“Plaub Hlis Ntuj 13–19. Mauxiyas 1–3: ‘Muaj Kev Hlub Puv Npo rau Vajtswv thiab Tib Neeg Txhua Tus,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Plaub Hlis Ntuj 13–19. Mauxiyas 1–3”, Los, Nrog Kuv Mus—Rau Ib Leeg thiab Tsev Neeg: 2020
Minerva K. Teichert (1888–1976), Vaj Ntxwv Npeyamis zaj Lus Kawg, 1935, pleev roj rau pob zeb, 36 x 48 yas tes. Brigham Young University Museum of Art.
Plaub Hlis Ntuj 13–19
Mauxiyas 1–3
“Muaj Kev Hlub Puv Npo rau Vajtswv thiab Tib Neeg Txhua Tus”
Vaj Ntxwv Npeyamis qhia vim li cas peb yuav tsum sau ntawv txog tej kev tshoov siab ntawm sab ntsuj plig uas peb txais tau: “Vim yeej muaj tsis tau hais tias peb txiv, Lihais, yuav nco tau tag nrho tej yam no, uas tau muab qhia rau nws cov me nyuam, tsuas yog muaj cov phiaj no los pab xwb” (Mauxiyas 1:4).
Sau Ntawv txog Koj tej Kev Tshoov Siab
Thaum koj hnov lo lus vaj ntxwv, tej zaum koj yuav xav txog cov vaj ntxwv tej kaus mom, tsev huab tais, cov tub qhe, thiab tej rooj theej kiab. Nyob hauv Mauxiyas 1–3, koj yuav nyeem ntawv txog ib tug vaj ntxwv txawv. Vaj Ntxwv Npeyamis tsis tau siv nws cov neeg tej hauj lwm kom nyob tau, tiam sis nws “siv [nws] txhais tes los ua hauj lwm” (Mauxiyas 2:14). Nws tsis tau cia lwm tus ua hauj lwm pab nws, es nws cia li pab nws cov neeg “kom kawg lub siab thiab lub dag lub zog uas tus Tswv tau muab rau [nws]” (Mauxiyas 2:11). Tus vaj ntxwv tsis tau xav kom nws cov neeg teev tiam nws; tiam sis, nws qhia lawv kom teev tiam ib tug Vaj Ntxwv uas tseem ceeb tshaj nws tus kheej, vim nws to taub tias yog “tus Tswv uas Muaj Hwj Chim Loj Tshaj Plaws uas kav” (Mauxiyas 3:5). Ib yam li txhua tus thawj coj zoo hauv Vajtswv lub nceeg vaj, Vaj Ntxwv Npeyamis tej lus thiab tus yam ntxwv ua rau peb nco txog tus Vaj Ntxwv Saum Ntuj Ceeb Tsheej, tus uas yog tus Cawm Seej, Yexus Khetos. Vaj Ntxwv Npeyamis tau ua tim khawv tias Yexus “los saum ntuj los” thiab “tawm mus xyuas tib neeg, ua tej txuj ci tseem ceeb zoo kawg … Thiab xyuas seb, nws los rau nws cov neeg, xwv kom txoj kev cawm seej yuav los tau rau noob neej los ntawm txoj kev ntseeg nws lub npe” (Mauxiyas 3:5, 9).
Tej lub Tswv Yim Kawm Vaj Lug Kub ntawm Yus Ib Leeg
Yuav tsum npaj siab thiaj txais tau Vajtswv txoj lus.
Thaum Vaj Ntxwv Npeyamis qhia tias nws xav hais lus rau nws cov neeg, muaj neeg coob dhau “ua rau vaj ntxwv Npeyamis thiab Mauxiyas thiaj tsis suav lawv” (Mauxiyas 2:2). Lawv twb tuaj vim lawv ris lawv tus thawj coj txiaj thiab lawv hlub nws. Tiam sis qhov tseem ceeb tshaj, lawv tuaj kom kawm txog Vajtswv txoj lus.
Thaum koj nyeem Mauxiyas 2:1–9, cia li nrhiav tej yam uas cov neeg tau ua kom qhia tias lawv saib Vajtswv txoj lus rau nqi. Vaj Ntxwv Npeyamis tau nug lawv dab tsi kom npaj lawv lub siab mloog Vajtswv txoj lus? (saib nqe 9). Koj yuav ua li cas kom npaj koj tus kheej zoo dua kom txais tau Vajtswv txoj lus thaum koj kawm koj ib leeg thiab nrog koj tsev neeg kawm thiab nyob hauv kev sib ntsib hauv lub Koom Txoos?
Kuj saib Mathais 13:18–23; Amas 16:16–17.
Thuam kuv pab lwm tus, kuv kuj ua hauj lwm pab Vajtswv.
Puas nyuaj rau koj nrhiav sij hawm ua hauj lwm pab lwm tus los sis koj puas xav muaj kev xyiv fab ntxiv thaum koj pab lwm tus? Koj xav tias Vaj Ntxwv Npeyamis yuav hais li cas yog koj nug nws seb vim li case nws ua hauj lwm pab lwm tus “kom kawg lub siab thiab lub dag lub zog”? (Mauxiyas 2:11). Thaum koj nyeem Mauxiyas 2:10–26, cia li nrhiav tej yam tseeb uas Vaj Ntxwv Npeyamis tau qhia txog kev pab lwm tus thiab xav seb koj yuav siv tej yam tseeb ntawd li cas hauv koj lub neej. Piv txwv hais tias, qhov uas koj paub tias thaum twg koj pab lwm tus, koj kuj ua hauj lwm pab Vajtswv mas qhov ntawd muaj nqis npaum li cas rau koj? (saib Mauxiyas 2:17). Cia li xav txog ib txoj kev uas koj pab tau lwm tus lub lim tiam no!
Kuj saib Mathais 25:40.
Thuam kuv pab lwm tus, kuv kuj ua hauj lwm pab Vajtswv.
Kuv txawj kov yeej tus neeg ntawm sab cev nqaij daim tawv thiab los ua ib tug neeg dawb huv los ntawm Yexus Khetos txoj Kev Theej Txhoj.
Vaj Ntxwv Npeyamis, zoo li txhua tus yaj saub, tau ua tim khawv txog Yexus Khetos kom nws “cov ntawd thiaj yuav tau txais kev zam txim rau lawv tej kev txhaum, thiab yuav zoo siab nrog txoj kev xyiv fab uas loj kawg nkaus” (Mauxiyas 3:13). Nws kuj qhia tias tus Cawm Seej, los ntawm Nws txoj Kev Theej Txhoj, ua rau peb hloov ua neeg huv thiab muab hwj chim rau peb tso “tus neeg ntawm sab cev nqaij daim tawv” tseg thiab los ua “ib tug neeg dawb huv” (Mauxiyas 3:19; kuj saib Phau Qhia txog Vaj Lug Kub, “Neeg ntawm Sab Cev Nqaij Daim Tawv,” scriptures.ChurchofJesusChrist.org)
Txwj Laug David A. Bednar piav hais tias: “Yog Yexus Khetos txoj Kev Theej Txhoj uas ua rau peb muaj ib lub hwj chim uas ntxuav thiab txhiv peb dim kom pab peb kov yeej kev txhaum thiab ib lub hwj chim uas hloov peb ua neeg dawb huv thiab txhawb peb dag zog kom pab peb hloov ua neeg zoo dua li peb hloov tau yog peb muaj peb lub zog xwb. Txoj Kev Theej Txhoj uas nyob mus ib txhis yeej yog pub rau tus neeg txhaum thiab tus neeg dawb huv nyob hauv peb txhua tus” (“Clean Hands and a Pure Heart,” Ensign los sis Liahona, Kaum Ib Hlis Ntuj 2007, 82)
Nov yog tej lus nug rau koj xav txog thaum koj nyeem Vaj Ntxwv Npeyamis zaj lus tim khawv txog tus Cawm Seej nyob hauv Mauxiyas 3:1–20:
-
Kuv kawm dab tsi los ntawm tej nqe no txog tus Cawm Seej thiab Nws ntiag tug hauj lwm?
-
Yexus Khetos tau pab kuv kov yeej kev txhaum li cas? Nws tau ua li cas kom pab kuv hloov kuv tus kheej thiab hloov los ua ib tug neeg dawb huv ntxiv?
-
Kuv kawm dab tsi txog kev hloov ua neeg dawb huv los ntawm Mauxiyas 3:19?
Vim li cas Vaj Ntxwv Npeyamis tau hais tias Yexus yog “Leej Txiv ntawm lub ntuj thiab lub ntiaj teb”?
Thawj Tswj Hwm Joseph F. Smith piav hais tias: “Yexus Khetos, tus uas peb paub tias yog Yehauvas, yog tus thawj uas Leej Txiv, Elauhis, tau siv kom tsim txhua yam. … Yexus Khetos, vim nws yog tus Tsim Ntuj Tsim Teb, los peb yeej hu nws ua Leej Txiv ntawm lub ntuj thiab lub ntiaj teb … ; thiab vim Nws tsim tej yam uas nyob mus ib txhis ces yeej tsim nyog hu nws ua Leej Txiv Nyob Mus Ib Txhis ntawm lub ntuj thiab lub ntiaj teb” (Teachings of Presidents of the Church: Joseph F. Smith [1998], 357).
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Mauxiyas 1:1–7
Cov phiaj toog thiab Nifais cov phiaj tau pab Vaj Ntxwv Npeyamis cov neeg li cas? Cov vaj lug kub foom koob hmoov rau peb tsev neeg li cas?
Mauxiyas 2–3
Tej zaum yuav muaj kev lom zem ua yeeb yam txog qhov chaw uas Vaj Ntxwv Npeyamis tau hais lus. Tej zaum nej yuav xav ua ib tug pej thuam thiab cia nej tsev neeg ib leeg zuj zus nyeem Vaj Ntxwv Npeyamis tej lus thaum lawv sawv saum tus pej thuam ntawd. Ces nej tsev neeg uas tseem tshuav mloog tau nyob hauv ib lub tsev pheeb suab.
Mauxiyas 2:9–19
Peb kawm dab tsi txog kev pab lwm tus los ntawm Vaj Ntxwv Npeyamis tej lus qhia thiab tus yam ntxwv? Peb txais kev tshoov siab ua dab tsi?
Mauxiyas 2:15–25
Puas pab tau nej tsev neeg yog nej sib tham txog kev txo hwj chim? Vim li cas Vaj Ntxwv Npeyamis tsis tau khav txog txhua yam uas nws tau ua? Peb yuav kawm dab tsi los ntawm nws tej lus qhia txog peb txoj kev txheeb ze Vajtswv?
Mauxiyas 2:36–41
Vaj Ntxwv Npeyamis tau qhia dab tsi txog qhov uas yuav muaj li cas yog yus paub qhov tseeb tiam sis yus tsis ua raws li qhov tseeb ntawd? Nws tau qhia dab tsi txog kev txais tau kev zoo siab tiag tiag?
Mauxiyas 3:19
Peb yuav tsum ua li cas kom hloov los ua haiv neeg ntseeg? Peb tsev neeg yuav tsom ntsoov rau tus cwj pwm twg los ntawm nqe no?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Cuab hom phiaj uas koj ua taus. Yog koj siv sij hawm ob peb feeb xwb kawm vaj lug kub txhua hnub ces koj yuav tau koob hmoov. Cia li cog lus tias koj yuav kawm txhua hnub, thiab nrhiav kev kom koj nco ntsoov txog koj txoj kev cog lus.
Vaj Ntxwv Npeyamis zaj Lus, los ntawm Jeremy Winborg