Tshooj 4
Cov Neeg Nifais uas ntxeev siab thiab cov Neeg Lamas tau koom tub rog thiab txeeb thaj av Xalahelas—Cov Neeg Nifais txoj kev swb tau los vim yog lawv txoj kev phem—Lub koom txoos tau tsawg zuj zus, thiab cov neeg tau rais los mus qaug zog li cov Neeg Lamas. Kwv yees li 38–30 xyoo ua ntej yug Yexus.
1 Thiab tau muaj tias nyob rau hauv xyoo thib tsib caug thiab plaub tau muaj kev ntxeev siab ntau nyob hauv lub koom txoos, thiab kuj tau muaj ib qho kev sib cav sib ceg nyob hauv cov neeg, kawg tias tau muaj nqaij ntuag ntshav nrog ntau heev.
2 Thiab feem neeg uas ntxeev siab tau raug tua thiab tau raug raws tawm ntawm thaj av, thiab lawv tau mus cuag cov Neeg Lamas tus vaj ntxwv.
3 Thiab tau muaj tias lawv tau rau siab mus txhib cov Neeg Lamas kom mus ua rog tawm tsam cov Neeg Nifais; tiam sis saib seb, cov Neeg Lamas tau ntshai heev, kawg tias lawv tsis kam mloog cov neeg ntxeev siab ntawd tej lus.
4 Tiam sis tau muaj tias nyob hauv xyoo thib tsib caug thiab rau ntawm cov neeg txiav txim txoj kev kav, tau muaj tej neeg ntxeev siab uas tau mus ntawm cov Neeg Nifais mus rau tom cov Neeg Lamas; thiab lawv tau koom nrog lwm cov txhib kom lawv npau taws rau cov Neeg Nifais; thiab lawv tag nrho tau npaj ua rog xyoo ntawd.
5 Thiab nyob rau hauv xyoo thib tsib caug thiab xya lawv tau nqis tuaj ua rog tawm tsam cov Neeg Nifais, thiab lawv tau pib txoj hauj lwm ntawm kev tuag; muaj tseeb tiag, kawg tias hauv xyoo tsib caug thiab yim ntawm cov neeg txiav txim txoj kev kav lawv muaj peev xwm txeeb tau thaj av Xalahelas; muaj tseeb tiag, thiab tag nrho tej av, twb mus txog tej av uas nyob ze thaj av Huaj Vam.
6 Thiab cov Neeg Nifais thiab Maulaunaihas tej tub rog twb tau raug raws mus rau hauv thaj av Huaj Vam.
7 Thiab nyob tod lawv tau tiv thaiv tawm tsam cov Neeg Lamas, txij li hiav txwv sab hnub poob, mus rau sab hnub tuaj; nws yog mus kev taw ib hnub rau cov Neeg Nifais, nyob rau ntawm txoj kab uas lawv tau tiv thaiv thiab lawv tej tub rog tau nyob thaiv lawv lub teb chaws sab pem toj.
8 Thiab li no cov Neeg Nifais uas ntxeev siab, nrog txoj kev pab ntawm cov Neeg Lamas tej tub rog uas coob heev, thiaj txeeb tau tag nrho cov Neeg Nifais tej av uas nyob sab qab teb. Thiab txhua yam no tau ua nyob hauv xyoo tsib caug thiab yim thiab cuaj ntawm cov neeg txiav txim txoj kev kav.
9 Thiab tau muaj tias nyob rau hauv xyoo rau caum ntawm cov neeg txiav txim txoj kev kav, Maulaunaihas thiab nws cov tub rog tau muaj peev xwm txeeb tau ntau feem ntawm thaj av; muaj tseeb tiag, lawv rov txeeb tau ntau lub nroog uas tau poob rau hauv cov Neeg Lamas tes lawm.
10 Thiab tau muaj tias nyob rau hauv xyoo rau caum thiab ib ntawm cov neeg txiav txim txoj kev kav lawv tau muaj peev xwm rov txeeb tau ib nrab ntawm tag nrho lawv tej av.
11 Nim no txoj kev poob loj ntawm cov Neeg Nifais no, thiab txoj kev poob tsam loj uas muaj nyob hauv lawv, yeej yuav tsis muaj yog tsis vim lawv tej kev phem thiab kev qias uas muaj nyob hauv lawv; muaj tseeb tiag, thiab nws kuj muaj nyob hauv lawv cov uas tau ua txuj hais tias nyob hauv Vajtswv lub koom txoos.
12 Thiab nws yog vim txoj kev khav ntawm lawv tej siab, vim yog lawv txoj kev nplua nuj heev, muaj tseeb tiag, nws vim yog lawv txoj kev saib tsis tau cov neeg pluag, tsis kam muab lawv tej zaub mov rau cov neeg tshaib plab, tsis kam muab lawv tej ris tsho rau cov neeg liab qab, thiab ntaus lawv cov kwv tij ua txo hwj chim plhu, ua saib tsis taus tej uas dawb ceev, tsis kam lees tus ntsuj plig ntawm txoj kev uas qhia tej uas yuav muaj los yav tom ntej thiab txoj kev tshwm sim, kev tua neeg, kev ua lim hiam, kev dag, kev ua tub sab, kev deev luag poj luag txiv, sawv sib cav sib ceg, thiab tau khiav mus rau hauv thaj av Nifais, nyob nrog cov Neeg Lamas—
13 Thiab vim yog lawv txoj kev phem loj no, thiab lawv txoj kev khav theeb txog lawv tus kheej lub zog, lawv tau raug tso cia rau lawv tus kheej lub zog; yog li ntawd lawv thiaj tsis vammeej, tiam sis tau raug txom nyem thiab raug ntaus, thiab raug raws khiav ua ntej cov Neeg Lamas, mus txog thaum lawv tau poob yuav luag tas lawv tej av.
14 Tiam sis saib seb, Maulaunaihas tau qhuab qhia ntau yam rau cov neeg vim yog lawv txoj kev tsis ncaj, thiab Nifais thiab Lihais, uas yog Hilamas cov tub, kuj tau qhuab qhia ntau yam rau cov neeg, muaj tseeb tiag, thiab tau qhia tej uas yuav muaj los yav tom ntej ntau yam rau lawv txog lawv tej kev tsis ncaj, thiab yam uas yuav los rau lawv yog lawv tsis hloov siab lees txim txog lawv tej kev txhaum.
15 Thiab tau muaj tias lawv tau hloov siab lees txim, thiab ntau npaum li lawv tau hloov siab lees txim lawv tau pib vam meej.
16 Vim thaum Maulaunaihas tau pom tias lawv tau hloov siab lees txim nws tau rov kam coj lawv ib qho chaw mus rau ib qho chaw, thiab ib lub nroog mus rau ib lub nroog, mus txog thaum uas lawv rov txeeb tau ib nrab ntawm lawv tej ntiag tug thiab ib nrab ntawm tas nrho lawv tej av.
17 Thiab li no tau xaus xyoo thib rau caum thiab ib ntawm cov neeg txiav txim txoj kev kav.
18 Thiab tau muaj tias nyob rau hauv xyoo rau caum thiab ob ntawm cov neeg txiav txim txoj kev kav, Maulaunaihas tsis muaj cuab kav rov txeeb tau tej av ntawm cov Neeg Lamas ntxiv lawm.
19 Yog li ntawd lawv tau tso tseg lawv txoj kev uas yuav txeeb lawv tej av uas tseem tshuav, vim cov Neeg Lamas tau muaj coob heev uas yuav ua mus tsis taus rau cov Neeg Nifais kom muaj hwj chim yeej lawv; yog li ntawd Maulaunaihas tau siv tag nrho nws tej tub rog tswj tuav tej feem uas nws txeeb tau lawm.
20 Thiab tau muaj tias, vim txoj kev coob heev ntawm cov Neeg Lamas cov Neeg Nifais tau ntshai heev, ntshai nyob tsam yuav raug swb, thiab raug tsuj, thiab raug tua, thiab raug puas tsuaj.
21 Muaj tseeb tiag, lawv tau pib nco txog tej kev qhia tej uas yuav muaj los yav tom ntej ntawm Amas, thiab Mauxiyas tej lus; thiab lawv tau pom tias lawv tau yog ib co neeg tawv ncauj, thiab tias lawv tau muab Vajtswv tej lus txib suav tsis muaj nqis kiag li.
22 Thiab tias lawv tau muab Mauxiyas tej kev cai pauv thiab tsuj rau hauv qab xib taws, los sis tej uas tus Tswv tau txib nws kom muab rau cov neeg; thiab lawv tau pom tias lawv tej kev cai tau raug muab hloov tsis ncaj, thiab lawv tau rais los mus ua ib co neeg phem, kawg tias lawv tau phem ib yam li cov Neeg Lamas.
23 Thiab vim yog lawv txoj kev tsis ncaj lub koom txoos tau pib tsawg zuj zus; thiab lawv tau pib tsis ntseeg tus ntsuj plig ntawm txoj kev qhia tej uas yuav muaj los yav tom ntej thiab tus ntsuj plig ntawm txoj kev tshwm sim; thiab Vajtswv tej kev txiav txim tau ntsia ntsoov lawv ntawm lub ntsej muag.
24 Thiab lawv tau pom tias lawv tau rais los mus qaug zog, li lawv cov kwv tij, cov Neeg Lamas, thiab tias tus Tswv tus Ntsuj Plig tsis tsom kwm lawv ntxiv lawm; muaj tseeb tiag, nws tau ncaim ntawm lawv mus vim tus Tswv tus Ntsuj Plig tsis nyob hauv tej tuam tsev uas tsis dawb huv—
25 Yog li ntawd tus Tswv tau tsum tsis tsom kwm lawv los ntawm nws lub hwj chim tseem ceeb thiab piv tsis tau, vim lawv tau poob mus rau hauv ib qhov uas tsis ntseeg thiab phem heev kawg nkaus; thiab lawv tau pom tias cov Neeg Lamas tau muaj coob dua li lawv, thiab yog lawv tseem tsis npuab rau tus Tswv lawv tus Vajtswv ces, lawv yuav tsum piam sij khiav tsis dim.
26 Vim saib seb, lawv tau pom tias cov Neeg Lamas lub zog yeej loj tib yam li lawv lub zog, txawm yog ib tug ntsuas ib tug. Thiab li no lawv tau poob rau hauv txoj kev txhaum loj no; muaj tseeb tiag, li no lawv thiaj tau rais los qaug zog, vim yog lawv txoj kev txhaum, nyob hauv sij hawm ncua tsis tau ntau xyoo.