“Yim Hli Ntuj 24–30. Hilamas 7–12: ‘Nco txog tus Tswv,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)

“Yim Hli Ntuj 24–30. Hilamas 7–12”, Los, Nrog Kuv Mus—Rau Ib Leeg thiab Tsev Neeg: 2020

Daim Duab

Nifais thov saum tus pej thuam hauv nws lub vaj

Daim duab txog Nifais nyob saum tus pej thuam hauv nws lub vaj los ntawm Jerry Thompson

Yim Hli Ntuj 24–30

Hilamas 7–12

“Nco txog tus Tswv”

Nifais, Lihais, thiab coob tug ntxiv twb tau “txais kev tshwm sim ntau txhua hnub” (Hilamas 11:23). Kev txais kev tshwm sim ntau tsis yog rau cov yaj saub xwb—koj kuj txais tau ib yam thiab. Yog koj sau ntawv txog koj tej kev tshoov siab ces koj haj yam yuav txais tau kev tshwm sim.

Sau Ntawv txog Koj tej Kev Tshoov Siab

Nifais txiv, Hilamas, tau thov nws ob tug tub kom nkawd “nco ntsoov, nco ntsoov”: nws xav kom nkawd nco ntsoov nkawd cov poj koob yawm txwv, nco ntsoov cov yaj saub tej lus, thiab qhov tseem ceeb tshaj plaws “peb tus Txhiv Dim, tus uas yog Khetos” (saib Hilamas 5:5–14). Peb yeej paub tias Nifais twb nco ntsoov, vim nov yog zaj uas nws tau tshaj tawm “yam tsis nkees kiag li” (Hilamas 10:4) ntau xyoo tom qab ntawd rau cov neeg. “Ua li cas nej thiaj ho hnov qab nej tus Vajtswv” (Hilamas 7:20), nws nug. Tag nrho tej yam uas Nifais ua—kev qhuab qhia, kev thov Vajtswv, kev ua txuj ci tseem ceeb, thiab kev thov Vajtswv xa kev tshaib kev nqhis—yog tej kev sim pab cov neeg tig mus rau Vajtswv thiab nco txog Nws. Kev tsis nco qab txog Vajtswv yog ib qho teeb meem loj tshaj qhov uas peb tsis paub txog Nws, thiab yooj yim rau peb tsis nco qab txog Nws thaum peb lub siab xav txog “tej yam tsis muaj nuj nqis ntawm lub ntiaj teb no” thiab thaum peb ua txhaum (Hilamas 7:21; kuj saib Hilamas 12:2). Tiam sis, raws li Nifais qhia los, yeej tsis lig dhau kom rov qab nco txog thiab “tig hlo mus rau tus Tswv nej tus Vajtswv” (Hilamas 7:17).

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Hilamas 7–11

Cov yaj saub qhia txog Vajtswv lub siab nyiam.

Muaj ntau tus yaj saub nyob hauv Phau Ntawv Maumoos, tiam sis Hilamas 7–11 yog ib qho chaw zoo rau peb kawm tias ib tug yaj saub yog dab tsi, nws ua dab tsi, thiab peb yuav tsum xav li cas txog nws tej lus. Thaum koj nyeem tej tshooj no, cia li tsom ntsoov rau tej yam uas Nifais ua, xav thiab thaum nws sib tham nrog tus Tswv. Nifais txoj kev qhuab qhia pab koj li cas kom to taub tus yaj saub lub luag hauj lwm hauv peb hnub nyoog? Nov yog ob peb zaj lus piv txwv. Koj nrhiav tau dab tsi ntxiv?

Hilamas 7:17–22.Cov yaj saub hais kom neeg hloov siab lees txim thiab ceeb toom txog tej yam yus raug thaum ua txhaum.

Hilamas 7:29; 9:21–36.Vajtswv muab kev tshwm sim rau cov yaj saub kom lawv paub tias cov neeg yuav tsum hnov tej yam twg.

Hilamas 10:7.Cov yaj saub muaj hwj chim khi tej yam hauv lub ntiaj teb thiab nyob saum ntuj ceeb tsheej (kuj saib Mathais 16:19; Lus Qhuab Qhia thiab Kev Khi Lus 132:46).

Hilamas 10:4–7, 11–12.

Tej nqe no ua rau koj xav li cas txog peb tus yaj saub uas nyob hauv lub caij nyoog no? Tsis ntev tas los nws tau qhia dab tsi? Koj ua dab tsi kom mloog thiab ua raws li nws qhia?

Hilamas 9–10

Tej txuj ci tseem ceeb thiab tej cim pab tau tiam sis yeej tsis txaus kom yus muaj kev ntseeg uas kav ntev.

Yog tias tej cim los sis tej txuj ci tseem ceeb txaus ua rau ib tug neeg hloov siab, ces ntshe tag nrho cov Neeg Nifais tau hloov siab los ntseeg vim Nifais tau ua tej cim zoo kawg nkaus nyob hauv Hilamas 9. Tiam sis, “muaj kev sib faib nyob hauv cov neeg” (Hilamas 10:1) vim feem coob “tseem ua lawv lub siab tawv” (Hilamas 10:15). Cov neeg phem xav li cas txog tej cim thiab tej txuj ci tseem ceeb? (saib Hilamas 10:12–15; kuj saib 3 Nifais 2:1–2). Yuav raug xwm txheej li cas yog tias tej lub cim yog lub hauv paus ntawm yus zaj lus tim khawv? (saib “Signs,” Gospel Topics, topics.ChurchofJesusChrist.org).

Hilamas 10:2–4

Kev xav xav ua rau yus txais tau kev tshwm sim.

Yog tias tau muaj ib lub sij hawm thaum koj poob siab, txhawj xeeb, los sis ua xyem xyav, tej zaum koj yuav kawm ib yam tseem ceeb los ntawm Nifais tus yam ntxwv nyob hauv Hilamas 10:2–4. Nws tau ua li cas thaum nws “poob siab”? (nqe 3).

Thawj Tswj Hwm Henry B. Eyring qhia tias, “Thaum peb xav txog vaj lub kub, ua rau peb txais tau tus Ntsuj Plig txoj kev tshwm sim. Rau kuv mas, kev xav txog yog txoj kev xav thiab txoj kev thov Vajtswv tom qab kuv ua tib zoo nyeem thiab kawm vaj lug kub” (“Serve with the Spirit,” Ensign los sis Liahona, Kaum Ib Hlis Ntuj 2010, 60). Koj yuav ua li cas kom teem sij hawm rau koj xav txog tej yam? Yog xav nyeem txog ib txoj kev uas yus siv tau kom xav txog Vajtswv txoj lus, saib Tij Laug Devin G. Durrant zaj lus “Kuv lub Siab Xav Ntsoov txog cov Vaj Lug Kub” (Ensign los sis Liahona, Kaum Ib Hlis Ntuj 2015, 112–15).

Kuj saib Paj Lug 4:26; Lukas 2:19; 1 Nifais 11:1; 2 Nifais 4:15–16; 3 Nifais 17:3; Maulaunais 10:3; Lus Qhuab Qhia thiab Kev Khi Lus 88:62.

Hilamas 12

Tus Tswv xav kom kuv nco txog Nws.

Nyob hauv Hilamas 12, Maumoos, tus uas sau ntsiab lus txog cov ceev xwm txheej, nws tau sau txog tej zaj uas peb kawm tau los ntawm Nifais zaj lus hauv tej tshooj ua ntej. Xav seb koj puas siv nws zaj ntsiab lus kom koj muaj cib fim tshuaj ntsuam koj lub siab. Tej zaum koj yuav xav sau tej yam uas Maumoos hais tias yuav ua rau neeg tsis nco qab tus Tswv. Tej yam twg pab koj nco txog Nws? Koj xav hloov dab tsi vim yog los ntawm tej yam uas koj kawm?

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.

Hilamas 7–9

Peb pom tej yam twg uas Nifais thiab cov yaj saub ua zoo ib yam? Peb tus yaj saub niaj hnub no qhia dab tsi? Tej zaum nej xaiv tau tej lus uas tus yaj saub tau qhia tsis ntev tas los thiab sib tham seb nej tsev neeg ua tau li cas kom coj raws li nws hais.

Hilamas 10:4–5, 11–12

Nifais tau ua li cas qhia tias nws xav ua raws li tus Tswv lub siab nyiam thiab tsis xav ua raws li nws tus kheej lub siab nyiam xwb? Peb yuav ua li cas kom coj raws li nws tus yam ntxwv? Peb tsev neeg ua tau li cas kom ua raws li tus Tswv lub siab nyiam zoo dua ntxiv?

Hilamas 11:1–16

Nifais tau xav dab tsi thiab nws tau ua li cas kom muaj li ntawd? Peb kawm dab tsi los ntawm kev thov Vajtswv los ntawm Nifais tus yam ntxwv?

Hilamas 11:17–23

Peb kawm dab tsi txog Nifais tus kwv, Lihais, nyob hauv Hilamas 11:17–23? Peb puas paub leej twg uas ua neej ncaj ncees tiam sis tsis txais kev qhuas ua li ntawd?

Hilamas 12:1–6

Puas muaj ib yam khoom uas nej siv tau kom pab nej tsev neeg to taub tias “tsis ruaj khov” txhais li cas? Piv txwv hais tias, tej zaum nej yuav xav caw ib tug sim muab ib yam khoom nyob sib npaug saum nws lub taub hau. Ces tej zaum nej yuav xav caw nej tsev neeg nrhiav hauv Hilamas 12:1–6 seb yog vim li cas tib neeg tsis ruaj khov coj raws li tus Tswv. Peb yuav ua li cas kom nyob ruaj khov ntawm peb sab ntsuj plig?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Kev Qhia Zoo Dua Ntxiv

Rov qab kawm. Nov yog ib lub tswv yim kom pab nej tsev neeg nco qab cov vaj lug kub uas nej kawm: Xaiv ib nqe uas muaj nqis rau nej, thiab muab dai rau ntawm ib qho chaw hauv nej tsev uas nej tsev neeg yuav pom ntau zaus. Caw nej tsev neeg ib leeg zuj zus xaiv ib nqe vaj lug kub uas muab tso rau txhua tus saib, thiab sib tham txog nqe ntawd thaum nej tsev neeg koom ua ke, xws li thaum noj mov los sis muaj tsev neeg kev thov Vajtswv.