“Yim Hli Ntuj 31–Cuaj Hlis Ntuj 6. Hilamas 13–16: ‘Tej Moo Zoo Siab ntawm txoj Kev Xyiv Fab Heev,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Yim Hli Ntuj 31–Cuaj Hlis Ntuj 6,” Los, Nrog Kuv Mus—Rau Ib Leeg thiab Tsev Neeg: 2020
Xamuyees tus Neeg Lamas Qhia Saum Phab Ntsa, los ntawm Arnold Friberg
Yim Hli Ntuj 31–Cuaj Hlis Ntuj 6
Hilamas 13–16
“Tej Moo Zoo Siab ntawm txoj Kev Xyiv Fab Heev”
Thaum koj sau ntawv txog koj tej kev tshoov siab lub lim tiam no, cia li xav txog qhov uas tej ntsiab cai los ntawm Hilamas 13–16 txuas rau thiab txhawb nqa lwm yam uas koj kawm hauv vaj lug kub.
Sau Ntawv txog Koj tej Kev Tshoov Siab
Zaum thib ib uas Xamuyees tus Neeg Lamas sim qhia “tej moo zoo siab” nyob hauv Xalahelas (Hilamas 13:7), cov Neeg Nifais uas siab tawv tau xyeej nws. Tej zaum koj yuav xav hais tias zoo li lawv tsa ib phab ntsa khov kho ib ncig lawv lub siab uas ua rau lawv txais tsis taus Xamuyees zaj xov. Xamuyees to taub tias nws zaj xov tseem ceeb npaum li cas thiab nws qhia tias nws muaj kev ntseeg npaum li cas thaum nws tau ua raws li Vajtswv cov lus txib kom nws “rov qab mus, thiab qhia tej yuav muaj los yav tom ntej” (Hilamas 13:3). Ib yam li Xamuyees tau ua, peb txhua tus ntsib tej phab ntsa thaum peb “npaj tus Tswv txoj kev” (Hilamas 14:9) thiab rau siab ua raws li Nws cov yaj saub hais. Thiab zoo li Xamuyees, peb kuj ua tim khawv txog Yexus Khetos, “tus uas yuav los … tiag tiag,” thiab caw txhua tus “ntseeg nws lub npe” (Hilamas 13:6; 14:13). Tsis yog txhua tus yuav mloog, thiab tej zaum ib txhia yuav tawm tsam peb. Tiam sis cov uas nsteeg zaj xov ntawm kev ntseeg Khetos kawm tias zaj no yeej yog “tej moo zoo siab ntawm txoj kev xyiv fab heev” (Hilamas 16:14).
Tej lub Tswv Yim Kawm Vaj Lug Kub ntawm Yus Ib Leeg
Tus Tswv hais lus ceeb toom dhau los ntawm Nws cov yaj saub.
Nyob hauv vaj lug kub, tej lub sij hawm cov yaj saub piv txog cov neeg zov nyas saum ib lub phab ntsa los sis tus pej thuam uas ceeb toom txog tej yam xwm txheej uas yuav los (saib Yaxayas 62:6; Exekhees 33:1–7).
Thawj Tswj Hwm M. Russell Ballard qhia hais tias: “Ib tiam dhau ib tiam, cov yaj saub tau ua lawv tej hauj lwm tiav thaum lawv ceeb toom cov neeg hais txog tej kev xwm txheej uas yuav los rau lawv yog tias lawv tsis hloov siab. Ib tiam dhau ib tiam, cov yaj saub tau ua lawv tej hauj lwm tiav thaum lawv ceeb toom cov neeg hais txog tej kev xwm txheej uas yuav los rau lawv yog tias lawv tsis hloov siab” (“God Is at the Helm,” Ensign los sis Liahona, Kaum Ib Hlis Ntuj 2015, 25).
Thaum koj kawm thiab xav txog Hilamas 13, tej zaum koj yuav xav sau lub cim rau tej lus ceeb toom ntau uas Xamuyees hais. Piv txwv hais tias, nws tau qhia dab tsi txog kev hloov siab lees txim? txog kev txo hwj chim thiab kev nplua nuj? Tej lus ceeb toom no muaj nqis dab tsi rau koj? Cov yaj saub hauv hnub nyoog no tau ceeb txog txog dab tsi, thiab koj xav tias koj yuav tsum ua li cas txog tej lus ceeb toom ntawd?
Tus yaj saub kom peb mus cuag Yexus Khetos.
Tus Tswv yeej muaj siab hlub tshua rau cov uas hloov siab lees txim.
Thaum xub thawj, tus Tswv Xamuyees rau cov Neeg Nifais kom qhia xov xwm xyiv fab heev tias tus Cawm Seej yuav los (saib Hilamas 13:7). Vim lawv xyeej nws, nws twb rov qab los ceeb toom txog Vajtswv tej kev txiav txim. Tiam sis nyob hauv tej lus ceeb toom ntawd los muaj kev caw kom lawv hloov siab lees txim; cia li nrhiav tej lus caw no nyob hauv Hilamas 13–15 (qhov tseem ceeb saib Hilamas 13:6, 11; 14:15–19; 15:7–8). Tej lus caw no muaj nqis dab tsi rau koj? Koj kawm tau dab tsi los ntawm tej nqe no txog kev hloov siab lees txim? Thaum twg koj tau txais Vajtswv txoj kev muaj siab hlub tshua uas los thaum koj hloov siab lees txim?
Tej cim thiab tej yam xav tsis thoob yuav txhawb neeg txoj kev ntseeg yog lawv tsis ua lawv lub siab tawv.
Nyob hauv Hilamas 14, Xamuyees piav vim li cas tus Tswv muab lub cim txog tus Cawm Seej txoj kev yug los thiab txoj kev tuag: “Rau lub hom phiaj tias tej zaum nej yuav ntseeg nws lub npe” (Hilamas 14:12). Thaum koj kawm Hilamas 14, cia li saib tej cim txog tus Cawm Seej txoj kev yug los nyob hauv nqe 1–8 thiab tej cim txog Nws txoj kev tuag nyob hauv nqe 20–28. Yog vim li cas koj xav txias tej cim no yog tej cim zoo rau Yexus Khetos txoj kev yug los thiab txoj kev tuag?
Koj puas txawj xav txog tej cim uas tus Tswv tau muab kom pab koj ntseeg Nws? Piv txwv hais tias, cov yaj saub tau qhia ua ntej txog tej cim uas yuav tshwm sim ua ntej tus Cawm Seej txoj Kev Los Zaum Ob (saib “Tej Cim ntawm lub Caij Nyoog Kawg,” Phau Qhia txog Vaj Lug Kub, scriptures.ChurchofJesusChrist.org). Puas tau muaj tej cim no hauv peb hnub nyoog no? Muaj tej cim ntxiv uas ua rau yus ntseeg Yexus Khetos los tej zaum muab rau koj tus kheej thiab tsis yog tej cim loj heev. Cia li siv sij hawm me ntsis kom xav txog tej yam uas koj pom Nws txhais tes pab koj lub neej.
Muaj lus ceeb toom twg txog tej cim nyob hauv Hilamas 16:13–23? Koj yuav ua li cas kom tsis txhob xav li cov neeg uas tej nqe no piav txog?
Kuj saib Amas 30:43–52; Ronald A. Rasband, “Los ntawm lub Ntuj Ceeb Tsheej tus Txheej Txheem,” Ensign los sis Liahona, Kaum Ib Hlis Ntuj 2017, 55–57.
Kev ua raws li tus yaj saub tej lus ntuas ua rau kuv nyob ze tus Tswv.
Txwj Laug Neil L. Andersen qhia tias: “Kuv tau kawm hais tias thaum kuv kawm txog Vajtswv tus yaj saub tej lus thiab ua tib zoo, thiab ua siab ntev, hloov kuv lub siab nyiam kom muaj raws li nws tej lus qhia zuj zus, ces kuv txoj kev ntseeg tus Tswv Yexus Khetos yeej loj tuaj. Yog peb xaiv tso nws tej lus ntuas tseg thiab xav tias peb paub zoo dua li nws, peb txoj kev ntseeg yuav tsis muaj zog thiab peb txoj kev txawj pom mus ib txhis los peb yuav tsis pom” (“Vajtswv tus Yaj Saub,” Ensign or Liahona, Tsib Hlis Ntuj 2018, 26–27). Cov Neeg Nifais tej lus thiab tej yam lawv ua nyob hauv Hilamas 16 ua li cas qhia tias Txwj Laug Andersen tej lus qhia muaj tseeb? Koj xav tias koj yuav tsum cog lus li cas hais txog tus Tswv cov yaj saub thiab tej lus uas lawv hais?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Hilamas 13:3–4
Nej tsev neeg txais kev tshoov siab li cas txog Xamuyees txoj kev ua raws li tus Tswv tej lus txib nyob hauv Hilamas 13:3–4? Thaum nej tsev neeg kawm vaj lug kub lub lim tiam no, tej zaum nej yuav xav yaum nej tsev neeg kom qhia txog tej kev tshoov siab uas “los rau hauv [lawv] lub siab.”
Hilamas 13:38
Lub tswv yim uas hais tias yus nrhiav tau kev zoo siab los ntawm “kev ua phem” los neeg coob ntseeg li no hauv peb hnub nyoog no. Kev ua raws li txoj moo zoo ua li cas ua rau peb muaj kev zoo siab tiag tiag?
Hilamas 15:3
Vim li cas qhov uas Vajtswv qhuab ntuas qhia tias Nws hlub peb? Caw nej tsev neeg txo hwj chim thov tus Tswv seb lawv yuav tsum ua dab tsi kom ua zoo dua ntxiv.
Hilamas 15:5–8
Peb kawm dab tsi txog kev hloov siab los ntseeg los ntawm tej lus uas piav txog cov Neeg Lamas hauv tej nqe no? Peb yuav ua li cas kom coj raws li lawv tus yam ntxwv?
Hilamas 16:1–3
Nej tsev neeg puas nyiam ua yeeb yam txog Xamuyees tus Neeg Lamas? Tom qab nej nyeem zaj ntawd, tej zaum nej tsev neeg yuav nyiam mus ib leeg zuj zus sawv saum ib lub rooj zaum thiab nyeem Xamuyees tej lus qhia tej yuav muaj los yav tom ntej thaum lwm tus ua txuj tua xub los sis txawb pob zeb. Tej zaum ua li no yuav pab nej tsev neeg to taub tias Xamuyees thiab cov Neeg Nifais tau xav li cas. Tej zaum cov me nyuam yaus yuav nyiam kos duab txog zaj no. Peb yuav ua li cas kom ua neeg zoo li Xamuyees thiab qhia txoj moo zoo rau lwm tus thaum peb ntshai ua li ntawd?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Nrhiav tej tus yam ntxwv. Ib tug txheej txheem yog kev npaj los yog tus yam ntxwv uas koj siv thaum koj ua ib txoj hauj lwm. Nyob hauv vaj lug kub, peb kawm txog tej txheej txheem uas qhia txog tus Tswv txoj kev ua Nws txoj hauj lwm, xws li thaum Nws xa Nws cov tub qhe mus ceeb toom cov neeg.
© The Book of Mormon for Young Readers, Xamuyees tus Neeg Lamas, los ntawm Briana Shawcroft; tsis pub luam