“Yim Hli Ntuj 17–23. Hilamas 1–6: ‘Lub Pob Zeb uas Yog Peb tus Txhiv Dim,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)

“Yim Hli Ntuj 17–23. Hilamas 1–6”, Los, Nrog Kuv Mus—Rau Ib Leeg thiab Tsev Neeg: 2020

Daim Duab

cov dej ntsawm rau cov pob zeb

Yim Hli Ntuj 17–23

Hilamas 1–6

“Lub Pob Zeb uas Yog Peb tus Txhiv Dim”

Tej ntsiab cai hauv tus txheej txheem qhia no yuav pab koj kawm Hilamas 1–6, tiam sis koj tseem ua taus lwm yam. tus Vaj Ntsuj Plig Dawb Huv yuav coj koj mus rau tej yam tseeb uas koj yuav tsum kawm.

Sau Ntawv txog Koj tej Kev Tshoov Siab

Phau Hilamas hais txog tej kev muaj yeej thiab kev raug txom nyem ntawm cov Neeg Nifais thiab cov Neeg Lamas. Thaum pib phau no tau “pib muaj teeb meem nyuaj heev nyob hauv cov Neeg Nifais” (Hilamas 1:1), thiab tej yam nyuaj los muaj ntau nyob hauv phau no. Peb nyeem txog tej kev dag ntxias hauv tseem fwv, tej pawg tub sab, kev xyeej cov yaj saub, thiab kev muab hlob thiab kev tsis ntseeg uas nyob thoob plaws thaj av. Tiam sis peb kuj muaj neeg uas coj yam ntxwv zoo li Nifais thiab Lihais thiab “cov uas txo hwj chim zog,” cov uas twb nyiaj dhau tiam sis kuj muaj zog ntawm sab ntsuj plig (Hilamas 3:34). Lawv tau ua li cas kom zoo li no? Lawv tau ua li cas kom muaj zog thaum lawv zej zog tab tom poob mus thiab raug puas tsuaj? Lawv tau ua ib yam li peb yuav tsum ua yog peb xav muaj zog thaum tus dab phem xa “cua daj cua dub” los raug peb—peb yuav tsum ua peb lub neej tsa “nyob rau saum lub pob zeb uas yog peb tus Txhiv Dim, tus uas yog Khetos, Vajtswv Leej Tub, … ib lub hauv paus uas yog neeg cog rau saud lawv yuav tsis vau” (Hilamas 5:12).

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Hilamas 1–6

Kev muab hlob ua rau kuv ncaim tus Ntsuj Plig thiab tus Tswv lub zog.

Thaum koj nyeem Hilamas 1–6—thiab nyob thoob plaws Phau Ntawv Maumoos—tej zaum koj yuav pom ib yam uas cov Neeg Nifais pheej ua: Thaum cov Neeg Nifais ncaj ncees, Vajtswv foom koob hmoov rau lawv thiab lawv vam meej. Tom qab ib ntus, lawv muab hlob thiab ua phem, xaiv ua tej yam uas ua rau lawv raug puas tsuaj thiab raug txom nyem. Lawv txo hwj chim thiab hloov siab lees txim, thiab Vajtswv foom koob hmoov rau lawv dua. Rov qab muaj li no ntau zaus heev es muaj neeg uas hais tias lawv “ib ncig rov qab los txog kev muab hlob.”

“Ib ncig rov qab los txog kev muab hlob.”

Nrhiav thaum twg muaj kev mus ib ncig no thaum koj nyeem. Tej zaum koj yuav xav sau lub cim rau tej nqe thaum koj nrhiav tau. Nov yog tej lus nug kom pab koj to taub kev mus ib ncig no thiab xav seb koj yuav siv li cas:

Muaj dab tsi uas qhia tias cov Neeg Nifais muaj kev muab hlob lawm? (saib, ua piv txwv, Hilamas 3:33–34; 4:11–13). Koj puas pom kev muab hlob li no hauv koj tus kheej?
Muaj li cas los ntawm kev muab hlob thiab kev ua phem? (saib Hilamas 4:23–26). Tej yam uas los ntawm kev txo hwj chim thiab kev hloov siab lees txim yog dab tsi? (saib Hilamas 3:27–30, 35; 4:14–16).
Hilamas xav kom nws cov tub nco txog dab tsi? (saib Hilamas 5:4–12). Qhov uas koj nco txog tej yam tseeb no yuav pab koj li cas kom tsis txhob muab hlob?

Kuj saib Dieter F. Uchtdorf, “Pride and the Priesthood,” Ensign los sis Liahona, Kaum Ib Hlis Ntuj 2010, 55–58.

Hilamas 3:24–35

Kuv yuav hloov ua neeg dawb huv thaum kuv ywj kuv lub siab rau Vajtswv.

Nyob hauv Hilamas 3, Maumoos piav txog ib lub sij hawm thaum lub Koom Txoos vam meej thiab tau koob hmoov heev ua rau cov thawj coj xav tsis thoob (saib nqe 24–32). Ces muaj ib txhia neeg uas muab hlob, tiam sis lwm tus “txoj kev txo hwj chim loj hlob muaj zog zuj zus tuaj, … twb txog rau thaum ua rau lawv lub siab hloov ua ntshiab thiab dawb huv” (Hilamas 3:35). Cia li saib nyob hauv nqe 34–35 seb cov neeg uas txo hwj chim tau ua li cas kom hloov ua dawb huv. Vim li cas tej no yuav pab koj hloov ua dawb huv ntxiv? Tej zaum yuav pab koj yog koj paub tias Phau Qhia txog Vaj Lug Kub (scriptures.ChurchofJesusChrist.org) qhia tias kev hloov ua dawb huv yog “tus txheej txheem ua kom tsis muaj kev txhaum, ua neeg ntshiab, ua neeg huv, thiab ua neeg dawb huv los ntawm Yexus Khetos txoj Kev Theej Txhoj.” Koj txais kev tshoov siab twg kom koj ua raws li cov thwj tim no tus yam ntxwv? Koj yuav ua dab tsi kom ywj koj lub siab rau Vajtswv?

Hilamas 5:14–52

Kuv txoj kev ntseeg muaj zog ntxiv los ntawm “tej pov thawj loj uas [kuv] tau txais”

Txwj Laug Jeffrey R. Holland tau hais lus rau cov uas nyuaj rau lawv muaj kev ntseeg: “Nej muaj kev ntseeg ntau tshaj qhov nej xav vim muaj ib yam uas Phau Ntawv Maumoos hu ua ‘tej pov thawj loj’ [Hilamas 5:50]. … Peb pom tej yam zoo hauv Haiv Neeg Ntseeg hauv Hnub Nyoog Kawg tej lub neej zoo li cov txiv ntawm tsob ntoo thiab cov txiv hmab” (“Tus Tswv, Kuv Ntseeg,” Ensign los sis Liahona, Tsib Hlis Ntuj 2013, 94). Thaum koj nyeem tej nqe no, cia li xav txog tej pov thawj loj uas tus Tswv tau muab rau koj. Piv txwv hais tias, tej zaum koj tsis tau hnov tus Tswv lub suab tiag tiag, tiam sis koj twb hnov “lub suab ntxhi” los ntawm tus Vaj Ntsuj Plig Dawb Huv uas “chob txog ntua nruab siab”? (Hilamas 5:30; kuj saib Lus Qhuab Qhia thiab Kev Khi Lus 88:66). Tej zaum koj twb nyob hauv kev tsaus ntuj, koj twb thov Vajtswv kom muaj kev ntseeg ntxiv, thiab koj twb “muaj txoj kev xyiv fab uas piav tsis tau” (Hilamas 5:40–47). Koj tau muaj tej yam uas txhawb nqa koj txoj kev ntseeg Khetos thiab Nws txoj moo zoo?

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.

Hilamas 3:27–30

Thaum tus yaj saub Maumoos tau sau ntsiab lus txog cov ceev xwm txheej dawb ceev, tej lus sij hawm nws tau hais tej lus “yog li no peb pom tias” kom qhia txog tej yam tseeb tseem ceeb. Nws xav kom peb kawm dab tsi nyob hauv Hilamas 3:27–30? Nyob hauv nej txoj kev kawm vaj lug kub lub lim tiam no, tej zaum nej yuav xav nres thiab nug nej tsev neeg seb lawv yuav hais li cas txog tej yam lawv tau nyeem tom qab hais “thiab yog li no peb pom tias.” Lawv xav qhia txog tej yam tseeb twg?

Hilamas 5:6–7

Thawj Tswj Hwm George Albert Smith yawg uas tau tas sim neej lawm George A. Smith tau tshwm sim rau nws thaum nws ua npau suav thiab nug hais tias, “Kuv xav paub tias koj tau ua dab tsi nrog kuv lub npe.” Thawj Tswj Hwm Smith teb hais tias, “Kuv yeej tsis tau ua dab tsi nrog koj lub npe uas yuav ua rau koj txaj muag” (nyob hauv Teachings of Presidents of the Church: George Albert Smith [2011], xxvi). Tom qab nej nyeem Hilamas 5:6–7, tej zaum nej tsev neeg yuav xav sib tham txog txoj kev nco txog thiab txoj kev hwm peb tej npe, tsis hais lub npe ntawm tus Cawm Seej los yog.

Hilamas 5:12

Xwv kom pab nej tsev neeg kawm tias “lub hauv paus ruaj nrees” txhais li cas, tej zaum nej yuav xav ua ib lub tsev me me thiab tso rau saum tej lub hauv paus uas sib txawv. Ces tej zaum nej yuav xav tsim “cua daj cua dub” thaum nej tsuag dej rau thiab siv ib lub kiv cua los yog lub zias plaub hau. Tau ua li cas rau lub tsev me me thaum tsa rau saum tej lub hauv paus sib txawv no? Ua li cas Yexus Khetos yog “ib lub hauv paus ruaj nrees” hauv peb lub neej?

Hilamas 5:29–33

Thaum twg peb tau paub tias peb hnov Vajtswv lub suab hauv peb lub neej?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Kev Kawm Zoo Dua Ntxiv ntawm Yus Ib Leeg

Ua siab ntev rau koj tus kheej. Yuav tsum tso ib lub pob zeb dhau ib lub pob zeb rau lub hauv paus ntawm koj txoj kev ntseeg. Yog tias nyuaj rau koj to taub tej lus qhuab qhia tam sim no, ua siab ntev. Cia li tso siab tias koj yuav to taub thaum koj tsa koj lub hauv paus rau saum Yexus Khetos thiab muab siab rau ntseeg thiab rau siab kawm.