koj kawm faib raws li ntsiab lus uas Amas qhia txog (xws li lub ntuj ntsuj plig, kev sawv rov los, thiab kev txum tim) ces sau ntawv txog tej uas Amas qhia txog txhua yam. Qhov uas koj nco txog tej yam tseeb no yuav pab koj li cas thaum koj raug ntxias los sis koj xav txais kev zam txim?
Kuv muaj peev xwm muaj kev ntseeg nrhiav tej lus teb rau kuv tej lus nug txog txoj moo zoo.
Tej lub sij hawm peb xav tias cov yaj saub paub teb txhua txoj lus nug txog txoj moo zoo. Tiam sis nco qab tias nyob hauv tshooj 40, Amas muaj tej lus nug txog peb lub neej tom qab peb tuag. Nws tau ua li cas kom paub lus teb? Nws tau ua li cas thaum nws tsis paub teb? Cia li xav seb Amas tus yam ntxwv yuav pab koj li cas thaum koj muaj lus nug txog txoj moo zoo.
Kev thov Vajtswv yog ib txoj kev rau peb nrhiav tau lus teb rau peb tej lus nug txog txoj moo zoo.
Yexus Khetos txoj Kev Theej Txhoj qhib kev rau txoj hau kev txhiv dim.
Khali-atoos ntseeg tias kev rau txim thaum ua txhaum yeej tsis ncaj (saib Amas 42:1). Tiam sis Amas qhia tias yeej muaj ib txoj kev dim “txoj kev txom nyem” uas peb raug thaum peb ua txhaum: kev hloov siab lees txim thiab kev ntseeg Yexus Khetos txoj Kev Theej Txhoj, uas yeej yog kev hlub tshua thiab ncaj (saib Amas 42:15). Thaum koj nyeem Amas 42, saib seb tus Cawm Seej txoj Kev Theej Txhoj ua rau koj txais tau kev hlub tshua thiab tsis “nyiag tau ntawm kev txim lij” (nqe 25). Koj nrhiav tau tej yam tseeb twg hauv tshooj no uas pab koj paub Nws txoj kev hlub tshua?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Amas 39:1–9
Puas zoo rau nej tsev neeg sib tham txog kev cai coj dawb huv? Yog tias zoo, ces xav seb tej no puas tsim nyog rau nej tsev neeg siv: Amas 39:1–9; “Sexual Purity,” For the Strength of Youth, 35–37; “Chastity,” Gospel Topics, topics.ChurchofJesusChrist.org; overcomingpornography.org; thiab ob daim video “What Should I Do When I See Pornography?” thiab “I Choose to Be Pure” (ChurchofJesusChrist.org). Xav seb nej yuav pab nej tsev neeg to taub txog tej koob hmoov los ntawm kev coj dawb huv thiab kev pw ua ke thaum sib yuav (piv txwv hais tias, saib daim video “How to Talk to Your Kids about Intimacy” on ChurchofJesusChrist.org).
Amas 39:9–15
Peb kawm dab tsi los ntawm tej nqe no txog kev tsis txhob ua txhaum?
Amas 42:4
Tej zaum nej yuav xav ua si thaum nej muab tej daim ntawv uas sau Khetos tej cwj pwm los sis tej ntsiab cai txog txoj moo zoo rau thiab muab tso rau ub rau no hauv chav nej nyob. Tej zaum nej yuav sim seb nej tsev neeg khaws tau pes tsawg daim ntawv ua ntej dhau sij hawm, ces sib tham txog qhov uas tej yam uas tau sau rau tej daim ntawd yuav pab peb li cas hloov los ua neeg zoo li Vajtswv. Lub sij hawm uas tau pub rau peb hauv lub ntiaj teb puas zoo li lub sij hawm uas teem tseg rau peb ua si li no? Peb yuav ua li cas kom siv “lub caij sim siab” hauv lub ntiaj teb rau peb hloov los ua neeg zoo li tus Cawm Seej?
Amas 42:12–15, 22–24
Tej zaum nej yuav xav kos duab txog kev txim lij thiab kev hlub tshua thaum nej siv ib daim duab txog ib lub teev thiab sib tham txog tej lus nug li no: Yog peb ua txhaum ces yuav ua li cas rau lub teev? Yuav tsum ua li cas raws li kev txim lij kom lub teev thiaj sib luag zos? Tus Cawm Seej tau ua li cas kom them tej nqi ntawm txoj kev lij thiab muab kev hlub tshua rau peb?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Tsom ntsoov rau tej lub ntsiab cai uas yuav foom koob hmoov rau nej tsev neeg. Thaum nej thov Vajtswv kawm Nws txoj lus, nug nej tus kheej tias, “Peb nrhiav dab tsi nyob no uas yuav muaj nqis heev rau kuv tsev neeg?” Nrhiav tus Ntsuj Plig txoj lus qhia thaum nej xav tias nej yuav ua li cas kom pab nej tsev neeg nrhiav tej yam tseeb no.
Nov Yog Kuv tus Tub, los ntawm Elspeth Caitlin Young