“Peb Hlis Ntuj 2–8. 2 Nifais 31–33: ‘Qhov No Yog txoj Kev,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Peb Hlis Ntuj 2–8. 2 Nifais 31–33”, Los, Nrog Kuv Mus—Rau Ib Leeg thiab Tsev Neeg: 2020
Khetos Qhia Nws cov Thwj Tim, los ntawm Justin Kunz
Peb Hlis Ntuj 2–8
2 Nifais 31–33
“Qhov No Yog txoj Kev”
Tus txheej txheem qhia no hais tej lus ntsiab cai uas tej zaum yuav muaj nqis rau koj nyob hauv 2 Nifais 31–33. Tiam sis tej yam tseem ceeb tshaj plaws uas koj yuav kawm yuav los ntawm tus Ntsuj Plig tej lus ntxhi. Nrhiav kev kom txais tau kev coj li no, thiab sau ntawv txog tej kev tshoov siab uas los rau koj.
Sau Ntawv txog Koj tej Kev Tshoov Siab
Nyob hauv Nifais’s tej lus uas nws sau ntawv thaum kawg, peb nyeem tau tej lus tshaj tawm no: “Tus Tswv tau txib kuv li no, thiab kuv yuav tsum mloog lus” (2 Nifais 33:15). Cov lus no yeej yog ntsiab lus txog Nifais lub neej. Nws twb nrhiav tus Tswv lub siab nyiam thiab ua siab loj sim ua li ntawd—tsis hais nws yuav tsum raug xwm txheej thaum nqa cov phiaj toog los ntawm Lanpas, ua ib lu nkoj thiab hla dej hiav txwv, los sis rau siab ntseeg qhia Khetos cov lus qhuab qhia, qhia meej thiab qhia nrog lub hwj chim. Nifais txawj hais lus yaum kom tib neeg paub tias lawv yuav tsum “txiv mus lawm tom hauv ntej nrog txoj kev ntseeg Khetos uas khov kho,” lawv yuav tsum taug “txoj kev ti thiab nqaim no uas yuav coj mus rau txoj sia nyob mus ib txhis” (2 Nifais 31:20, 18), vim txoj kev ntawd yog txoj kev uas nws twb taug lawm. Nws paub los ntawm nws tus kheej tias txoj kev no, txawm tej lub sij hawm yog ib txoj kev nyuaj los, yeej yog ib txoj kev xyiv fab, thiab “yeej tsis muaj lwm txoj kev los sis lwm lub npe nyob hauv qab ntuj uas yuav cawm tau tib neeg nyob hauv Vajtswv lub nceeg vaj” (2 Nifais 31:21).
Tej lub Tswv Yim Kawm Vaj Lug Kub ntawm Yus Ib Leeg
Yexus Khetos thiab Nws cov lus qhuab qhia yog tib txoj kev mus rau txoj sia nyob mus ib txhis.
Yog tias koj yuav tsum siv ob peb lo lus xwb hais ntsiab lus txog txoj kev mus rau txoj sia nyob mus ib txhis, koj yuav hais li cas? Nifais, los ntawm nws txoj kev qhia meej thiab qhia yooj yim, tau hais li no: kev ntseeg Khetos, kev hloov siab lees txim, kev cai raus dej, kev txais lub txiaj ntsim Vaj Ntsuj Plig Dawb Huv, thiab nyiaj kom mus txog thaum kawg. Tom qab koj kawm Nifais tej lus qhia nyob hauv 2 Nifais 31–32, xav seb koj yuav piav li cas rau ib tug neeg yog siv koj tus kheej tej lus. Cia li xav seb kev ua neej raws li tej lus qhia no tau foom koob hmoov rau koj li cas. Tej zaum koj yuav xav txog Nifais tej lus qhia nyob hauv 2 Nifais 31:18–20 thiab ntsuam xyuas koj txoj kev “txiv mus lawm tom hauv ntej” nyob rau ntawm txoj kev uas yog txoj moo zoo.
Kuj saib 3 Nifais 11:32–39; 27:13–22; D. Todd Christofferson, “Yexus Khetos cov Lus Qhuab Qhia,” Ensign los sis Liahona, Tsib Hlis Ntuj 2012, 86–90; Brian K. Ashton, “Yexus Khetos cov Lus Qhuab Qhia,” Ensign los sis Liahona, Kaum Ib Hlis Ntuj 2016, 106–9.
Kev coj raws li Yexus Khetos tej lus qhia coj peb mus rau txoj sia nyob mus ib txhis.
Yexus Khetos tau ua yam ntxwv zoo tag nrho txog kev mloog lus thaum Nws ua kev cai raus dej.
Txawm koj ua kev cai raus dej nag hmo los sis 80 tawm xyoo tas los, lub sij hawm ntawd yeej tseem ceeb—koj twb pib ua kev khi lus kom coj raws li Yexus Khetos tas koj lub neej. Cia li xav txog koj kev cai raus dej thaum koj nyeem txog tus Cawm Seej txoj kev cai raus dej nyob hauv 2 Nifais 31:4–13. Vim li cas tus Cawm Seej tau ua kev cai raus dej? Qhov uas vim li cas Nws ua kev cai raus dej puas zoo li qhov uas vim li cas koj ua kev cai raus dej? Koj yuav ua dab tsi hnub no kom coj raws li tus Cawm Seej tus yam ntxwv txog kev mloog lus?
Txoj kab ke ntawm lub cim nco txog yog ib lub cib fim txhua lub lim tiam rau koj rov qab cog lus tias koj yuav coj raws li Yexus Khetos. Lwm zaus uas koj txais lub cim nco txog, xav seb puas nyeem 2 Nifais 31:13 thiab xav txog koj txoj kev txiav txim siab tias koj yuav “coj raws li Leej Tub, kawg siab kawg ntsws” thiab koj txaus siab “ris Khetos lub npe.”
Tus Vaj Ntsuj Plig Dawb Huv yauv qhia kuv tias kuv yuav tsum ua dab tsi.
Yog tias kev cai raus dej thiab kev pom zoo yog “lub rooj vag uas [peb] yuav tsum nkag mus” txoj kev ti thiab nqaim (2 Nifais 31:17), ces peb yuav ua li cas tom qab peb pib taug txoj kev no? Nifais cov neeg xav paub qhov no (saib 2 Nifais 32:1). Nifais tau teb li cas nyob hauv 2 Nifais 31:19–20 thiab tshooj 32? Koj nrhiav tau tej lus teb twg rau koj tus kheej?
Kuj saib David A. Bednar, “Receive the Holy Ghost,” Ensign los sis Liahona, Kaum Ib Hlis Ntuj 2010, 94–97; “Holy Ghost,” Gospel Topics, topics.ChurchofJesusChrist.org.
Phau Ntawv Maumoos yaum kom txhua tus ntseeg Khetos.
Nyob hauv 2 Nifais 33, thaum Nifais xaus nws tej kev sau ntawv, nws piav vim li cas nws sau ntawv. Koj nrhiav tau yog vim li cas nyob hauv tshooj no? Cia li xav txog tej yam uas koj tau nyeem nyob hauv 1 Nifais thiab 2 Nifais lawm thiab nyeem tej lus cim uas koj tau sau. Tej zaj lus thiab tej lus qhia tau ua li cas kom muaj raws li Nifais lub hom phiaj rau koj? Piv txwv hais tias, tej zaj lus thiab tej lus qhia tau ua li cas yaum kom “ntseeg [Khetos] thiab nyiaj kom mus txog thaum kawg”? (nqe 4). Cia li xav seb puas sau ntawv txog tej xwm txeej no los sis qhia rau ib tug hauv koj tsev neeg los sis ib tug phooj ywg.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
2 Nifais 31:5–13
Puas muaj leej twg hauv nej tsev neeg uas npaj ua kev cai raus dej, los sis tau ua kev cai raus dej tsis ntev tas los? Tej zaum lawv yuav qhia tau vim li cas lawv txiav txim siab ua kev cai raus dej. Raws li Nifais qhia, yog vim li cas peb yuav tsum ua kev cai raus dej? Peb txais tau cov koob hmoov twg thaum peb ua kev cai raus dej?
2 Nifais 31:17–21
Nej yuav ua li cas pab nej tsev neeg to taub Nifais zaj lus piv txwv txog “txoj kev ti thiab nqaim”? (2 Nifais 31:18). Piv txwv hais tias, tej zaum nej yuav xav ua hauj lwm ua ke kom kos duab txog txoj kev uas Nifais piav txog nyob hauv 2 Nifais 31:17–21, sau lub npe rau tej yam uas peb yuav tsum ua kom nkag rau hauv txoj kev thiab taug txoj kev ntawd mus tom ntej ntxiv. Tus Cawm Seej ua li cas kom pab peb taug txoj kev ntawd mus tom ntej?
2 Nifais 31:20
Yog nej xav pab nej tsev neeg to taub ntxiv txog txoj kev nyiaj kom mus txog thaum kawg, phab 7 ntawm Qhia Kuv txoj Moo Zoo muaj ib lub ntsiab lus uas pab tau; Txwj Laug Dale G. Renlund’s zaj lus “Haiv Neeg Ntseeg Yeej Meem Sim” (Ensign los sis Liahona, Tsib Hlis Ntuj 2015, 56–58) los muaj thiab.
2 Nifais 32:8–9
Xwv kom pab nej tsev neeg to taub hais tias peb muaj peev xwm “thov Vajtswv tas mus li,” tej zaum nej yuav xav sau ntawv txog tej qhov chaw uas peb thov tau haud (los sis kos duab txog tej qhov chaw ntawd). Ces nej tsev neeg hu tau ib zaj nkauj uas qhia txog kev thov Vajtswv, xws li “Koj Puas Tau Thov Vajtswv?” (Cov Nkauj Qhuas Vajtswv, zaj 55), thiab muab cov lus hauv zaj nkauj pauv kom siv tej lus uas lawv tau sau lawm. Tus Tswv foom koob hmoov rau peb li cas thaum peb thov Vajtswv tas mus li?
2 Nifais 33:1–2
Tej yam twg yuav ua rau tib neeg “ua lawv lub siab tawv qhawv tawm tsam tus Ntsuj Plig Dawb Huv”? Peb yuav ua li cas kom ua tib zoo cia tus Vaj Ntsuj Plig Dawb Huv muaj chaw nyob hauv peb?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Coj raws li tus Cawm Seej tus yam ntxwv. Yog ib qho zoo thaum peb kawm raws li tus Cawm Seej qhia—tej txheej txheem uas Nws siv thiab tej yam uas Nws tau hais. Tiam sis Yexus lub hwj chim kom qhia thiab txhawb nqa lwm tus yeej yog los ntawm qhov uas Nws yog leej twg thiab Nws ua neej li cas. Yus rau siab ua neej raws li Yexus Khetos npaum li cas thiab tso siab rau Nws lub hwj chim theej txhoj npaum li cas los, yus haj yam yuav qhia raws li Nws txoj kev.
Kom Muaj Raws Li Tag Nrho Kev Ncaj Ncees, los ntawm Liz Lemon Swindle