“Cuaj Hlis Ntuj 7–13. 3 Nifais 1–7: ‘Tsa Koj lub Taub Hau thiab Cia Li Zoo Siab,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Cuaj Hlis Ntuj 7–13. 3 Nifais 1–7”, Los, Nrog Kuv Mus—Rau Ib Leeg thiab Tsev Neeg: 2020
Ib Hnub, Ib Hmos, thiab Ib Hnub, los ntawm Jorge Cocco
Cuaj Hlis Ntuj 7–13
3 Nifais 1–7
“Tsa Koj lub Taub Hau thiab Cia Li Zoo Siab”
Cov Neeg Nifais twb pom tej cim xav tsis thoob, tiam sis thaum sij hawm dhau mus ces lawv tsis nco qab txog tej ntawd (saib 3 Nifais 2:1). Kev sau ntawv txog koj tej kev tshoov siab yuav pab koj nco txog tej yam uas muaj los ntawm sab ntsuj plig thaum koj kawm 3 Nifais 1–7.
Sau Ntawv txog Koj tej Kev Tshoov Siab
Yeej yog ib lub sij hawm zoo siab heev ua ib tug neeg ntseeg Yexus Khetos. Twb tau muaj raws li tej lus qhia txog tej yuav muaj los yav tom ntej—tej cim thiab tej txuj ci tseem ceeb twb tau qhia tias tsis ntev tus Cawm Seej yuav yug los. Tiam sis, kuj yog ib lub sij hawm rau cov ntseeg txhawj xeeb heev vim, txawm muaj tej txuj ci tseem ceeb no, cov tsis ntseeg hais tias “lub sij hawm … twb dhau lawm” rau tus Cawm Seej txoj kev yug los (3 Nifais 1:5). Cov neeg no twb “ua kev xeeb txob loj heev thoob plaws rau hauv thaj av” (3 Nifais 1:7) thiab twb teem ib hnub muab cov ntseeg tua yog tias tej uas Xamuyees tus Neeg Lamas qhia tias yuav muaj—ib hmos uas tsis muaj kev tsaus ntuj—tseem tsis tau tshwm sim.
Thaum muaj tej xwm txheej uas sim siab li no, tus yaj saub Nifais “sib zog thov nws tus Vajtswv pab nws cov neeg” (3 Nifais 1:11). Tus Tswv tej lus teb yeej pab tau leej twg uas raug kev tsim txom los sis ua xyem xyav thiab xav paub tias txoj kev kaj yuav kov yeej txoj kev tsaus ntuj: “Cia li tsa koj lub taub hau thiab cia li zoo siab; … kuv yeej yuav ua kom muaj raws li tag nrho tej uas kuv tau txib kom kuv cov yaj saub uas dawb huv lub qhov ncauj hais” (3 Nifais 1:13).
Tej lub Tswv Yim Kawm Vaj Lug Kub ntawm Yus Ib Leeg
Tus Tswv yuav ua kom muaj raws li tag nrho Nws tej lus.
Koj yuav xav li cas yog tias koj yog ib tug neeg ntseeg thaum lub sij hawm raws li piav txog nyob hauv 3 Nifais 1–7? Piv txwv hais tias, koj yuav xav li cas yog koj yuav tos ntsoov hmo uas tsis tsaus ntuj uas qhia tias tus Cawm Seej yuav yug los, yog koj paub tias koj yuav raug tua tuag yog tsis muaj li hais ntawd? Thaum koj nyeem 3 Nifais 1:4–21 thiab 5:1–3, nrhiav tej yam uas Nifais thiab lwm tus ntseeg tau ua kom muaj kev ntseeg thaum lub sij hawm nyuaj no. Tus Tswv tau foom koob hmoov rau lawv li cas? Koj kawm dab tsi uas yuav pab koj thaum koj tseem tos ntsoov cov koob hmoov uas tus Tswv cog lus tias koj yuav tau txais?
Qhov uas kuv tsis nco txog qab tej yam uas tau muaj los ntawm sab ntsuj plig ua rau kuv yooj yim raug Dab Ntxwg Nyoog tej kev ntxias.
Tej zaum koj yuav xav tias kev pom ib yam txuj ci tseem ceeb li tau pom ib hmos uas tsis muaj kev tsaus ntuj los koj yuav nco ntsoov tau ntev thiab yuav pab koj zaj lus tim khawv muaj zog. Tiam sis tej kev nco txog tej cim thiab tej kev xav tsis thoob uas cov Neeg Nifais pom los tau ploj zuj zus mus. Vim li cas lawv tsis nco qab, thiab tau muaj li cas tom qab lawv tsis nco qab lawm? (saib 3 Nifais 1:22; 2:1–3).
Koj ua dab tsi kom nco qab thiab rov qab ua tim khawv txog tej yam tseeb ntawm sab ntsuj plig? Piv txwv hais tias, xav seb kev sau ntawv txog tej yam uas muaj los ntawm sab ntsuj plig yuav pab koj li cas. Koj yuav ua li cas kom ua tim khawv rau cov uas nyob ze koj kom pab lawv ntseeg?
Kuj saib Amas 5:6; Henry B. Eyring, “O Remember, Remember,” Ensign los sis Liahona, Kaum Ib Hlis Ntuj 2007, 66–69; Neil L. Andersen, “Tsis Lam Tau Kev Ntseeg, Xaiv Muaj Kev Ntseeg,” Ensign los sis Liahona, Kaum Ib Hlis Ntuj 2015, 65–68.
3 Nifais 2:11–12; 3:1–26; 5:24–26
Tus Tswv muab zog rau Nws Haiv Neeg Ntseeg kov yeej tej xwm txheej ntawm sab ntsuj plig.
Nyob hauv peb hnub nyoog no, feem ntau peb tsis tawm tsam tej pawg tub sab uas yuam peb tawm peb lub tsev thiab sau los ua ke hauv ib qho chaw. Tiam sis peb yeej muaj tej xwm txheej ntawm sab ntsuj plig, thiab cov Neeg Nifais zaj no tej zaum muaj tej lus qhia uas yuav pab peb. Xav txog tej yam uas koj kawm tau thaum koj nyeem 3 Nifais 2:11–12 thiab 3:1–26.
Nyob hauv 3 Nifais 5:24–26 peb nyeem txog qhov uas yuav muab tus Tswv cov neeg sau los ua ke hauv hnub nyoog kawg. Tej nqe no qhia dab tsi rau peb txog qhov uas tus Tswv ua li cas kom muab Nws cov neeg sau los ua ke niaj hnub no?
Kuj saib “Worldwide Devotional for Youth: Messages from President Russell M. Nelson and Sister Wendy W. Nelson,” Rau Hli Ntuj 3, 2018, ChurchofJesusChrist.org; “Ixayees—Txoj kev sau Ixayees los ua ke,” Phau Qhia txog Vaj Lug Kub, scriptures.ChurchofJesusChrist.org.
Kuv yog Yexus Khetos ib tug thwj tim.
Koj xav tias kev ua Yexus Khetos ib tug thwj tim txhais li cas? (saib Lus Qhuab Qhia thiab Kev Khi Lus 41:5). Nyob hauv 3 Nifais 5:12–26, Maumoos nres sau ntsiab lus txog cov Neeg Nifais cov ceev xwm txheej thiab tau qhia tias nws yog Yexus Khetos tus thwj tim. Ces, nyob hauv 3 Nifais 7:15–26, nws tau piav txog lwm tus thwj tim txoj kev qhuab qhia, tus yaj saub Nifais. Koj kawm dab tsi hauv ob zaj no uas pab koj to taub tias kev ua Khetos tus thwj tim txhais li cas?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
3 Nifais 3:13–14, 25–26
Cov Neeg Nifais tau ua li cas kom pov hwm lawv tus kheej ntawm lawv cov yeeb ncuab? Peb yuav ua dab tsi rau peb lub tsev kom peb nyab xeeb thiab txais kev pov hwm ntawm kev phem hauv lub ntiaj teb no?
3 Nifais 2:1–3; 6:15–17
Xwv kom pab nej tsev neeg kawm tias Dab Ntxwg Nyoog ua li cas kom ntxias peb, cia li kos duab txog ib lub cev, thiab thaum nej tsev neeg nyeem 3 Nifais 2:1–3 thiab 6:15–17, sau lub cim rau feem ntawm lub cev uas hais. Raws li tej nqe no, Dab Ntxwg Nyoog siv tej kev twg kom ntxias peb tsis nco qab txog Vajtswv thiab ua txhaum?
3 Nifais 4:7–12, 30–33
Cov Neeg Nifais tau ua li cas thaum lawv pom cov tub sab Nkadi-atoos tuaj? Peb tsev neeg kawm dab tsi los ntawm cov Neeg Nifais thaum peb raug tej xwm txheej nyuaj heev? Peb kawm tau dab tsi los ntawm cov Neeg Nifais tej lus tom qab tus Tswv tau pab lawv thaum muaj kev nyuaj heev?
3 Nifais 5:13; Lus Qhuab Qhia thiab Kev Khi Lus 41:5
Cia li nyeem 3 Nifais 5:13 thiab Lus Qhuab Qhia thiab Kev Khi Lus 41:5, thiab sib tham txog qhov uas kev ua Khetos ib tug thwj tim txhais li cas. Tej zaum nej tsev neeg yuav xav sib tham txog tej lub sij hawm thaum lawv ib leeg pom ib leeg ua thwj tim. Yog nej muaj me nyuam yaus, tej zaum nej yuav xav tsim ib daim uas hais tias, “Kuv yog Yexus Khetos ib tug thwj tim,” thiab cia lawv rau daim ntawd thaum twg nej pom lawv coj raws li tus Cawm Seej.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Peb nej tsev neeg muab cov vaj lug kub piv rau lawv tus kheej. Nifais hais tias, “Kuv tau muab tag nrho tej vaj lug kub coj los piv rau peb, kom thiaj muaj nqis rau peb thiab kom peb kawm tau” (1 Nifais 19:23). Xwv kom pab nej tsev neeg muab cov vaj lug kub piv rau lawv tus kheej, tej zaum nej yuav xav caw lawv xav txog tej yam lawv yuav ua yog tias lawv nyob nrog cov ntseeg uas piav txog nyob hauv 3 Nifais 1:4–9. (Saib Teaching in the Savior’s Way, 21.)
Ib Hnub, Ib Hmos, thiab Ib Hnub, los ntawm Walter Rane