1 Thiab nim no tau muaj tias nyob rau hauv xyoo xya caum thiab ob ntawm cov neeg txiav txim txoj kev kav tej kev sib cav sib ceg tau ntau tuaj, kawg tias tau muaj tsov rog thoob plaws txhua thaj av nyob rau hauv cov Neeg Nifais sawv daws.

2 Thiab nws twb yog pab neeg tub sab ntsiag to no uas tau coj rawv txoj hauj lwm ntawm txoj kev puas tsuaj thiab txoj kev phem. Thiab npluav rog no tau muaj nyob tas nrho xyoo ntawd; thiab nyob hauv xyoo xya caum thiab peb los kuj tau muaj nyob tib yam.

3 Thiab tau muaj tias nyob rau hauv xyoo no Nifais tau thov tus Tswv hais tias:

4 Au tus Tswv es, tsis txhob cia cov neeg no raug puas tsuaj los ntawm ntaj; tiam sis Au tus Tswv es, cia kom muaj ib qho kev tshaib nqhis nyob rau hauv thaj av, kom txhib lawv rau txoj kev nco txog tus Tswv lawv tus Vajtswv, thiab tej zaum lawv yuav hloov siab lees txim thiab tig rov los cuag koj.

5 Thiab nws txawm tau muaj raws li Nifais tej lus. Thiab tau muaj ib qho kev tshaib nqhis loj heev nyob rau saum thaj av, nyob rau tag nrho hauv cov Neeg Nifais. Thiab li no nyob hauv xyoo xya caum thiab plaub los txoj kev tshaib nqhis kuj muaj tas zog, thiab txoj hauj lwm puas tsuaj tau tsum los ntawm ntaj tiam sis tau rais los mus mob heev los ntawm txoj kev tshaib nqhis.

6 Thiab txoj hauj lwm puas tsuaj no kuj tau muaj tas zog nyob rau hauv xyoo xya caum thiab tsib. Vim tej av tau raug foom kom nws yuav qhuav qhawv, thiab tsis muaj qoob loo hauv lub caij sau qoob loos; thiab tag nrho tej av tau raug foom, kuj muaj nyob hauv cov Neeg Lamas tib yam nkaus li nyob hauv cov Neeg Nifais, ces lawv raug foom li ntawd ces lawv thiaj tau piam sij txhiab txhiab leej nyob rau hauv tej feem phem heev dua ntawm thaj av.

7 Thiab tau muaj tias cov neeg tau pom tias lawv twb yuav piam sij los ntawm txoj kev tshaib nqhis, thiab lawv tau pib nco qab txog tus Tswv lawv tus Vajtswv; thiab lawv tau pib nco qab txog Nifais tej lus.

8 Thiab cov neeg tau pib thov lawv tej thawj tub txiav txim thiab lawv tej thawj coj, kom lawv yuav hais rau Nifais tias: Saib seb, peb paub tias koj yog ib tug neeg ntawm Vajtswv, thiab yog li ntawd cia li thov tus Tswv peb tus Vajtswv kom nws tig txoj kev tshaib nqhis no ncaim ntawm peb mus, ntshai nyob tsam tas nrho tej lus uas koj tau hais txog peb txoj kev puas tsuaj yuav muaj txhij txhua.

9 Thiab tau muaj tias tej neeg txiav txim tau hais rau Nifais, raws li tej lus uas tau xav kom hais. Thiab tau muaj tias thaum Nifais pom tias cov neeg tau hloov siab lees txim thiab tau txo hwj chim lawv tus kheej los ntawm npua hnab tsaj, nws tau rov thov tus Tswv dua, hais tias:

10 Au tus Tswv es, saib seb cov neeg no tau hloov siab lees txim; thiab lawv tau cheb Nkadi-atoos pab neeg tawm hauv lawv lawm kawg tias lawv tau rais los mus tu noob lawm, thiab lawv tau muab lawv tej tswv yim ntsiag to npog rau hauv av lawm.

11 Nim no, Au tus Tswv es, vim yog lawv txoj kev txo hwj chim no koj puas kam tshem koj txoj kev npau taws mus, thiab cia koj txoj kev npau taws zoo siab rau txoj kev puas tsuaj ntawm cov neeg phem uas koj twb tau ua rau puas tsuaj tas lawm.

12 Au tus Tswv es, koj puas kam tshem koj txoj kev npau taws mus, muaj tseeb tiag, koj txoj kev npau taws heev, thiab ua kom txoj kev tshaib nqhis no tsum nyob rau saum thaj av no.

13 Au tus Tswv es, koj puas kam mloog kuv, thiab ua kom yuav muaj raws li kuv tej lus, thiab tso nag los rau saum lub ntiaj teb, xwv kom nws yuav txi taus nws tej txiv, thiab nws tej noob qoob loo txi rau lub caij sau qoob loo.

14 Au tus Tswv es, koj twb tau mloog kuv tej lus thaum kuv tau hais tias, Cia kom muaj ib qho kev tshaib nqhis, xwv kom tej kab mob ntawm ntaj riam yuav tseg; thiab kuv paub tias koj yeej yuav kam, txawm yog, nyob rau lub sij hawm no, cia li mloog rau kuv tej lus, vim koj tau hais tias: Yog cov neeg no hloov siab lees txim kuv yuav tseg lawv txoj sia.

15 Muaj tseeb tiag, Au tus Tswv es, thiab koj pom tias lawv tau hloov siab lees txim lawm, vim yog txoj kev tshaib nqhis thiab tej kab mob kev nkeeg thiab txoj kev puas tsuaj uas tau los rau lawv.

16 Thiab nim no, Au tus Tswv es, koj puas kam tshem koj txoj kev npau taws mus, thiab sim dua saib lawv puas yuav tu koj? Thiab yog muaj li, Au tus Tswv es, koj mam foom koob hmoov rau lawv raws li koj tej lus uas koj tau hais lawm.

17 Thiab tau muaj tias nyob rau hauv xyoo thib xya caum thiab rau tus Tswv tau tshem nws txoj kev npau taws ntawm cov neeg mus, thiab tau ua kom nag los rau saum lub ntiaj teb, kawg tias nws tau txi txiv nyob rau hauv lub caij uas nws txi txiv. Thiab tau muaj tias nws tau txi noob nyob rau lub caij uas sau qoob loo.

18 Thiab saib seb, cov neeg tau zoo siab thiab qhuas Vajtswv, thiab tas nrho tej uas nyob saum thaj av tau muaj kev zoo siab txhij txhua; thiab lawv tsis tau nrhiav ua kom Nifais puas tsuaj ntxiv lawm, tiam sis lawv tau saib nws ib yam li ib tug yaj saub muaj hwj chim, thiab ib tug neeg ntawm Vajtswv, Vajtswv tau muab hwj chim thiab cai loj rau nws.

19 Thiab saib seb, Lihais, nws tus kwv, los kuj tsis nyob tom nws qab ib qho me me li yog hais txog tej kev ncaj ncees.

20 Thiab li no tau muaj tias cov Neeg Nifais tau pib vam meej dua nyob rau hauv thaj av, thiab tau pib txhim khov lawv tej chaw uas piam lawm, thiab tau coob ntxiv thiab ri tawm, mus txog thaum uas lawv tau npog tas nrho saum thaj av, tas nrho rau sab qaum teb thiab rau sab qab teb, txij li hiav txwv hnub poob mus rau hiav txwv hnub tuaj.

21 Thiab tau muaj tias xyoo xya caum thiab rau tau kawg muaj kev thaj yeeb. Thiab xyoo xya caum thiab xya tau pib muaj kev thaj yeeb; thiab lub koom txoos tau ri mus thoob plaws saum txhua thaj av; thiab feem coob ntawm cov neeg, tsis hais cov Neeg Nifais thiab cov Neeg Lamas, tau zwm rau hauv lub koom txoos; thiab lawv tau muaj kev thaj yeeb heev nyob hauv thaj av; thiab li no tau xaus xyoo xya caum thiab xya.

22 Thiab lawv kuj tau muaj kev thaj yeeb nyob rau hauv xyoo xya caum thiab yim, tsuas yog muaj qho me ntsis kev sib cav sib ceg txog tej yam ntawm txoj lus qhuab qhia uas tau sau los ntawm tej yaj saub xwb.

23 Thiab nyob rau hauv xyoo xya caum thiab cuaj tau pib muaj kev sib ceg ntau. Tiam sis tau muaj tias Nifais thiab Lihais, thiab ntau tus ntawm nkawd cov kwv tij uas tau paub txog tej ntsiab tseeb ntawm txoj lus qhia, tau muaj ntau yam kev tshwm sim txhua hnub, yog li ntawd lawv tau qhuab qhia rau cov neeg, kawg tias lawv tau muab ib qho kawg rau lawv txoj kev sib ceg nyob rau tib xyoos ntawd.

24 Thiab tau muaj tias nyob rau hauv xyoo yim caum ntawm cov neeg txiav txim txoj kev kav cov Neeg Nifais, tau muaj ib co neeg ntxeev siab uas los ntawm cov Neeg Nifais, uas ob peb xyoos ua ntej lawm tau mus rau tom cov Neeg Lamas, thiab tau ris lub npe Neeg Lamas rau saum lawv, thiab kuj tau muaj ib txhia neeg uas yog tej xeeb leej xeeb ntxwv tiag ntawm cov Neeg Lamas, raug txhib kom npau taws los ntawm lawv, los sis los ntawm cov neeg ntxeev siab, yog li ntawd lawv tau pib muaj ib npluav rog nrog lawv tej kwv tij.

25 Thiab lawv tau tua neeg thiab ua lim hiam; thiab tom qab ntawd lawv yuav thim rov qab mus rau hauv tej roob, thiab rau hauv tej hav zoov thiab tej chaw tsis muaj neeg paub, mus nraim lawv tus kheej xwv kom lawv yuav tsis raug nrhiav tau, niaj hnub txais neeg mus ntxiv rau lawv cov, npaum li uas yuav muaj tej neeg ntxeev siab tau mus cuag lawv.

26 Thiab li no thaum txog sij hawm, muaj tseeb tiag, tau ncua tsis ntau xyoo, lawv tau rais los mus ua ib pab tub sab loj heev kawg nkaus li; thiab lawv tau tshawb nrhiav tas nrho Nkadi-atoos tej tswv yim ua hauj lwm ntsiag to; thiab li no lawv tau thiaj rais los mus ua cov neeg tub sab Nkadi-atoos.

27 Nim no saib seb, cov neeg tub sab no tau ua piam sij loj heev, muaj tseeb tiag, tau ua kev puas tsuaj loj heev nyob hauv cov Neeg Nifais, thiab kuj nyob hauv cov Neeg Lamas thiab.

28 Thiab tau muaj tias nws tsim nyog yuav tsum tau muaj ib qho kev nres txoj hauj lwm puas tsuaj no; yog li ntawd lawv tau xa ib pab tub rog uas yog neeg muaj zog mus rau hauv hav zoov thiab mus rau saum tej roob tshawb nrhiav pab tub sab no, thiab rhuav kom lawv puas tsuaj mus.

29 Tiam sis saib seb, tau muaj tias nyob rau tib xyoos ntawd lawv tau raug raws rov qab los rau lawv tej av. Thiab li no tau xaus xyoo thib yim caum ntawm cov neeg txiav txim txoj kev kav cov Neeg Nifais.

30 Thiab tau muaj tias nyob rau thaum pib xyoo thib yim caum thiab ib lawv tau rov qab mus tawm tsam pab tub sab no dua, thiab tau rhuav ntau tus puas tsuaj; thiab lawv kuj tau muaj kev puas tsuaj ntau thiab.

31 Thiab lawv tau raug yuam rov qab tawm ntawm tej hav zoov thiab tawm ntawm tej roob los rau lawv tej av, vim yog txoj kev coob heev ntawm cov neeg tub sab uas tau ua neej nyob rau saum tej roob thiab tej hav zoov.

32 Thiab tau muaj tias li no tau xaus xyoo no. Thiab cov tub sab tseem tau muaj coob ntxiv thiab tau loj muaj zog, kawg tias lawv txheem tau tas nrho cov Neeg Nifais tej tub rog, thiab cov Neeg Lamas li thiab; thiab lawv tau ua kom muaj kev ntshai heev los rau saum cov neeg uas nyob tas nrho saum thaj av.

33 Muaj tseeb tiag, vim lawv tau los xyuas ntau feem ntawm thaj av, thiab tau ua kev puas tsuaj loj rau lawv; muaj tseeb tiag, tau tua ntau leej, thiab tau cab lwm cov mus ua qhev rau hauv hav zoov, muaj tseeb tiag, thiab ntxiv qhov tseem ceeb tshaj yog lawv tej poj niam thiab lawv tej me nyuam.

34 Nim no txoj kev phem loj no, uas tau los rau cov neeg vim yog lawv txoj kev tsis ncaj, tau txhib lawv dua rau txoj kev nco txog tus Tswv lawv tus Vajtswv.

35 Thiab li no tau xaus xyoo yim caum thiab ib ntawm cov neeg txiav txim txoj kev kav.

36 Thiab nyob hauv xyoo yim caum thiab ob lawv tau pib rov hnov qab tus Tswv lawv tus Vajtswv. Thiab nyob rau hauv xyoo yim caum thiab peb lawv tau pib loj muaj zog hauv txoj kev tsis ncaj. Thiab nyob hauv xyoo yim caum thiab plaub lawv tseem tsis tau kho lawv tej kev thiab.

37 Thiab tau muaj tias nyob hauv xyoo yim caum thiab tsib lawv tau loj hlob muaj zog dua ntxiv thiab muaj zog dua ntxiv nyob hauv lawv txoj kev khav theeb, thiab nyob hauv lawv txoj kev phem; thiab li no lawv tau tab tom siav dua rau txoj kev puas tsuaj.

38 Thiab li no tau xaus xyoo yim caum thiab tsib.