“Tsib Hlis Ntuj 11–17. Mauxiyas 18–24: ‘Peb Tau Khi Lus nrog Nws,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Tsib Hlis Ntuj 11–17. Mauxiyas 18–24”, Los, Nrog Kuv Mus—Rau Ib Leeg thiab Tsev Neeg: 2020
Minerva K. Teichert (1888-1976), Vaj Ntxwv Leehais thiab Nws cov Neeg Dim, 1949-1951, pleev roj rau pob zeb on masonite, 35 7/8 x 48 yas tes. Brigham Young University Museum of Art, 1969.
Tsib Hlis Ntuj 11–17
Mauxiyas 18–24
Peb Tau Khi Lus nrog Nws
Thawj Tswj Hwm Thomas S. Monson hais tias: “Thaum peb nyeem thiab xav txog cov vaj lug kub, tus Ntsuj Plig yuav ntxhi lus zoo rau peb sab ntsuj plig” (“Peb Yeej Tsis Taug Kev Peb tus Kheej,” Ensign los sis Liahona, Kaum Ib Hlis Ntuj 2013, 122)
Sau Ntawv txog Koj tej Kev Tshoov Siab
Zaj uas hais txog Amas thiab nws cov neeg nyob hauv Mauxiyas 18; 23–24 qhia tias txoj kev “los rau hauv Vajtswv pab yaj” txhais li cas (Mauxiyas 18:8). Thaum lawv ua kev cai raus dej, lawv tau khi lus nrog Vajtswv kom “ua hauj lwm rau nws thiab ua raws li nws tej lus txib” (Mauxiyas 18:10). Txawm yog nov yog kev cog lus uas nyias ua nyias los, lawv kuj tau cog lus tias lawv ib leeg yuav ua li cas rau ib leeg. Muaj tseeb tiag, peb nyias yuav tsum taug nyias txoj kev rov qab mus cuag Leej Txiv Saum Ntuj Ceeb Tsheej, thiab tsis muaj leej twg uas txawj sawv lwm tus cev ua raws li peb tej kev khi lus, tiam sis qhov no tsis hais tias peb nyob peb ib leeg xwb. Peb ib leeg xav tau ib leeg. Vim peb yog cov mej zeej hauv Khetos lub Koom Txoos, peb khi lus tias peb yuav ua hauj lwm rau Vajtswv thaum peb ib leeg pab ib leeg, “ib leeg … ris ib leeg tej nra” (Mauxiyas 18:8–10). Amas cov neeg kuj muaj tej nra ris thiab, ib yam li peb txhua tus. Thiab ib txoj kev uas tus Tswv pab peb “ris tau [peb] tej nra hnyav yam yooj yim” (Mauxiyas 24:15) yog txoj kev tsa ib Tsoom Haiv Neeg Ntseeg uas tau cog lus tias lawv yuav nyuaj siab nrog peb thiab nplij peb lub siab, ib yam li peb tau cog lus tias peb yuav ua li ntawd rau lawv.
Tej lub Tswv Yim Kawm Vaj Lug Kub ntawm Yus Ib Leeg
Thaum ua kev cai raus dej yus khi lus tias yus yuav ua hauj lwm rau Vajtswv thiab ua tim khawv txog Nws.
Mauxiyas 18:8–10 muaj Amas tej lus qhia txog kev khi lus thaum ua kev cai raus dej, los sis peb txoj kev cog lus rau Vajtswv thaum peb ua kev cai raus dej. Thaum koj nyeem tej nqe no, cia li xav txog tej lus nug no:
-
Koj kawm dab tsi los ntawm tej nqe no txog tej yam uas koj cog lus thaum koj tau ua kev cai raus dej? Vajtswv cog lus dab tsi rau koj?
-
Qhov uas peb khi lus ua hauj lwm rau Vajtswv (saib nqe 10) puas muaj nqis rau peb txoj hauj lwm uas ib leeg yuav txhawb pab ib leeg? (saib nqe 8–9).
-
Koj ua dab tsi kom ua raws li koj tej lus cog tseg?
-
Qhov uas koj ua raws li koj txoj kev khi lus thaum ua kev cai raus dej pab koj li cas kom “muaj tus Ntsuj Plig puv npo”? (Mauxiyas 18:14). Tus Ntsuj Plig pab koj li cas kom koj ua raws li koj txoj kev khi lus?
Thaum kuv khi lus nrog Vajtswv, kuv txais Nws cov koob hmoov.
Zaj no kuj qhia txog txoj kev ua kev cai raus dej uas yog lawm. Koj kawm dab tsi nyob hauv nqe 14–17 txog qhov uas yuav tsum muab neeg ua kev cai raus dej li cas? Koj kawm dab tsi ntxiv txog kev cai raus dej los ntawm Mathais 3:16; Loos 6:3–5; 3 Nifais 11:21–28; thiab Lus Qhuab Qhia thiab Kev Khi Lus 20:72–74?
Vajtswv cov neeg yuav tsum koom siab.
Ib yam li Amas thiab nws cov neeg tau kawm, tej lub sij hawm thaum yus coj raws li Yexus Khetos yus yuav tsum tso ib lub qub neej tseg thiab ua ib yam tshiab thiab txawv dhau los. Tiam sis Amas cov neeg lawv ib leeg txhawb ib leeg lub zog vim lawv koom siab hauv “Khetos lub koom txoos” (Mauxiyas 18:17). Tej lus qhia nyob hauv Mauxiyas 18:17–30 ua li cas ua rau koj xav ua ib tug mej zeej zoo dua ntxiv ntawm lub Koom Txoos? Koj muaj peev xwm ua dab tsi kom pab cov mej zeej hauv koj pawg ntseeg los sis ceg ntseeg “muab lawv lub siab sib khi ua ke los ntawm kev koom siab koom ntsws thiab los ntawm kev ib leeg hlub ib leeg”? (Mauxiyas 18:21).
Kuj saib Henry B. Eyring, “Our Hearts Knit as One,” Ensign los sis Liahona, Kaum Ib Hlis Ntuj 2008, 68–71.
Yeej yuav muaj raws li cov yaj saub hais.
Anpinadais tau hais tej uas yuav muaj los yav tom ntej txog tej yam uas yuav raug Vaj Ntxwv Nau-as thiab nws cov neeg yog tias lawv tsis kam hloov siab lees txim. Tiam sis, ib txhia xav tias tej lus no yog tej lus lawv ntseeg tsis taus (saib Mauxiyas 12:1–8, 14–15), qhov tseem ceeb yog vim cov Neeg Nifais twb tiv thaiv lawv tus kheej txij thaum cov Neeg Lamas tau pib tawm tsam lawv 50 xyoos tas los (saib Mauxiyas 9:16–18; 11:19). Tiam sis yeej yuav muaj raws li cov yaj saub tej lus tag nrho—nyob hauv peb lub caij nyoog ib yam li hauv Anpinadais lub caij nyoog.
Koj kawm dab tsi nyob hauv Mauxiyas 19–20 uas yuav ua rau Nkide-oos tshaj tawm tias twb tau muaj raws li Anpinadais tej lus qhia tej yuav muaj los yav tom ntej? (saib Mauxiyas 20:21). Ua li cas zaj no txhawb koj txoj kev ntseeg txog Vajtswv cov yaj saub tej lus ceeb toom thiab tej lus ntuas thiab koj txoj kev rau siab xav coj raws li lawv hais? Thaum twg koj pom muaj raws li cov yaj saub tej lus nyob hauv peb hnub nyoog no?
Vajtswv txawj pab kom kuv lub nra yuav sib.
Leehais cov neeg thiab Amas cov neeg ob pawg no raug poob cev qhev, txawm yog nyias pawg muaj nyias xwm txheej. Koj yuav kawm dab tsi los ntawm kev muab zaj txog Leehais cov neeg nyob hauv Mauxiyas 19–22 piv rau zaj uas hais txog Amas cov neeg nyob hauv Mauxiyas 18; 23–24? Tej zaum koj yuav xav kawm txog qhov uas ob pawg no tau ua li cas thaum lawv raug poob cev qhev thiab ob pawg no tau ua li cas thaum lawv dim lawm. Thaum koj ua li no, nrhiav tej yam rau koj siv hauv koj lub neej. Piv xwv hais tias, koj kawm dab tsi los ntawm ob zaj no uas yuav pab koj ris koj tej nra?
Kuv tso siab rau tus Tswv.
Txawm yog lawv twb hloov siab lees txim rau lawv tej kev txhaum lawm, Amas thiab nws cov neeg tseem raug poob cev qhev. Zaj no qhia tias kev tso siab rau tus Tswv thiab kev ua raws li peb tej kev khi lus tsis ua rau peb dim teeb meem txhua lub si hawm, tiam sis kev tso siab rau tus Tswv yuav pab peb kov yeej tej teeb meem ntawd. Thaum koj nyeem Mauxiyas 23:21–24 thiab 24:8–17, cia li nco txog tej lus uas yuav pab koj kawm tso siab rau Vajtswv, txawm yog koj raug dab tsi los xij.
Kuj saib Thomas S. Monson, “Kuv Yuav Nrog Nraim Koj Tsis Tso Koj Tseg,” Ensign los sis Liahona, Kaum Ib Hlis Ntuj 2013, 85–87.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Mauxiyas 18:1–4
Muaj neeg hais tias yus suav taus cov noob hauv ib lub txiv, tiam sis yus suav tsis taus cov txiv uas yuav los ntawm ib lub noob. Tsuas muaj ib tug neeg uas lees txais Anpinadais zaj lus tim khawv, tiam sis ib tug neeg ntawd—Amas—tau pab ntau tiam neeg ntawm cov Neeg Nifais. Tej zaum nej yuav xav siv ib lub txiv uas muaj noob kom qhia txog lub ntsiab cai no. Peb tsev neeg yuav ua li cas siv zaj lus no? Peb yuav ua li cas kom hais peb zaj lus tim khawv rau lwm tus?
Mauxiyas 18:8–10
Peb kawm dab tsi txog peb txoj kev khi lus thaum peb ua kev cai raus dej los ntawm tej nqe no? (kuj saib Lus Qhuab Qhia thiab Kev Khi Lus 20:73, 77–79). Peb tab tom ua dab tsi kom npaj rau peb txoj kev khi lus thaum ua kev raus dej los sis ua raws li peb txoj kev khi lus?
Mauxiyas 18:30
Tej qhov chaw twg muaj nqis tshwj xeeb rau peb vim tias peb tau hnov tus ntsuj plig nyob hauv tej qhov chaw ntawd?
Mauxiyas 21:11–16; 24:10–15
Peb kawm dab tsi thaum peb muab Amas cov neeg txoj kev poob cev qhev piv rau Leehais cov neeg txoj kev poob cev qhev?
Mauxiyas 21:15; 24:11–15
Tej nqe no qhia dab tsi rau peb txog tej kev uas tus Tswv siv kom teb yus tej lus thov?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Nrhiav ib lub sij hawm uas zoo rau koj kawm vaj lug kub. Lub sij hawm yooj yim tshaj rau koj kawm vaj lug kub yog thaum twg tsis muaj dab tsi cuam tshuam. Nrhiav ib lub sij hawm uas zoo rau koj kawm vaj lug kub, thiab ua zoo npaum li koj ua tau kom kawm thaum lub sij hawm ntawd txhua hnub.
Cov Dej Maumoos, los ntawm Jorge Cocco