1 Thiab nim no, tau muaj tias tau muaj ntau leej uas tau hnov tej lus ntawm Xamuyees, tus Neeg Lamas, uas nws tau hais nyob saum cov ntsa loog ntawm lub nroog. Thiab txhua tus uas tau ntseeg nws tej lus tau tawm mus nrhiav Nifais; thiab thaum lawv tau tuaj thiab nrhiav tau nws lawm lawv tau lees lawv tej txim rau nws thiab tsis kam tsis lees, lawv tau xav ua kev cai raus dej rau tus Tswv.

2 Tiam sis txhua tus uas tsis tau ntseeg Xamuyees tej lus tau npau taws rau nws; thiab lawv tau txawb pob zeb rau nws saum ntsa loog, thiab kuj tau muaj ntau tus tau tua xub rau nws thaum uas nws sawv nyob saum ntsa loog; tiam sis tus Tswv tus Ntsuj Plig tau nyob nrog nws, kawg tias lawv tej pob zeb thiab lawv tej xub tsis raug nws.

3 Nim no thaum lawv tau pom tias lawv tsis muaj peev xwm ua kom raug nws, tau muaj ntau leej ntxiv uas tau ntseeg nws tej lus, kawg tias lawv tau mus cuag Nifais kom muab lawv ua kev cai raus dej.

4 Vim saib seb, Nifais tau tab tom ua kev cai raus dej, thiab tab tom qhia tej uas yuav muaj los yav tom ntej, thiab tab tom qhuab qhia, hais txog txoj kev hloov siab lees txim rau cov neeg, tab tom ua tej cim thiab tej uas xav tsis thoob, ua tej txuj ci tseem ceeb nyob hauv cov neeg, xwv kom lawv yuav paub tias tus Khetos yuav tsum los tsis ntev no—

5 Qhia rau lawv txog tej uas yuav tsum los tsis ntev no, xwv kom lawv yuav paub thiab nco qab txog nyob rau thaum uas tej ntawd los xwv kom lawv yuav paub tias tej ntawd twb xub ua rau lawv paub ua ntej lawm, kom lawv yuav ntseeg; yog li ntawd txhua tus uas tau ntseeg Xamuyees tej lus tau tawm mus cuag nws kom ua kev cai raus dej, vim lawv tau tuaj hloov siab thiab lees lawv tej kev txhaum.

6 Tiam sis feem coob ntawm lawv tau tsis ntseeg Xamuyees tej lus; yog li ntawd thaum lawv pom tias lawv tej pob zeb thiab lawv tej xub tsis raug nws, lawv tau qw nrov rau lawv tej thawj nom peb, hais tias: Txhom tus neeg no thiab muab nws khi, vim saib seb nws muaj dab; thiab vim yog tus dab tej hwj chim uas nyob hauv nws peb tej pob zeb thiab tej xub thiaj tsis raug nws; yog li ntawd cia li muab nws txhom thiab muab nws khi, thiab coj nws khiav mus.

7 Thiab thaum uas lawv nce mus cev lawv tej tes rau nws, saib seb, nws tau dhia saum ntsa loog los, thiab tau khiav tawm ntawm lawv tej av mus, muaj tseeb tiag, twb tau mus rau tom nws lub teb chaws, thiab tau pib qhuab qhia thiab qhia tej uas yuav muaj los yav tom ntej nyob hauv nws cov neeg.

8 Thiab saib seb, nws tsis raug hnov ib zaug ntxiv nyob hauv cov Neeg Nifais lawm; thiab tau muaj li no nyob hauv cov neeg.

9 Thiab li no tau xaus xyoo thib yim caum thiab rau ntawm cov neeg txiav txim txoj kev kav cov Neeg Nifais.

10 Thiab li no kuj tau xaus xyoo yim caum thiab xya ntawm cov neeg txiav txim txoj kev kav, feem coob ntawm cov neeg yeej tseem nyob hauv lawv txoj kev khav thiab txoj kev phem, thiab feem tsawg ua zoo mus rau Vajtswv.

11 Thiab tej yam no los kuj muaj tib yam, nyob rau hauv xyoo yim caum thiab yim ntawm cov neeg txiav txim txoj kev kav.

12 Thiab tau muaj kev txawv txav me me nyob hauv cov neeg tej siab nyiam xwb, tsuas yog cov neeg tau pib ua siab tawv rau kev tsis ncaj, thiab ua tej uas tsis raws li Vajtswv tej lus txib ntau ntxiv thiab ntxiv, nyob rau hauv xyoo yim caum thiab cuaj ntawm cov neeg txiav txim txoj kev kav.

13 Tiam sis tau muaj tias nyob rau hauv xyoo thib cuaj caum ntawm cov neeg txiav txim txoj kev kav, tau muaj tej cim loj muab rau cov neeg, thiab tej uas xav tsis thoob; thiab cov yaj saub tej lus tau pib muaj zuj zus.

14 Thiab tej tim tswv tau tshwm sim rau tej neeg, tej neeg txawj ntse pom, thiab tau tshaj tawm rau lawv txoj moo zoo ntawm txoj kev xyiv fab; li no nyob rau hauv xyoo no tej vajlugkub tau pib muaj zuj zus tuaj.

15 Txawm li ntawd los, tsuas yog tshuav cov ntseeg heev tshaj ntawm lawv, uas nyob hauv cov Neeg Nifais thiab cov Neeg Lamas xwb, tas nrho cov neeg ces tau pib ua lawv tej siab tawv, thiab tau pib cia siab rau lawv tej zog thiab rau lawv tej kev txawj ntse, hais tias:

16 Tej zaum lawv yuav kwv yees raug tej yam, nyob hauv ntau yam; tiam sis saib seb, peb paub tias tas nrho tej hauj lwm loj thiab xav tsis thoob no yeej yuav muaj tsis tau los, uas tau hais lawm.

17 Thiab lawv tau pib soj ntsuam thiab sib cav nyob hauv lawv, hais tias:

18 Nws twb tsis tsim nyog tias yuav muaj ib tug neeg li ib tug Khetos yuav los; yog muaj li ntawd, thiab nws yog Vajtswv Leej Tub, Leej Txiv saum ntuj ceeb tsheej thiab hauv ntiaj teb, li uas tau hais lawm, vim li cas nws ho yuav tsis ua nws tus kheej rau peb pom ib yam li ua rau lawv cov uas nyob tim Yeluxalees pom thiab?

19 Muaj tseeb tiag, vim li cas nws ho yuav tsis ua kom pom nws tus kheej nyob hauv thaj av no li uas nyob rau tim thaj av Yeluxalees thiab?

20 Tiam sis saib seb, peb paub tias qhov no yog ib txoj kev li kev cai phem, uas tau muab cev nqis rau peb los ntawm peb tej yawg koob, ua kom peb yuav ntseeg tej yam uas loj thiab xav tsis thoob uas yuav muaj los, tiam sis tsis nyob hauv peb, tiam sis nyob hauv thaj av uas nyob ncua deb, ib thaj av uas peb tsis paub; yog li ntawd lawv kav tsij ceev kom peb tsis paub txog, vim peb yuav ua tsis tau tim khawv nrog peb tej qhov muag tias lawv muaj tseeb.

21 Thiab lawv yuav ua tej yam txuj ci uas peb tsis txawj to taub, los ntawm txoj kev dag ntxias thiab tej kev txuj ci tes taw ntawm tus dab, uas yuav ceev peb qis ua tej tub qhe rau lawv tej lus, thiab ua tub qhe rau lawv, vim peb vam kom lawv qhia txoj lus rau peb; thiab li no lawv thiaj yuav ceev kom peb tsis paub dab tsi yog peb yuav cia peb tus kheej rau lawv, tas nrho peb lub neej.

22 Thiab tau muaj ntau yam ntxiv uas cov neeg tau xav nyob hauv lawv tej siab, uas yog tej yam ruam thiab tsis muaj nuj nqis; thiab lawv tau raug thab ntau heev, vim Dab Ntxwg Nyoog tau txhib kom lawv ua tsis ncaj tsis tu ncua li; muaj tseeb tiag, nws tau ncig mus ri tej lus paj lus cua thiab tej kev sib cav sib ceg rau saum thaj av tas nrho, xwv kom nws yuav ua tau cov neeg tej siab tawv rau tej uas zoo thiab rau tej uas yuav los.

23 Thiab txawm tias muaj tej cim thiab tej uas xav tsis thoob uas tau ua muaj nyob hauv tus Tswv cov neeg, thiab tej txuj ci tseem ceeb ntau uas lawv tau ua, los Dab Ntxwg Nyoog tseem tuav tau cov neeg tej siab ruaj nyob thoob plaws rau saum thaj av.

24 Thiab li no tau xaus xyoo thib cuaj caum ntawm cov neeg txiav txim txoj kev kav cov Neeg Nifais.

25 Thiab li no tau xaus Hilamas phau ntawv, raws li phau ceev xwm txheej ntawm Hilamas thiab nws cov tub.