“Peb Hlis Ntuj 16–22. Yakhauj 5–7: ‘Tus Tswv Ua Hauj Lwm Nrog Peb,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Peb Hlis Ntuj 16–22. Yakhauj 5–7”, Los, Nrog Kuv Mus—Rau Ib Leeg thiab Tsev Neeg: 2020
Zaj Dab Neeg Piv Txwv txog tus Ntoo Txiv Roj, los ntawm Brad Teare
Peb Hlis Ntuj 16–22
Yakhauj 5–7
Tus Tswv Ua Hauj Lwm Nrog Peb
Kev nyeem vaj lug kub ua rau peb txais tau kev tshwm sim. Yog li ntawd thaum koj nyeem Yakhauj 5–7, nrhiav tus Ntsuj Plig txoj kev coj koj kom pab koj thiab koj tsev neeg. Tus Tswv muaj tej zaj lus twg uas Nws xav qhia rau koj?
Sau Ntawv txog Koj tej Kev Tshoov Siab
Muaj neeg coob heev uas tseem tsis tau hnov txog Yexus Khetos txoj moo zoo. Yog tias koj ntxhov siab heev vim txoj hauj lwm muab lawv sau los ua ke hauv tus Tswv lub Koom Txoos yog ib txoj hauj lwm loj kawg nkaus, zaj dab neeg piv txwv txog cov ntoo txiv roj nyob hauv Yakhauj 5 ua rau koj nco ntsoov tias: lub vaj txiv hmab yeej yog tus Tswv li. Nws tau muab ib cheeb tsam me me rau peb txhua tus kom pab ua Nws txoj hauj lwm—peb tsev neeg, peb cov phooj ywg, cov neeg nyob ib puag ncig uas peb pab tau. Thiab tej lub sij hawm tus neeg thib ib tuas peb pab muab sau los ua ke yog peb tus kheej. Tiam sis peb yeej tsis nyob peb ib leeg thaum ua txoj hauj lwm no, vim tus Tswv ntawm lub vaj txiv hmab yeej nrog nraim Nws cov tub qhe ua hauj lwm (saib Yakhauj 5:72). Vajtswv paub thiab hlub Nws cov me nyuam, thiab Nws yuav npaj ib txoj kev rau lawv txhua tus mloog Nws txoj moo zoo, tsis hais cov uas twb xyeej Nws thaum yav tas los (saib Yakhauj 4:15–18). Ces thaum ntawd, thaum ua hauj lwm tiav lawm, txhua tus uas “rau siab ua hauj lwm nrog [Nws] … yuav tau kev xyiv fab nrog [Nws] vim yog cov txiv ntawm [Nws] lub vaj txiv hmab” (Yakhauj 5:75).
Tej lub Tswv Yim Kawm Vaj Lug Kub ntawm Yus Ib Leeg
Ib zaj dab neeg piv txwv yog dab tsi?
Tej zaj dab neeg piv txwv yog dab neeg uas qhia qhov tseeb ntawm sab ntsuj plig los ntawm tej lub cim. Piv txwv hais tias, nyob hauv zaj dab neeg piv txwv txog cov ntoo txiv roj, lub vaj txiv hmab yog lub ntiaj teb, ib tug ntoo txiv roj nyeg piv txog Ixayees (cov uas tau khi lus nrog Vajtswv), thiab cov ntoo txiv roj qus piv txog lwm haiv neeg (cov uas tsis tau ua kev khi lus nrog Vajtswv).
Thaum koj kawm zaj dab neeg piv txwv nyob hauv Yakhauj 5, nrhiav tej lub cim ntxiv thiab xav txog lub ntsiab. Piv txwv hais tias, koj xav tias cov txiv zoo piv txog dab tsi? Cov txiv phem piv txog dab tsi?
Yexus Khetos yog tus Tswv ntawm lub vaj txiv hmab.
Ua ntej koj pib kawm zaj dab neeg piv txwv txog cov ntoo txiv roj nyob hauv Yakhauj 5, tej zaum yuav zoo yog koj rov qab nyeem Yakhauj 4:10–18 kom kawm yog vim li cas Yakhauj xav tias nws yuav tsum qhia zaj dab neeg piv txwv rau nws cov neeg. Nyob hauv Yakhauj 6:3–5, koj nrhiav tau tej ntsiab lus ntxiv uas Yakhauj xav hais txog; nrhiav tej ntsiab lus no nyob hauv zaj dab neeg piv txwv. Koj nrhiav tau tej ntsiab lus twg rau koj tus kheej nyob hauv Yakhauj 5?
Yakhauj 5 yog ib tshooj ntev—ntev tshaj hauv Phau Ntawv Maumoos. Tej zaum yuav pab yog koj muab faib ua ob peb zaj li no, uas piav txog tej lub caij nyoog ntawm lub ntiaj teb zaj keeb kwm:
-
Nqe 3–14.Kev muab Ixayees tawg khiav ri niab ua ntej Khetos lub caij nyoog
-
Nqe 15–28.Khetos thiab cov Tim Thawj tej lus qhuab qhia
-
Nqe 29–49.Lub Sij Hawm Tso Qhov Tseeb Tseg Loj Heev
-
Nqe 50–76.Kev muab Ixayees sau los ua ke hauv hnub nyoog kawg
-
Nqe 76–77.Lub caij Milenias thiab qhov kawg ntawm lub ntiaj teb
Xwv kom muaj tswv yim ntxiv txog zaj dab neeg piv txwv, saib daim duab uas txuas rau tus txheej txheem qhia no.
Peb txhua tus ua tau hauj lwm rau Vajtswv thaum peb pab Nws muab Nws cov me nyuam sau los ua ke.
Vajtswv caw kuv los pab Nws muab Nws cov me nyuam sau los ua ke.
“Lwm cov tub qhe” (Yakhauj 5:70) uas tus Tswv hu hauv tus Tswv lub vaj txiv hmab yog tib neeg zoo li koj—vim peb yog mej zeej ntawm lub Koom Txoos, peb txhua tus lav ris txoj kev pab Vajtswv muab Nws cov me nyuam sau los ua ke. Koj nrhiav tau tej ntsiab cai twg nyob hauv Yakhauj 5, qhov tseem ceeb yog nqe 61–62 thiab 70–75, uas hais txog kev ua hauj lwm hauv tus Tswv lub vaj txiv hmab? Koj tau hnov Nws hu koj ua hauj lwm hauv Nws lub vaj txiv hmab li cas? Tau muaj li cas rau koj thaum koj koom tes ua Nws txoj hauj lwm?
Kuj saib “Missionary Work,” Gospel Topics, topics.ChurchofJesusChrist.org; “Old Testament Olive Vineyard,” “Help the Church Grow” (videos, ChurchofJesusChrist.org).
Kuv yeej sawv tau khov kho thaum lwm tus tawm tsam kuv txoj kev ntseeg.
Qhov uas muaj los rau cov Neeg Nifais nrog Seles los twb rov qab muaj niaj hnub nim no: tej zaum muaj neeg uas txawj ntse thiab txawj hais lus uas xav ua rau koj txoj kev ntseeg puas tsuaj mus. Tiam sis “tsis muaj peev xwm ntxias tau” Yakhauj (Yakhauj 7:5). Yakhauj tau ua li cas thaum muaj neeg tawm tsam nws txoj kev ntseeg? Koj kawm dab tsi los ntawm nws tej lus teb? Koj ua tau dab tsi tam sim no kom npaj rau tej lub sij hawm thaum tib neeg yuav tawm tsam koj txoj kev ntseeg?
Kuj saib “Answering Gospel Questions,” Gospel Topics, topics.ChurchofJesusChrist.org; Jeffrey R. Holland, “Tus Nqi—thiab cov Koob Hmoov—ntawm Kev Ua Thwj Tim,” Ensign los sis Liahona, Tsib Hlis Ntuj 2014, 6–9.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Yakhauj 5
Qhov uas pab ib txhia tsev neeg yog txoj kev kos duab txog lub cim los ntawm zaj dab neeg piv txwv txog cov ntoo txiv roj thaum lawv tab tom nyeem. Tej zaum nej tsev neeg yuav nyiam ua li ntawd, los sis muaj lwm txoj kev uas nej pab tau nej tsev neeg xam pom tej lub cim nyob hauv zaj dab neeg piv txwv no. Tej zaum nej ua tau ib lub cim rau ib qho chaw saum ib lub rooj los sis hauv av kom piv txog lub vaj txiv hmab (los sis lub ntiaj teb) thaib siv ib yam khoom kom piv txog tus ntoo txiv roj nyeg (los sis tsev neeg Ixayees), xws li ib daim uas sib dhos ua ke, uas yus faib tau ua ib qho ib qho (kom piv txog Ixayees txoj kev tawg khiav ri niab) ces muab rov qab tso ua ke (kom piv txog kev muab Ixayees sau los ua ke). Zaj dab neeg piv txwv qhia dab tsi rau peb txog tus Tswv? txog Nws cov tub qhe?
Yakhauj 5:70–77
Thaum nej nyeem txog “zaum kawg” uas tus Tswv ua hauj lwm hauv Nws lub vaj txiv hmab, muaj dab tsi uas tshoov nej tsev neeg lub siab kom ua hauj lwm rau tus Tswv “nrog nej lub lub zog”? (Yakhauj 5:71). Tej zaum nej yuav xav caw nej tsev neeg nco txog nqe 75 los ntawm txoj kev siv lawv lub npe hauv nqe no—piv txwv hais tias, “[Lub npe] tau koob hmoov.” Tej zaum lawv yuav xav qhia thaum twg lawv muaj kev xyiv fab thaum lawv ua hauj lwm rau tus Tswv ntawm lub vaj txiv hmab, vim lawv qhia txog txoj moo zoo, ua hauj lwm hauv lub tuam tsev, los sis txhawb nqa cov mej zeej ntawm lub Koom Txoos. (Kuj saib M. Russell Ballard, “Tso Siab rau tus Tswv,” Ensign los sis Liahona, Kaum Ib Hlis Ntuj 2013, 43–45.)
Yakhauj 6:4–7
Tus Tswv tau ua li cas kom muab Nws txhais npab hlub tshua ncav rau peb? Tej lus “muab siab npuab” txhais tau li cas hauv tej nqe no? Tus Tswv ua li cas kom muab siab npuab peb? Peb yuav ua li cas kom muab siab npuab Nws?
Yakhauj 7:1–12
Peb kawm dab tsi los ntawm tej nqe no txog qhov uas tib neeg yuav sim coj lwm tus mus ua yuam kev? Peb yuav ua li cas kom coj raws li Yakhauj tus yam ntxwv thiab ntseeg Khetos khov kho?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Cim ntsoov ib nqe vaj lug kub. Xaiv ib nqe vaj lug kub uas muaj nqis rau nej tsev neeg, thaib cim ntsoov ua ke. Txwj Laug Richard G. Scott qhia hais tias, “Ib nqe vaj lug kub uas yus cim ntsoov yeej zoo li ib tug phooj ywg khov kho uas tsis khiav mus txawm yog sij hawm dhau mus lawm los” (“The Power of Scripture,” Ensign los sis Liahona, Kaum Ib Hlis Ntuj 2011, 6).