“Tsib Hlis Ntuj 4–10. Mauxiyas 11–17: ‘Txoj Kev Kaj … uas Tsis Muaj Hnub Yuav Tsaus,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Tsib Hlis Ntuj 4–10. Mauxiyas 11–17”, Los, Nrog Kuv Mus—Rau Ib Leeg thiab Tsev Neeg: 2020
Anpinadais Ua Tim Khawv rau Vaj Ntxwv Nau-as, los ntawm Andrew Bosley
Tsib Hlis Ntuj 4–10
Mauxiyas 11–17
“Txoj Kev Kaj … uas Tsis Muaj Hnub Yuav Tsaus”
Anpinadais tej lus ua rau ib tug hauv Vaj Ntxwv Nau-as lub nceeg vaj hloov siab loj heev (saib Mauxiyas 17:2–4). Cia li nyeem Mauxiyas 11–17 thiab thov Vajtswv tias koj yuav txais kev tshoov siab kom koj paub tias koj hloov tau li cas.
Sau Ntawv txog Koj tej Kev Tshoov Siab
Tej hluav taws loj los pib ntawm txim taws xwb. Anpinadais yog ib tug neeg xwb uas ua tim khawv tawm tsam ib tug vaj ntxwv thiab cov hauv nws nceeg vaj. Lawv xyeej Anpinadais tej lus feem ntau, thiab nws raug txim tuag lawm. Tiam sis nws zaj lus tim khawv txog Yexus Khetos, tus uas yog “ib txoj kev kaj … uas tsis muaj hnub yuav tsaus” (Mauxiyas 16:9), twb ua rau tus pov thawj hluas Amas pib xav txog ib yam dab tsi. Thiab txoj kev xav hloov siab los ntseeg ntawd twb loj zuj zus thaum Amas coj neeg coob hloov siab lees txim thiab ntseeg Yexus Khetos. Tej nplaim hluav taws uas kub Anpinadais twb tau tuag lawm, tiam sis lub hluav taws ntawm kev ntseeg uas nws tej lus twb tsim los yeej tau kav ntev kom pab cov Neeg Nifais—thiab cov uas nyeem nws tej lus hnub no. Peb feem coob yeej yuav tsis raug tej yam uas Anpinadais raug vim yog peb zaj lus tim khawv, tiam sis peb txhua tus muaj sij hawm thaum kev coj raws li Yexus Khetos yog kev sim peb lub siab seb peb puas ua siab loj thiab ntseeg. Tej zaum qhov uas koj kawm Anpinadais zaj lus tim khawv yuav pab tej nplaim hluav taws ntawm koj zaj lus tim khawv loj dua ntxiv thiab ua rau koj ua siab loj.
Tej lub Tswv Yim Kawm Vaj Lug Kub ntawm Yus Ib Leeg
Kuv muaj peev xwm sawv ruaj khov rau qhov tseeb, tsis hais thaum kuv sawv kuv ib leeg xwb.
Cia li xav seb yus yuav poob siab npaum li cas yog tias yus yog Anpinadais uas hloov siab lees txim rau ib co neeg uas tsis tshua muaj siab xav hloov tej yam phem uas lawv ua. Tib neeg pheej xyeej nws zaj lus. Tiam sis Anpinadais tsis tau tso tseg.
Puas muaj sij hawm thaum koj xav tias koj sawv koj ib leeg tiv thaiv qhov tseeb? Thaum koj nyeem Mauxiyas 11–13 thiab 17, koj kawm dab tsi uas pab tau koj npaj siab thaum twg tus Tswv xav kom koj sawv khov kho rau Nws txoj moo zoo? Koj kawm tej ntsiab cai twg ntxiv los ntawm Anpinadais tus yam ntxwv?
Kuv yuav tsum rau siab kom to taub Vajtswv txoj lus.
Vaj Ntxwv Nau-as cov pov thawj twb paub Vajtswv txoj lus lawm—lawv txawj hais tej nqe vaj lug kub thiab hais tias lawv qhia cov lus txib. Tiam sis cov lus txib ntawd los tsis yog “sau rau hauv [lawv] lub siab,” thiab lawv tsis tau “ua kom [lawv] lub siab yuav to taub” cov lus txib ntawd (Mauxiyas 13:11; 12:27). Yog li ntawd, lawv lub neej tsis tau hloov hlo li.
Thaum koj nyeem Mauxiyas 12:19–30, cia li xav seb kev ua kom koj lub siab yuav to taub Vajtswv txoj lus txhais li cas. Qhov no puas tshoov koj lub siab kom hloov koj txoj kev kawm txoj moo zoo?
Tus Tswv yuav txhawb nqa Nws cov tub qhe thaum lawv ua Nws txoj hauj lwm.
Nyob rau ib qho, Anpinadais lub neej qhia ntau yam txog qhov uas tus Tswv txhawb nqa Nws cov tub qhe—koj kawm tau qhov no nyob hauv Mauxiyas 13:1–9. Tiam sis, tus Tswv kuj cia Anpinadais raug tsim txom, raug kaw, thiab raug tua vim yog nws zaj lus tim khawv. Koj kawm dab tsi hauv tej nqe no uas qhia tias Anpinadais tau tso siab rau tus Tswv? Anpinadais tus yam ntxwv ua rau koj xav dab tsi thaum koj xav txog koj tej txoj kev hu thiab tej kev lav ris?
Yexus Khetos raug txom nyem rau kuv.
Vaj Ntxwv Nau-as thiab nws cov pov thawj ntseeg tias kev cawm seej yog los ntawm Mauxes txoj kev cai. Anpinadais xav kom lawv paub tias kev cawm seej yog los ntawm tus Mexiyas, Yexus Khetos. Nyob hauv Mauxiyas 14–15, cia li nco txog tej lus uas piav txog tus Cawm Seej thiab tej uas Nws raug txom nyem rau koj. Tej nqe twg pab koj hlub Nws ntxiv thiab ris Nws txiaj ntxiv?
Ua li cas Yexus Khetos yog Leej Txiv thiab Leej Tub?
Tej nqe no los tej lub sij hawm nyuaj to taub vim zoo li Anpinadais qhia tias Leej Txiv Saum Ntuj Ceeb Tsheej thiab Yexus Khetos yog ib tug neeg xwb, tiam sis peb paub tias nkawd yog ob leeg. Tej uas Anpinadais hais txhais li cas? Nws tau qhia tias Vajtswv uas yog Leej Tub—Yehauvas—yuav los ua tus Txhiv Dim (saib Mauxiyas 15:1), nyob ua neej ntawm sab cev nqaij daim tawv, los ua ib feem tib neeg thiab ib feem Vajtswv (nqe 2–3). Nws ywj Nws tus kheej rau Vajtswv uas yog Leej Txiv lub siab nyiam tag nrho (nqe 5–9). Vim yog li no, Yexus Khetos yog Vajtswv Leej Tub thiab tus uas zoo ib yam li Vajtswv uas yog Leej Txiv nyob hauv lub ntiaj teb (saib Yauhas 14:6–10).
Anpinadais piav ntxiv hais tias Yexus Khetos kuj yog Leej Txiv vim thaum peb lees yuav Nws txoj kev txhiv peb dim, peb hloov los ua “nws cov tub ki” (Mauxiyas 15:11–12). Los yog hais tias, peb rov qab yug los ntawm sab ntsuj plig los ntawm Nws (saib Mauxiyas 5:7).
Kuj saib Yauhas 5:25–27; 8:28–29; 17:20–23; “The Father and the Son,” Ensign, Plaub Hlis Ntuj 2002, 12–18.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Mauxiyas 11–13; 17
Anpinadais thiab Amas coj yam ntxwv zoo vim lawv nyob ruaj nrees ua raws li qhov tseeb tsis hais thaum tsis tshua muaj neeg ua li ntawd los yog. Tej zaum muaj tib neeg uas xav yuam nej tsev neeg kom lawv tsis txhob ua raws li lawv tej kev cai. Nej kawm dab tsi log ntawm Anpinadais thiab Amas txog txoj kev nyob ruaj nrees ua raws li qhov tseeb? Cov duab uas muab txuas rau tus txheej txheem qhia no tej zaum yuav pab nej tsev neeg xav txog zaj no. Tom qab nej kawm tej tshooj no, xav seb nej puas ua yeeb yam txog tej xwm txheej uas muaj tiag kom pab nej tsev neeg xyaum teb li cas thaum tib neeg xav kom lawv tsis txhob ua raws li lawv tej kev cai. Los sis tej zaum nej ib leeg qhia tau ib leeg txog tej lub sij hawm thaum nej nyob ruaj nrees ua raws li qhov tseeb.
Mauxiyas 12:33–37; 13:11–24
Qhov uas hais tias yus muaj Vajtswv cov lus txib “sau rau hauv [peb] lub siab” txhais li cas? (Mauxiyas 13:11). Tej zaum nej yuav xav sau tej lub tswv yim (los sis kos duab txog nej lub tswv yim) rau ib lub huam cais ntawv loj heev. Vim li cas cov lus txib muaj nqis rau peb? Peb yuav ua li cas kom sau cov lus txib rau hauv peb lub siab?
Kev kawm vaj lug kub yuav pab peb muab cov lus txib sau rau hauv peb lub siab.
Mauxiyas 14
Nyob hauv tshooj no nej yuav nrhiav tau tej lus uas piav txog Yexus Khetos. Tej zaum nej tsev neeg yuav xav hais tej lus ntawd thaum nej nrhiav tau. Nej tsev neeg xav li cas txog tus Cawm Seej thaum nej kawm tej lus no?
Mauxiyas 15:26–27; 16:1–13
Tej nqe no piav tias Vajtswv cov me nyuam yuav raug li cas yog Yexus “tsis tau los rau hauv lub ntiaj teb” (Mauxiyas 16:6) los sis yog lawv tsis tau coj raws li Nws. Peb tau tej yam zoo twg vim Nws tau los theej peb lub txhoj? Kuj saib daim video “Why We Need a Savior” (ChurchofJesusChrist.org).
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Siv dab neeg thiab tej zaj lus piv txwv kom qhia txog tej ntsiab cai ntawm txoj moo zoo. Tus Cawm Seej tau siv dab neeg thiab zaj lus piv txwv kom qhia txog txoj moo zoo tej ntsiab cai. Cia li xav txog tej zaj lus piv txwv thiab dab neeg los ntawm nej lub neej uas yuav ua rau nej tsev neeg to taub zoo txog ib lub ntsiab cai ntawm txoj moo zoo (saib Teaching in the Savior’s Way, 22).
Nws lub Ntsej Muag Ci Ntsa Iab Kawg Nkaus Li, los ntawm Jeremy Winborg