“Yim Hli Ntuj 3–9. Amas 43–52: ‘Sawv Khov Kho Muab Siab rau Ntseeg Khetos,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Yim Hli Ntuj 3–9. Amas 43–52,” Los, Nrog Kuv Mus—Rau Ib Leeg thiab Tsev Neeg: 2020
Rau cov Koob Hmoob ntawm Kev Ywj Pheej, los ntawm Scott M. Snow
Yim Hli Ntuj 3–9
Amas 43–52
“Sawv Khov Kho Muab Siab rau Ntseeg Khetos”
Tej zaum koj yuav xav tias tej yam nyob hauv Amas 43–52 tsis tshua muaj nqis rau koj tus kheej. Tiam sis, ib yam li lwm nqe vaj lug kub, tus Tswv muaj ib zaj xov rau koj. Cia li thov Vajtswv kom paub yog dab tsi.
Sau Ntawv txog Koj tej Kev Tshoov Siab
Thaum peb nyeem tej lus no nyob hauv Amas tshooj 43—“Thiab nim no kuv rov qab hais ib zaj uas hais txog tej kev ua rog ntawm cov Neeg Nifais thiab cov Neeg Lamas”—peb yeej xav paub vim li cas Maumoos tau hais tej zaj dab neeg txog kev ua tsov ua rog thaum nws tsis muaj chaw hauv cov phiaj (saib Maumoos cov Lus 1:5). Peb yeej muaj kev tsov kev rog ntau hauv hnub nyoog kawg no, tiam sis nws tej lus muaj nqis heev tsis yog vim nws piav txog tej lub tom txwv thiab kev nyuaj siab uas los ntawm kev tsov kev rog xwb. Nws tej lus kuj npaj peb lub siab rau kev tsov kev rog uas “peb txhua tus sawv ua rog” (Cov Nkauj Qhuas Vajtswv, zaj 116), yog kev tsov kev rog uas peb txhua hnub tawm tsam kev phem cov tub rog. Kev tsov rog no los muaj tiag tiag, thiab qhov tiav yuav hloov peb txoj sia nyob mus ib txhis. Ib yam li cov Neeg Nifais, peb “muaj ib qho uas zoo dua txhawb [peb] zog” uas yog “peb tus Vajtswv, peb txoj kev teev ntuj, thiab txoj kev ywj pheej, thiab peb txoj kev thaj yeeb, peb [tsev neeg].” Maulaunais hu qhov no ua “lub hom phiaj ntawm cov ntseeg Khetos,” uas yog lub hom phiaj uas peb txhawb nqa hnub no (Amas 43:45; 46:12, 16).
Tej lub Tswv Yim Kawm Vaj Lug Kub ntawm Yus Ib Leeg
Kev ua rog hauv Phau Ntawv Maumoos qhia kuv txog kuv tej kev ua rog tawm tsam kev phem.
Kev nyeem txog kev ua tsov ua rog nyob hauv cov Neeg Nifais thiab cov Neeg Lamas tej zaum yuav muaj nqis ntxiv rau koj yog tias koj sim muab piv rau koj tej kev ua tsov ua rog ntawm sab ntsuj plig. Thaum koj nyeem Amas 43–52, cia li saib tias cov Neeg Nifais tau ua li cas kom lawv ua taus (los sis ua tsis taus zoo). Ces cia li xav seb koj yuav siv tej yam uas koj kawm li cas kom pab koj yeej koj tej kev ua tsov ua rog ntawm sab ntsuj plig. Thaum koj kawm nqe vaj lug kub li muaj nram qab no, cia li sau koj tej kev xav txog qhov uas koj yuav coj raws li cov Neeg Nifais tus yam ntxwv li cas:
-
Amas 43:19 Cov Neeg Nifais tau npaj cov cuab yeej tiv rog. (Kuv txawj sim npaj kuv tus kheej yog kuv rau cov cuab yeej tiv rog ntawm sab ntsuj plig.)
-
Amas 43:23–24 Lawv xav tau tus yaj saub tej lus coj lawv kev.
Saib cov Neeg Lamas thiab cov Neeg Nifais uas ntxeev siab tau sim kov yeej cov Neeg Nifais. Tej yam no pab ceeb toom koj txog qhov uas tus yeeb ncuab yuav ua li cas kom tawm tsam koj. Thaum koj kawm, cia li sau ntawv txog tej yam uas Dab Ntxwg Nyoog yuav ua kom tawm tsam koj li no:
-
Amas 43:8 Xelaheenas xav kom nws cov neeg npau taws nws thiaj li yuav muaj hwj chim tswj hwm lawv. (Thaum kuv npau taws rau lwm tus neeg, kuv cia Dab Ntxwg Nyoog muaj hwj chim kov yeej kuv.)
-
Amas 43:29 Cov Neeg Lamas xav coj cov Neeg Nifais ua lawv cev qhev.
Minerva•K. Teichert (1888–1976), Tiv Thaiv cov Neeg Nifais lub Nroog, 1935, pleev roj rau pob zeb, 36 x 48 inches. Brigham Young University Museum of Art.
Thaum kuv rau siab ua neeg zoo li Maulaunais, kuv yuav hloov los ua zoo li tus Cawm Seej.
Koj puav xav hloov los ua neeg zoo li tus Cawm Seej ntxiv thiab tsis cia tus yeeb ncuab muaj hwj chim hauv koj lub neej? Ib txoj kev uas koj ua taus li no yog kev ua raws li cov lus qhia nyob hauv Amas 48:17 uas hais kom peb ua neeg “zoo li Maulaunais.” Cia li tsom ntsoov rau Maulaunais tej cwj pwm thiab tej yam nws ua nyob hauv Amas 43–52 tiam sis qhov tseem ceeb yog nyob hauv 46:11–28 thiab 48:7–17. Muaj dab tsi uas tshoov koj lub siab txog tus “neeg uas muaj hwj chim” no? Tej cwm pwm thiab tej yam yus ua zoo li nws ua li cas ho ua rau tus dab phem tsis muaj hwj chim hauv koj lub neej? Cia li xav seb koj txais kev tshoov siab twg kom coj raws li Maulaunais tus yam ntxwv thiab hloov los ua zoo li tus Cawm Seej.
Dab Ntxwg Nyoog dag ntxias peb ib qho me me dhau ib qho me me.
Dab Ntxwg Nyoog paub tias peb coob tsis kam ua txhaum loj heev los sis ntseeg kev dag loj heev. Yog li ntawd, nws dag me me thiab ntxias me me kom coj peb ua txhaum me me—ua txhaum npaum li nws xav tias peb kam ua. Nws ua li no mus txog thaum peb twb mus deb ntawm txoj kev ua neej ncaj ncees.
Peb yeej kawm txog tus txheej txheem no nyob hauv zaj uas hais txog Amalikhaiyas txoj kev ntxias Lihoothis, nyob hauv Amas 47. Thaum koj kawm, cia li xav seb Dab Ntxwg Nyoog tab tom ua li cas kom ntxias koj, raws li Txwj Laug Robert D. Hales piav:
“Tus Amalikhaiyas uas ntxeev siab tau hais kom Lihoothis ‘los rau nram taw roob’ thiab ntsib nws hauv lub hav. Tiam sis thaum Lihoothis tawm chaw siab los, nws raug lom ‘’me zuj zus mus txog thaum nws tuag, ces nws pab tug rob poob los rau Amalikhaiyas txhais tes (saib Amas 47). Los ntawm kev sib cav sib ceg, muaj ib txhia neeg uas ntxias peb tawm chaw siab los. Chaw siab yog qhov chaw uas muaj txoj kev kaj. … Yog chaw uas muaj kev thaj yeeb” (“Christian Courage: The Price of Discipleship,” Ensign los sis Liahona, Kaum Ib Hlis Ntuj 2008, 74).
Kuj saib 2 Nifais 26:22; 28:21–22.
Kev koom siab ua rau peb nyab xeeb.
Nyob hauv tej xwm txheej uas sau txog nyob hauv Amas 50, yeej ua rau yus xav tias cov Neeg Lamas tsis muaj peev xwm kov yeej cov Neeg Nifais. Cov Neeg Nifais tej cuab yeej tiv rog, tej chaw thaiv rog, thiab tej kev koom siab mas ua rau lawv xav tias tsis muaj leej twg muaj peev xwm kov yeej (saib Amas 49:28–30 thiab 50:17–20). Tiam sis cov Neeg Lamas twb yeej lawv tej lub nroog ntau—tsis hais tej uas Maulaunais tau pab thaiv rog (saib Amas 51:26–27). Vim li cas muaj li no? Nrhiav tej lus teb thaum koj nyeem tej tshooj no (qhov tseem ceeb saib Amas 51:1–12). Cia li xav seb zaj no muaj tej lus ceeb toom twg rau koj thiab koj tsev neeg.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Amas 45:2–8
Yog nej nyeem tej nqe no ua ke, tej zaum yuav ua rau nej tsev neeg xav sib tham txog txoj moo zoo ib tug rau ib tug, ib yam li Amas hais rau Hilamas.
Amas 46:12–22
Daim chij ntawm kev ywj pheej tau tshoov cov Neeg Nifais lub siab kom ua raws li Vajtswv cov lus txib thiab tiv thaiv lawv txoj kev ntseeg. Muaj dab tsi uas ua rau peb xav ua zoo ib yam? Tej zaum nej tsev neeg yuav xav tsim lawv daim chij ntawm kev ywj pheej—ib daim chij uas muaj tej lus los sis cov duab uas ua rau nej nco qab ua raws li Vajtswv cov lus txib txhua hnub.
Amas 48:7–9; 49:1–9; 50:1–6
Thaum nej tsev neeg nyeem txog cov Neeg Nifais tej chaw thaiv rog, tej zaum nej yuav xav sib tham seb nej kho nej lub tsev kom ruaj nrees tiv thaiv ntawm tus yeeb ncuab. Tej zaum cov me nyuam yuav nyiam siv tej khoom xws li rooj thiab tej daim pam ua ib lub tsev thaiv rog, los sis lawv yuav nyiam kos duab txog qhov uas lawv xav tias cov Neeg Nifais tej kev thaiv rog zoo li cas.
Amas 51:1–12
Tej nqe no qhia dab tsi rau peb txog qhov uas peb tsev neeg yuav raug li cas thaum peb sib cav sib ceg? Peb yuav ua li cas kom koom siab koom ntsws ntxiv?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Nug tej yam thaum koj kawm. Thaum koj kawm vaj lug kub, nug koj tus kheej txog tej yam uas yuav pab koj xav txog qhov uas koj ua neej zoo li cas raws li tej yam koj nyeem.
Daim Chij ntawm Kev Ywj Pheej, los ntawm Larry Conrad Winborg