1 Thiab nim no, kuv cov kwv tij uas kuv hlub es, saib seb, kuv tshaj tawm rau nej tias tsuas yog nej yuav hloov siab lees txim xwb, tsis li ces nej tej vaj tse yuav raug tseg tsis muaj neeg nyob.

2 Muaj tseeb tiag, tsuas yog nej yuav hloov siab lees txim xwb, tsis li ces nej tej poj niam yuav muaj kev txom nyem quaj ntsuag nyob rau lub sij hawm thaum lawv pub mis rau me nyuam mos noj; vim nej yuav sim khiav thiab yuav tsis muaj chaw rau nej nkaum; muaj tseeb tiag, thiab kev txom nyem yuav raug rau lawv cov uas muaj me nyuam, vim lawv yuav xeeb me nyuam thiab khiav tsis tau; yog li ntawd, lawv yuav raug tsuj qaug thiab yuav raug tseg cia piam sij.

3 Muaj tseeb tiag, kev txom nyem yuav raug rau cov neeg uas hu ua cov Neeg Nifais tsuas yog lawv yuav hloov siab lees txim xwb, thaum lawv yuav pom tas nrho tej cim no thiab tej uas xav tsis thoob uas yuav ua kom lawv pom; vim saib seb, lawv tau yog ib co neeg raug xaiv los ntawm tus Tswv; muaj tseeb tiag, nws tau hlub cov Neeg Nifais, thiab kuj tau qhuab ntuas lawv; muaj tseeb tiag, nyob rau lub caij lawv ua tsis ncaj nws tau qhuab ntuas rau lawv vim nws hlub lawv.

4 Tiam sis saib seb kuv cov kwv tij, nws tau ntxub cov Neeg Lamas vim tej uas lawv ua tau phem tsis tu ncua, thiab li no los vim yog txoj kev tsis ncaj ntawm lawv tej yawg koob txoj kev li kev cai. Tiam sis saib seb, txoj kev cawm seej tau los rau lawv dhau los ntawm cov Neeg Nifais txoj kev tshaj qhia; thiab vim li no tus Tswv thiaj tau ua kom lawv txoj sia ntev dua tuaj.

5 Thiab kuv xav kom nej pom tias feem coob ntawm lawv tseem nyob hauv txoj kev ntawm lawv txoj hauj lwm, thiab lawv tau ua zoo mus rau Vajtswv, thiab lawv yeej kam coj nws tej lus txib thiab nws tej kev cai thiab nws tej kev txiav txim mus raws li Mauxes txoj kev cai.

6 Muaj tseeb tiag, kuv hais rau nej, tias feem coob ntawm lawv tab tom ua li no, thiab lawv tab tom xyaum rau siab ntso yam tsis nkees kiag xwv kom lawv yuav coj tau lawv cov kwv tij uas tseem tshuav los paub txog qhov tseeb; yog li ntawd muaj coob tug uas los ntxiv rau lawv cov txhua hnub.

7 Thiab saib seb, nej yeej paub nej lawm, vim nej twb tau pom, tias lawv txhua tus uas tau raug coj los paub txog qhov tseeb, thiab paub txog qhov phem thiab qias ntawm lawv tej yawg koob tej kev li kev cai, thiab raug coj los ntseeg tej vajlugkub dawb huv, muaj tseeb tiag, tej kev qhia tej uas yuav muaj los yav tom ntej ntawm cov yaj saub dawb huv, uas tau muab sau tseg, uas tau coj lawv los rau txoj kev ntseeg ntawm tus Tswv thiab rau txoj kev hloov siab lees txim, uas yog txoj kev ntseeg thiab txoj kev hloov siab lees txim uas coj ib txoj kev pauv siab los rau lawv—

8 Yog li ntawd, txhua tus uas tau los rau qhov no, nej paub nej lawm tias cov no yeej nyob ruaj nrees thiab khov kho hauv txoj kev ntseeg, thiab nyob hauv tej yam uas tau ua rau lawv dim lawm.

9 Thiab nej kuj paub tias lawv tau muab lawv tej cuab yeej ua rog faus, thiab lawv ntshai muab lawv los siv ntshai tsam lawv ho ua txhaum; muaj tseeb tiag, nej pom tau tias lawv ntshai ua txhaum—vim saib seb lawv yuav cia lawv tus kheej kom raug tsuj qaug thiab raug tua los ntawm lawv tej yeeb ncuab, thiab yuav tsis kam tsa lawv tej ntaj tawm tsam lawv, thiab li no los vim yog lawv txoj kev ntseeg Khetos.

10 Thiab nim no, vim lawv txoj kev ruaj khov thaum lawv ntseeg rau tej yam uas lawv ntseeg, rau qhov vim yog lawv txoj kev ruaj nrees thaum lawv raug ua ib zaug lawm kom pom kev, saib seb, tus Tswv yuav foom koob hmoov rau lawv thiab ua kom lawv muaj sia ntev, txawm tias lawv tau muaj tej kev tsis ncaj—

11 Muaj tseeb tiag, txawm tias lawv yuav tso txoj kev ntseeg tseg zuj zus los tus Tswv yuav ua kom lawv muaj sia ntev, mus txog thaum lub caij nyoog los uas tau hais los ntawm peb tej yawg koob, thiab los ntawm tus yaj saub Xinos, thiab ntau lwm cov yaj saub, ntsig txog txoj kev rov txum tim paub qhov tseeb dua ntawm peb cov kwv tij, cov Neeg Lamas—

12 Muaj tseeb tiag, kuv hais rau nej, tias nyob rau lub sij hawm kawg tej kev cog lus ntawm tus Tswv tau raug muab cev rau peb cov kwv tij, cov Neeg Lamas; thiab txawm tias lawv tau muaj tej kev txom nyem ntau, thiab txawm tias lawv yuav raug raws khiav mus rau ub rau no nyob rau saum lub ntiaj teb, thiab raug raws, thiab yuav raug qhuab thiab raug khiav mus rau qhov txhia chaw, tsis muaj chaw nkaum, los tus Tswv tseem yuav hlub tshua rau lawv thiab.

13 Thiab qhov no tau raws li txoj kev qhia tej uas yuav muaj los yav tom ntej, tias lawv yuav raug coj rov qab los rau txoj kev paub tseeb, uas yog txoj kev paub txog lawv tus Txhiv Dim, thiab lawv tus tswv yug yaj tseeb thiab zoo, thiab los nyob nrog nws cov yaj.

14 Yog li ntawd kuv hais rau nej tias, nws yuav zoo rau lawv dua li rau nej tsuas yog nej yuav hloov siab lees txim xwb.

15 Vim saib seb, yog tej hauj lwm loj tau ua rau lawv pom li uas tau ua rau nej pom lawm, muaj tseeb tiag, rau lawv cov uas tau tso txoj kev ntseeg tseg zuj zus vim yog lawv tej yawg koob tej kev li kev cai, ces nej yeej pom tau nej tus kheej tias lawv yeej yuav tsis tso txoj kev ntseeg tseg zuj zus ib zaug li lawm.

16 Yog li ntawd, tus Tswv hais tias: Kuv yuav tsis ua kom lawv puas tsuaj huv tib si, tiam sis kuv yuav ua kom nyob rau hauv kuv hnub pom zoo lawv yuav tig rov qab los cuag kuv dua, tus Tswv hais li.

17 Thiab nim no saib seb, tus Tswv hais, txog cov Neeg Nifais li no: Yog lawv yuav tsis kam hloov siab lees txim, thiab xyaum ua li kuv siab xav, kuv yuav ua kom lawv puas tsuaj huv tib si, tus Tswv hais tias, vim yog lawv txoj kev tsis ntseeg txawm tias tau muaj ntau yam hauj lwm loj uas kuv tau ua nyob rau hauv lawv; thiab tseeb tib yam li tus Tswv muaj txoj sia nyob tej yam no yeej yuav muaj tiag, tus Tswv hais li.