Rau Hli Ntuj 8–14. Amas 8–12: ‘Yexus Khetos Yuav Los Txhiv Nws cov Neeg Dim,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)

“Rau Hli Ntuj 8–14. Amas 8–12,” Los, Nrog Kuv Mus—Rau Ib Leeg thiab Tsev Neeg: 2020

Daim Duab

Amas qhuab qhia

Kev Qhia cov Lus Qhuab Qhia Tseeb, los ntawm Michael T. Malm

Rau Hli Ntuj 8–14

Amas 8–12

Yexus Khetos Yuav Los Txhiv Nws cov Neeg Dim

Kev kawm vaj lug kub ua rau peb txais tau kev tshwm sim. Yog li ntawd thaum koj nyeem Amas 8–12, cia li sau ntawv txog tej yam uas tus Ntsuj Plig qhia koj los ntawm Amas thiab Amulej tej lus.

Sau Ntawv txog Koj tej Kev Tshoov Siab

Vajtswv txoj hauj lwm yeej yuav tsis ploj mus. Tiam sis tej lub sij hawm thaum peb pab ua Nws txoj hauj lwm ntshe zoo li peb ua tsis taus—los sis, peb tsis pom tias tau muaj raws li peb xav tau tam sim ntawd. Tej lub sij hawm peb xav tias peb zoo li Amas thaum nws tshaj tawm txoj moo zoo nyob hauv Amoonaihas—muaj neeg xyeej peb, nto qaub ncaug rau peb, thiab ntiab peb tawm. Tiam sis thaum ib tug tim tswv hais kom nws rov qab mus qhia dua, Amas ua siab loj “rov qab nrawm nroos mus” (Amas 8:18), thiab Vajtswv tau npaj txoj kev rau nws. Nws yeej tsis tau npaj zaub mov rau Amas noj thiab ib qho chaw nyob xwb, Nws kuj tau npaj Amulej, uas yog ib tug uas koom nrog Amas ua hauj lwm, ib tug uas tiv thaiv txoj moo zoo, thiab ib tug phooj ywg zoo. Yog peb raug kev thim rov qab thiab kev poob siab thaum peb ua hauj lwm hauv tus Tswv lub nceeg vaj, peb yuav tsum nco ntsoov tias Vajtswv tau txhawb nqa thiab coj Amas, thiab peb yuav tsum tso siab rau Vajtswv hais tias Nws kuj yuav txhawb nqa thiab coj peb mus thiab, txawm yog peb raug tej xwm txheej nyuaj heev.

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Amas 8

Thaum kuv xav qhia txoj moo zoo rau lwm tus kuv yuav tsum ua siab ntev thiab ua tas zog.

Txawm ib tug neeg yuav xyeej koj zaj lus tim khawv txog txoj moo zoo los, koj tsis tas tso koj txoj kev cia siab tseg—vim hais tias, tus Tswv yeej yuav tsis tso tus neeg ntawd tseg, thiab Nws yuav coj koj paub ua li cas. Hais txog Amas mas, ib tug tim tswv tau txib nws rov qab mus rau Amoonaihas mus qhia txoj moo zoo txawm yog cov neeg nyob ntawd twb tau xyeej nws lawm (saib Amas 8:14–16). Koj kawm dab tsi los ntawm Amas tus yam ntxwv txog txoj kev qhia txoj moo zoo txawm yog yus raug teeb meem thiab kev tsim txom? Tej nqe twg nyob hauv Amas 8 ua rau koj xav qhia txoj moo zoo rau lwm tus ntxiv?

Kuj saib 3 Nifais 18:30–32; Jeffrey R. Holland, “Tus Nqi—thiab cov Koob Hmoov—ntawm Kev Ua Thwj Tim,” Ensign los sis Liahona, Tsib Hlis Ntuj 2014, 6–9.

Amas 9:18–25; 10:16–23

Vajtswv txiav txim rau Nws cov me nyuam raws li txoj kev kaj thiab txoj kev txawj ntse uas lawv muaj.

Thaum nyeem txog tej yam uas cov Neeg Nifais nyob hauv Amoonaihas ua rau tus Tswv cov tub qhe, yeej yooj yim rau peb nco qab tias twb muaj ib lub sij hawm thaum lawv ua raws li txoj moo zoo thiab yog “ib co neeg uas tus Tswv foom koob hmoov ntau heev rau” (Amas 9:20). Muaj tseeb tiag, ib feem ntawm Amas zaj lus rau cov neeg nyob hauv Amoonaihas yog qhia lawv tias vim lawv ua lawv lub siab tawv tom qab lawv tau koob hmoov ntau heev, lawv raug phem tshaj cov Neeg Lamas, cov uas ua txhaum vim lawv tsis paub xwb. Qhov tsis sib thooj no qhia dab tsi rau peb txog Vajtswv txoj kev txiav txim rau Nws cov me nyuam?

Thaum koj nyeem txog cov koob hmoov ntau uas Vajtswv pub rau cov Neeg Nifais (qhov tseem ceeb saib Amas 9:19–23), cia li xav txog cov koob hmoov ntau uas Nws tau pub rau koj. Koj ua li cas kom ua raws li cov koob hmoov no? Koj xav tias koj yuav tsum hloov li cas?

Kuj saib Lus Qhuab Qhia thiab Kev Khi Lus 82:3.

Amas 11–12

Vajtswv txoj hau kev yog ib txoj hau kev txhiv dim.

Cov yaj saub hauv Phau Ntawv Maumoos tau siv ob peb lub npe kom piav txog Vajtswv txoj hau kev rau Nws cov me nyuam, xws li txoj hau kev cawm seej los sis txoj hau kev zoo siab. Nyob hauv Amas 11–12, Amas thiab Amulej hais tias yog txoj hau kev txhiv dim. Thaum koj nyeem ob tshooj no, cia li xav seb vim li cas nkawd siv lo lus “txhiv dim” kom piav txog txoj hau kev no. Tej zaum koj kuj yuav xav sau ib zaj ntsiab lus txog tej yam uas Amas thiab Amulej qhia txog tej yam no ntawm txoj hau kev.

Txoj Kev Poob:

Tus Txhiv Dim:

Kev Hloov Siab Lees Txim:

Kev Tuag:

Kev Sawv Rov Los:

Kev Txiav Txim:

Cia li xav txog qhov uas Amulej tej lus raug cov neeg lub siab li cas (saib Amas 11:46). Vim li cas koj xav tias tej lub ntsiab cai no raug lawv lub siab heev li no? Tej lub ntsiab cai no tau pab koj li cas?

Kuj saib D. Todd Christofferson, “Yexus Khetos txoj Kev Sawv Rov Los,” Ensign los sis Liahona, Tsib Hlis Ntuj 2014, 111–14.

Amas 12:8–18

Yog kuv tsis ua kuv lub siab tawv, kuv txais tau Vajtswv txoj lus ntxiv.

Ib txhia neeg xav paub vim li cas Leej Txiv Saum Ntuj Ceeb Tsheej tsis ua txhua yam rau peb paub. Nyob hauv Amas 12:9–14, Amas tau piav txog ib qho uas vim li cas tej lub sij hawm Vajtswv tsis qhia tej yam uas tsis muaj leej twg paub rau peb. Tej zaum tej lus nug no yuav pab koj xav txog tej yam nws qhia:

Qhov uas hais tias peb ua peb lub siab tawv txhais li cas? Koj puas tau pom qhov no ntawm koj tus kheej?
Vim li cas tus Tswv yuav tsis qhia Nws txoj lus rau cov uas tau ua lawv lub siab tawv?
Koj puas tau txais kev cog lus tias koj yuav txais “qhov uas ntau dua ntawm txoj lus”? (Amas 12:10). Thaum txais tau ces lub sij hawm ntawd zoo li cas?
Koj yuav ua dab tsi kom ua tib zoo muaj Vajtswv txoj lus “nyob hauv [koj]”? (Amas 12:13). Yog tias koj muaj Vajtswv txoj lus nyob hauv koj, ces koj “tej lus”, “tej yam [koj] ua,” thiab koj “tej kev xav” yuav hloov li cas? (Amas 12:14).

Yog xav tau piv txwv txog tej ntsiab cai no, cia li muab Amulej piv rau lwm tus neeg nyob hauv Amoonaihas. Tej yam uas muaj los rau rau Amulej (qhov tseem ceeb saib Amas 10:1–11) ua li cas qhia txog tej yam uas Amas qhia hauv tej nqe no?

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.

Amas 8:10–18

Peb kawm dab tsi los ntawm Amas txoj kev “nrawm nroos” (nqe 18) ua raws li tus Tswv hais txawm yog nws ua ib qho nyuaj heev? Xwv kom pab qhia lub ntsiab cai rau cov me nyuam yaus, tej zaum nej yuav xav ua si hais kom lawv ua ib txoj hauj lwm thiab sim saib nej tsev neeg txawj ua nrawm npaum li cas. Piv txwv hais tias, nej saib tau leej twg txawj tais ib lub tsho nrawm npaum li cas.

Amas 10:1–12

Peb kawm dab tsi los ntawm Amulej nyob hauv tej nqe no? Nws zaj lus tim khawv tau ua li cas rau cov uas mloog nws hais? Caw nej tsev neeg npaj ua ib yam dab tsi lub lim tiam no raws li tej yam uas lawv kawm los ntawm Amulej tus yam ntxwv.

Amas 10:22–23

Peb kawm dab tsi los ntawm tej nqe no txog qhov uas ib pawg neeg ncaj ncees yuav pab li cas hauv ib lub nroog siab phem?

Amas 11:34–37

Ob qho no txawv li cas hais tias Yexus Khetos cawm peb dim thaum tseem muaj kev txhaum thiab cawm peb dim ntawm peb tej kev txhaum? (saib Hilamas 5:10; kuj saib 1 Yauhas 1:9–10). Kom piav txog tej yam uas Amulej qhia, tej zaum nej yuav xav hais dab neeg uas Txwj Laug Allen D. Haynie hais hauv nws zaj lus “Nco txog Tus uas Peb Tso Siab Rau” (Ensign los sis Liahona, Kaum Ib Hlis Ntuj 2015, 121–23). Yexus Khetos ua dab tsi kom cawm peb dim peb tej kev txhaum?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Kev Kawm Zoo Dua Ntxiv ntawm Yus Ib Leeg

Kawm cov yaj saub thiab cov tim thawj tej lus hauv hnub nyoog kawg no. Cia li nyeem txog tej yam uas cov yaj saub thiab cov tim thawj hauv hnub nyoog kawg tau qhia txog tej yam tseeb uas koj nrhiav tau hauv cov vaj lug kub. Piv txwv hais tias, koj xaiv tau ib lub ntsiab lus nyob hauv Amas 8–12 thiab nrhiav lub ntsiab ntawd nyob hauv lub tuam rooj sab laj uas nyuam qhuav tas los (saib Teaching in the Savior’s Way, 21).