1 Thiab li no peb muaj peev xwm pom tau tias noob neej tej siab yuam kev npaum li cas, thiab txoj kev tsis ruaj khov; muaj tseeb tiag, peb muaj peev xwm pom tias tus Tswv nyob hauv nws txoj kev zoo uas tsis muaj qhov kawg tau foom koob hmoov thiab ua kom vam meej rau cov uas muab lawv txoj kev cia siab rau nws.

2 Muaj tseeb tiag, thiab peb muaj peev xwm pom nyob rau tib lub sij hawm thaum uas nws tau ua nws cov neeg vam meej, muaj tseeb tiag, los ntawm txoj kev ntxiv kom lawv tej qoob loo tom tej liaj teb muaj ntau tuaj, lawv tej pab yaj thiab lawv tej tsiaj txhu, thiab tej kub, thiab tej nyiaj dawb, thiab tas nrho txhua yam muaj nuj nqis huv tib si thiab tej paj ntaub; tau tseg lawv tej sia, thiab tau cawm lawv dim ntawm lawv tej yeeb ncuab tes; tau ua kom lawv tej yeeb ncuab tej siab muag xwv kom lawv yuav tsis tshaj tawm tsov rog tawm tsam lawv; muaj tseeb tiag, thiab qhov kawg, tau ua txhua yam rau txoj kev tau zoo nyob thiab txoj kev zoo siab ntawm nws cov neeg; muaj tseeb tiag, ces tom qab ntawd ho yog lub caij uas lawv ua lawv tej siab tawv, thiab hnov qab tus Tswv lawv tus Vajtswv, thiab muab Tus Dawb Huv tsuj rau hauv lawv qab xib taws—muaj tseeb tiag, thiab ua li no los vim yog txoj kev yooj yim hauv lawv, thiab lawv txoj kev vam meej heev.

3 Thiab li no peb pom tias yog tus Tswv tsis qhuab nws cov neeg nrog ntau yam kev txom nyem, muaj tseeb tiag, yog nws tsis xyuas lawv nrog txoj kev tuag thiab nrog txoj kev txhawj ntshai, thiab kev tshaib nqhis thiab nrog txhua yam kev mob nkeeg, ces lawv yeej yuav tsis nco qab nws.

4 Au cas tib neeg yuav ruam ua luaj, thiab tsis tau kam kiag, thiab phem ua luaj, thiab ua zoo li dab, thiab yuav nrawm ua luaj mus ua tej tsis ncaj, thiab qeeb ua luaj mus ua qhov zoo, muaj tseeb tiag, cas yuav nrawm ua luaj mus mloog tus dab tej lus, thiab nruab lawv tej siab rau saum tej khoom uas tsis muaj nuj nqis ntawm lub ntiaj teb!

5 Muaj tseeb tiag, cas yuav nrawm ua luaj rau txoj kev khav theeb; muaj tseeb tiag, cas yuav nrawm ua luaj mus khav txiv, thiab ua txhua yam uas tsis ncaj; thiab cas lawv yuav nco txog tus Tswv lawv tus Vajtswv qeeb ua luaj, thiab cuab pob ntseg rau nws tej lus ntuas, muaj tseeb tiag, cas yuav qeeb ua luaj thaum taug txoj kev txawj ntse!

6 Saib seb, lawv tsis xav kom tus Tswv lawv tus Vajtswv, tus uas tau tsim lawv, yuav saib xyuas thiab kav lawv; txawm hais tias nws txoj kev uas zoo heev thiab nws txoj kev hlub tshua tau muaj rau lawv los, lawv tseem tau suav tsis muaj nqis kiag rau nws tej lus qhuab ntuas, thiab lawv tsis xav kom nws ua lawv tus coj kev.

7 Au cas noob neej txoj kev tsis muaj nqi yuav loj ua luaj; muaj tseeb tiag, lawv twb tsis muaj nqi li tej hmoov av ntawm lub ntiaj teb.

8 Vim saib seb, tej hmoov av ntawm lub ntiaj teb tseem txawj txav mus rau ub rau no, txawj sib faib kom ua ob sab, thaum raug txib los ntawm peb tus Vajtswv uas loj thiab kav ib txhis.

9 Muaj tseeb tiag, saib seb nyob ntawm nws lub suab tej me nyuam roob thiab tej roob twb tshee thiab qeeg nkaws.

10 Thiab los ntawm lub hwj chim ntawm nws lub suab lawv tawg ntsoog ntxaws, thiab rais los mus ua tiaj, muaj tseeb tiag, zoo tib yam li ib lub hav.

11 Muaj tseeb tiag, los ntawm lub hwj chim ntawm nws lub suab tas nrho lub ntiaj teb twb co qeg txoog;

12 Muaj tseeb tiag, los ntawm lub hwj chim ntawm nws lub suab, lub hauv paus muaj zog twb qeeg, mus ti nkaus hauv plawv.

13 Muaj tseeb tiag, thiab yog nws hais rau lub ntiaj teb tias—Txav—nws yeej raug txav.

14 Muaj tseeb tiag, yog nws hais rau lub ntiaj teb tias—Koj yuav tsum mus rov qab, kom nws yuav ua kom hnub ntev ntau teev—nws yeej yuav ua li ntawd;

15 Thiab li no, raws li nws lo lus lub ntiaj teb mus rov qab, thiab nws tshwm rau tib neeg pom tias lub hnub sawv nyob twj ywm; muaj tseeb tiag, yeej yog li ntawd; vim yeej tseeb tias lub ntiaj teb txav thiab tsis yog lub hnub.

16 Thiab saib seb, kuj tib yam, yog nws hais rau cov dej uas tob heev tias—Koj cia li qhuav mus—nws yeej yuav ua li ntawd.

17 Saib seb, yog nws hais rau lub roob no tias—Koj cia li sawv, thiab los tim no thiab vau rau saum lub nroog ntawd, kom nws yuav raug muab faus—saib seb nws yeej yuav ua li ntawd.

18 Thiab saib seb, yog ib tug neeg zais ib qho nyiaj txiag rau hauv av, thiab tus Tswv yuav hais tias—Cia nws raug foom tsis zoo, vim yog txoj kev tsis ncaj ntawm nws tus uas tau muab zais cia lawm—saib seb, nws yeej yuav raug foom tsis zoo.

19 Thiab yog tus Tswv yuav hais tias—Koj raug foom tsis zoo, xwv kom yuav tsis muaj leej twg yuav nrhiav tau koj txij li lub sij hawm no mus lawm yav tom ntej thiab mus ib txhis li—saib seb, yuav tsis muaj leej twg tau nws txij li ntawd mus thiab ib txhis li.

20 Thiab saib seb, yog tus Tswv yuav hais rau ib tug neeg hais tias—Vim yog koj txoj kev tsis ncaj, koj yuav raug foom tsis zoo mus ib txhis—nws yeej ua li ntawd.

21 Thiab yog tus Tswv yuav hais tias—Vim yog koj txoj kev tsis ncaj koj yuav raug txiav tawm ntawm kuv xub ntiag mus—nws yeej yuav ua kom muaj tau li ntawd.

22 Thiab kev txom nyem yuav raug rau nws tus uas nws yuav hais li no rau, vim nws yuav raug rau nws tus uas yuav ua tsis ncaj, thiab nws yuav raug cawm tsis tau; yog li ntawd, vim qhov no, kom tib neeg yuav dim tau, txoj kev hloov siab lees txim thiaj tau raug muab tshaj tawm.

23 Yog li ntawd, lawv cov uas yuav hloov siab lees txim thiab mloog rau lub suab ntawm tus Tswv lawv tus Vajtswv tau koob hmoov; vim cov no yog lawv cov uas yuav raug cawm dim.

24 Thiab thov Vajtswv pub, nyob hauv nws txoj kev muaj puv npo loj, xwv kom tib neeg yuav raug coj los mus rau txoj kev hloov siab lees txim thiab tej hauj lwm zoo, xwv kom lawv yuav raug txum tim zog rau zog, raws li lawv tej hauj lwm.

25 Thiab kuv xav kom neeg sawv daws yuav raug cawm dim. Tiam sis peb tau nyeem lawm tias nyob rau hauv hnub loj thiab kawg ntawd yeej yuav muaj ib txhia uas yuav raug muab ntiab tawm, muaj tseeb tiag, cov uas yuav raug ntiab tawm ntawm tus Tswv xub ntiag mus;

26 Muaj tseeb tiag, cov uas yuav raug xa mus rau ib qho chaw uas muaj kev nyuaj siab tsis txawj kawg, tiav loo tej lus uas hais tias: Lawv cov uas tau ua zoo lawm yuav tau muaj txoj sia kav ib txhis; thiab lawv cov uas tau ua phem yuav tau muaj txoj kev raug txim kav ib txhis. Thiab nws yeej yog li no. Amees.