“Cuaj Hlis Ntuj 14–20. 3 Nifais 8–11: ‘Cia Li Sawv thiab Los Cuag Kuv,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Cuaj Hlis Ntuj 14–20. 3 Nifais 8–11,” Los, Nrog Kuv Mus—Rau Ib Leeg thiab Tsev Neeg: 2020
Kuv Yog txoj Kev Kaj ntawm Neeg Ntiaj Teb, los ntawm James Fullmer
Cuaj Hlis Ntuj 14–20
3 Nifais 8–11
“Cia Li Sawv thiab Los Cuag Kuv”
Nyob hauv 3 Nifais 8–11, cov neeg tau hnov Vajtswv lub suab hais lus rau lawv. Thaum koj nyeem tej tshooj no, tsom ntsoov rau qhov uas Nws lub suab hais li cas rau koj.
Sau Ntawv txog Koj tej Kev Tshoov Siab
“Saib seb, kuv yog Yexus Khetos, tus uas cov yaj saub ua tim khawv tias yuav los rau hauv lub ntiaj teb” (3 Nifais 11:10). Thaum nws hais cov lus no, tus Cawm Seej uas tau sawv rov los lawm, twb ua kom muaj raws li tej lus qhia txog tej yuav muaj los yav tom ntej, uas tau hais 600 xyoo dhau los hauv Phau Ntawv Maumoos. Txwj Laug Jeffrey R. Holland sau hais tias, “Tus Cawm Seej txoj kev tshwm sim thiab qhov nws hais li ntawd twb yog lub sij hawm tseem ceeb tshaj plaws nyob hauv Phau Ntawv Maumoos. Yog kev tshwm sim thiab tej lus uas twb ua rau cov Neeg Nifais txhua tus yaj saub txais kev tshoov siab. … Txhua tus twb tau hais lus txog nws, hu nkauj txog nws, ua npau suav txog nws, thiab thov Vajtswv kom nws los—tiam sis tam sim ntawd nws nyob ntawd tiag tiag. Yog ib hnub zoo kawg nkaus! Tus Vajtswv uas muab txhua hmo ntuj hloov uas kaj ntug twb los txog lawm” (Christ and the New Covenant [1997], 250–51).
Tej lub Tswv Yim Kawm Vaj Lug Kub ntawm Yus Ib Leeg
Yexus Khetos yog txoj Kev Kaj ntawm Neeg Ntiaj Teb
Tej zaum koj yuav pom tias muaj tej ntsiab lus uas hais txog kev tsaus ntuj thiab txoj kev kaj—ntawm sab cev nqaij daim tawv thiab sab ntsuj plig huv tib si—nyob hauv 3 Nifais 8–11. Koj kawm dab tsi los ntawm tej tshooj no txog kev tsaus ntuj thiab txoj kev kaj ntawm sab ntsuj plig? Muaj dab tsi uas ua rau koj lub neej muaj kev tsaus ntuj? Muaj dab tsi uas ua rau koj lub neej muaj txoj kev kaj? Koj xav tias yog vim li cas tus Cawm Seej xaiv kom hais txog Nws tus kheej tias Nws yog “txoj kev kaj thiab txoj sia ntawm neeg ntiaj teb”? (3 Nifais 9:18; 11:11). Ua li cas Yexus Khetos yog txoj kev kaj hauv koj lub neej?
Yog kuv hloov siab lees txim, tus Cawm Seej yuav muab kuv sau los, pov hwm kuv, thiab kho kuv zoo.
Koj xav tias cov neeg tau xav li cas tom qab lawv raug kev puas tsuaj thiab nyob hauv kev tsaus ntuj raws li qhia nyob hauv 3 Nifais 8? Koj xav tias lawv xav li cas thaum lawv hnov tus Cawm Seej lub suab hais txog txoj kev kaj, kev hlub tshua, thiab kev txhiv dim nyob hauv tshooj 9 thiab 10?
Txawm yog tus Cawm Seej tshaj tawm tias kev puas tsuaj yog vim cov neeg ua txhaum, Nws cog lus tias Nws yuav kho cov uas rov qab los cuag Nws thiab hloov siab lees txim (saib 3 Nifais 9:2, 13). Txwj Laug Neil L. Andersen hais tias: “Kuv xav tsis thoob vim tus Cawm Seej hlub tshua tus uas hloov siab lees txim, txawm yog tus ntawd txoj kev txhaum cuaj khaum npaum li cas. Kuv ua tim khawv tias tus Cawm Seej txawj zam txim rau peb tej kev txhaum thiab xav ua li ntawd” (“Repent … That I May Heal You,” Ensign los sis Liahona, Kaum Ib Hlis Ntuj 2009, 40).
Nrhiav hauv 3 Nifais 9–10 kawm tej yam uas qhia tias Khetos muaj siab hlub tshua thiab xav zam txim rau tib neeg. Ua piv txwv, koj nrhiav tau dab tsi nyob hauv 3 Nifais 9:13–22 thiab 10:1–6 uas pab koj paub txog tus Cawm Seej txoj kev hlub tshua? Cia li xav txog tej lub sij hawm thaum Nws tau “tu” koj thiab “sau” koj los (saib 3 Nifais 10:4). Xav seb koj puas sau ntawv txog tej lub sij hawm no nyob hauv ib phau ceev txwm txheej los sis qhia txog tej no rau cov uas koj hlub.
Kuv txawj kawm hnov thiab to taub Vajtswv lub suab.
Koj puas tau xav tias nyuaj rau koj to taub ib zaj lus uas Vajtswv hais lus rau koj? Tej zaum tej yam uas muaj los rau cov neeg nyob hauv 3 Nifais 11:1–8 yuav pab koj to taub tej ntsiab cai txog kev hnov thiab to taub Vajtswv lub suab. Tej zaum koj yuav kawm txog qhov uas Vajtswv lub suab zoo li cas thiab cov neeg tau ua dab tsi kom lawv thiaj li to taub. Zaj no pab koj li cas kom koj txawj hnov thiab to taub Vajtswv lub suab hauv koj lub neej los ntawm kev tshwm sim?
Yexus Khetos caw kuv ua tej yam kom muaj ib zaj lus tim khawv txog Nws.
Twb muaj 2,500 tug neeg uas sib sau ua ke nyob hauv Huaj Vam, qhov chaw Yexus Khetos twb tshwm sim (saib 3 Nifais 17:25). Txawm muaj neeg coob npaum li ntawd los, tus Cawm Seej caw lawv los “ib tug dhau ib tug” kom xuas tej qhov ntsia hlau nyob hauv Nws txhais tes thiab taw (3 Nifais 11:14–15). Qhov no qhia dab tsi rau koj txog qhov uas peb yuav tsum kawm tej yam peb tus kheej uas txhawb nqa peb txoj kev ntseeg Yexus Khetos? Tus Cawm Seej ua dab tsi kom caw koj “cia li sawv thiab los cuag” Nws? (3 Nifais 11:14). Muaj tej yam twg uas tau pab koj paub tias Nws yog koj tus Cawm Seej? Tej zaum koj yuav xav txog qhov uas vim li cas tus Cawm Seej tus yam ntxwv nyob hauv tej nqe no yuav pab koj li cas thaum koj txhawb pab lwm tus.
Ib Tug Dhau Ib Tug, los ntawm Walter Rane
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
3 Nifais 8–9
Xwv kom pab nej tsev neeg to taub tej yam uas piav txog nyob hauv 3 Nifais 8–9, tej zaum nej yuav xav rov qab hais los sis mloog kev kaw suab txog tej feem ntawm ob tshooj no nyob hauv ib chav uas tsaus nti. Sib tham seb yuav zoo li cas thaum lawv nyob hauv kev tsaus ntuj tau peb hnub. Ces tej zaum nej yuav xav sib tham txog qhov uas Yexus Khetos yog “txoj kev kaj … ntawm neeg ntiaj teb” (3 Nifais 9:18).
3 Nifais 10:1–6
Kev xav txog ib tug poj qaib muab nws cov me nyuam qaib sau los ua ke tej zaum yuav pab nej heev qhia cov me nyuam kom lawv to taub txog tus Cawm Seej tus cwj pwm thiab Nws ntiag tug hauj lwm. Tej zaum nej yuav xav nyeem tej nqe no thaum nej tsev neeg saib ib daim duab txog ib tug poj qaib thiab cov me nyuam qaib. Vim li cas ib tug poj qaib yuav muab nws cov me nyuam qaib sau los ua ke? Vim li cas tus Cawm Seej xav muab peb sau los ua ke kom nyob ze Nws? Yuav muaj li cas yog ib tug me nyuam qaib tsis tuaj thaum nws niam hu.
3 Nifais 11:1–7
Tej zaum nej yuav xav nyeem tej nqe no ib txhia nrog ib lub “lub suab yau” (3 Nifais 11:3). Cov neeg yuav tsum ua dab tsi kom to taub lub suab uas los saum ntuj los? Peb kawm dab tsi los ntawm tej yam no?
3 Nifais 11:21–38
Puas muaj leej twg hauv nej tsev neeg uas npaj ua kev cai raus dej? Tej zaum kev nyeem 3 Nifais 11:21–38 yuav pab lawv npaj. Qhov uas nej tsev neeg xav txog tus Cawm Seej tej lus qhia hauv tej nqe no yuav pab cov uas twb tau ua kev cai raus dej lawm li cas?
3 Nifais 11:29–30
Tej nqe no qhia dab tsi rau peb txog kev sib cav sib ceg? Peb yuav ua li cas kom tsis muaj kev sib cav sib ceg hauv peb lub tsev? (3 Nifais 11:30).
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Sau ntawv txog koj tej kev tshoov siab. Txwj Laug Richard G. Scott hais tias, “Kev txawj ntse uas yus muab sau cia yog kev txawj ntse uas yus siv tau thaum txog sij hawm. … [Qhov uas yus muab tej kev tshoov siab ntawm sab ntsuj plig sau cia] ua rau yus haj yam txais tau txoj kev kaj ntxiv” (“Acquiring Spiritual Knowledge,” Ensign, Kaum Ib Hlis Ntuj 1993, 88).
Ib tug Tswv Yug Yaj, los ntawm Howard Lyon