“Yim Hli Ntuj 10–16. Amas 53–63: ‘Nws lub Hwj Chim Ua Txuj Ci Tseem Ceeb Yuav Tsom Kwm,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Yim Hli Ntuj 10–16. Amas 53–63,” Los, Nrog Kuv Mus—Rau Ib Leeg thiab Tsev Neeg: 2020
Ob Txhiab tug Tub Rog Hluas, los ntawm Arnold Friberg
Yim Hli Ntuj 10–16
Amas 53–63
“Nws lub Hwj Chim Ua Txuj Ci Tseem Ceeb Yuav Tsom Kwm”
Tej zaj nyob hauv Amas 53–63 yuav pab koj pom tias muaj li cas thaum ua neej raws li txoj moo zoo los sis muab txoj moo zoo tso tseg. Thaum koj nyeem Amas 53–63, cia li sau ntawv txog tej kev tshoov siab uas koj txais thiab xav txog tej yam uas koj ua tau kom ua raws li qhov tseeb.
Sau Ntawv txog Koj tej Kev Tshoov Siab
Piv rau cov Neeg Lamas tej pawg tub rog, Hilamas “pawg tub rog uas tsawg tsawg” (Amas 56:33) uas muaj 2,000 tug Neeg Nifais cov tub hluas ntshe yeej tsis tau cov Neeg Lamas. Tsis yog lawv muaj tsawg tsawg xwb, Hilamas cov tub rog “lawv txhua tus tseem hluas heev,” thiab “lawv ib txwm tsis tau sib ntaus sib tua dua li” (Amas 56:46–47). Peb cov uas xav tias tej lub sij hawm muaj cov yeeb ncuab suav tsis txheeb thiab muaj coob dhau thaum peb tawm tsam Dab Ntxwg Nyoog thiab cov phem hauv lub ntiaj teb hauv hnub nyoog kawg no los tej zaum peb yuav paub lawv tau xav li cas.
Tiam sis Hilamas pawg tub rog muaj tej yam uas cov Neeg Lamas tsis tau muaj, tej uas tsis yog neeg coob los sis tej txuj ci ua rog. Lawv tau xaiv Hilamas, ib tug yaj saub, coj lawv (Amas 53:19); “lawv niam tau qhia lawv hais tias, yog lawv ntseeg, Vajtswv yuav cawm lawv dim” (Amas 56:47); thiab “lawv txoj kev ntseeg loj heev rau tej uas lawv niam tau qhia kom lawv ntseeg.” Yog li ntawd, “Vajtswv lub hwj chim ua txuj ci tseem ceeb” tau pov hwm lawv (Amas 57:26). Txawm yog lawv txhua tus raug mob thiab ua rog, “lawv twb tsis muaj ib tug uas tuag li” (Amas 57:25). Yog li ntawd thaum peb raug mob ntawm sab ntsuj plig, peb yuav tsum ua siab loj—vim zaj uas peb kawm los ntawm Hilamas pawg tub rog yog qhov uas “muaj ib tug Vajtswv uas ncaj, thiab tus uas ntseeg, ces nws lub hwj chim ua txuj ci tseem ceeb yuav tsom kwm tus ntawd” (Amas 57:26).
Tej lub Tswv Yim Kawm Vaj Lug Kub ntawm Yus Ib Leeg
Amas 53:10–22; 56:43–48, 55–56; 57:20–27; 58:39–40
Thaum kuv muab siab rau ntseeg Vajtswv, Nws yuav foom pub Nws lub hwj chim zoo kawg nkaus rau kuv.
Tej zaj uas hais txog tej txuj ci tseem ceeb zoo li Hilamas cov tub rog hluas tej zaum nyuaj rau peb to taub vim tias ntshe tsis ntxim muaj tseeb. Tiam sis muaj tej zaj zoo li no nyob hauv vaj lug kub kom qhia peb tias thaum peb muaj kev ntseeg, Vajtswv ua tau tej txuj ci tseem ceeb hauv peb lub neej. Thaum koj nyeem txog cov tub rog hluas hauv tej nqe nram qab no, nrhiav tej yam uas lawv tau ua kom muab siab rau ntseeg Vajtswv, muaj dab tsi uas ua rau lawv txoj kev ntseeg muaj zog, thiab muaj dab tsi uas tau qhib kev rau tej txuj ci tseem ceeb no: Amas 53:10–22; 56:43–48, 55–56; 57:20–27; thiab 58:39–40. Daim phiaj no qhia txob ib txoj kev rau koj sau ntawv txog tej yam uas koj nrhiav tau.
|
Hilamas cov tub rog tej cwj pwm: | |
|
Tau qhia dab tsi rau lawv: | |
|
Lawv tau ua li cas: | |
|
Cov koob hmoov lawv tau txais: |
Tom qab koj kawm tej nqe no, koj txais kev tshoov siab li cas kom koj muab siab rau ntseeg?
Hilamas tau hais txog cov niam tsev txoj kev txhawb cov tub rog hluas txoj kev ntseeg muaj zog (saib Amas 56:47–48; 57:20–27). Koj tsev neeg thiab lwm tus tau ua li cas kom pab txhawb koj txoj kev ntseeg kom muaj zog? Koj yuav ua li cas kom pab koj tsev neeg thiab phooj ywg txoj kev ntseeg muaj zog ntxiv?
Lawv Tau Ntseeg los ntawm Joseph Brickey
Kuv xaiv tau kom xav zoo txog lwm tus thiab tsis txhob tu siab.
Hilamas thiab Pehaulas nkawd ob leeg muaj tej yam uas tsim nyog ua rau lawv tu siab. Hilamas tsis tau txais kev txhawb nqa rau nws tej pawg tub rog, thiab Maulaunais liam Pehaulas hais tias nws tsis pub kev txhawb nqa ntawd (saib Amas 58:4–9, 31–32; 60). Koj xav li cas txog tej yam uas lawv tau ua nyob hauv Amas 58:1–12, 31–37 and Amas 61? Koj yuav ua li cas kom coj raws li nkawd tus yam ntxwv thaum koj muaj xwm txheej li ntawd?
Txwj Laug David A. Bednar qhia tias: “Yeej yuav muaj ib txoj kev thiab ib lub sij hawm, thaum ib tug hauv lub Koom Txoos no yuav ua los sis hais ib yam dab tsi uas ua rau nej tu siab. Yeej yuav muaj li no rau peb txhua leej txhua tus—thiab yeej yuav tsis muaj ib zaug xwb. … Peb yeej tswj hwm tsis tau lwm tus tej yam ntxwv thiab tej kev xav. Tiam sis, peb yeej muaj peev xwm xaiv tias peb yuav ua li cas. Thov nco ntsoov tias peb yog tib neeg uas muaj kev ywj siab coj ncaj ncees, thiab peb xaiv tau kom tsis txhob tu siab” (“And Nothing Shall Offend Them,” Ensign los sis Liahona, Kaum Ib Hlis Ntuj 2006, 91).
Kuj saib Paj Lug 16:32; Maulaunais 7:45; David A. Bednar, “Muaj lub Siab Mos Siab Muag thiab Txo Siab Txo Ntsws,” Ensign los sis Liahona, Tsib Hlis Ntuj 2018, 30–33.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Amas 53:10–17
Cov Eethais-Nifais-Lihais tau khi lus tias lawv yuav tsis ua kom ntshav nrog. Peb tau khi lus rau Vajtswv tias peb yuav ua li cas? Peb nyeem dab tsi nyob hauv Amas 53:10–17 uas tshoov peb lub siab kom rau siab ntseeg ua raws li peb tej kev khi lus?
Amas 53:20–21
Peb yuav ua li cas kom ua neeg zoo li Hilamas cov tub hluas? Tej zaum yuav pab nej yog nej sib tham txog tej lus hauv tej no lub ntsiab; piv txwv hais tias, qhov uas hais tias “khov heev … hais txog dag zog thiab kev ua ub ua no” txhais li cas? Qhov uas hais tias “taug kev ncaj ncees rau [Vajtswv]” txhais li cas?
Amas 58:9–11, 33, 37
Thaum twg peb xav tau heev, peb puas thov Leej Txiv Saum Ntuj Ceeb Tsheej, ib yam li cov Neeg Nifais cov tub rog tau ua? Nws tau teb lawv tej lus thov li cas? Nws tau teb peb tej lus thov li cas?
Amas 61:2, 9, 19
Peb kawm dab tsi los ntawm Pehaulas txog qhov uas peb yuav tsum teb li cas thaum twg peb raug liam tsis yog lawm?
Amas 62:39–41
Nov yog ib zaj lus qhia uas siv ib yam khoom kom pab nej tsev neeg to taub tias peb muaj peev xwm xaiv thaum peb raug kev sim siab tias peb yuav muaj lub siab “muag” los sis lub siab “tawv”: Tso ib lub qos yaj ywm thiab ib lub qe rau hauv ib lub lauj kaub uas muaj dej npau lawm. Qos yaj ywm thiab lub qe sawv peb cev, thiab cov dej yog kev sim siab uas peb raug. Thaum nej muab qos yaj ywm thiab lub qe hau, tej zaum nej yuav xav sib tham txog tej kev sim siab uas nej tsev neeg raug. Tib neeg ua tau li cas thaum raug kev sim siab li no? Raws li qhia hauv Amas 62:41, qhov uas peb ua li cas thaum peb raug kev sim siab hloov peb li cas? Tom qab muab qos yaj ywm thiab lub qe hau tas lawm, cia li hlais qos yaj ywm thiab qhib lub qe kom txhua tus saib tias “kev sim siab” no tau ua rau qos yaj ywm muag lawm thiab ua rau lub qe tawv. Peb tsev neeg yuav ua dab tsi thaum peb raug kev sim siab kom peb txo hwj chim thiab nyob ze Vajtswv?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Cia cov me nyuam siv lawv txoj kev txawj tsim tej yam. “Thaum nej caw nej cov me nyuam tsim ib yam uas qhia txog ib lub ntsiab cai ntawm txoj moo zoo, nej yuav pab lawv to taub lub ntsiab cai zoo dua ntxiv, thiab nej kuj yuav pab lawv muaj ib yam dab tsi uas ua rau lawv nco ntsoov txog qhov uas lawv tau kawm. … Cia li lawv ua, kos duab, pleev xim, sau ntawv, thiab tsim tej yam” (Teaching in the Savior’s Way, 25).
Muaj Tseeb Tiag, Twb Suav Txhua Tus Lawm, los ntawm Clark Kelley Price