1 Thiab tau muaj tias tau muaj ib qho kev sib faib nyob hauv cov neeg, kawg tias lawv tau sib faib rau ub thiab rau no thiab lawv tau nyias mus nyias lawm, cia Nifais nyob tib leeg, thaum uas nws tseem sawv hauv lawv nruab nrab.

2 Thiab tau muaj tias Nifais tau mus rau tom nws lub tsev, xav ntsoov hauv siab rau tej yam uas tus Tswv tau qhia rau nws paub.

3 Thiab tau muaj tias thaum nws tseem tab tom xav ntsoov tuaj hauv siab li no—tau txom nyem siab heev vim yog txoj kev phem ntawm cov Neeg Nifais, lawv tej hauj lwm ntsiag to ntawm kev tsaus ntuj, thiab lawv tej kev tua neeg, thiab lawv tej kev lim hiam, thiab tas nrho txhua yam kev tsis ncaj—thiab tau muaj tias thaum nws tseem tab tom xav ntsoov li no rau hauv nws siab, saib seb, ib lub suab tau los hais rau nws tias:

4 Koj tau koob hmoov, Nifais, rau tej yam uas koj tau ua lawm; vim kuv tau pom txoj kev uas koj tau tshaj tawm txoj lus yam tsis nkees li, qhov uas kuv tau muab rau koj, muab rau cov neeg no. Thiab koj tseem tsis tau ntshai lawv, thiab tsis tau nrhiav koj tus kheej txoj sia, tiam sis tau nrhiav yam uas kuv siab nyiam, thiab tau coj li kuv tej lus txib.

5 Thiab nim no, vim koj tau ua li no yam tsis nkees kiag, saib seb, kuv yuav foom koob hmoov rau koj mus ib txhis; thiab kuv yuav ua kom koj muaj hwj chim hais lus thiab ua taus, hauv txoj kev ntseeg thiab hauv kev ua hauj lwm; muaj tseeb tiag, kom txhua yam tsav raug ua tiav los raws li koj tej lus, vim koj yeej yuav tsis thov yam uas tsis raws li kuv siab nyiam.

6 Saib seb, koj yog Nifais, thiab kuv yog Vajtswv. Saib seb, kuv tshaj nws tawm rau koj nyob ntawm kuv tej tim tswv xub ntiag, tias koj yuav muaj hwj chim rau saum cov neeg no, thiab yuav foom kom lub ntiaj teb muaj kev tshaib nqhis, thiab kev mob aws, thiab kev puas tsuaj, raws li txoj kev phem ntawm cov neeg no.

7 Saib seb, kuv muab lub hwj chim rau koj, tias yam dab tsi uas koj yuav khi nyob hauv ntiaj teb yuav raug khi nyob saum ntuj ceeb tsheej; thiab yam dab tsi uas koj yuav daws kom xoob nyob hauv ntiaj teb yuav raug daws kom xoob nyob saum ntuj ceeb tsheej; thiab li no koj yuav muaj hwj chim nyob hauv cov neeg no.

8 Thiab li no, yog koj yuav hais rau lub tuam tsev no kom ntuag rhe ua ob sab, nws yeej yuav ua li ntawd.

9 Thiab yog koj yuav hais rau lub roob no tias, koj cia li qis los thiab cia li tiaj, nws yeej yuav ua li ntawd.

10 Thiab saib seb, yog koj hais tias Vajtswv yuav foom cov neeg no, nws yeej yuav muaj li ntawd.

11 Thiab nim no saib seb, kuv txib koj, tias koj cia li mus thiab tshaj tawm rau cov neeg no, tias tus Tswv Vajtswv, tus uas muaj Hwj Chim loj kawg nkaus hais li no tias: Tsuas yog nej hloov siab lees txim xwb tsis li ntawd nej yuav raug foom tsis zoo, mus rau txoj kev puas tsuaj.

12 Thiab saib seb, nim no tau muaj tias thaum tus Tswv tau hais tej lus no rau Nifais tas, nws tau nres thiab tsis tau mus rau tom nws lub tsev, tiam sis tau rov qab mus rau tom cov neeg coob coob uas tau khiav ri niab mus rau ib ncig saum thaj av, thiab tau pib tshaj tawm rau lawv txog tus Tswv txoj lus uas tau hais rau nws lawm, ntsig txog lawv txoj kev puas tsuaj yog lawv tsis kam hloov siab lees txim.

13 Nim no saib seb, txawm hais tias Nifais tau ua tej txuj ci tseem ceeb uas qhia lawv txog txoj kev tuag ntawm tus thawj tub txiav txim los, lawv tseem tau ua lawv tej siab tawv thiab tau tsis kam mloog tus Tswv tej lus.

14 Yog li ntawd Nifais tau tshaj tawm tus Tswv txoj lus rau lawv, hais tias: Tus Tswv hais li no tias, tsuas yog nej yuav hloov siab lees txim xwb, tsis yog li ntawd nej yuav raug foom tsis zoo mus rau txoj kev puas tsuaj.

15 Thiab tau muaj tias thaum Nifais tau tshaj tawm txoj lus rau lawv tas lawm, saib seb, lawv tseem ua lawv tej siab tawv qhawv thiab tsis kam mloog nws tej lus; yog li ntawd lawv tau hais lus phem nkaug nws, thiab tau yuav cev lawv tej tes txhom nws xwv kom lawv yuav tau muab nws pov rau hauv qhov taub.

16 Tiam sis saib seb, Vajtswv lub hwj chim tau nrog nws nyob, thiab lawv tsis muaj cuab kav txhom nws kom tau muab nws pov rau hauv qhov taub, vim tus Ntsuj Plig tau coj thiab nqa nws tawm ntawm nruab nrab ntawm lawv mus.

17 Thiab tau muaj tias li no nws tau mus ntawm ib pab neeg rau ib pab neeg nyob hauv tus Ntsuj Plig, tshaj tawm Vajtswv txoj lus, mus txog thaum nws tau tshaj tawm txoj lus rau lawv txhua tus, los sis tau xa xov tawm mus rau cov neeg sawv daws.

18 Thiab tau muaj tias lawv tseem tsis tau kam mloog nws tej lus; thiab tau pib muaj tej kev sib cav sib ceg, kawg tias lawv tau raug sib faib lawv tus kheej thiab tau pib ib leeg tua ib leeg nrog ntaj.

19 Thiab li no tau xaus xyoo thib xya caum thiab ib ntawm cov neeg txiav txim txoj kev kav cov Neeg Nifais.