“Peb Hlis Ntuj 9–15. Yakhauj 1–4: ‘Cia Li Los Sib Raug Zoo Nrog Nws Los ntawm Khetos txoj Kev Theej Txhoj,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Peb Hlis Ntuj 9–15. Yakhauj 1–4”, Los, Nrog Kuv Mus—Rau Ib Leeg thiab Tsev Neeg: 2020
Zam Txim, los ntawm Greg K. Olsen
Peb Hlis Ntuj 9–15
Yakhauj 1–4
Cia Li Los Sib Raug Zoo Nrog Nws Los ntawm Khetos txoj Kev Theej Txhoj
Thaum koj sau ntawv txog koj tej kev tshoov siab ntawm sab ntsuj plig, koj qhia Vajtswv tias koj xav kom tus Vaj Ntsuj Plig Dawb Huv qhia koj. Thaum koj nyeem Yakhauj 1–4, tej zaum koj yuav xav sau ntawv txog koj tej kev tshoov siab.
Sau Ntawv txog Koj tej Kev Tshoov Siab
Cov Neeg Nifais tau xav tias Nifais yog lawv tus “neeg tsom kwm zoo heev” (Yakhauj 1:10). Nws twb tau tiv thaiv lawv thaum cov yeeb ncuab tawm tsam, thiab nws ceeb toom lawv txog tej xwm txheej ntawm sab ntsuj plig. Tiam sis nws tsis nyob lawm, thiab txoj hauj lwm coj Neeg Nifais ntawm sab ntsuj plig twb hloov los ua Yakhauj li, vim nws yog tus uas Nifais tsa ua ib tug pov thawj thiab xib hwb rau cov neeg (saib Yakhauj 1:18). Vim nws txais kev tshoov siab, Yakhauj paub tias nws yuav tsum “siv tej lus tawv qhawv” qhia nws cov neeg, vim lawv “pib ua kev txhaum” (Yakhauj 2:7, 5). Tej kev txhaum no yeej yog tej teeb meem uas tib neeg raug niaj hnub no thiab: kev ntshaw nyiaj txiag thiab kev coj tsis dawb huv. Tiam sis txawm Yakhauj xav tias nws yuav tsum rau txim rau cov uas ua phem los, nws lub siab mob heev rau cov uas “raug chob ua mob tob heev” (Yakhauj 2:35). Yakhauj ua tim khawv tias kev kho ob pawg no zoo—cov uas ua txhaum thiab cov uas raug mob ntawm sab ntsuj plig—yeej los ntawm tus Cawm Seej Yexus Khetos. Yakhauj zaj lus, zoo li Nifais zaj lus ua ntej, yog hu kom cov neeg “los sib raug zoo nrog [Vajtswv] los ntawm Khetos txoj kev theej txhoj” (Yakhauj 4:11).
Tej lub Tswv Yim Kawm Vaj Lug Kub ntawm Yus Ib Leeg
Tus Tswv xav kom kuv rau siab ua qhov uas Nws hu kuv ua.
Yakhauj xav tias, kev qhia Vajtswv txoj lus tsis yog kev txib los ntawm nws tus tij laug xwb—yeej yog ib “txoj hauj lwm los ntawm tus Tswv,” yog li ntawd nws twb khwv kom “rau siab ua [nws] txoj luag hauj lwm” (Yakhauj 1:17, 19). Thawj Tswj Hwm Gordon B. Hinckley tau qhia hais tias peb rau siab ua peb txoj luag hauj lwm “thaum peb mob siab ua hauj lwm, thaum peb qhia nrog kev ntseeg thiab kev ua tim khawv, thaum peb txhawb nqa thiab pab cov neeg xav coj ncaj ncees hauv lawv lub neej” (“Magnify Your Calling,” Ensign, Tsib Hlis Ntuj 1989, 47). Cia li xav txog koj “[tej luag hauj lwm] los ntawm tus Tswv” thaum koj nyeem Yakhauj 1:6–8, 15–19 and 2:1–11. Vim li cas Yakhauj tau rau siab ntseeg ua hauj lwm npaum li ntawd? Nws tus yam ntxwv ua rau koj xav ua dab tsi kom rau siab ua koj txoj kev hu hauv lub Koom Txoos thiab koj tej kev lav ris hauv tsev?
Kuj saib “Rise to Your Call” (video, ChurchofJesusChrist.org).
Tus Tswv zoo siab rau kev coj dawb huv.
Kev txhaum yeej ua rau tib neeg thiab cov neeg hauv peb lub sawm fem raug xwm txheej. Hais txog kev ua txhaum ntawm kev tsis coj dawb huv, Yakhauj ceeb toom txog ob qho xwm txheej no. Thaum koj nyeem Yakhauj 2:31–35 thiab 3:10, cia li nrhiav tej yam uas kev coj tsis dawb huv ua rau cov Neeg Nifais raug xwm txheej rau ib leeg thiab rau lawv cov neeg. Tej yam ntawd ua li cas zoo ib yam li tej xwm txheej uas los ntawm kev coj tsis dawb huv uas muaj niaj hnub nim no? Koj kawm dab tsi los ntawm Yakhauj tej lus uas pab tau koj qhia ib tug koj hlub txog qhov uas kev coj dawb huv tseem ceeb npaum li cas? Koj tau koob hmoov li cas thaum koj siv zog coj dawb huv?
Nco ntsoov tias Yakhauj kuj hais txog txoj kev yuav ntau tus poj niam. Koj kawm dab tsi nyob hauv Yakhauj 2:23–30 uas pab koj to taub vim li cas, tej lub sij hawm tsawg tsawg xwb, tus Tswv tau txib Nws cov neeg yuav ntau tus poj niam? Nws xav li cas txog cov uas ua li ntawd thaum Nws tsis tau tso cai?
Kuv yeej yuav sib raug zoo nrog Vajtswv los ntawm Yexus Khetos txoj Kev Theej Txhoj.
Yakhauj tau thov nws cov neeg kom lawv “sib raug zoo nrog [Vajtswv] los ntawm Khetos txoj kev theej txhoj” (Yakhauj 4:11). Koj xav hais tias qhov no txhais tau li cas? Puas pab yog koj nrhiav reconcile hauv ib phau ntawv qhia ntsiab lus? Tej zaum koj yuav nrhiav tau tej lus los sis kab lus hauv tshooj no uas qhia koj tias yuav ua li cas kom los cuag Khetos yog li ntawd yuav sib raug zoo nrog Vajtswv. Piv txwv hais tais, Yakhauj qhia tias Mauxes txoj kev cai yog muab kom taw tes rau cov neeg mus rau Yexus Khetos (saib Yakhauj 4:5). Vajtswv tau muab dab tsi rau koj kom taw tes rau Khetos? Koj siv tej no li cas kom txav los ze dua li Vajtswv?
Kuj saib 2 Nifais 10:24.
Kuv dim tau kev dig muag ntawm sab ntsuj plig yog kuv tsom ntsoov rau tus Cawm Seej.
Thaum Yakhauj nrhiav kev kom nws cov neeg tig hlo mus rau tus Tswv, nws ceeb toom lawv kom lawv tsis txhob dig muag ntawm sab ntsuj plig thiab tsis txhob ntxub txoj moo zoo “tej lus uas qhia meej” (saib Yakhauj 4:13–14). Txwj Laug Quentin L. Cook ceeb toom txog teeb meem zoo ib yam li ntawd hauv peb lub caij nyoog: “Peb muaj ib txhia uas nyiam ‘ntsia dhau lub hom phiaj’ thiab tsis ua tej yam kom txhawb nqa ib zaj lus tim khawv txog txoj moo zoo. Thaum peb ua li ntawd peb muab tib neeg lub tswv yim pauv qhov tseeb ntawm txoj moo zoo, ua raws li txoj moo zoo heev dhau, … los sis xav tias txoj kev cai yeej zoo dua li cov lus qhuab qhia. Yog peb tsis txhob ua tej yam no ces yuav pab peb tsis txhob dig muag ntawm kev teev ntuj thiab tsis txhob dawm ko taw li Yakhauj piav txog” (“Looking beyond the Mark,” Ensign, Mar. 2003, 42)
Raws li Yakhauj 4:8–18 qhia, peb yuav tsum ua li cas kom tsom ntsoov rau tus Cawm Seej thiab tsis txhob raug kev dig muag ntawm sab ntsuj plig?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Yakhauj 1:6–8, 15–19; 2:1–11; 4:18
Tej lus thiab kab lus twg hauv tej nqe no qhia txog txoj Yakhauj txoj kev hlub rau cov uas nws coj mus? Peb cov thawj coj hauv lub Koom Txoos tau ua li cas kom pab peb paub txog lawv txoj “kev xav thiab kev txhawj txog kev … nyob zoo ntawm [peb] tej ntsuj plig ntau tshaj”? (Yakhauj 2:3). Tej zaum nej tsev neeg yuav xav qhia txog tej kev uas peb txhawb nqa pom zoo peb cov thawj coj hauv lub Koom Txoos. Tej zaum nej npaj tau ua ib yam dab tsi nrog nej tsev neeg ua ke rau cov thawj coj hauv lub Koom Txoos hauv nej zej zog, xws li kev sau ntawv ua lawv tsaug rau lawv txoj kev pab los sis nco txog lawv thiab lawv tsev neeg thaum lawv thov Vajtswv.
Yakhauj 2:8
Vajtswv txoj lus ua li cas thiaj kho “tej ntsuj plig uas raug mob” kom zoo?
Yakhauj 2:12–21
Tej nqe no qhia dab tsi rau peb txog qhov uas peb yuav tsum saib cov nyiaj txiag zoo li cas? Peb ua dab tsi kom ncav tes pab lwm tus uas xav tau kev pab?
Yakhauj 3:1–2
Tej lus uas hais tias “muaj lub siab dawb” thiab “ntsia ntsoov Vajtswv nrog nej lub siab ruaj khov kho” txhais li cas?
Yakhauj 4:4–11
Ib yam uas yuav pab nej tsev neeg to taub hais tias txoj kev muaj kev ntseeg “khov kho” txhais li cas yog nrhiav ib tug ntoo nyob ze thiab hais kom nej tsev neeg muab tej ceg ntoo co co. Ces hais kom lawv sim muab lub cev ntoo co co. Vim li cas nyuaj kom muab lub cev ntoo co co? Peb kawm dab tsi los ntawm Yakhauj tej lus qhia txog txoj kev muaj kev ntseeg uas “khov kho”?
Peb muaj peev xwm muaj kev ntseeg Khetos uas “khov kho” zoo li ib cev ntoo.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Mloog tus Ntsuj Plig. Thaum koj kawm vaj lug kub, tsom ntsoov rau koj tej kev xav (saib Q&K 8:2–3), txawm yog tej ntawd tsis yog hais txog tej yam uas koj tab tom nyeem. Tej zaum tej kev tshoov siab no yog tej yam uas Vajtswv xav kom koj paub thiab ua.
Kuv Yuav Xa Lawv tej Lus Mus (Yakhauj tus Xib Hwb), los ntawm Elspeth Caitlin Young